Yibraniyam 10
10
N Yesu a ni yikiyu ki̱da kiin
1Niku we yilangu n ke ti̱kan chi aya kana ki̱swerang we chi ti̱yilitu ka beditu. Yilangu n ke chiti siin. Nang chi a yo a lwebitu, ka yo ka nang wuwule niye wu ki̱bedu ki̱dwan n ti Kwama yi medmed yinangu n Kwama ki̱baddu we nii ki̱ku chakku kakku swa̱tu n ti swa̱tangu. 2Ka no yilangu ki̱ni dukan ka du ki̱letiye, kane ni̱bu a du niku ki̱tuumangu. Di̱ne bi̱bu ki̱ sii Kwamamu ka ya nuraku ki̱ni kwang, ni̱tu chitu a ne chakakku kani̱n yingle chidu we ki̱taku chiyangu. 3Aya niku ki̱tuumangu wuka wa̱re wu ki̱yodu ni kur ki̱letiye, swa̱tu n ti swa̱tu. 4Nangki̱n, a ne da ki̱tuum tangkam n ti siiti ka da̱u ki̱letiye we.
5Di̱ne yiko, yo n Yesu yaka lewe ti̱ti̱niye a yi Kwama ko,
“Niku ki̱tuumangu n ti niku kuli̱nangu mwang babu,
aya n domi bwi.
6Niku ki̱tumang ki̱twirangu
n ti ki̱ku ki̱nura ki̱letiyangu,
mwang nwebu ta̱ma̱ng kangu.”
7Yinu n yi mi, “M mi̱n nang wu, Kwama,
m be mang tum ki̱kemo,
yinangu a mwal we dur mi̱nangu
we taki̱da Kwama wu wauwade.”
8A mwe a fwa ko, “Niku ki̱tumang n ti di̱kanu kwali̱n chi̱nu n ti beti̱naiyu n ti niku di̱ne woku ki̱letiyangu mwang nwebu ta̱ma̱ng kangu.” A fwa yiko kasi ki̱ku yilang a fwa bunti̱ku ya̱mi yiyu ki̱ni kwangangu. 9Yinu a ki̱la fwati̱ ki̱da ko, “M mi̱n nang wu n be mang ri ki̱kemo, ma chi mu badditu.” A yo yilang ki̱ka̱ra̱ngu a kuteng ke ki̱robangu a ti kakku. 10We ki̱ke Kwama n chi̱ni, ni kau ni̱bi wauwadi̱m di̱ne niku bwiyangu n Yesu Masiya a ni ki̱da kiin a ne suku wengu.
11Ka nang wuwule diye ka nang wuwule fanseti ki̱ma niku ki̱tuumang, kimatin niku kitumingu ka maku chi a ne dukan we ka wo ki̱letinu. 12Aya yo n Yesu a be a ma niku yikiyu ki̱da kiin ki̱diya kwadu di̱ne ki̱letiye, n ki̱n a swe a kang ki̱yilang Kwamang. 13We bwako n ki̱n ki̱yandu ka ku ki̱la fakwarbu ki̱me. 14We ki̱yili̱n ni ki̱ki kiinangu, a yo bi̱bu a no ya nuraki̱mu a kabbi di̱mbi̱li̱m ki̱diya kwadu.
15Fi̱ki̱m Kwamamu a ma nimi̱n di̱mwar we ti̱tu. A mwe a yi ko,
16“Tewuduwe, ya̱mu mang ma bwa̱ki̱ n ti chimu nang bi̱bu,
mang yo yili̱n mitu we ni̱tu chitu,
mang mwal ti̱nu we ti̱kuran chiitu.”
17Yinu a ki̱la fwati̱ ki̱da ko,
“A ne mang kur
Ki̱leti chiyu n ti yili̱ntu ta bunti̱bitu.”
18Ki̱ka̱ngu yo n Kwama a du chi̱nimi̱n ki̱letiye, a ne chaku kakkangu we ki̱ni niku ki̱tuumangu.
Ni ya ki̱dwan n ti Kwama
19Di̱ne yiko, kebu mi̱m, n chi̱ni ki̱ni da ni le fi a la chi ki̱ni wauwadenu a ne tayi we di̱ne ki̱tuum Yesumu. 20Wu nang wa̱re wu fwiye wu a ti̱kuriye, n ki̱n a wudunimi̱n si̱re ki̱ni bwiki ke ni le fi wawade.
21N chi̱ni ki̱ni wuduwe Fanseti wu ni̱bu Kwamami kwang a fa̱la̱ng kange. 22Di̱ne yiko, ni ya ki̱dwan n ti Kwama ki̱ni ni̱r di̱n, ki̱ni keku bi̱yili̱mang a ne kamaku wengu. Ni ya ki̱dwan ki̱ni ni̱r di̱du a ya nuraku we ki̱letiyu a ne dibwiwe n ti bwiyu a nuran ki̱ni mwe wu a lele. 23Ni tituwe yo ni̱re chire wu, ni ma di̱mwar ki̱nu ki̱ni dukan yinang, di̱ne ni ke ki̱n ni wu a bwa̱u ya̱mu ware n ti chiniye. 24A dakan ni kur kebi̱bu ki̱ni ki̱swi wu ni yo chidu ki̱ni ni̱r mi̱laki̱nu n ti nangi̱n ti̱yilite. 25Ni dudu muraki̱ku we yinangu bi̱kamu a meki̱madangu. N ti ki̱ki yikongu, ni funti̱bwi ni kum yichireyu mi̱n ni̱ti̱tu di̱ne niyang ku Di mwatake a mwatawe.
26Aya a ne kaang niku ki̱tuumang we ki̱ku a lwe ka da̱u ki̱letiyang, ka ni chakakku ni mweng neki̱ti ki̱ni maku ki̱letiyangu a kutengu niyang yim bi̱yili̱mange. 27Di̱ne yiko, mwataku we ki̱ku ki̱ni tayang n ti ki̱rang ki̱ku kwisang ki̱ku ka twi bi̱bu a ko Kwamamu. 28Ka nang wuwule niye, wu a kii yilang Musange, ni̱bu ki̱ chidu a ne ki̱bune we, ka ni̱bi burau ka bi̱ta a kekan ko bi̱yili̱m a kii yilange. 29Ni kamadu bi̱bi̱le ki̱dum mwataki̱m ka ma ni̱bi bi̱bu mi̱ne, wu a swa̱ba Bwe Kwama wu a ko a mabu nangangu ki̱ni ki̱tum Yesu Masiya bi̱bu a bwa̱u bwa̱ki̱ Kwama wu a nura chi we ki̱letiye. Wu ki tu Fi̱ki̱m Kwamame.
30Di̱ne ni yim wu a fwa ko, “M mi̱n nang naba ki̱yerange#10:30 Ykw 32:35 ., mang ma ki̱yerangu.” Yinu a fwa ti̱n ko, “N Tewuduwe ka kaba ni̱bu ki̱mu mi̱nu.” 31Chi tayi ka nii a le fa̱la̱ng Kwama wu kurengu we ti welante.
Ni̱bu a mu ni̱ri̱mu ka ya ki̱ti̱me
32Ti̱kur ki̱ni diti kutenyu a kutengu ta swan yam Kwamamu, ti̱mu ni̱ru, ti̱makan n ti riye ki̱ya chi̱ne. 33Wuka yo ni̱bu ki̱tu chi̱ni kwa̱rikwa̱ri, ki̱ni chi̱n riye a kakku ni̱bangi kwang, wuka yo ti̱kedu ti̱ kunkadu n ti bi̱bu ki̱nwe ki̱duum riyem bi̱bu. 34Nangki̱n ti̱ nwe ki̱bune bi̱bu ki̱nwe riye a di̱bi̱nti̱li̱mu, ti̱nti̱ne ti̱ma ti̱mi̱lan yoko ni̱bu a yitu chi̱n kuli̱ne, di̱ne ti̱yim tiko n ti̱ni ki̱ni kuli ti̱yili ti̱tu a la chi a ne ridu riye ki̱diya kwadi. 35Di̱ne yiko bwiti chiyu a bwaduwe, di̱ne ka yodu ta ya ki̱ti̱me wuduwe we di̱Kwama. 36A dakan ta rudu, di̱ne n nang ki̱swi ta mang ki̱ke Kwama. A kuteng ki̱ku ta ya chi n ki̱n a bwa̱u ka ni chi̱ne 37Kangu ya̱m Kwamu ma fwangu;
“Nangki̱n a ne ti ke,
ni ki̱bede ka bedu a ne ti̱kadu.
38Aya chini newe bi̱bu ki̱wudi kutengi̱mu ki̱le
bwangi̱mu aya we bi̱bu a ke bi̱yili̱mu yinu a ya swiki̱mu.”
39N chi̱ni ni newe bi̱bu ki̱ ki̱la kuteng ki̱ le bwamu. Aya chi̱ni we bi̱bu a ke bi̱yili̱mangu chiyangu, ki̱ya swiki̱.
Actualmente seleccionado:
Yibraniyam 10: Tula
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2015, The Nigeria Bible Translation Trust and Wycliffe Bible Translators, Inc. All rights reserved.
