อีซยา 28
28
ทต้ะเซ๊ง โพล้ง โพะคอง ค่าง, โพล้งลื่งเท่ออคู, ดี๊ โมไคล้คิ้ แยว้ พี่ อ อ้าทางซ๊างทาง
1ทเซงทื่งเฌ๊ฌ้อง แบ โพล้ง ม้า เท่อ ชอง ลู่ง เอฟาอีง ซีง ลแพ, อ คูคล้าง พี่ ทื่งดู ล้างซ้ะ
ดี๊ ทเซงทื่งเฌ๊ฌ้อง แบ อ ทโพ๊ ลู่ง อฌี้อแอว้ ดี๊ อฆี๊งอแล้ พี่ อ ดี้งล้างไฆวะ
พี่ โอ ทลู่ง อ จ้องคู ลู่ง ทแด้ พ้า อกู้งอล๊า, พี่ ล้างเคลิ่ง ดี๊ ไซ้ะ ซไบ้ะแซ ที๊ง
2อี้งเซ้อ, ทอดูทึโท๊ทึ กแช่ อ โพล้ง โอ ล แฌ้ พี่ โอ ดี๊ อไฌ่อแบ้ ดี๊ อชองอไคล๊
บี่ซุ้ดี๊ ลี้ง มื่งแซ, บี่ซุ้ดี๊ ลี้งเฌ๊ พ้ะดู ลู่ง อ แม้เฌ๊ฌ้อง เท่อ
บี่ซุ้ดี๊ ลี้งเฌ๊ ทเฌ๊ช้า พ้ะดู พี่ อ แยว้ล้าง
พี่ ม เว่งว๊าง เท่อ ดี๊ อ จูง, เกม๊า ล้าง ท้อง ฌางคู
3โพล้ง ม้า เท่อ ชอง ลู่ง เอฟาอีง ซีง ลแพ, อ คูคล้าง พี่ ทื่งดู ล้างซ้ะ
ม แบ ทไย่ล้าง ลู่ง คางย๊างซ้ะ เช๊ละ
4ดี๊ อ ทโพ๊ ลู่ง อฌี้อแอว้ ดี๊ อฆี๊งอแล้ พี่ อ ดี้งล้างไฆวะ
พี่ โอ ทลู่ง อ จ้องคู ลู่ง ทแด้ พ้า พี่ อกู้งอล๊า
ม เก บี่ซุ้ดี๊ กูงเย้ เม๊ง อ ต้องคู ล คลึ้ ท้อง ทคู่แค๊ แบ
พี่ โพล้ง แด เว๊ นอ, อางไฆวะ เว๊
ลทีงฆ่าง พี่ อ แซ เฌ๊ท้อง อ จูง นอ
5ล นี้ง แย๊ นอ, กแช่ยาเว ซึ้คู ดูทึ ม เก คูคล้าง พี่ อฌี้อแอว้
ดี๊ ม เก คูคล้าง พี่ อฆี๊งอแล้ เอะ กแช่แยว้ อพูอลี้ง, พี่ โอ ล้างลื๊อ ก้ะ ล แพ นอ
6เลา ดี๊ ม เก ท นางล้างแบไท้ อ ซ้ะ ลู่ง ท อเกิ้งอแบ เอะ โพล้ง พี่ ชี๊น้าง ต้ะเซ๊ง เท่อ
ดี๊ เก เอะ โพล้ง ลแพ นอ อไฌ่อแบ้, พี่ อ น้า ทดึ้ทชาง ลู่ง เว่ง อ ป้ะตู๊ง
7อ ซื๊งเว๊ ล แพ อี้ง, ว้างมื่งว้างไร้ะไฆวะ ดี๊ ไซ้ะ ซไบ้ะแซ ที๊ง บี่ซุ้ โละซ้ะ ปะ
ดี๊ เด้งเค๊งแดฆ้าง ดี๊ ไซ้ะที๊งมี่จ้าง
โพล้งลื่งเท่ออคู ดี๊ โมไคล้คิ้กแช่แยว้ นอ, ว้างไร้ะว้างพาง ดี๊ ไซ้ะที๊งมี่จ้าง
อ ซื๊งเว๊ ลแพ นอ, คูเยิ้งแน่เยิ้ง ดี๊ ไซ้ะ ซไบ้ะแซ ที๊ง
อ เว๊ เด้งเค๊งแดฆ้าง ดี๊ ไซ้ะที๊งมี่จ้าง
อ ซื๊งเว๊ แด ท แด เว้ ลเมะลโต้ แบ
อ เว๊ บึ้ทะ ลู่ง ท ต้ะเซ๊ง พ้า
8เป๊งนี่ คะ ทอาง กุ้ช๊อง นอ, โอ ฆวี้ ดี๊ ท พี่ ปยุ้ทางไฆวะ
ทโนง ล โอ น่าง จอง แบ พี่ อเช๊งอเกล้ง
9อ เว๊ ม ซอง เอะโพล้งเล้ ท ซีงแฌ๊?
อ เว๊ ม โล้บลิ้ เอะโพล้งเล้ ทลื่งทไคล้?
โล้ เอะ โพล้ง พี่ อ พู่ แพล่นู่ง ลแพ นอ-อ้า?
โล้ เอะ พืงแซ พูปี๊ พู่ โอพ้ะไฆวะ ดี๊ อ มู่ อ ซ้ะแน๊ นอ-อ้า?
10เป๊งนี่ เก บี่ซุ้ดี๊ ท อ ลู่ง เซ๊ ปรื้งๆ, พี่ คุ้ช๊องแน ล ซีงแฌ๊ อไฌ่อกย้อง แบ
เก บี่ซุ้ดี๊ ท อ ลู่ง เอ้งไฌ้ เท่อ, พี่ คุ้ช๊องแน แน ล ซี แบ
โอ ที่ ท อ ลู่ง เอ้งไฌ้ เท่อ, ท อ ลู่ง เซ๊ ปรื้งๆ
11เต้ๆ, นอ, โพล้ง ไคล้ ท อ คว่าง ล้างช๊าง อ นุ้เฌะ, ดี๊ โพล้งลชื้อแด อ พลี้
กแช่แยว้ ม ไคล้ ดี๊ โพล้ง ล ชื้อ อี้ง
12เมะเว๊ ดี๊ โพล้ง ลแพ นอ พี่ กแช่แยว้ ไจ้ะเว๊
“อ อี้ง เก ท โอไปว้ะโอแซ
เกม๊า ท โอไปว้ะโอแซ เอะ โพล้ง พี่ ทไปว้ะ อ ซ้ะ
ดี๊ อ อี้ง เก ท โอไปว้ะโอแซ”
ทึเมะ บี่นอ ฌี้ นอ, อ เว๊ ล คุ้ช๊องแน แบ#1คร.14:21
13ทบี่นอ, กแช่ยาเว อลู่งอแท๊ เก เอะ-อ้ะ บี่อี้ง
“เมะเว๊ เก บี่ซุ้ดี๊ ท อ ลู่ง เซ๊ ปรื้งๆ, พี่ คุ้ช๊องแน ล ซีงแฌ๊ อไฌ่อกย้อง แบ
เก บี่ซุ้ดี๊ ท อ ลู่ง เอ้งไฌ้ เท่อ พี่ คุ้ช๊องแน แน ล ซี แบ
โอ ที่ ท อ ลู่ง เอ้งไฌ้ เท่อ, ท อ ลู่ง เซ๊ ปรื้งๆ
บี่ซุ้ อ ซื๊งเว๊ ม ลี้, ดี๊ คาง ชิ้ล่อง พลี๊ ล้างเทะเค้า ลู่ง อ ล่างไค๊ ล โค๊
ม เท้พ้ะ แค่เทา, ดี๊ แบ พลี้ง, ฌ้อง แบ ท พองนี่
14อกย้องบี่นอ, แน้ โพล้ง แม้ไฌ๊ซ้ะ เท่อ ลแพ ซีง-เอ้อ, เกม๊า คุ้ช๊องแน กแช่ยาเว อลู่งอแท๊
เมะเว๊ โพล้ง พี่ โพะคอง โพล้ง ล ชื้อ อี้ง, ลู่ง เว่ง เยรูซเลง พ้า
15เมะเว๊ น ซื๊ง ไคล้ บี่อี้ง, “ก นี่ แม้ ทเอิ้งล้าง ดี๊ ทซี๊ง เย้า
ดี๊ ก นี่ แม้ ทเอิ้งล้าง โละซ้ะ ดี๊ พลื่งค่าง
ท่อง ทอ้าทน้ะ เฌ๊ แยว้ล้าง นอ
ม ล เฌ๊ท้อง เฆ้อ แบ
เมะเว๊ ก แม้ เกม๊า ท กไบล้ะกแบล เก ก ทล่าง ทุ้กดื้ง ซ้ะ
ดี๊ ก แบ ท กดื้งทะ ดี๊ ท คีงอูง”
16อกย้องบี่นอ, ทอดูทึโท๊ทึ กแช่ยาเว ไคล้ ไจ้ะเว๊ บี่อี้ง
“อี้งเซ้อ, ก อางกีล้าง โล่ง ล โพลง ลู่ง ซีโยง พ้า
เมะเว๊ โล่ง พี่ แม้แคว่ดุ้ เย้า
เก เฌเทิงโล่งลู่งอล้างเปิ่งทึ พี่ อ ลื่งดูฆวี้ดู, เก ท อ ฌี่ง คางไท้ะ พี่ อเฌิ่งอค๊า
‘โพล้ง ล แฌ้ นอ, พี่ อางกีล้าง อ ซ้ะ ม ล ปชื่งปตี้ เท่อ แบ’#ปเล๊ ซีได้ะ บี่อี้ง, ม ล ซ้ะ ล้างท่อง แบ-อ้า, ม ล ซ้ะเมซ้ะไพล้ เท่อ แบ#ทอฆ.118:22-23; รม.9:33; 10:11; 1ปต.2:6
17ดี๊ ก ม ต๊างทาง ท อเกิ้งอแบ เก พลี้ง ทู เท่อ
ดี๊ ทแบกแช่แยว้อซ้ะ เก นางทู แซ
ฌ้อง มื่งแซ ม กว้ะไฆวะ ท กไบล้ะกแบล, พี่ เก ทล่าง ทุ้กดื้ง ซ้ะ
ดี๊ ที๊ง ม แยว้ล้าง ล้างพะ ทล่าง ทุ้กดื้ง ซ้ะ”
18ฌ้อง น ซื๊ง ทเอิ้งล้าง ดี๊ ทซี๊ง ม เก ท ล้างกวาง
ดี๊ น ทเอิ้งล้าง โละซ้ะ ดี๊ พลื่งค่าง ม ล โอ ค๊า แบ
ท่อง ทอ้าทน้ะ#ฮีบรู อ คว่าง นอ, ปเล๊ เว๊ ล้องๆ, บี่อี้ง, พี่ ทพลีทท่าง เฌ๊ แยว้ล้าง
น ซื๊ง ม แบ อ ท ไย่เละค๊างพะ
19อ แยว้ล้าง พ้องไฆวะ ไค๊คื๊ง ชี่ แอ เล้ นอ, อ ม ลี้ฌ้า แน้ ไค๊คื๊ง บี่นอ ล้อ
เมะเว๊ อ ม ลี้ แยว้ล้าง พ้องไฆวะ โฌ้ๆ, เย้า โฌ้ๆ, เด้าะ
เลา ดี๊ มแช๊แค๊ ดี๊ มแน้แค๊
ดี๊ ม โอ ที่ ท ไพ้ะฆิ้โค๊ฆิ้, ท่อง แน ทอไฌ่อกย้อง ซี นอ
20เป๊งนี่ ล่างมี๊ง นอ, พือ น้ะ พี่ โพล้ง ม จองเละ ซ้ะ ลู่ง อ คู นอ
ดี๊ แบย นอ เอง น้ะ, ม คลึไบ้ะ ล้างซ้ะ ล ไบ้ะ แบ
21เมะเว๊ กแช่ยาเว ม เฌ้เทิงทาง ด้องซุ้ ลู่ง ทลู่ง เปรีซีง#2ซมอ.5:20; 1ทกน.14:11
กแช่แยว้ ม ซ้ะทาง ด้องซุ้ ลู่ง ทลู่ง กีเบโอง คางไท้ะ#ยชว.10:10-12
บี่ซุ้ แม้ กแช่แยว้ อ ทไพ้ะทแม้, พี่ เก กแช่แยว้ อ ทไพ้ะทแม้ ลู่ง อล้ะอเล่
ดี๊ บี่ซุ้ แม้ กแช่แยว้ อ เท่อ, พี่ เก ทแม้ ลู่ง อ ล้างลู่ล้างล้ะ
22อกย้องบี่นอ, เก โพล้ง เฌา แม้ ไฌ๊ซ้ะ เท่อ ล ฌี้
เมะ ล เมะ บี่นอ แบ, น พลี้งท้ะ ม ไช้ะ น้ะ ทาง ไค๊
เมะเว๊ จ แน่ฌ๊า นี่ เท่อ ดี๊ ทอดูทึโท๊ทึ กแช่ยาเว, พี่ ซึ้คู ดูทึชองทึ
แบฆ้ะ ดี๊ ไละ อางแบเลา เท่อ อ ไฌ่, แม้เฌ๊ฌ้อง ล้างเทา เท่อ เฆ้ง ที๊งล่างค่างพ้า
23เกม๊า ดุ้ แน่, ฌ้อง คุ้ช๊องแน จ ลู่ง
เกม๊า ควี๊งคูแกยแน่, ฌ้อง คุ้ช๊องแน จ ทไคล้
24โพล้ง เท๊ไชะ บี่ซุ้ ฆวีงล้าง เท่อ, ม เท๊ เท่อ ครึๆ, ล้อ-อ้า?
อ เว๊ ไบล้ะกแด้ ฌางคู เบงคู ดี๊ คะ ฌางคู ครึๆ, ล้อ-อ้า?
25พี่ อ เว๊ แม้พุ้ ฌางคู เบงคู เย้า นอ
ม ล ฆวีงล้าง โฮ๊งโฌ้ มื่งเทิง ดี๊ ว้างไซ๊ พ้ะดู แบ-อ้า?
อ เว๊ ล เซิง บืง ซาลี เก ล เทวๆ, แบ
ดี๊ ล เซิง บืง บาเล ลู่ง อล่างอเกล้ พ้า แบ
เลา ดี๊ ล เซิง บืง ซเปล ลู่ง ท อ พ้าไท้ะ แบ-อ้า?
26เมะเว๊ กแช่แยว้ ซอง-อ้ะ ลู่ง อ แบ เมาะ
อ กแช่แยว้ ซอง-อ้ะ
27เมะเว๊ โพล้ง ล โอ น่างแฌ้ แบ, ไฌะล้าง โฮ๊งโฌ้ ดี๊ นาง ไฌะล้าง บืง-อ้า
เจ่ เลาะ คางไร้ะ ไร้ะ เคล้เท่งล้าง ว้างไซ๊พ้ะดู-อ้า แบ
แบเด้าะ อ เว๊ แม้นี่ นางทุ้บ้อง ท่าง โฮ๊งโฌ้ เกม๊า อ ล้างพลืง
ดี๊ เจ่ นางมื่งคืง ท่าง ว้างไซ๊พ้ะดู
28กู นอ นี่แบ ดี๊ ท ไฌะบลิ้ บืง
อกย้องบี่นอ, โพล้ง ล โอ น่างแฌ้ แบ, ไฌะล้าง บืง ล้างชู้ ล้างแกย
อ เว๊ คะ เลาะ ท๊างกู่ง กซี เคล้เท่งล้าง เว๊
แบเด้าะ นอ, ล นี่ แม้ เท้พ้ะ ล้างบลิ้ล้างเนา เว๊ แบ
29ท ล ไฌ่ อี้ง นอ, เฌ๊นี่ ดี๊ กแช่ยา ซึ้คู ดูทึชองทึ ปะ
กแช่แยว้ อล้ะอเล่ เต้ๆ, ลู่ง ท เนฌ้าโล้ฌ้า พ้า
ดี๊ ฌี้ทึแอว้ทึ ลู่ง ทโกงซีมองแบ อ ไฌ่ พ้า
Actualmente seleccionado:
อีซยา 28: NPKTH
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Pwo Karen Bible (Thailand) © Thailand Bible Society, 2016.
