Ozhi ndu ishi-ozhi 9

Jisọsu l'afụru Sọlu l'ụzo, Sọlu gbanwee

1Ọle Sọlu bẹ l'eyekwadua ndu l'etso ụzo Jisọsu egvu eyeshi whẹ iya ike, eseshikwawho ẹza ike tẹ ya gbushia whẹ. Ọ tụgbua jekfu onye ishi ndu l'agbajẹ ẹja nụ Chileke, 2je asụ iya t'o deru ẹkwo-ozhi nụ iya, ya l'e-goshije l'ụlo-ndzuko ndu Ju mẹe ya rwua Damásukọsu nke ọwhu bụ: ya -whụa onye l'etso ụzo nke Onye-Nwe-Ọha, ya atụa ya mkpọro: ọbu nwoke, ọbu nwanyị, kpụru bya Jerúsalẹmu.

3O jenyazhiawho l'echi-ụzo Damásukọsu, mbụ abyaakwaa orwu Damásukọsu. A nọnyaa, iwhoro shilewho l'imigwe bya achalẹwho vaa chawhe iya mgburumgburu. 4Ọ daa l'alị l'ẹka ono mbụ Sọlu. Ọ nụa olu-okfu, l'asụje iya: “Sọlu, Sọlu ?ọo gụnu meru iwhe l'ịikpa mu ẹhu?”

5Sọlu sụ iya: “?Ọo onye b'ị bụ Onye-Nwe-Ọha?” Olu ono sụ iya: “Ọo mbẹdua bụ Jisọsu, bụ onye ọbu, l'ịikpa ẹhu. 6Gbeshi bahụ l'ime mkpụkpu ono, aa-karụ ghu-a iwhe l'ii-me.”

7Ndu whẹ l'iya lị l'ije ono kfụ-geleruwho l'ẹka ono; iwhe ono kpụbe whẹ ọnu okfu nkele whẹ l'anụ-a olu ono, ole whẹ ta awhụdu onye ọbu, l'ekfu iya nụ l'ẹnya. 8Sọlu gbalihu bya asaa ẹnya; tọ whụhe ụzo. Whẹ gude iya l'ẹka, duba lẹ Damásukọsu. 9Ọ nọkota abalị ẹto, tọ whụ ụzo; tọ dụ iwhe bụ nri, kparụ iya l'ọnu, tọ ngụ nke angụngu.

10O nweru onye lanụ, l'etso ụzo Jisọsu, bu lẹ Damásukọsu, ẹwha iya bụ Ananáyasu. Onye-Nwe-Ọha byakfuta iya l'ọwhulenya bya asụ iya: “Ananáyasu!”

Ananáyasu za iya: “Owe Onye-Nwe-Ọha!”

11Onye-Nwe-Ọha sụ iya: “Kwakọbe jeshia l'ogborogbo ụzo ono, l'eekuje Ụzo-kfụru-nhamụnha. I -rwua l'ụlo Júdasu, gụ ajịa ajị onye Tásọsu, ẹwha iya bụ Sọlu. Ọ nọwho l'ẹka ono ekfu anụ Chileke. 12Ọ whụkwaru nwoke, ẹwha iya bụ Ananáyasu l'ọwhulenya g'ọ batarụ bya abyabẹ iya ẹka l'ishi, mee ya ọ whụlahaa ụzo.”

13Ananáyasu sụ: “Onye-Nwe-Ọha, m'a dụakwa l'igwe kọoru mu akọ nwoke-e, kọkotaru mu ejo-iwhe o meru ndu nke ghu lẹ Jerúsalẹmu. 14A sụkwaru lẹ ndu l'agbajẹ ẹja nụ Chileke zhiru iya t'ọ bya akpụtakota iwhe bụ onye sụ-zhiaru l'ọo ghu bụ Onye-nwe-iya-nụ.”

15Onye-Nwe-Ọha sụ iya: “Jeshiaro, l'ọo mu họtaru iya t'o jeeru mu ozhi. Ọo ya l'e-me tẹ ndu l'ẹte abụa ndu Ju mẹe ndu ishi whẹ mẹwaro iwhe bụ ụnwu Ízurẹlu marụ onye mu bụ. 16Mu l'e-goshikwanu iya iwhe-ọtsulanu, l'oo-jekota l'okfu ẹhu mu.”

17Ọo ya bụ lẹ Ananáyasu atụgburu jeshia. O rwua bya abahụ l'ụlo ọbu, bya abyabẹ Sọlu ẹka sụ: “Nwanna mu Sọlu, Onye-Nwe-Ọha, bụ Jisọsu l'onwiya bẹ zhiru mu tẹ mu bya. Ọo Jisọsu ono bụ onye ono, goshiru ghu onwiya l'ụzo gẹ l'ịibya ẹka-a. Ọ sụru tẹ mu bya emee t'ị whụlahaa ụzo ọdo mẹe t'ị nata Ume-Dụ-Nsọ.” 18Nteke ono who, iwhe ọbu, dụ-gee g'ọo ẹkiri shi Sọlu l'ẹnya dashịa. Ọ whụlahaa ụzo. Ọ gbalihu, e mee ya baputizimu. 19Ọ bya eria nri nteke ono, ike dụ iya.

Sọlu l'ekfu okfu Chileke lẹ Damásukọsu

Yẹle ndu l'etso ụzo Jisọsu bya anọo nwabalị olemole lẹ Damásukọsu. 20Ọ tụko ụlo-ndzuko ndu Ju jewhede, wata anọ ezhi nke Jisọsu. O kfulahaa l'ọo Jisọsu bẹ bụ Nwa Chileke.

21Ọ tụfu ndu marụ iya nụ ẹhu. Whẹ sụ: “?Mẹ tọ bụnua nwoke-e bẹ bụ onye-e, shi egbushi ndu sụru l'ọo Jisọsu bẹ bụ Onye-nwe-whẹ-nụ lẹ Jerúsalẹmu? Mẹ iwhe o kwoberu bya ẹka-a kwa tẹ ya bya akpụkoo anyi, kpụ-jeru ndu ishi ndu l'agbajẹ ẹja nụ Chileke.”

22Sọlu l'akalẹwho okfushi okfu Chileke ike aka eje eje. O goshi l'ọo Jisọsu bụ Onye Ndzọta ono, Chileke kweru ụkwa iya, shi ishi lanụ hakashịaru whẹ iwhe meru g'o gude ọ dụ nno nke ọwhu ndu Ju, nọ lẹ Damásukọsu l'ete enwehee ọnu okfu.

23A nọnyaa, mbụ nọokwaro ọdu shii; ndu Ju bya bya achịa idzu nke ogbu Sọlu. 24Ama bya agbaarụ Sọlu l'eemekwa t'e gbua ya. O noo ya, whẹ l'anọje eche ọnuzo, l'eeshije bahụ l'ime obodo ono eche: eswe l'ẹnyashi t'a marụ gẹ l'ee-shi whụa Sọlu gbua. 25Obenu l'ẹnyashi, ndu ọli iya parụ iya ye lẹ nkata, a tụru eri pyoo l'ụzo, dụ lẹ mgbodo, e gude kpuwheta obodo ono mgburumgburu, pazeta iya, mee ya, o rwua alị.

Sọlu l'adawhu azụ lẹ Jerúsalẹmu

26Sọlu rwua Jerúsalẹmu bya ejeshia nụ tẹ ya jekfu ndu l'etso ụzo Jisọsu. Whẹ tụko gẹ whẹ ha tsụhukota iya egvu, nkele whẹ te ekwetadu l'ọ bụwaa onye l'etso ụzo Jisọsu. 27Ọo ya bụ lẹ Bánabasu abya eyeru iya ẹka, bya eduta iya dukfu ndụ-ishi-ozhi, bya akọoru whẹ akọ gẹ Sọlu gude whụa Onye-Nwe-Ọha l'ụzo, kọkwaaru whẹ whọ gẹ Onye-Nwe-Ọha ọbu l'onwiya gude kfuru yeru Sọlu. Ọ tụaru whẹ ọnu gẹ Sọlu gude kfushibe okfu ẹhu Jisọsu ike lẹ Damásukọsu. 28Tọ dụ iya bụ, ndụ-ishi-ozhi ono kweta t'ọ lwakfuta whẹ mẹe t'o jeje ẹka sọru iya lẹ Jerúsalẹmu. O tsokwaruwho Jerúsalẹmu ekfushi iya ike l'ọo Jisọsu zhiru iya tẹ ya kfu iya l'iswi ẹhu iya. 29Yẹle ndu Ju, l'ekfu okfu Giríku l'anọduje atụ ntụtego nteke nteke. A nọnyaa, whẹ melahaa tẹ whẹ gbua ya. 30Ụnwunna, bụ ndu chọchi nụa ya, whẹ dufu Sọlu dube iya Sizaríya, yeru iya ẹka, o jeshia Tásọsu.

31Ọ kwa iya nụ bụ lẹ nchị adụ ndu chọchi ndoo nke nwa nteke ono, mbụ ndu chọchi lile, nọkota lẹ Judíya mẹe Gálili mẹe Samériya. Chọchi l'apalihu; aka oshihu ike eje eje. Ume-Dụ-Nsọ l'eyekwaru whẹ madzụ nke ọwhu obu ka whẹ oshihu ike; whẹ l'eyeru Onye-Nwe-Ọha ẹso.

Pyita l'eje Lịda mẹe Jọpa

32Pyita tụko ẹka lile jekota. O be ujiku lanụ, o jeshia tẹ yẹle ụnwu Chileke, bu lẹ Lịda jịa. 33O rwua ẹka ono, ọ whụa nwoke ọbu, ẹwha iya bụ Iníyasu. Nwoke ono bẹ iwhe lọnwushiru ibẹhu lanụ, nke ọwhu ọ zẹwaa l'ẹhu, nọwaa awha ẹsato, t'ọ gbashije agbashi. 34Pyita ku iya: “Iníyasu! Gbashi, lẹ Jisọsu Kuráyisutu bẹ mewaru ghu t'i mehu. Gbalihu lụfuta l'ẹka ono, i daburu.” Iníyasu gbalihulekwawho. 35Ndu bu lẹ Lịda mẹe lẹ Sharọnu whụa g'o mehuwaru ejewhe, whẹ kweta l'ọo Jisọsu bụ Onye-nwe-whẹ-nụ.

36Lẹ Jọpa b'o nweru nwanyị lanụ, bụ onye l'etso ụzo Jisọsu. Nwanyị ono l'anọje eme ree nteke nteke, l'ọonojekwawho emeru ndu l'amaa gẹ whẹ l'eme iya iwhe-ọma. Ẹwha nwanyị ono bụ Tábịta, bụ iya bụ Dókasu l'okfu Giríku bụ iya bụ umoro. 37A nọnyaa nteke ono, iwhe melahaa ya. Iwhe ọbu, l'eme iya nụ gbua ya. Whẹ bya aghụ-gee ya ẹhu; pata iya nyihu ụlo-eli je enyebe iya. 38Ọo ya bụ, ndu l'etso ụzo Jisọsu, bu lẹ Jọpa nụa lẹ Pyita nọ lẹ Lịda, dụkubekwa Jọpa ono ntse. Tọ dụ iya bụ lẹ whẹ eyefu ụmadzu labọ tẹ whẹ kua Pyita t'ọ bya ẹgwegwa. 39Pyita kwakọbelekwawho tsoru whẹ. O rwua, e duta iya nyihu ụlo-eli ono, ụnwanyi-mbunu dowhee Pyita mgburumgburu tụko aryakaa ẹkwa, egoshije Pyita uwe, Dókasu kwashịru keeru whẹ nteke ọ nọ ndzụ. 40Pyita chịshikota whẹ l'ẹka ono; bya ebyishi ikpere kfuru nụ Chileke. Ọ bya aghaa ẹnya lee odzu ono sụ: “Tábịta teta, nọdu ndzụ!” Nwanyị ono saa ẹnya. Ọ whụlewho Pyita, ọ gbalihu nọdu anọdu. 41Pyita bya alọta iya l'ẹka yeru iya ẹka, ọ kfuru akfụru. Pyita bya ekukoo chọchi l'owhu mẹe ụnwanyi-mbunu ono, duru Tábịta dee whẹ, g'o tetanaru nọdu ndzụ. 42Iwhe ono, meru nụ ono ngakọta Jọpa mgburumgburu. A kabaanụ ọdu l'igwe kweta l'ọo Jisọsu bụ Onye-Nwe-Ọha. 43Pyita buru l'ụlo Sáyịmonu nọo ọdu lẹ Jọpa. Sáyịmonu bụ onye l'emeje akpọ-anụ gẹ l'ọo-dụ, e gude iya eme nka.

Actualmente seleccionado:

Ozhi ndu ishi-ozhi 9: Ezaa

Destacar

Copiar

Comparar