Ozhi ndu ishi-ozhi 17

Iwhe l'eme lẹ Tesalonáyika

1Pọlu yẹle Sáyilasu palihu ije je aghajaa Amfịpolisu mẹe Apolóniya. Whẹ tụgbua bahụ Tesalonáyika. Mkpụkpu ono bẹ ụlo-ndzuko ndu Ju dụ. 2Pọlu bya abahụ l'ụlo-ndzuko ono, bụ iya bẹ bụkwanu iwhe l'ọonoje eme ẹka ẹka. O dukfube jee ya mbọku ọtuta-ume ẹto, l'oogudeje iwhe e deru l'ẹkwo Okfu Chileke ekfuru whẹ okfu. 3O bya emee okfu Chileke ono, o doo whẹ ẹnya, goshi whẹ lẹ Ọ-dzọo-ndzụ, e deru l'ọo-bya, bụ Kuráyisutu bẹ jefutaje iwhe-ọtsulanu, ya anwụhu, lẹ Chileke mefutaje iya t'o shi l'ọnwu teta nọdu ndzụ. Ọ sụ whẹ: “Jisọsu-a, mu l'ekfuru unu okfu iya bẹ kwa iya bụ Kuráyisutu ọbu bụ iya bụ Onye Ndzọta, Chileke kweru ụkwa iya.” 4O nweru ndu ọwhu Pọlu yẹle Sáyilasu kfutaru, whẹ tsoru whẹ kweta nke Chileke. O nwekwaruwho igweligwe ndu Girísu, ndu Chileke dụru lẹ nsọ mẹe igweligwe ụnwanyi, a marụ ẹwha whẹ, whẹ kfutakwaruwho yeru onwowhe.

5Ọle ndu Ju kolahaaru whẹ okoowhoo. Whẹ bya eje akpakọo obukobuko madzụ l'aswa bya agbaa ọgbo. Whẹ kpakaa mkpụkpu ono, mkpụkpu gbahụ yaba yaba. Whẹ buru maramara buba l'ibe Jésọnu l'ẹka whẹ l'achọ Pọlu yẹle Sáyilasu tẹ whẹ gude whẹ kpụfutaru ọha. 6Whẹ ta awhụ whẹ, whẹ bya akpụta Jésọnu, hakwarụwho ụnwanyi anyi ọdo kpụta yeru iya. Whẹ kpụta whẹ kpụ-jeru ndu ikpe mkpụkpu je asụ whẹ lẹ ndu-a, tụkoru mgboko ghakọta iya olu l'alị bẹ byarwuakwaru ẹka-a. 7Ọ buru Jésọnu bẹ dutaru whẹ duba l'ibe iya. Sụ l'ọ kwa iwu ọ-chị-ọha, bụ Siza tụru bẹ ndu ono gẹ whẹ ha tụkoru emebyishi, asụjenu l'o nweru eze ọdo, ẹwha iya bu Jisọsu dụ nụ. 8Iwhu gbangahụ igwe-ọha ono mẹe ndu ikpe mkpụkpu ono gẹ whẹ nụleruwho iwhe ono. 9A bya egbebee Jésọnu mẹe ndu ono, a tụkoru whẹ l'iya gude okpoga, whẹ l'a-sụbe, bụkwanu, ọ -dụa rịkpotongu ọdo, meru lẹ mkpụkpu ono, whẹ ewotawhu okpoga whẹ azụ. Whẹ bya asụbe iya, a haa whẹ, whẹ lashia.

Iwhe meru lẹ Beríya

10O rwulewho l'ẹnyashi ụnwunna ono melewho ẹgwegwa dufu Pọlu yẹle Sáyilasu sụ whẹ tẹ whẹ jeshia Beríya. Whẹ rwua ẹka ono, whẹ jeshia l'ụlo-ndzuko ndu Ju. 11Ndu ẹka ono ka onwe obu-iwhoro, amamẹ ndu Tesalonáyika. L'ọogu whẹ ẹgu tẹ whẹ nụa ozhi-ọma ono. Mbọku-mbọku bẹ whẹ l'anọje agụ ẹkwo-okfu Chileke tẹ whẹ marụ, ?iwhe Pọlu l'anọje ekfu bua ezhi-okfu. 12Tọ dụ iya bụ lẹ ndu ha l'igweligwe ekweta l'ọo Jisọsu bụ Onye-Nwe-Ọha, mẹwaro igweligwe ụnwanyi Girísu, a marụ ẹwha whẹ, mẹkwawho unwoke Girísu.

13Ndu Ju, bu lẹ Tesalonáyika nọdu l'ẹka ono nụa lẹ Pọlu l'ezhiakwa okfu Chileke lẹ Beríya. Whẹ byatashia ẹka ono. Whẹ bya akpakashịa igwe-ọha ono kpalia whẹ, yeru whẹ ọku. 14Ụnwunna dutalekwawho Pọlu ẹgwegwa vudoru iya t'o rwua l'eze-ẹnyimu. Tímoti yẹle Sáyilasu nọ-kpe azụ lẹ Beríya. 15Ndu l'evudoru Pọlu duta iya jeye whẹ dube iya Átẹnsu. Whẹ dawhushia azụ lẹ Beríya. Pọlu sụ whẹ tẹ Sáyilasu yẹle Tímoti byakfutakwa iya ntaa ntaa.

Iwhe l'eme lẹ Átẹnsu

16Pọlu nọdu lẹ Átẹnsu ngabẹru Sáyilasu yẹle Tímoti. Ọ whụa g'ẹnya-alị tụkoru mkpụkpu ono narụ; obu whụde iya sasasa. 17Whẹ lẹ ndu Ju mẹe ndu Girísu, bụ ndu ọwhu Chileke dụru lẹ nsọ l'anọje edzu idzu l'ụlo-ndzuko ndu Ju. L'oojejekwawho aswa mbọku-mbọku yẹle nwa ndu ọwhu ọ whụru l'ẹka ono l'anọjekwawho ekfu nke Chileke. 18O be ujiku lanụ, ọ daarụ Pọlu yẹle ndu l'ezhi mmamagụ, shi l'ọgbo ndu Epyikuríya mẹe Sutóyiku, byarụ ọnu iwhe l'ookfu. Ndu sụ: “?Ọo gụnu bẹ onye-e, l'adụa iwhe ọ marụ-a l'ekfu?” Ndu sụ: “Ọ dụkwa g'ọo agwa ndu ọha ọdo bẹ l'ọotu ọnu iya nno.” Iwhe meru whẹ kfude nno bụ lẹ Pọlu l'ekfu nke Jisọsu mẹe nke oshi l'ọnwu teta nọdu ndzụ. 19Whẹ bya egude Pọlu, duta iya dufuta lẹ nggamgbo Arịyópagosu, bụ ẹka l'aasajẹ okfu, sụ iya: “Ọogushikwa anyi ẹgu ike t'ị karụ anyi iwhe ọwhuu ọwa, l'iikfu okfu iya. 20Sụ l'iwhe lile, anyi nụ-geeru l'iikfuru anyi bẹ bụkwa anyi nchị ọwhuu. L'ọ dụkwanu nke t'e kfua iwhe ọbu t'anyi marụ iya.” 21O noo lẹ ndu Átẹnsu l'owhu mẹe ndu ọdo, lwarụ iya alwa te enwedu iwhe ọdo, whẹ l'aga mkpa iya, gbahalẹwho tẹ whẹ ngabẹ nchị nụta iwhe ọwhuu mẹe tẹ whẹ kfuje nke iwhe ọwhuu ono.

22Ọo ya bụ, Pọlu bya akfụru l'iwhu ndu ono lẹ nggamgbo Arịyópagosu ono sụ: “Átẹnsu, unu gebe-o! Mu sụru agha, mu whụwaru l'unu wotanukaru agwa ye l'ẹhu. 23O noo l'eshi mu shi jewheta lẹ mkpụkpu unu-a bẹ mu whụkotaru ẹnya-alị unu. Mu whụ-geeru whụa ẹnya-alị ọwhu e deru l'ọ waa bụ: Nke agwa, l'ẹte amaa ẹwha iya. Onye ono, unu l'abarụ ẹja lẹ ba abụ l'unu marụ iya bẹ bụ onye ọbu, mu l'ekfuru unu okfu iya nta-a.

24“Ọo ya bụ Chileke, meru mgboko, mee iwhe lile, dụ iya l'ime. Ọo ya bụ onye nwe igwe, nweru alị, tẹmenu to buje l'ụlo, madzụ gude ẹka iya tụa. 25Mkpa iwhe madzụ l'e-gude ẹka iya seta bya anụ iya ta adụkwa iya, eshi-ọwhu ọ bụ iya l'anụ ndzụ, anụ ume, anụ madzụ iwhe lile. 26Ọo Chileke lanụ ono bẹ meru onye ivurụzo, ọ bya eshiwaro l'onye lanụ ono mee mba lile, dụkota lẹ mgboko-o kpaa-whuu. Ọo ya dụhawaro mbụ gbubua nteke ndu nọ lẹ mgboko-o l'a-nọ-be, gbubukwaawho ẹka oge-alị whẹ l'a-kpagee. 27Iwhe Chileke meturu iwhe lile ono bụ nggẹ ndiwhe chọo yẹbe Chileke, chọta iya mẹ whẹ rwadanyaa ẹka iya, o noo lẹ Chileke ta adụkwa onye ọ nọdu otẹnya lẹge anyi ha, mbụkwa m'ọo onye lanụ. 28O noo l'ọo ya bẹ gude ndzụ anyi:

‘Ọ bụru iya meru iwhe anyi l'ejewhe,

Ọ bụhukwaru iya whọ meru

iwhe anyi dụ adụdu owhu.’

Ọ dụa g'ọo ẹgube-ẹ ndibe unu, l'eme nke egvu gụru egvu sụ:

“ ‘Anyi tụkokwaru bụru ụnwu iya.’

29“Ọo ya bụ l'eshi anyi tụkoru bụru ụnwu Chileke, t'anyi ba arịjekwa lẹ Chileke dụ g'ọo iwhe e gude ope kpụa, ọdua woo: ọ bụru iwhe a kpụru l'ụrwa, ọdumeka ọ bụru iwhe a pyịtaru l'oshi. Ọriri madzụ te erwukwa gẹ Chileke gbarụ, ọwhu l'abụ l'ọo t'e gude oome nka gude goshi g'ọ dụ. 30Chileke wofuakwaru ẹnya lẹ nteke l'ete eshia marụ iya. Ntaa b'ọ sụakwaru tẹ madzụ kpaa-whuu, nọ l'ẹka lile daa onwowhe ụta, haa ome iwhe-dụ-ẹji, lwakfuta iya. 31L'o dobeekwaru mbọku, l'oo-kpe ndiwhe kpaa-whuu ikpe, kfụru nhamụnha. Onye l'oo-gude kpee ikpe ono bụ nwoke ọbu, ọ họtaru l'onwiya. Iwhe o gude mee tẹ madzụ lile marụ l'iwhe ono l'e-mekota lẹge ya tụberu iya bụ l'o meru t'onye ono shi l'ọnwu teta nọdu ndzụ.”

32Pọlu kfufutalekwawho nke oshi l'ọnwu teta nọdu ndzụ ono, whẹ harụ gbadẹru iya mgbacha, o nweru ndu ọwhu sụru: “Ọ dụkwa anyi nggẹ l'ọ dụ g'e shi i kfubaa iwhe ọwa ọdo t'anyi nụbaa.” 33Pọlu parụ whẹ haa l'ẹka ono tụgburu. 34O nweru ndu tsoru iya nu kweta l'ọo Jisọsu bụ Onye-Nwe-Ọha. Dayonísiyọsu, bụ onye tso l'ọgbo Arịyópagosu bẹ lị lẹ ndu ono, kwetaru mẹfua nwanyị, l'eekuje Dámarisu mẹwaro ndu ọdo.

Actualmente seleccionado:

Ozhi ndu ishi-ozhi 17: Ezaa

Destacar

Copiar

Comparar