Ozhi ndu ishi-ozhi 16

Tímoti l'etso Pọlu yẹle Sáyilasu

1Pọlu whẹ bya erwua Dabyi, whẹ jekwaawho Lị́sutura. O nweru onye nke Kuráyisutu, bu l'ẹka ono, ẹwha iya bụ Tímoti. Tímoti bẹ bụ nwanyị, bụ onye Ju bẹ nwụru iya nụ. Nwanyị ono bụkwawho onye nke Kuráyisutu. Nna Tímoti ono bụru onye Girísu. 2Ụnwunna ndu ọwhu bu lẹ Lị́sutura mẹe ndu ọwhu bụ lẹ Ayikóniyomu bẹ tụgba-gezhiaru ọnu Tímoti, sụ l'ọ bụ ọkpobe madzụ. 3Pọlu sụ lẹ ya l'e-duta Tímoti tẹ yẹle iya lịru. Ọ bya eduta iya bua ya ugvu. Iwhe meru o bua ya ugvu bụ l'iwhe bụ ndu Ju, bukota l'ẹka ono bẹ makọtawaru lẹ nna Tímoti bụ onye Girísu. 4E megee, whẹ l'iya lịru tụgburu. Iwhe bụ-zhia mkpụkpu, whẹ ghataru bẹ whẹ l'akọkotajeru ndu nke Kuráyisutu idzu ono, ndụ-ishi-ozhi mẹe ndu e meru ọgurenya chọchi chịru lẹ Jerúsalẹmu. Whẹ l'asụje whẹ tẹ whẹ mekotajekwa iwhe lile ono, a chịru l'idzu. 5Ọo ya bụ, e mee chọchi lile ono, ọ kabaa oshihu ike l'ekwekwe, whẹ kwetaru nke Kuráyisutu, whẹ l'akakwawhọ shii lẹ mbọku lẹ mbọku.

Tirówasu: Ọwhulenya Pọlu

6Whẹ je tẹ whẹ bahụ lẹ Éshiya je ekfua okfu Chileke l'ẹka ono, Ume-Dụ-Nsọ te ekwe. Whẹ kwee tụgbua ghajaa l'alị Firíjiya mẹe Galéshiya. 7Whẹ rwua oge alị Mísiya whẹ lẹ Byitíniya, whẹ jeshia tẹ whẹ bahụ lẹ Byitíniya, Ume Jisọsu te ekwekwawho. 8Whẹ je aghajaa l'alị Mísiya jeshia Tirówasu. 9O be l'ẹnyashi gẹ whẹ rwuru Tirówasu, Pọlu bya awhụa awhụ, whụa onye Masedóniya. Onye ono bya akfụru Pọlu l'iwhu; aryọje iya sụ: “Byiko, ghabunua bata Masedóniya bya eyeru anyi ẹka.” 10Pọlu whụ-gee ọwhulenya ono, anyi kwakọbelekwawho nteke ono tụgburu, ọ bụru anyi oje Masedóniya, o noo nkele o doru anyi ẹnya l'ọo Chileke bẹ l'eku anyi t'anyi bya ezhia ozhi-ọma nke Chileke l'ẹka ono.

Fílipayi: Lị́diya l'anata Jisọsu t'ọ bụru Onye-nwe-iya-nụ

11Ọo ya bụ, anyi gude ụgbo shi lẹ Tirówasu tụgbua iwhu lanụ jeshia Sámoturesu. O be echile iya; anyi shiwaro l'ẹka ono ngaa bahụ Niyápolisu. 12Anyi shi lẹ Niyápolisu gude ọkpa bamihuwaroya Fílipayi bụ iya bụ ishi alị Masedóniya. Ọo mkpụkpu ẹka ono bẹ ndu shi Romu bu. Anyi nọo nwujiku olemole l'ẹka ono. 13O rwunua lẹ mbọku ọtuta-ume, anyi fụta l'ọnu ẹka, l'eeshije bahụ mkpụkpu ono jeshia l'agụga ẹnyimu. Ẹka ono bẹ anyi gbeenu sụ l'ọo ẹka ndu Ju l'anọduje ekfu anụ Chileke. Anyi rwua bya anọzeta, wata okfuru ụnwanyi, dzukoru l'ẹka ono okfu Chileke. 14Onye lanụ l'ụnwanyi ono, nụru okfu ono, anyi l'ekfu bẹ ẹwha iya bụ Lị́diya. Lị́diya ono bụ onye Tayatáyira. Ọogba nghọ ẹkwa uswe uswe. Nwanyị ono ta abụdu onye Ju, ọle Chileke dụru iya lẹ nsọ. Onye-Nwe-Ọha, bụ Chileke bya agụhaa obu iya, ọ ngabẹ nchị l'iwhe Pọlu l'ekfu. 15E mee yẹle ndu ụlo iya baputizimu. Ọ sụ anyi: “Unu byanụ anọta l'ụlo mu mẹ unu -kwewaa lẹ mu bụwaa onye natarụ Jisọsu ọkpobe anata t'ọ bụru Onye-nwe-mu-nụ.” Ọ ryọnyaa anyi, anyi jeshia.

Pọlu nọ mkpọro lẹ Fílipayi

16O rwua ujiku lanụ, anyi l'ejewaa ẹka l'aanọduje ekfu anụ Chileke. Anyi whụa nwamgbọko ọbu, bụ ohu; tẹmenu ọgvu buru iya l'ẹhu. Ọgvu ono, bu iya l'ẹhu meru iya l'ọogba ẹja, ahajẹru akọ iwhe l'e-me l'ụzo iwhu. Ọ kwatarụ gude ọgba ẹja ono akparu ndu nwe iya nu oke okpoga. 17O tsowhelahaa anyi lẹ Pọlu. L'oochi mkpu asụje: “Ndu-a bụkwa ndu l'ejeru Chileke ono, kangokotaru nụ ozhi! Whẹ l'a-kọru unu ụzo, l'ee-shi dzọfuta unu.” 18Iwhe ono bẹ l'ọonoje agụ ọgu egvu mbọku-mbọku. A nọnyaa, iwhe ono, l'ookfu kabaa ọdu Pọlu ashị, dụta iyẹ ya nke ọwhu l'ọoto dụhee ike tarụ iya nshi. Ọ ghachi sụ ọgvu ono: “Mu gude ẹwha Jisọsu Kuráyisutu ekfuru ghu t'ị lụfuta nwata ono l'ẹhu.” Ekfutsuta, l'ookfutsuta iya, ọgvu ono lụfuta nwata ono l'ẹhu. 19Ndu nwe iya nụ whụlewho l'ọgvu ono lụfuwaru iya l'ẹhu, nke ọwhu l'ọotoo kpatahẹru whẹ okpoga, whẹ kpụru Pọlu yẹle Sáyilasu kpụfu whẹ aswa kpukfu ndu ikpe whẹ, 20bụ iya bụ ndu ikpe Romu, je asụ whẹ: “Ndu-a bụkwa ndu Ju, byarụ tẹ whẹ bya akpatarụ anyi okfu lẹ mkpụkpu. 21Whẹ l'ezhikwa omelalị ọwhu l'ẹte abụa ekemu-alị nke anyịbe ndu Romu. Mbụ tọ hẹkwanu l'anyi bya l'etso omelalị onona.”

22Igwe-ọha ono wulihu tẹ whẹ tsua Pọlu whẹ kputukputu. Ndu ikpe ono lajashịa uwe Pọlu mẹe nke Sáyilasu; sụ t'e chia whẹ ẹchachi. 23E chigee whẹ ẹchachi ono, chibashigee whẹ echibashi; a chịru whẹ ye l'ụlo mkpọro. A sụ onye l'eche ụlo mkpọro ono t'ọ tuchishikwaa ụlo mkpọro ono ike. 24Onye l'eche ụlo mkpọro ono kwobe l'e kfuru nno; chịru whẹ je eye l'ọhulo ime ụlo mkpọro ono. Ọ tụa whẹ mkpọro, bya achịru whẹ ọkpa pyokafugee l'oshi, a tufushiru ụzo.

25Abalị dalẹwho ẹbo; Pọlu yẹle Sáyilasu l'ekfu anụ Chileke, agụ egvu anụ iya. Ndu whẹ lẹ whẹ tụkoru nọdu l'ụlo mkpọro l'ẹka ono ngabẹ whẹ nchị l'olu. 26A nọnyalekwawho, alị wata ọnma jijiji; kwata anmashi iya ike. Ụlo ono nmakọta jijiji jeye l'ukfu-ụlo ono. E jia ekfu, ụlo mkpọro ono gụhashia. Mkpọro, a tụru whẹ gẹ whẹ ha tụko mefugezhia. 27Onye ono, l'eche ụlo mkpọro ono lwutehu, jeshia ole ẹnya, ụlo mkpọro ono ghewarunu onu. Ọ mịtalewho ogu-ịgba iya amịta nke tẹ ya bya anmagbua onwiya. 28Pọlu chishia sụ iya: “Hẹe! Be emekwa! Be emekwa! Tọ bọ dụkwa iwhe l'ii-me onwoghu. Anyi tụkokwaru-a nọdu-gee l'ẹka-a!”

29Onye ono, l'eche ụlo mkpọro ono sụ t'a nwụtaadaa ọku. O gude ẹhu-anmanma egvu, l'ọotsu gbagbụa je adaa kpube iwhu lẹ mgboro ọkpa Pọlu yẹle Sáyilasu. 30Ọ bya edufuta whẹ sụ whẹ: “Ndu nke mu, ?o zhia gụnu bẹ mu l'e-me t'a dzọfuta mu?”

31Pọlu whẹ sụ iya: “Woru ndzụ ghu ye Jisọsu, bụ Onye-Nwe-Ọha l'ẹka nggẹ Chileke adzọfuta gụ lẹ ndibe ghu g'unu ha.” 32Pọlu whẹ bya ekfuaru iya nke Onye-Nwe-Ọha, kfukwaaru iya whọ ndu lile, nọkota l'ụlo iya gẹ whẹ ha. 33Onye ono, l'eche ụlo mkpọro ono duta whẹ nteke onowho l'ẹnyashi ono, je asachaa ọnya ẹka ono, e chibashiru whẹ. E mee yẹle ndibe iya baputizimu l'ẹnyashi onowho. 34O duta Pọlu yẹle Sáyilasu lashia ibe iya je anụ whẹ nri; whẹ ria. Ẹhu tsọo yẹle ndibe iya ụtso tsọshia whẹ iya ike, nkele ntaa bẹ whẹ byawaru bya amarụ Chileke.

35O be l'ụtsu iya, ndu ikpe ndu Romu ono zhia ndu ọgbogu whẹ tẹ whẹ je asụ t'a haa Pọlu whẹ, tẹ whẹ lashia.

36Onye ono, l'eche ụlo mkpọro bya ezhia ya Pọlu, sụ iya lẹ ndu ishi sụkwaru t'a haa gụ lẹ Sáyilasu t'unu la. Unu tọlekwawho nwẹhu ntaa tụgbua lashia l'olu odoo.

37Ọle Pọlu sụru ndu ọgbogu ono: “E te ejekwa anyi okpe ikpe t'ọ ka mma l'ọo ikpe b'a nmarụ anyi. E chia anyi ẹchachi l'edzudzu-ọha, l'ẹka anyi bụhukwaa ndu nweru ikike g'ọo ndu Romu. A chịta anyi ye lẹ mkpọro. Ntaa bẹ whẹ sụru t'a haa anyi l'edomi t'anyi la. O noo ta abyakwa l'eme anyi l'iwhu. Tẹ whẹ bya l'onwowhe bya edufuta anyi.”

38Ndu ọgbogu ono je ekfuru ndu ikpe ono gẹ Pọlu whẹ kfuru. Whẹ tsulahaa egvu gẹ whẹ nụru lẹ Pọlu yẹle Sáyilasu bẹ nweru ikike g'ọo ndu Romu. 39Whẹ je je aryọo Pọlu whẹ aryọ. Whẹ dufuta whẹ l'ụlo mkpọro ono bya aryọo whẹ tẹ whẹ lụfuru whẹ lẹ mkpụkpu whẹ. 40Pọlu yẹle Sáyilasu lụfuta l'ụlo mkpọro ono bya ejeshia ibe Lị́diya. Ọ bụru ẹka ono bẹ whẹ jekfuru ụnwunna je agbẹe whẹ ọkpu-ike sụ t'obu shihu whẹ ike, whẹ tụgbua.

Actualmente seleccionado:

Ozhi ndu ishi-ozhi 16: Ezaa

Destacar

Copiar

Comparar