Bikambwa Biniki Bikima 24
24
1Eneki bina betano oetaka, Anania nkanga en’iyome mene aokita meho, ende la bingambe bimoi la botenji’omoi bona nkaso onotangama Telutulo; ko baosumola gouverneur likambo lina Paulo. 2Ko enek’iy’oelelaka Paulo, Telutulo aomatsa yakol’ende yok’osamb’one, ate,
Enakik’iso lacin’ena mwi enatoatel’e, ko la baoyi banatoongedy’e bonyang’one la lokanyi lonakanedy’e, 3iso totamba baoyi’ane ban’ekotua l’ekotua en’ili behetu, ko tokokanga lokango mene, e Felika onoleki lokumo! 4Ko, enefalang’emi lacina ooke lonungo l’aoyi bike, lakoonda l’isei ine otolofe ena baoyi banafaataki bike. 5Lacin’iso tomena boto’one ayali nk’eyoka boto’ona lofundo mene, bosombanyi bona bitomoko eneyali Ba-Yuda ban’enyanga behetu, ko ayali bolonji bona boloi bona Ba-Nazaleta; 6ko ende amomeka lacina afulunganya boeka bon’otumba bona Yakomba. Iso tuundaki, (ko tosokolanga totende likambo linande yoka bosamb’onoyali beeka beniso; 7ohonde commandant eka Lusia aoya eneyal’iso, ko aotokumola boto’one la bita mene, 8ko aila, ate, Baakoli’anande bayake eneyal’e). Ko yombo eamene osisol’ende, ongeya baoyi’ane bahatu banoakol’iso. 9Ko Ba-Yuda baambana l’otenji’oho, ko baimedy’oka baoyi’aho bayali nko solosolo.
10Ko eneki gouverneur oilelaka Paulo ndembi la likasa lacina atende, Paulo aokutola, ate,
Emi lalokola boloko’onami l’ekiko, eney’emi oka e omoyala juge eneyali bato ban’onyang’one mbula bike; 11lacin’eamene okolana yey’oka bekolo bemosila nko jo l’efe kei eneki’m’ocoaka Yelusalema okumya Yakomba meho; 12ko iyo batansungya kuma njaatane l’oto ntango, yombo kuma njasombanya bato batomake etomoko, l’en’otumba bona Yakomba, l’ena basunagoga, l’en’elongo ben’onyanga; 13ko bafinya likotum’oka baoyi banambakol’iyo bayali nko solosolo. 14Ohonde emi limedya yoi line en’oso’one, noka ena Mbok’eho enatang’iyo bokotu’okina, emi lasaela Yakomba ena bafango’aniso, ko limedya baoyi bahatu banatengamaki ena basangya l’en’ekanda ben’asumoli. 15Ko njali la lolendedyo eneyali Yakomba nko loho lonalendedy’iyoamene, nk’oka le bato banakoli le bato banafakoli bangetwa lakina en’ewedi. 16Lacin’eho, emi lameka lacin’eho mbate botema bonofana nkwaka ena likambo en’oso bona Yakomba la bato bisike bihitu. 17Ko eneki mbula bike oetaka, njaye oyela bato ban’onyang’onami nganji in’isei ko la toma tona ndekya; 18ko Ba-Yuda bamoi bana Asia baonsungya kuma njakambe baoyi’ane en’otumba bona Yakomba, kuma losongwa l’esongelo ena basangya, ohonde ntayala l’ato bik’ike, ko etaata etomoko. 19Ko yomb’iyo bayali la likambo l’emi, akoli eneyal’iyo lacina bayi mendo en’oso’one ko bambakole. 20Koko bato’ane bakosumolake yoi lin’owe linalik’iy’osungyaka eneyal’emi, eneki’m’oemalaka en’oso bona likita lina bingambe, 21umola nko yoi limoko linaliki’m’ololuaka kuma njemali ena ntoto eniyo, emite, Ncina enansisol’ino bon’in’one nk’ena likambo lin’eetwelo en’ato banawaki.
22Eneki Felika ookaka baoyi’ane, amaonza isalisali, lacin’oka aeyaki bokotua bona Mbok’eho njeya mene, ko amasumola, ate, Enengi commandant eka Lusia oya nongokadya likambo linino. 23Ko aotoma capitaine ena soldats lacin’eho atombanya Paulo, ohonde efa la locili, atafekyake bifili binande banalanga bayi oyokambya.
24Eneki bina bemoi osilaka, Felika aoya la booli’onande oka Dulusila, boyoto’ona Yuda, ko aelela Paulo, amolofamela ena likambo lin’imeedyo eneyali Yesu Masiya. 25Koko eneki’nd’otendaka baoyi ena likambo lina mbongi, la njofima, l’etendelo en’akambo enengoya, Felika aoka losomo, ko aamba, ate, Ombocoa isanga; nko nongata etelo enakolana, nongokelela lakina. 26Ko ende aolendedy’oka Paulo angof’ende bosolo; ko la ncin’eho ameelela beelela bike, ko aesola l’ende. 27Koko eneki mbula ife osilaka, Polukio Feseto aokitanya Felika, ko Felika aocika Paulo en’onyolo, lacin’oka alangaki lokumo lona Ba-Yuda.
Actualmente seleccionado:
Bikambwa Biniki Bikima 24: BBY62
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bokanda Bona Yakomba Bon’ototo © Alliance Biblique de la R. D. Congo, 1962
