उत्पत्ति 50
50
याकूबयात थुंगु
1योसेफ थः बौया म्हय् भ्वसुलाः चुप्पा नयाः ख्वल। 2अले वं थःथाय् च्वंपिं वैद्यतय्त थः बौया सीम्हय् नस्वाः वःगु मलम पाकेबिल। 3थ्व पिइन्हुया ज्या खः। मिश्रीत नं न्हयेन्हु तक दुःखं च्वन।
4दुःखं च्वनेगु न्हि क्वचायेवं योसेफं भारदारतय्त थथे धाल, “जिगु थुलि खँ फारोयाथाय् यंकाब्यु। 5जिमि बाःनं जितः थथे धकाः पाफय्काथकल, ‘जि सीत्यनागु दु। कनान देशय् जि थःम्हं हे म्हुयाथकागु चिहानय् जितः थुनाब्यु।’ उकिं जितः फारों वनेगु उजं बियादीसा जि वनाः वये।”
6फारों धाल, “छिमि बाःनं पाफय्कू थें कनानय् वनाः थुनाः वा।” 7उकिं योसेफ थः बौयात थुनेत वन। व नापं फुक्क भारदारत, ततःधंपिं मनूत व मूमूपिं मनूत फुक्कं वन। 8योसेफया छेँजः सकलें, वया दाजुकिजापिं व वया बौया थःथितिपिं नं फुक्कं वन। थः मस्त, सा फै व वस्तु जक अन हे गोशेनय् त्वःताथकल। 9मनूत रथय् च्वनाः व सल गयाः नं व नापं वन। थ्व तसकं तःधंगु हुल खः।
10यर्दन लिक्क च्वंगु आतादया छ्व पाइगु ख्यलय् थ्यंसेंलि इमिसं तसकं दुःख यानाः ख्वल। योसेफ अन थः बौया न्हय्न्हुया दुःखं च्वन। 11अन च्वनीपिं कनानीतय्सं आतादया छ्व पाइगु ख्यलय् तसकं नुगः मछिंकाः ख्वःगु खनाः थथे धाल, “थ्व ला मिश्रीतय् सी हःगु जुयाच्वन खनी।” उकिं यर्दन लिक्कया व थाय्यात हाबिल मिश्रइम धायेगु यात।
12थुकथं याकूबं धाःथें वया काय्पिन्सं यात। 13इमिसं वयागु सीम्हयात कनान देशय् थ्यंक हे यंकाः अब्राहामं हित्ती एप्रोनपाखें न्यानाकयातःगु मम्रेया लिक्क च्वंगु मक्पेलाया बुँइ च्वंगु गुफाय् थुनाबिल। 14थः बौयात थुने धुंकाः योसेफ, थः दाजुकिजापिं अले व नापं वःपिं फुक्कलिसें मिश्रय् लिहां वल।
योसेफं थः दाजुपिन्त हपाः ब्यूगु
15थःपिनि बौ सीगु खनाः योसेफया दाजुपिनि थवंथवय् थथे खँ ल्हात, “योसेफं आः तक नं ईख तयाः झीसं वयात यानागुया बदला काःसा छु यायेगु?”
16उकिं इमिसं योसेफयाथाय् थथे धाय्के छ्वत, “सी न्ह्यः छिकपिनि बाःनं छितः थथे धायेत जिमित धयाथकूगु खः – 17‘छन्त मभिंकूगुलिइ छं छिमि दाजुपिन्त क्षमा या।’ उकिं आः छिकपिनि बाःया परमेश्वरया दासतय्त इमिसं याःगु द्वंबिद्वंया लागि क्षमा बियादिसँ।” थ्व न्यनाः योसेफ ख्वल। 18वया दाजुपिन्सं वयाः वयागु न्ह्यःने भ्वसुलाः धाल, “जिपिं छिकपिनि दास खः।”
19योसेफं इमित धाल, “ग्याये मते, जि छु परमेश्वर खः ला? 20छिमिसं जितः स्यंकेत स्वल, परमेश्वरं थुकिया पलेसा भिं यानादिल। थौं झी फुक्कं गुकथं बचय् जुयाच्वना, व उकिया हे लिच्वः खः। 21उकिं ग्याये मते। जिं छिमित व छिमि मचाखाचायात लही।” थुकथं वं थः दाजुपिन्त हपाः बिल।
योसेफ सीगु
22योसेफ थः दाजुकिजापिंलिसे मिश्रय् हे च्वन। योसेफ सच्छि व झिदँ तक म्वात। 23योसेफं एफ्राइमया पाखें छुइ तकं खन। वं मनश्शेया काय् माकीरया नकतिनि बूपिं मस्त तकं थःगु मुलय् तये खन।
24सी न्ह्यः योसेफं थः दाजुकिजापिन्त धाल, “जि आः यक्व म्वाइ मखुत। परमेश्वरं छिमिगु बिचाः यानादी। अले छिमित थनं अब्राहाम, इसहाक व याकूबयात बचं बियादीगु देशय् यंकादी।”
25अले योसेफं इमित पाफय्केबिल, “परमेश्वरं छिमित यंकादीगु देशय् जिगु अस्थि यंके धकाः जितः बचं ब्यु।” 26थुकथं योसेफ सच्छि व झिदँ दय्काः मिश्रय् हे सित। वयागु म्हयात नस्वाः वःगु मलम पानाः बाकसय् तया तल।
Actualmente seleccionado:
उत्पत्ति 50: NEW
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2024 Nepal Bible Society, Newa Christian
Literature Center and Wycliffe Bible Translators, Inc.
