उत्पत्ति 39
39
योसेफ मिश्र देशय्
1योसेफयात मिश्रय् यंकल। मिश्रया फारोया दरबारया पिवाःतय् नायः पोतीफरं वयात इश्माएलीतय्गु ल्हातिं न्यानाकाल।
2परमप्रभु योसेफलिसे दीगुलिं वं याक्व ज्या भिनावल। व थः मिश्री मालिकया छेँय् च्वनीगु खः। 3वया मालिकं परमप्रभु व नापं दीगु व वं याःगु न्ह्यागुं ज्या परमप्रभुं पूवंकादीगु खँ सीकल। 4उकिं व खनाः व लय्ताल। अले वं वयात थःगु छेँय् ज्या याइपिनि नायः यानाबिल। वं थःगु छेँया फुक्क जिम्मा नं वयात हे बिल। 5वं थःगु छेँया फुक्क जिम्मा वयात ब्युसांनिसें योसेफया हुनिं परमप्रभुं व मिश्रीया छेँय् आशिष बियादिल। परमप्रभुया आशिष वयागु छेँय् दुनेपिने न्ह्याथासं लात। 6उकिं वं फुक्कं योसेफया जिम्माय् त्वःताबिल। थःम्हं नयेगु त्वनेगुलिइ बाहेक वं आः छुकी हे च्यूताः मतल।
योसेफ बांलानाः यइपुसे च्वं। 7छुं ई लिपा वया मालिकया कलातं मिखा तयाः वयात धाल, “जि नाप द्यं वा।”
8वं थ्व खँ मन्यं, अले धाल, “जि थ्व छेँय् दुगुलिं जिमि मालिकं छुं खँय् हे च्यूताः मतः, वय्कलं थःके दुगु फुक्क जिगु जिम्माय् त्वःतादीगु दु। 9थ्व छेँय् जि स्वयाः च्वय् सुं मदु। वय्कलं छि छम्ह बाहेक जितः फुक्क बियादीगु दु। छाय्धाःसा छि वय्कःया कलाः खः। उकिं जिं गथे यानाः थज्याःगु मभिंगु ज्या यानाः परमेश्वरया विरोधय् पाप याये फइ?”
10वं न्हियान्हिथं धाःसां योसेफ व नाप द्यनेत व नापं च्वनेत तकं मानय् मजू।
11छन्हु योसेफ थःगु ज्या यायेत छेँय् दुहां वन। उबलय् छेँय् ज्या याइपिं छम्ह हे मदु। 12वं योसेफयागु गा ज्वनाः धाल, “जि नाप द्यँ।” योसेफ थःगु गा वयागु ल्हातिइ हे त्वःताः अनं बिस्युं वन।
13योसेफ थःगु गा वयागु हे ल्हातिइ त्वःताः बिस्युं वंगु खनाः 14वं छेँय् ज्या याइपिन्त सःताः धाल, “स्व, व हिब्रूयात ला थन झीत बेइज्जत याकेत धकाः हःगु जुयाच्वन। व जिलिसें द्यनेत थन दुहां वल। जि तसकं हालाबिया। 15जि तसकं हालागुलिं व थःगु गा थन हे त्वःताः बिस्युं वन।”
16वं थः भाःत छेँय् दुहां मवतले व गा थःम्हं हे कयातल। 17भाःतम्ह दुहां वयेवं वं व हे खँ वयात कन, “छिं हयादीम्ह व हिब्रू च्यः जितः बेइज्जत यायेत थन दुहां वल। 18जि तसकं हालाबिसेंलि व थःगु गा त्वःताः बिस्युं वन।”
19“छिम्ह च्यलं थथे यात” धकाः कलाःया पाखें थथे न्यँसेंलि योसेफया मालिक तमं मि जुल। 20वं योसेफयात ज्वंकाः फारोया कैदीत कुनीगु झ्यालखानाय् कुंकेबिल। योसेफ झ्यालखानाय् लाःबलय् नं 21परमप्रभु व नाप हे दी। वय्कलं वयात दया यानाः झ्यालखानाया हाकिमयात वयात माया याइम्ह यानादिल। 22उकिं वं योसेफयात अन कुना तःपिं फुक्कसिया नायः यानाबिल। अले अन न्ह्यागु यायेमाःसां योसेफयागु जिम्माय् त्वःताबिल। 23योसेफया जिम्माय् लाःगु छुं ज्याय् हे वं च्यूताः मकाल। छाय्धाःसा परमप्रभु योसेफ नाप दी। अले वं याःगु न्ह्यागुं ज्या पूवंकादी।
Actualmente seleccionado:
उत्पत्ति 39: NEW
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2024 Nepal Bible Society, Newa Christian
Literature Center and Wycliffe Bible Translators, Inc.
