उत्पत्ति 35
35
याकूबं बेथेलय् वेदी दय्कूगु
1परमेश्वरं याकूबयात धयादिल, “दँ, बेथेलय् वनाः अन हे च्वँ। अले छ थः दाजु एसावलिसे ग्यानाः बिस्युं वंबलय् छन्थाय् खनेदय्कः वःम्ह परमेश्वरया लागि छगू वेदी दय्कि।”
2उकिं याकूबं थः छेँजःपिन्त व थःलिसे दुपिं सकसितं धाल, “छिपिंलिसे दुगु कर्पिनिगु मूर्तियात वांछ्वयाब्यु, अले थःपिन्त शुद्ध यानाः मेगु लं फ्यु। 3झी आः थ्व थाय् त्वःताः बेथेलय् वनेत्यना। अन जिं जितः आपतय् ग्वाहालि यानादीम्ह व जि न्ह्याथाय् वंसां जिलिसें दीम्ह परमेश्वरया लागि छगू वेदी दय्के।”
4अले फुक्कसिनं याकूबयात थःपिन्के दुगु फुक्क मूर्ति व न्हाय्पनय् च्वंगु तिसा बिल। वं व फुक्क शकेमया नापसं च्वंगु स्वंसिमा क्वय् थुनाबिल। 5इपिं अनं वँसेंलि परमेश्वरं इमिगु जवंखवं च्वंगु शहरयात ग्याःचिकुं भुनाबिल। अले सुनानं याकूब व वया मनूतय्त लीमफुत।
6याकूब थः मनूतलिसे कनान देशया लुजः धाःथाय् थ्यंकः वल। थौंकन्हय् थ्व थाय्यात बेथेल धाइ। 7वं अन छगू वेदी दय्कल। वं व थाय्यागु नां एल-बेथेल धकाः तल। छाय्धाःसा व थः दाजुलिसे ग्यानाः बिस्युं वःबलय् परमेश्वरं वयात अन हे झायाः नापलानादीगु खः।
8अन रिबेकाया तुतुमां दबोरा सित। वयात बेथेलया क्वसं च्वंगु छमा स्वसिमाया क्वय् थुनाबिल। उकिं व थाय्यागु नां अल्लोन-बकुत तल।
9याकूब पद्दन-आरामं वये धुंकाः परमेश्वरं हाकनं वयाथाय् खनेदय्कः झायाः वयात आशिष बियादिल। 10परमेश्वरं वयात धयादिल, “छंगु नां याकूब खः। आः थनिंनिसें छंगु नां याकूब मखु, इस्राएल जुइ।” थुकथं वय्कलं वयागु नां इस्राएल तयादिल।
11वय्कलं वयात हाकनं धयादिल, “जि दक्व शक्ति दुम्ह परमेश्वर खः। छं यक्व सन्तान दयेमा। छंगुपाखें यक्व जात जाति दयावइ। छंगुपाखें यक्व जुजुपिं नं दयावइ। 12जिं अब्राहाम व इसहाकयात बी धयागु देश छन्त बी, अले थ्व सदांया लागि छिमि सन्तानयागु जुइ।” 13अले परमेश्वर अनं झाल।
14याकूबं अन ल्वहं छगः धंकाः उकी दाखमद्य व चिकं लुनाबिल। 15अले वं परमेश्वरं वलिसे नवाःगु व थाय्यागु नां बेथेल तल।
बेन्यामीन बूगु व राहेल सीगु
16इपिं बेथेलं वन। एप्रात थ्यनी थें च्वंकाः राहेलयात मचाबुइ ब्यथा जुल। 17वयात तसकं ब्यथा जुयाच्वंबलय् दिरिअजिं वयात धाल, “ग्याये मते, हाकनं काय् हे बुल।” 18राहेलं थः सीगु सीकाः सी न्ह्यः वं मचायागु नां बेन-ओनी#३५:१८ बेन-ओनी थुकिया अर्थ खः दुःखया काय् तल। बौम्हं धाःसा वयागु नां बेन्यामीन#३५:१८ बेन्यामीन थुकिया अर्थ खः जव ल्हाःया काय् तयाबिल। 19राहेल सित। वयात एप्रात वनेगु लँसिथय् थुनाबिल। थ्व थाय्यात थौंकन्हय् बेथलेहेम धाइ। 20याकूबं वयात थुंगु थासय् ल्वहं छगः धंकाबिल। थ्व आः तकं राहेलयात थुंगु थां कथं दनि।
21व अनं वन। वं मिग्दल-एदेरया मेखेपाखे थःगु पाल ग्वल। 22याकूब अन हे च्वनाच्वंबलय् रूबेन थः बौया मथ्याःम्ह कलाः बिल्हालिसे द्यन। याकूबं थ्व खँ सिल।
याकूबया काय्पिं
याकूबया झिंनिम्ह काय् दु –
23लेआया पाखें, दक्वसिबय् तःधीम्ह रूबेन, अले शिमियोन, लेवी, यहूदा, इस्साखार व जबूलून।
24राहेलया पाखें, योसेफ व बेन्यामीन।
25राहेलया दासी बिल्हापाखें, दान व नप्ताली।
26लेआया दासी जिल्पापाखें – गाद व आशेर।
थुपिं फुक्क याकूब पद्दन-आरामय् च्वनाच्वंबलय् हे बूपिं खः।
27याकूब मम्रेय् थः बौ इसहाकयाथाय् लिहां वल। थ्वयात किर्यत-अर्बा व हेब्रोन नं धाः। अब्राहाम व इसहाक पिनें वयाः थन हे च्वंगु खः। 28इसहाक १८० दँ दुबलय् सित। 29व तसकं बुरा जुयाः सित अले थः बौ तापाःबाज्यापिं नापं मिलय् जूवन। वयात वया काय्पिं एसाव व याकूबं थुन।
Actualmente seleccionado:
उत्पत्ति 35: NEW
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2024 Nepal Bible Society, Newa Christian
Literature Center and Wycliffe Bible Translators, Inc.
