उत्पत्ति 14
14
अब्रामं लोतयात त्वःतकाहःगु
1थुबलय् हे शिनारया जुजु अम्रापेल, एल्लासारया जुजु अर्योक, एलामया जुजु कदोर्लाओमेर व गोयीमया जुजु तिदालं 2सदोमया जुजु बेरा, गमोराया जुजु बिर्शा, अदमाया जुजु शिनाब, सबोयीमया जुजु शेमेबेर व बेलाया (लिपाया सोअर) जुजुलिसें लडाइँ यात। 3इपिं फुक्क सिद्दीम अर्थात मृत सागरया ब्यासिइ मुन। 4झिंनिदँ तक जुजु कदोर्लाओमेरं क्वत्यलातःगु खः, झिंस्वदँय् इमिसं विद्रोह यात।
5झिंप्यदँय् कदोर्लाओमेर व नाप दुपिं जुजुपिन्सं वयाः अस्तेरोत कर्णेमया रपाईतय्त, हामया जुजीतय्त, शावेकिर्यातैमया एमीतय्त 6अथवा होरीतय्त सेइरया पहाडंनिसें एल-पारानया मरुभूमि तक थःगु अधीनय् काल। 7अनंलि इपिं लिहां वल। अले एन-मिशपातय् (लिपा कादेश) वनाः अमालेकीतय्गु फुक्क देश व हासेसोन-तामारया फुक्क एमोरीतय्त नं थःगु अधीनय् काल।
8सदोम, गमोरा, अदमा, सबोयीम व बेलाया (लिपाया सोअर) जुजुपिन्सं सिद्दीम ब्यासिइ वयाः 9एलामया जुजु कदोर्लाओमेर, गोयीमया जुजु तिदाल, शिनारया जुजु अम्रापेल, एल्लासारया जुजु अर्योकया विरोधय् ल्वायेत मुन। प्यम्ह जुजुया विरोधय् न्याम्ह। 10अन सिद्दीम ब्यासिइ थाय् थासय् अलकत्राया गाः दुगुलिं सदोम व गमोराया जुजुपिं बिस्युं वंबलय् इमि गुलिं मनूत अलकत्रा गालय् कुतुंवन, ल्यंदुपिं जक पहाडपाखे बिस्युं वन। 11थुपिं प्यम्ह जुजुपिन्सं सदोम व गमोराया फुक्क सम्पत्ति व नसाज्वलं तकं लाकाः यंकल। 12इमिसं सदोमय् च्वनाच्वंम्ह अब्रामया काय्चा लोत व वयागु सम्पत्तिनापं यंकल।
13लडाइँनं बिस्युं वःम्ह छम्हय्सिनं वयाः हिब्रू अब्रामयात थ्व खँ कन। उबलय् व एमोरी मम्रें पिनाथकूगु सिमात दुथाय् च्वनाच्वंगु खः। उबलय् व मम्रेया दाजु एश्कोल व आनेरलिसे मिले जुयाः च्वनाच्वंगु खः।
14अब्रामं थः काय्चा लोतयात ज्वना यंकूगु खँ न्यनाः थःथाय् हे बूपिं व ल्वायेगु सय्कातःपिं स्वसः व झिंच्याम्ह दासतय्त थःलिसें ब्वनाः शत्रुतय्त ख्याख्यां दान तक हे थ्यंकः वन। 15अब्रामं थः मनूतय्त पुचः पुचः दय्काः चान्हय् प्यखेरं हमला यानाः इमित बुकाछ्वत। अले दमस्कसया उत्तर पाखे च्वंगु होबा तक्क लिनाछ्वत। 16वं थः काय्चा लोत व वयागु सम्पत्ति लिसें शत्रुतय्सं त्याकाः यंकूपिं मिसात, मिजंत फुक्क लितहल।
मल्कीसेदेकं अब्रामयात आशिष ब्यूगु
17अब्राम कदोर्लाओमेर व व नाप दुपिं जुजुपिन्त त्याकाः वये धुंकाः सदोमया जुजु वयात नापलायेत शावेया ब्यासिइ वल। थ्व थाय्यात “जुजु बेसी” नं धाः।
18शालेमया जुजु मल्कीसेदेक मरि व दाखमद्य ज्वनाः वल। व दक्वसिबय् तःधंम्ह परमेश्वरया पुजाहारी खः। 19वं अब्रामयात थुकथं आशिष बिल,
“जिं स्वर्ग व पृथ्वी दय्कादीम्ह
दक्वसिबय् तःधंम्ह परमेश्वरया नामं छन्त आशिष बी।
20दक्वसिबय् तःधंम्ह परमेश्वरयात तःधंकी,
गुम्हय्सिनं छिमि शत्रुतय्त छंगु ल्हातय् लःल्हानादिल।”
अले अब्रामं थःम्हं हःगु फुक्क झिब्वय् छब्व वय्कःयात बिल।
21सदोमया जुजुं अब्रामयात धाल, “जितः मनूत जक ब्यु, धनसम्पत्ति छं थःम्हं हे ति।”
22अब्रामं सदोमया जुजुयात लिसः बिल, “स्वर्ग व पृथ्वी दय्कूम्ह दक्वसिबय् तःधंम्ह परमेश्वरयात जिं बचं बियागु दु, 23जिं छिगु सुका बापु तकं काये मखु। मखुसा ला छिं, ‘अब्रामयात जिं तःमि यानाबिया’ धकाः धाइ। 24जिमि मनूतय्सं नःगु बाहेक जितः छुं नं म्वाः। बरु जिनापं वःपिं आनेर, एश्कोल व मम्रेयागु भाग जक इमित बियादिसँ।”
Actualmente seleccionado:
उत्पत्ति 14: NEW
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2024 Nepal Bible Society, Newa Christian
Literature Center and Wycliffe Bible Translators, Inc.
