Salmos 63
63
David: Yusru ameka wina Apuruitme timiauri
1Yusru ameka wina Apuruitme.
Kashik amincha eajme.
Yumi jitachu asamtai,
yumi jiturat tusa,
nungka nukap yuumawa nunisnak wisha amincha nukap yuumajme.#Sal 42.1-2; 143.6
2Ami jeemin wayaan kakarmarmin tura paaniurmincha wainkatasan wakerajai.
3Wikia iwiaaku pujustasan wakerayatun,
nuna nangkamasnak ami anengkratairum itiur awak tusan nekaatasan wakerajai.
Tura nuna nekaan wina jangkerjai warartustatjame.
4Tura iwiaaku pujaknaka:
Ameketme pengkeram titatjame.
Tura asan amin seakun uwejrun yakí takurtatjame.
5Aints yutan nekas kunturman nukap yuwa tutuarua nunisnak wikia naku nakut pujustatjai.
Tura asan wina jangkerjai warartakun:
Ameketme juuntam titatjame.
6-7Yusru ameketme wina yainkatnumka.
Tura asakmin kashisha peaknum tepesnasha aminka nintimtusan pujajme.
Atashu uchichiri ni nukuri nanapen weamkar pujuinawa nunisnak pengker nintimsan pujajai.#Sal 91.4
8Iwiaaku pujaknaka tuke amijai tsaniasan pujustasan wakerajai.
Ami untsur uwejmijai winaka akuptatsme.
9Antsu wina mantuwartas wakerutinauka aints jakau iwiartainum tepesartin ainawai.
10Tura nangkijai ijum jakaartin ainawai.
Tura asaramtai ni namangkenka yukartin ainau yuwaartin ainawai.
11Tuminamtai wikia Yusen maaketai tusan warastinuitjai.
Wikia Yusnawaitjai tinu ainauka mash Yusen maaketai tiartas kantamawartin ainawai.
Antsu wait chichamrintin ainaunka Yus chichamtikiashtinuitai.
Actualmente seleccionado:
Salmos 63: acu
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2019, Wycliffe Bible Translators, Inc. All rights reserved.
