Proverbios 6
6
Tumashmiaktinun pachis nuikiartamu
1Uchiru, ami irutkamuram chichartamak: Wikia tumashitjai. Antsu akiimiakchamin asamtai, ukunam akikmijinam tusan, ame tumaashruka akiimiaktrukta tamataikia, 2ame ayu takumka, ami chichammijiaing chapikjiai jingkiamua nunisketme. 3Turakmeka uchiru, chikich aintsu tumaashrin akiktatjai tinu asam, yamaik angkanmamtikiata. Turakum wake mesekam ami irutkamuram werim: Tumaashrum akimiakchamnau asamtai tsangkutrurta tita. 4Tura irutkamurmin wetsuk pujakmeka, kanutsuk asata.
Tura nijai chichatsuk pujakmeka pengké ayamraip. 5Angkan wajastaj takumka, japa waitmak tsekea nunismek, tura chingki ejatkan wainak nanaki yaja weawa nunismek angkanmamtikiata.
Naki ainaun pachis nuikiartamu
6Ame naki akumka, week ainau takakminak wekaina nu jiisam, takakmastin nuimiarta.
7Kame, takata apuri atsayat, tura juuntri: Tu takakmastai tachamaitiat, 8weekka ni wakeramurijai
kintajai metek takakminawai. Tura yumitin ayamsarmi tusa, esati takakmasar, nuka ainaun juukar ukuinawai. 9Maj, amesha naki akumka, ¿warutam arusmek nantaktiamek? ¿Warutam arusmek
shintaram takat nangkamatam? 10-11Jumchiksha kanurtajai. Jumchiksha ayamsatjai tu nintimsam pujakminka, aneachmau tsuka mangkartinua nunisang nepetmaktinuitai. Tura kasa aints warinchurmin kasamkatas aneachmau jeemin wayaawa nunisang winamtai yuumaktinuitme. Tura asamtai kakaaram takakmasta tajame.
Pase nintintin warukuita tusa nuikiartamu
12Aints pase nintintin warukuita tusan nuiniajrume: Nu aintska nangkami chichaakka, wait chichaman
etserui. 13Tura aintsun anangkatas, jiijai mitsum wajaayi. Tura nawejai tura uwejejai inakmas wajaayi.
14Ni nintimauri pase asamtai, tuni wekaawa nunisha tuke aints ainaun anangkatas wakerawai. Turasha aints ainau chichainamtai, maaniawarti tu nintimias chichaawai. 15Tura asamtai nu aintsu waitnastintri aneachmau jeatnuitai. Tura pengké ayamrukchamin mengkakatnuitai.
Yus nakita nuna pachis nuikiartamu
16Yuse nakitamuringkia seisaitai. Kame, nekas siete ainawai:
17Aints: Wikia miajuitjai tusa, chikich aintsnaka: Mianchawaitai tusa suwirpiaku jiinaunka Yuska
naktitawai. Tura wait chichaman etserin ainauncha nakitawai. Tura anangmichu ainaun mainauncha
Yuska nakitawai. 18Tura aints tunau nintimsar pujuinauncha, tura chikich ainaun pase awajsartas
wakerina nunasha Yuska nakitawai. 19Tura chikich aints ainaun tsanuminak pujuinauncha, tura
aints chikich aintsun ni yachijai kajernaikiati tusa nintimtikniuncha Yuska nakitawai.
Natsa ainaun nuiniamu
20Uchiru, wina chichamur umirkam, nukuram nuitamramia nusha kajinmatkiip. 21Nekasan kajinmatkii tusam, tuke nintimin ukusta. 22Tsawaisha tuni wekaame nunisha nu chichamnaka nuitamrartinuitai.
Tura kashi tepakmincha nunisha aminka waitmakartinuitai. Nunia tsawaarkum shintaram
nunisha nu nuikiarturmauka nintimratnuitme.
23Nu umirkatin chicham ainauka namparin kapawa nunisarang ainawai. Tura shirikip kea nunisarang ainawai. Nuka itiur timiá pengker pujusminuita tusar nuitamrartinuitai. 24Tura kungkatip nuwa amin anangkramatas chichamtaisha, umirkatin chicham ainauka amin angkan awajtamsartinuitai.
Tura aishrintin amin anangkramatas wakeramtaikia, nunia kiishmaktinuitme. 25Nuka shiirmachitai,
tuuka nintimraip. Kame, amin waitmak jimiaj wajamtaisha, ameka jiisaip.
26Kungkatip nuwa ainauka aya kuikian wakerinak aishmangkun juinawai. Tura aishrintin ainauka amijai tsanirminak ami pujutrumka mesertin ainawai. 27¿Ji kapaun aints minaksatas wakerakka, wejmakringka aesachminkai? 28Tura ji kapamunam sapatrin wejtsuk aints najamtaikia ¿nawencha aesachminkai?
29Aints aishrinujai kanurtas tepawa nunisketai. Aishrinun takau ainauka mash ni waitnastintrin jukiartin ainawai.
30Aints yaparak tsukajai jakai tusa yurumkan kasamak juwa nunaka chikich aints ainauka tsuutinatsui.
31Turamaitiat chikich aints nuna wainak achik: Ame kasamkame nuka siete awangturkita
tawai. Nu atsamtaikia, ni jeen warinchu iruna nuna mash suruk, kichik kasamkamunam siete akiktinuitai.
32Tura aints aishrinujai kanauka pengké nintinchawaitai. Ningki mestumawai.
33Nuka natsanpiakun najanau asamtai, numijai katsumkartatui, tura aints ainauka
ni turamurin mash nekainau asar, nu aintsnasha jiitnasha nakitrartinuitai.
34Nu nuwa aishri nekas timiá suwirpiaku nu aintsun kajerak wait anentsuk
pengké tsangkurashtinuitai. 35Aints: Tsangkutrurta tamaitiat, pengké anturkashtinuitai.
Tura kuikian warinchuncha susatjame tamaitiat: Nunasha nakitajai, titinuitai.
Actualmente seleccionado:
Proverbios 6: acu
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2019, Wycliffe Bible Translators, Inc. All rights reserved.
