Versículos más leídos de la Biblia Piripodeniza 4

Compartir

Uapima ticappiremananicca touira tibodideni uatoto cana-rrerarri. Ocasserani temanarraroza naqui tibodideni uauatomacca nerrerarri. Uima bazima tibodideniza auatomeza naqui Deozara uati uati titiquena narri. Deoza uatide tiquerrenaza naqui Pouarrine bica tanicca ticarrimanani tibodideni uatonissa tarri. Nezape Pouaza: —Rrehe, Tirrine bica tani −titiquena narri.

Nema tiquenezape Deo tiadeniza pocca rronehe da inarizanitoui, tibodideni rrassi naniuarrine. Pocca rronehepe deni torranicca. Madirra iape pocca rronehecca uima nemanehe iattaniuarrine iparrire-rrerani. Zeso Cristoza tiquerrenarrarope narraro rronehe tibodideni ecaua, tibodideni uatoue naqui ecaua narraroparri.

Ouimecotedeni, rridacca uati onarrarocca uima tazarrani arrima tinanemanarri: Uima parrisseheccazara tibodideni uatome-manarri. Imadinissa taniuarrineccara tibodideni uatome-manarri. Parrirenissa tanicca uimatouira tibodideni uatome-manarri. Uima bicani ponira tiadeniza torrarizaniuarrine tibodideni uatome-manarri. Uima bica tanicca touira tibodideni uatome-manarri. Madirra pocca madie toccanissa tarraro touira tibodideni uatome-manarri. Uima bicani pina Deocca uimassa narraro touira tibodideni uatome-manarri. Deo ticcadeni uimaza uatizeuiuarrine tibodideni uatomanissa tarri.

Cristo oua tonadacorarra narrarirrine uima onihi onihi ouaza torrazape oparrireni.

Uarrirriraza ia Zozossede Deoza tetetizemana narri. Tiadeniza uati omanipomarraro: Ia Zozossede Deoza tetetizemana narri, onarraro.

Nazapa icca Deo ticappiremananicca tiadeniza da da ihinananitoui. Zeso Cristocca tiquerrenezape pocca biquehe, poua carrirraricca bazima tiadeniza inanarrorarraro.

Arri tiadeni mari ocanabaqquirrarope tiadeniza torrarri. Tiadeni ocazossebaqquirrarope pina occa zossenirrissa tinanemanarri. Pina occa uima timittemanarrarossa tinanemanarri. Pina arri occa madie qqui tiquenarrarossa tinanemanarri. Pina arri occa uimassa tinanemanezape Deopa tiadeni rrassi tonanabaqquiuitoui. Pouana rronehe rrinede. Tiadeniza madirizaui.

Ouattipe tiadeniza arrima onarraro: Rroneqquiri tiquenaza timadimanarri. Naui madirra ouaha attidenipa: —Pouadenipa bicaqquiri naui −quequenanauiuarrine, onarraro. Ia Zozossede Deo ccaniui uarrira taui.

Occa madierrine bazira tehe ocarriza naqui nauato onani. Ozepe sse teza naqui nauato onarraro. Uima onihi onihi ocatama-rizarrarorrine ouattarraro. Orrira onani. Accara onehe omadiza, pemi omadiza naqui ouatterre narraro nauato onani. Mota torraui ouaza aniza naco nauato onarraro. Ocappirehe omadiza naqui ouatterre narraro nauato onani.

Tirrinedeni ouatizenicca uima tiadeniza uati onarraro. Naraha ocappirani, oparrire-rrerani onerrerarraro. Ouape ouatterre narraro. Ocarriza, ocappireza naqui obodi ohouatize narraro.