Versículos más leídos de la Biblia Valooma 3

Compartir

Lola, avaanu vooni vagalwike, ʉlʉgendo lwa veene naluvonia ʉwɨɨmɨkiwa wa Ngʉlʉve. Lɨno, ʉNgʉlʉve kʉ lʉhʉngʉ lwa mwene, ɨdiike avaanu vave nʉ vʉgolosu pamiiho ga mwene kɨtsila ʉmwene kʉhombwa kɨɨnu. Aavombile ewo kʉ nzɨla jya kʉnsuungʼa ʉMesiya ʉYɨɨsʉ ʉvɨ iitsile akahetsa imbiivi tsiitu nʉ kʉtʉgombola.

Ɨnzɨla ɨjyo kwʉ kʉmwɨdɨka ʉYɨɨsʉ Kɨlɨsiti. ɄNgʉlʉve, kʉ nzɨla ɨjyo, ikʉvavalɨla ʉvʉgolosu avaanu vooni avikʉmwɨdɨka ʉYɨɨsʉ, nitengelela ʉmuunu ʉvaveetsaga.

ɄNgʉlʉve aammʉmiitse ʉYɨɨsʉ ave neekelo jya kʉvasajania avaanu nʉ mwene, pakʉta avaanu avikwɨdɨka ʉkʉta aasue kʉ nongwa tsa veene vasyɨkɨlwe imbiivi tsa veene. ɄNgʉlʉve aavombile ndavʉle pa kʉvonia ʉkʉta ʉmwene inʼgolosu, ivʉnga avatulanongwa. Lola, ʉmwene naavavʉnge pa mbiivi tsa veene itsʉ vaagalwike ʉnsɨkɨ gwa kʉnsana. Ikange, aavombile ndavʉle pa kʉvonia ʉkʉta, ʉmwene inʼgolosu mu nsɨkɨ ʉgʉ, wʉ ivʉnga ʉvʉtulanongwa, nʉ wʉ ikʉvavalɨla ʉvʉgolosu avaanu avikʉmwɨdɨka ʉYɨɨsʉ.

Lola, nakʉli ʉmuunu ʉvaveetsaga ʉvɨ ivalɨlwa ʉvʉgolosu pamiiho ga Ngʉlʉve kʉ nzɨla jya kʉkonga ʉmwʉ tsitsovela indagɨlo. Ɨmbombo jya ndagɨlo kwʉ kʉvonia vooni ʉkʉta vavombambiivi.

Ago galɨngʼiine nʉ Vʉvɨge ʉVʉvalatse ʉwiita, “Nakʉli ʉmuunu ʉvɨ inʼgolosu, nʉ mpamato. Nakʉli ʉmuunu ʉvaveetsaga ʉvammanyile ʉNgʉlʉve, ikange nakʉli ʉvɨ ikʉndonda. Avaanu vooni vakʉlekile ʉkʉmpʉlɨka ʉNgʉlʉve, lola, vooni vavʉla lʉvʉmbʉlɨlo ikange pamiiho ga mwene. Nakʉli ʉmuunu ʉvivomba ʉwiipa, nakʉli nʉ mpamato.”

Lɨno, twivona ʉkʉta ʉNgʉlʉve vɨ mwene ikʉmbalɨla ʉmuunu ave inʼgolosu kʉ nzɨla jya kʉmwɨdɨka ʉYɨɨsʉ, najiiva kʉ nzɨla jya kʉkonga ʉmwʉ indagɨlo tsa Moose tsitsovela.

Baako, napadebe! ɄNgʉlʉve ikʉvavonia avaanu ʉkʉta ʉmwene itsova itsa jɨlweli nʉ kʉtsivomba nʉpwʉ jɨngave avaanu vooni vitsova ʉvʉnuasi. Lola, ʉVʉvɨge ʉVʉvalatse wiita, “Ʉngavavʉʉle avaanu vaako imbiivi tsa veene, amamenyu gaako ga jɨlweli. Ʉngavahɨge, ʉvʉhɨgi waako wa vʉgolosu.”