Versículos más leídos de la Biblia Kuxh 6

Compartir

Tul ech tal Jesuus s-eche: —Koʼvaq, tul bʼen bʼeeq oʼ ilan t-vaʼq txʼavaʼ uvaʼ yeʼl xaol s-tuul, —xeʼt Jesuus. Tan mam xaol nikich taqʼbʼ kʼatz Jesuus; atz mam xaol nikich itzajeʼ. Echetz yeʼ nikich tutxh vet itxʼaʼon Jesuuse tuchʼ inqʼa nikich itxhus tibʼ s-kʼatza.

Yaʼne ech tal Jesuus te inqʼa xaol s-eche: —Jatvaʼlxh oʼ, inqʼa qʼexsan tetz viyolbʼal quBʼaal Tiuxh, tan jankʼal inqʼa tenam, nik oksan quqʼij. Pet taʼn kuxh u qutenam yeʼ nik oksan quqʼij. Tul kʼuxh inqʼa tu qotzotz, inqʼa antxh qitzʼin qatzik, tan yeʼ nik toksa oʼ s-tuul, —xeʼt Jesuus.

Aʼetz vet teluʼl Jesuus tuul u vaarko, tul til Jesuus uvaʼ mam tenam txʼebʼoʼmyich vet s-tiʼ. Tul itxum Jesuus ivatz inqʼa xaol. Tan til Jesuus uvaʼ echich kuxh tatin inqʼa xaol, eche tatin joloq karneʼl uvaʼ yeʼl xeen tetz ati. Tan yeʼich tootzaql inqʼa xaol kam laʼich motx ibʼan tiʼ tootzaqil inimal quBʼaal Tiuxh. Echetz ixeʼt vet Jesuuse tiʼ itxhusux mamala bʼaʼnla txhaq txumbʼal xoʼl inqʼa xaol.

Tul yeʼ utxh ibʼant Jesuus invaʼq kaebʼal aanima t-vitenam. Tan juunil kuxh inqʼa yaabʼ ibʼan Jesuus bʼaʼn. Tan yeʼ nikich iqej inqʼa xaol oq uvaʼ, aʼich Jesuus u Kriisto. Tul taqʼ jaʼ Jesuus iqʼabʼ tiviʼ inqʼa xaol. Tul motx ibʼan vet bʼaʼn. Tul tira txumun Jesuus tiʼ yeʼ viqejt inqʼa xaol uvaʼ, aʼich Jesuus u Kriisto. Yaʼne junun ipal vet Jesuus t-inqʼa talaq tenam uvaʼ naqlich kuxh kʼatz u tenam Nasareet. Tul nikich pal itxhus ka Jesuus inqʼa xaol.

Yaʼne ikʼul vet Jesuus oʼvaʼl inqʼa paan tuchʼ kaʼvaʼt inqʼa txay. Tul saqin jaʼ Jesuus t-amlikaʼ; atz tal Jesuus bʼaʼnla yol s-tiibʼa. Yaʼne ipixh Jesuus inqʼa paan s-tuul. Tul taqʼ Jesuus te inqʼa nikich itxhus tibʼ s-kʼatza. Tul ijatxaq vet el xoʼl inqʼa xaol s-kaqaayil. Atz talat Jesuus ijatxpeʼl kaʼvaʼl inqʼa txay xoʼl inqʼa xaol. Tul motx txʼaʼon jankʼalxh inqʼa xaol. Atz tetxhal motx inoj inqʼa xaol s-kaqaayil. Tul aʼl tel imolt inqʼa nikich itxhus tibʼ kʼatz Jesuus iyal inqʼa paan tuchʼ iyal inqʼa txay. Tul kabʼlavatel xuʼk motx imola uvaʼ bʼeenoxh inojeʼ.