Versículos más leídos de la Biblia Isaías 41

Compartir

Melle be gwayo. An beba gudiguad. Melle be suli-suli-itogo. Ani an be-Bab-Dummadid. An be-ogannogoed, an be-bendakoed, an-sakwa-gandikid-nuedsikidgi an be-ganikioed.

Ar ani an be-Bab-Dummad-Jehová gued. An be-argan-nuedsikid-ganikidid. Ani an bega soged: ‘Melle be gwayo, ani an be-bendakoed.’ ”

”Dule-isdar-be-dakmaladi, bingegudmaloed, nug-mesagwar gudmaloed. Dule-begi-gwisgudimaladi, bela bergudoed, gudisurmaladyobi naoed.

Ar napneg-naid-ugakaase an be-susad, nega-sukungan-dikasulidba an bese gochad. An bega sogsad: ‘Be an-maiga gued.’ Ani an be-susad, an be-obachasulid.

Be be-isdarmalad-amidiguo-inigwele, gwen be amiosulid. Bebo-bila-onomaladi, bela bergudoed, gudisurmaladyobi naoed.

Bab-Jehová soged: “Bemar-Israel-dulemar ichee-gue-inigwele, melle be gwayemalo. Bemar-Jacob-wagan-gandik-gusur-inigwele, melle be gwayemalo. Ar an-sunnagwad an be-bendakoed. Ani an Israel-dulemar-e-Bab-Dummad-Isligwaled gued. Ar an be-Bendakedid.

Bab-Jehová sogdebalid: “Israel, bedi an-maiga gued. Be, Jacob-wagan, an bemar-susadid, An-ai-Abraham-wagan be gumalad.

Yalamar-biribali, diwarmar-iirmakega an imakoed, nebaganba ibemargi-dii-aryogega an imakoed, nega-dulesulidganba dii-ambikuega an imakoed. Neg-dinnaganba ibemar-aryomai an imakoed.

Bab-Dummad sogdebalid: “Dule-wilemalad, degi, dule-ibmar-abesa-gudimalad, gobega dii amididamalad, degi-inigwele, amidasurmalad. Uku-uku-itogedba gwabin-dinna itogusdamalad. Degi-inigwele, ani Bab-Jehová-guedgi an amar-itogoed. Ani an Israel-dulemar-e-Bab-Dummad-guedgi, an amar walagwen metosulid.

¿Doa weyob imaksa? ¿Doa nabir we-ibmar bursuli-guega imaksa? ¿Doa gebesailaunni dulamar-ainakwedanikidse gocha? Ani an Bab-Jehová guedi, bela we-ibmarmar imaksad. Ani an gebesailaginedid, ani an berguedse gudii gubaloed.

Nega-dulesulidganbali, urwarmar, acacia-sapimar, an digoed. Baryawarmar, degine, olivo-sapimar an digoed. Napa-isganagi, ciprés-sapimar an digoed, pino-warmar, degi, abeto-sapimar an digoed. Adi, dulemar dakega, degi, wisgumalaga, egi binsamalaga, degi, magar-itomalagar, Bab-Jehová we-ibmarmar-imaksaye, Israel-dulemar-e-Bab-Dummad-Isligwaledi, we-ibmarmar obinnisye.”