Жаратылыу 26
26
Исхакъ бла Абимелек
1Ибрахимни заманында болгъан алгъыннгы ачлыкъдан сора да, ол жерде ачлыкъ болгъан эди. Алай бла Исхакъ, Филистни патчахы Абимелекге, Герар шахаргъа баргъанды.
2Раббий Исхакъгъа кёрюнюп былай айтханды:
– Мисирге барма, Мен санга айтырыкъ жерде жаша. 3Ол жерде кёчюп айлан. Мен сени бла боллукъма эмда санга берекет берликме, нек десенг, битеу бу жерлени санга эм туудукъларынга берликме эмда атанга, Ибрахимге этген антымы толтурлукъма. 4Туудукъларынгы кёкдеги жулдузлача кёп этерикме эмда битеу бу жерлени туудукъларынга берликме. Сени урлугъунгу юсю бла битеу жерни миллетлери алгъышлы боллукъдула. 5Ибрахим Мени сёзюме тынгылап, Мени фарызымы, буйрукъларымы, жорукъларымы эм насийхатларымы тутханы ючюн, алай этерикме.
6Алай бла Исхакъ Герарда тохтагъанды. 7Ол жерни адамлары анга къатыныны юсюнден соргъанда, Исхакъ: «Ол мени эгечимди», – дегенди. «Къатынымды», – дерге уа къоркъгъанды. «Рабийгъат чырайлы тиширыуду. Бу жерни адамлары мени аны ючюн ёлтюрмеге эдиле», – деп ойлагъанды.
8Исхакъ анда кёп заман жашагъандан сора уа, Филистни патчахы Абимелек терезеден къарап, Исхакъ къатыны Рабийгъатны эркелете тургъанын кёргенди. 9Абимелек Исхакъны чакъырып:
– Ол сени къатынынгды да! Эгечимди деп, сен нек айтханса? – дегенди.
– Мен аны амалтын жоюлмагъа эдим деген сагъышдан айтханма, – дегенди Исхакъ.
10Абимелек:
– Сен бизге алай нек этген эдинг? Халкъымдан биреулен сени къатынынг бла жатса, сен бизни терсликге тюшюрюп къоярыкъ эдинг да, – дегенди.
11Сора Абимелек битеу халкъгъа:
– Бу адамгъа бла аны къатынына ким тийсе да, ишексиз ёлтюрюллюкдю, – деп буйрукъ бергенди.
Къуюла ючюн филистлиле бла даулаш
12Исхакъ ол жерде урлукъ себип, ол жыл жюз кере кёп арпа тирлик алгъанды. Раббий анга аллай берекет бергенди. 13Исхакъ бай болгъанды, сыйы бекден бек кётюрюлюп барып, уллу байлыкъгъа жетгенди. 14Аны къой-эчки сюрюулери да, тууар мал сюрюулери да, кёп къуллары да болгъанындан, филистлиле анга зарланып башлагъандыла.
15Филистлиле, аны атасы Ибрахим сау заманда атасыны къуллары къазгъан битеу къуюланы оюп, топуракъ къуюп басдыргъандыла.
16Абимелек Исхакъгъа:
– Кет бизни арабыздан. Сен бизден эсе къарыулу болгъанса, – дегенди.
17Алай бла Исхакъ андан кетип, чатырлары бла Герар ёзенинде жерлешип, анда жашагъанды. 18Сора Исхакъ, атасы Ибрахимни заманында къазылгъан, аланы уа филистлиле Ибрахим ёлгенден сора оюп басдыргъан къуюланы жангыдан къазгъанды эмда алагъа атасы атагъан атланы атагъанды.
19Исхакъны къуллары ёзенде къую къаза тургъанда, анда баргъан суу шауданны тапхандыла. 20Алай а Герарны сюрюучюлери Исхакъны сюрюучюлери бла: «Суу бизникиди», – деп даулашхандыла. Ала даулашханлары ючюн Исхакъ къуюгъа Эсек#26:20 Эсек атны магъанасы – «даулашыу». атагъанды. 21Башха къую къазгъандыла да, аны юсюнде да даулашхандыла. Исхакъ анга Ситна#26:21 Ситна атны магъанасы – «душманлыкъ». атагъанды. 22Алайдан кетип, ол башха къую къазгъанды, аны юсюнден а арада сёз жюрюмегенди. Исхакъ: «Энди Раббий бизге эркин жер берди, жер башында биз да кёбейирбиз», – дегенди да, анга Рехобот#26:22 Рехобот атны магъанасы – «кенглик». атагъанды.
23Андан Исхакъ Беэр-Шебагъа кёчгенди. 24Ол кече Раббий анга кёрюнюп:
– Мен атанг Ибрахимни Аллахыма, – дегенди. – Къоркъма, Мен сени блама. Къулум Ибрахимни хатеринден санга алгъыш берликме да, туудукъларынгы кёп этерикме.
25Сора Исхакъ анда къурман этилиучю жер къурагъанды да, Раббийни атын айтып, дууа этгенди. Анда чатырын къургъанды, Исхакъны къуллары да ол жерде къую къазгъандыла.
26Ол заманда Герардан Абимелек, аны ёзюрю Ахузат эм аскер башчысы Пикол Исхакъгъа келгендиле. 27Исхакъ а алагъа:
– Сиз манга нек келгенсиз? Мени кёрюп болмай, къатыгъыздан къыстап ийген эдигиз да! – дегенди.
28– Раббий сени биргенге болгъанын ачыкъ кёргенбиз, – дегендиле ала, – ол себепден бизни бла сени арабызда ант келишиу болсун дегенбиз. Кесамат этейик! 29Биз санга тиймегенибиз кибик, сен да бизге аманлыкъ этме. Биз санга жаланда ахшылыкъ этип туруп, сени сау-саламат жибергенбиз. Энди уа сен Раббийни алгъышлы адамыса.
30Исхакъ алагъа той-оюн этгенди, ала ашап, ичгендиле. 31Эрттенликде эртте туруп, бир-бирлерине ант этгендиле, сора Исхакъ аланы ашыргъанды, ала да андан жарашыулукъ бла кетгендиле.
32Ол кюн окъуна Исхакъны къуллары келип, ала къазгъан къуюну юсюнден анга билдирип:
– Биз суу тапханбыз! – дегендиле.
33Исхакъ да къуюгъа Шиба#26:33 Шиба атны магъанасы – «ант». атагъанды. Ол себепден ол шахарны аты бюгюннге дери да Беэр-Шебады.
Эсауну къатынлары
34Эсау къыркъ жыллыкъ болуп, хетли Беерийни къызы Юдитни эм хитли Элонну къызы Басематны кесине къатыннга алгъанды. 35Ала уа Исхакъгъа бла Рабийгъатха жюрек ауурлукъ эдиле.
Επιλέχθηκαν προς το παρόν:
Жаратылыу 26: МалкъСК
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Институт перевода Библии, 2020-2024