Matiu 2
2
Ia Sigho Ka Ira Mane Avoavohodi Fateo Mo
1Zisas neke doli ka ia malau faana Betilehemu aianihi Zudia, ka ia fafata tetu Mane Ginituakelana Herodi. Leghuna ianimu lama, to la dufu ghu Zerusalemu keha mane sighodi fateo mo ta avoho fikifokori ira babaghunu, 2dike la notoho ghu, “?Hae mo mu ne urahana ia gogoso ta mala meha mane ginitaukeladi ira Ziu? Ghai nake finini ia nona babaghunu vona mehanana visi fateo mo, nake meha ghu mala va totoana ghinina.”
3Ne nomohi ghu iahi Herodi ia Mane Ginitaukela, manei neke puina age anga ghena fuludu neke pisipasa ghini ghu, taghe iala molamo dike ghua ira leghu noni haroharo nga Zerusalemu, e ghua. 4Kudo varighara ghidi tuna ira hiama ta kenu nia ira mane ta vari va kakahe ghini ia vetula beana ka God, neke ghua manei. “?Aiani hae mo mu ta age urahana ghatu ia Mesaea?” ne ghua notohorira. 5“Ka ia malau fafaana Betilehemu ani Zudia,” di ghua ghini, “vununa iahi mu neke kangavina ia porofeti:
6“‘Betilehemu, ka ia kava Zudia,
agho mu e deo go meha va nonoghana ghu
ka ira malau leghaha ta kenu aianihi Zudia,
vununa ka agho ta la au mehana kaike mala babatu,
mala batu ghidira ira nogu noni Isiraeli
taghe kaike noni ta kopunai sipisipi
ta batu ghidi ira nona sipisipi ta ghuana.’#2:6 Maeka 5:2”
7Ianimu tuna ghe, neke kudo poikari nga Herodi ira mane sighodi fateo mo, neke hadu kavei ghu ka maneri, ia torai fafata neke podolono ia babaghunu. 8Ianimu tuna ghe, neke tuhu laori nga Betilehemu, neke va kahe ghidi ghu, “O lao, o toraina la hadu va veha mehai ghu gogoso ani. Noto la finini la, o ke la leghu meha, o meha va kahe ghinagu ghu, a boka lao haro ghu molamo ara, a la va totoana ghini ghu.”
9Leghuna nonomoho ka ia Mane Ginitaukela ghe, dike ghahe nga tuna ira mane sigho. Ia babaghunu dike fininio fateo mo, neke podolo ma neke lao ghu visi kenudi mo, neke vuhai la nodo ghu ka ia fatena malau neke auno ia gogoso. 10Di finini ghu babaghunu ani, maneri dike puina age va ghazaghaza fuludu. 11Ka ia la hagheledi ka ia suga, maneri dike la finini ia rekaha gogoso tei nia Mere ia nona uke e ghua, dike la torongaghituturu hinae ghu va totoana ghinina. Ianimu tuna ghe, dike hio kaveri nga ira nodi namaha ta toraina vona tabaradi, ira golu, inisenisi nia ia sedi ta va kudo ghini maa e ghua, dike vanani lao ghu. 12Ke ghahe vai leghudina mu, maneri dike leghu ka ia malaudi ka keha hanganana mo, vununa God neke torai kahe ghidi va gigima ka ia epu baghunai taka ke leghu laona ghu maneri ka Herodi.
Ia Pelo Lao Izipi
13Ka leghuna tato hoatai ghahero ira mane sigho, kaike engizeli ka ia Lod neke podolo ghini Zosepu ka ia epu baghunai, “Tetu vona, o pelo lao ghu Izipi taremehana gogoso tei nia, nia nona uke e ghua,” neke ghua ghini. “O la au ma aianimu, a vuhai ke va kahe ghini ghau ghu ara ta ke leghuna, vununa Herodi e age ghorevaha ghini ghatu haduina rekaha nia, mala va lemeina.” 14Ka redu ianimu, Zosepu neke tetu vona neke ghahe ghu laona Izipi taremehana ia rekaha gogoso, nia Mere ia nona uke, e ghua, 15dike la au ghu aianimu, neke vuhai leme ghu Herodi. Iahi lamu va ghuduvina heve neke kaheio ia Lod ka ia porofeti: “Ara nake kudo kavei ia Tuugu aianihi Izipi,”#2:15 Hosea 11:1 ia ta ghua.
Herodi Ne Atunguri Ira Rekaha.
16Ne age hadu kavei ghu Herodi ira mane sighodi fateo mo dike seke ghini ta ghuana, manei neke toraina age ngaziri ghena. Tuhu laori tuna ira mane magara ani Betilehemu nia ka ira malau gheremena mo neke ghua manei, ta mala la atungurira leghu rekaha mane ta palu komuhudi nga ta vai hinae ghu, leghuina neke va kahe ghinio ira mane sigho ghinina ia fafata neke kusu podolono ia babaghunu. 17Iahi lamu tuna mu age hohoghonana, heve neke kahe kenuio Zeremaea ia porofeti:
18“Kaike leo di nomoho laoina Rama,
ia nakele adoꞌado nia kakato, e ghua.
Reseli ne nakele ghidi ira nona rekaha;
deona ge kabai va kakapoti ghu,
vununa maneri to leme ghedi.”#2:18 Zeremaea 31:15
Zisas Ne Leghu Nazareti
Luku 2:39
19Leghuna ia lemena Herodi, kaike engizeli ka ia Lod neke podolo ghini Zosepu ka ia epu baghunai aianihi Izipi, 20neke kahe ghua ghu iahi, “Tetu vona, o ke hioi leghu laoi ghu ani Isiraeli rekaha nia taremehana nona uke, vununa ira noni dike kabai va lemeio rekaha nia mu, to leme.”
21Tetu vona tuna ge hioi ghu ia rekaha taremehana nona uke geto ke leghu lao ghu ka ia kava Isiraeli neke ghua Zosepu. 22Ghe ne age nomohi ghu manei Akeleasi neke tetu holarina nona mama Herodi ani Zudia ta ghuana, Zosepu neke maughena ke laona aianimu. Ianimu tuna ghe neke va kahe ghinini nga tuna Zosepu ka keha epu baghunainani ta mala ke laona manei ani Galili. 23Lao tuna gedi la au ghu ka ia malau fafaana ta va kudo ghini Nazareti, dike ghua. Heve dike kaheio ira porofeti mu neke to meha hohoghona ghu: “Manei edi age va kudo ghini manena Nazareti,” ia ta ghua.
Επιλέχθηκαν προς το παρόν:
Matiu 2: kji
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2022, Islands Bible Ministries. All rights reserved.