Matiye Túlɓay
Túlɓay
Bélaɓay a Matiye, saɓay hí̧ njuku láɓulawri ka ɓá Juyífri. Kú tu Mbété a Tâ̧wké ɓá táŋáké. Matiye tɔ́ʼɔ Zezú ɓá báŋa njuku ka niŋ hɛ̧ a kú ɗé ka̧n ɓil Mbétékéri, a kaw kɛ̧́ ɓayké a sêe a fékéri. A ɓil nâm ka Matiye ɗé mbété nɛ́, njuku láɓulawri ka ɓá Juyífri, kú ní kuriri ɓá ŋgɛ̧́náké a vûn gɔ́ŋ Gáŋvbôn a kuriri. Nǎŋnɔ́, kú tɛ̧́ a niŋ mára̧, a nyá njukuri ka zi tí ɓá Juyífri yáy, gí ɓil mára̧ké kɔ́.
Matiye kó Zezú ɓá báŋa Gáŋnjuku ka saɓay a kpɔ́ŋa sé tûl hɛ̧ ka Gáŋvbôn zi ɓá njuku láɓulawri kú niŋ. Zezú ɓá njuku ka tɔ́ʼɔ ŋgboro lá ɓil sáŋna a Mbété a tâ̧wké hí̧ njukuri. Ké ɓá Mɛsí ka Juyífri kaw zoko nɛ́. Ka ŋgboro saɓay a pû a Gáŋvbôn, ké sa ɓá: Gáŋvbôn ɓá Gáŋmbây, káwa mbây a mɛ̌ tí a tísiri dá.
Bélaɓay a Matiye, sé mbêw kuu gázín mbété a Bélaɓay a sáykéri.
A ɓil mbété a mɛ̌, Matiye mára̧ ɓay a Zezú kɔ̧ ɓil gáŋ ɓayri ndíɓí: Ɓay ka tí a Matiye 5 sé ka̧ 7, malé ɓay a Zezú ka tûl kon, ka kó bɔʼɔséna a gunbɛʼɛri. Ɓayké kɔ́, kó káwa a njukuri kuu Gáŋvbôn. Ɓay ka tí a ɓil mbété a Matiye 10 sé ka̧ 12, hí̧ nzáʼa nzɛ́rɛ hí̧ njukuri ka e sé tɔ́ʼɔ Bélaɓay a ndísɛ̌ʼɛ. Ɓay ka tí a ɓil mbété a Matiye 13 sé ka̧ 17, mára̧ gáŋ ɓayri ka kó tâ̧w hɛ̧ri̧ ka Zezú sa hí̧ njukuri, ɓay kú tu péna ka Gáŋvbôn kaw ɓá Mbây, ka a niŋ. Ɓay ka tí a ɓil mbété a Matiye 18 sé ka̧ 23, saɓay sé ŋgboro káwa mbêw a bazeŋ a nyînrí̧ a ɓil mára̧ a njuku láɓulawri. A ɓay ka tí a ɓil mbété a Matiye 24 sé ka̧ 25, saɓay sé ŋgboro káwa a gunbɔʼɔ a Zezúri, ɓay a zoko ndéna a Gáŋvbôn a kɔ́rɔ́ké.
A títáʼaké rá̧ kɔ́rɔ́ ɓaykéri, saɓay ka kó záŋmári̧ ka Zezú ŋgɛ́rɛ, rá̧ lâʼari a ké hí̧ njukuri. Ké sa ɓayri ka ɓá njukuri kɛrɛ ɓay rá̧ ɓay manyɓayri kuu gáŋnjuku a Juyífri.
A títáʼa Bélaɓay, Matiye saɓay a mbuŋa rá̧ káwa a lélé a Zezú, mbây a Juyífri (Mat 1 sé ka̧ 2). A kɔ́rɔ́ Bélaɓayké, kú ŋgbá Zezú, a í nɛ́ (Mat 27). Dáy Gáŋvbôn toma nɛ́ ka hûl. Zezú gí tɔ́ʼɔ mûn nɛ́ hí̧ gunbɛʼɛri, a sa hí̧ kuriri ɓá kú sé tɔ́ʼɔ Bélaɓay a mɛ̌ hí̧ njukuri too ka tísiri (Mat 28). A hí̧nzáʼa ɓá: « Mi e kuu wǎyri dát ka̧ sêe a kɔ́rɔ́ké.» (28:20).
Ɗambɛl rá kú mbuŋ Zezú, kú ɗí nɛ́ ɓá Emanuwɛl, zi ɓay a sa ɓá «Gáŋvbôn e kuu manárí̧» (1:23). Zezú ɓá têm a Gáŋvbôn a bazeŋ a njukuri.
Επιλέχθηκαν προς το παρόν:
Matiye Túlɓay: pnz
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2023 CABTAL