མེ་ཐིའུ་ལེའུ་ 17
17
ཡེ་ཤུ་སྐུ་གཟུགས་ཀྱི་བཀྱག་འགྱུར་བའི་སྐོར།
1ཉིནམ་དྲུག་གི་ཤུལ་ལས་ ཡེ་ཤུ་གིས་ པེ་ཏྲོ་དང་ ཡ་ཀོབ་ དེ་ལས་ ཡ་ཀོབ་ཀྱི་སྤུན་ཆ་ ཡོ་ཧ་ནཱན་ཁོང་གསུམ་རྐྱངམ་གཅིག་འཁྱིད་དེ་ ཡར་སྒང་མཐོ་ས་ལུ་བྱོན་ཏེ། 2ཡར་སྒང་གུ་ཕེབསཔ་ད་ ཡེ་ཤུ་གི་སྐུ་གཟུགས་ཀྱི་བཀྱག་འགྱུར་ས་ ཁོང་གིས་མཇལ་ནུག་ ཁོ་གི་ཞལ་ཉིམ་བཟུམ་སྦེ་ཤར་ཏེ་འོད་འཐོནམ་མ་ཚད་ ཁོ་གི་ན་བཟའ་ཡང་དཀརཔོ་ལུ་འགྱུར་ཏེ་འོད་ཅེམ་ཅེ་སྦེ་སོང་ནུག 3དེ་འཕྲོ་ལས་ མོ་སཱེས་དང་ ཨེ་ལི་ཡ་ དཔྱད་རིག་མེད་སི་སི་སྦེ་ ཡེ་ཤུ་དང་གཅིག་ཁར་གསུང་གྲོས་གནང་ས་མཇལཝ་ད། 4པེ་ཏྲོ་གིས་ཡེ་ཤུ་ལུ་ གཙོ་བོ་ལགས་ང་བཅས་ནཱ་ལུ་ཡོད་ནི་དེ་གིས་ ལེགས་ཤོམ་ཨིན་མས་ ནཱ་གིས་ཐུགས་དང་ལྡན་པ་ཅིན་ ང་གིས་དབུ་གུར་གསུམ་སྤུབ་གེ་ གཅིག་ནཱ་གི་དོན་ལུ་ གཅིག་ མོ་སཱེས་ཀྱི་དོན་ལུ་ གཅིག་ ཨེ་ལི་ཡ་གི་དོན་ལུ་ཟེར་ཞུ་ནུག 5ཁོ་གིས་དེ་སྦེ་ཞུ་སྟེ་སྡོད་པའི་བར་ན་ ཁོང་གི་གུ་ལས་མར་ས་སྨུག་འོད་ཅེམ་ཅེ་སྦེ་སྤུབ་འོངས་ཏེ་ ས་སྨུག་འདི་ནང་ལས་གསུང་སྐད་གཅིག་གིས་ ཨ་ནི་ངེ་གི་བུ་གཅེས་ཤོས་ཕངས་ཤོས་དེ་ཨིན་ ཁོ་ལུ་བལྟ་སྟེ་ ང་གནམ་མེད་ས་མེད་སེམས་དགའཝ་ཨིན་ ཁོ་གིས་སླབ་མི་ཁ་ལུ་ཉན་ཞིག་ཟེར་གསུངས་ནུག 6སློབ་མ་ཚུ་གིས་དེ་གོཝ་ད་ གནམ་མེད་ས་མེད་འདྲོགས་ཏེ་ ས་ཁར་ག་ཕུབ་བརྐྱབས་ཏེ་གྱེལ་སོང་ནུག 7དེ་འབདཝ་ད་ ཡེ་ཤུ་བྱོན་ཏེ་ ཁོང་གི་གཟུགས་ཁར་འདོགས་སྦེ་ ཡར་ལོངས་ཤིག་ འདྲོག་མི་དགོ་ཟེར་གསུངས་ནུག 8དེ་ལས་ཁོང་གིས་ཡར་བལྟཝ་ད་ ཡེ་ཤུ་མ་གཏོགས་གཞན་ག་ཡང་མ་མཐོང་པས།
9ཁོང་ཡར་སྒང་གུ་ལས་མར་འོངམ་ད་ ཡེ་ཤུ་གིས་ཁོང་ལུ་ ཁྱེད་ཀྱིས་མཐོང་མི་ཚུ་ མིའི་བུ་ཤི་ས་ལས་གསོན་པོ་སྦེ་ལྷོང་མ་གནང་ཚུན་ཚོད་ ག་ལུ་ཡང་མ་སླབ་ཟེར་བཀའ་གནངམ་ད། 10སློབ་མ་ཚུ་གིས་ཡེ་ཤུ་ལུ་ ག་ཅི་འབད་བཀའ་ཁྲིམས་ཀྱི་སློབ་དཔོན་ཚུ་གིས་ ཨེ་ལི་ཡ་ཧེ་མ་ལོག་བྱོན་དགོ་ཟེར་སླབ་སྨོ་ཟེར་ཞུ་ནུག 11དེའི་ལན་ལུ་ཡེ་ཤུ་གིས་ དོན་ལས་རང་ཨིན་ ཨེ་ལི་ཡ་འདི་ཧེ་མ་བྱོན་ཏེ་ ག་ར་རིམ་པ་བཞིན་དུ་ཀྲིག་ཀྲི་སྦེ་མཛད་འོང་། 12དེ་འབདཝ་ད་ ང་གིས་ཁྱེད་ལུ་སླབ་དོ་ ཨེ་ལི་ཡ་ཧེ་མ་ལས་བྱོན་ཚར་ཡི་ དེ་འབདཝ་ད་ ཁོང་གིས་ཁོ་ལུ་ངོ་མ་ཤེས་པར་ ཁོང་རང་གི་འདོད་པ་ལྟར་དུ་ཁོ་ལུ་འབད་ཡི་ དེ་བཟུམ་སྦེ་རང་ མིའི་བུ་ཡང་ཁོང་གི་ལག་པར་སྡུག་བསྔལ་མྱོང་དགོ་ཟེར་གསུངས་ཚརཝ་ད། 13ཡེ་ཤུ་གིས་ཁྲུས་གསོལ་བྱིན་མི་ ཡོ་ཧ་ནཱན་གྱི་སྐོར་ལས་ གསུངསམ་ཨིན་མས་ཟེར་སློབ་མ་ཚུ་གིས་ཧ་གོ་ནུག།
འདྲེ་གདོན་འཛུལ་མི་ཨ་ལོ་གཅིག་ལུ་དྲགཔ་མཛད་པའི་སྐོར།
14ཡེ་ཤུ་དང་སློབ་མ་ཚུ་སྒང་གུ་ལས་མར་འབབ་སྟེ་ མི་དམངས་སྡོད་སར་འབྱོནམ་ད་ མི་གཅིག་འོང་སྦེ་ཡེ་ཤུ་གི་སྐུ་མདུན་ལུ་པུས་མོ་ས་ཁར་བཙུགས་སྦེ་ཞུ་ནུག 15གཙོ་བོ་ལགས་ ངེ་གི་བུ་ལུ་སྙིང་རྗེ་གཟིགས་གནང་ ཁོ་ལུ་བརྒྱལ་ནད་ཕོག་སྟེ་ ཁོ་ཚར་ལེ་ཤ་མེ་དང་ཆུ་ནང་གྱེལ་ཏེ་ གནམ་མེད་ས་མེད་སྡུག་བསྔལ་མྱོང་སྟེ་ཡོད། 16ང་གིས་ཁོ་ནཱ་གི་སློབ་མ་ཚུ་སྡོད་སར་འཁྱིད་སྐྱེལ་ཡི་ དེ་འབདཝ་ད་ ཁོང་གིས་དྲགཔ་བཟོ་མ་ཚུགས་ཟེར་ཞུཝ་ད། 17ཡེ་ཤུ་གིས་ ཨ་ཁའི་ ཁྱེད་དད་པ་མེད་མི་དང་ ཚུལ་དང་མ་མཐུན་མིའི་མི་རབས་ཚུ་ ང་ཁྱེད་དང་གཅིག་ཁར་ག་དེམ་ཅིག་སྡོད་ནི་ ག་དེམ་ཅིག་ཚུན་ཚོད་ཁྱེད་ལུ་བཟོད་པ་བསྒོམ་སྡོད་ནི་སྨོ་ བུཚ་འདི་ནཱ་ང་སྡོད་སར་འཁྱིད་ཤོག་ཟེར་གསུངས་ནུག 18བུ་འདི་འཁྱིད་འོངམ་ད་ ཡེ་ཤུ་གིས་འདྲེ་གདོན་དེ་ལུ་བཀའ་བཀྱོན་གནང་སྟེ་ འདྲེ་གདོན་འདི་ཐོན་འགྱོ་སྦེ་ བུ་འདི་དེའི་བསྒང་ལས་ར་དྲག་སོང་ནུག 19དེའི་ཤུལ་ལས་མི་གཞན་ག་ཡང་མེདཔ་ད་ སློབ་མ་ཚུ་ཡེ་ཤུ་བཞུགས་སར་བཅར་ཏེ་ ང་བཅས་ཀྱིས་ག་ཅི་འབད་འདྲེ་གདོན་དེ་ བཏོན་བདའ་མ་ཚུགསཔ་ཨིན་ན་ཟེར་དྲི་བ་ཞུཝ་ད། 20དེའི་ལན་ལུ་ཡེ་ཤུ་གིས་ ག་ཅི་སྨོ་ཟེར་བ་ཅིན་ ཁྱེད་ལུ་དད་པ་ཆེ་ཏོག་ཏོ་མིན་འདུག་ ང་གིས་ཁྱེད་ལུ་དོན་ལས་རང་སླབ་ཨིན་ ཁྱེད་ལུ་དད་པ་པད་དཀར་སོན་བཟུམ་སྦེ་ཆུང་ཀུ་གཅིག་ཡོད་པ་ཅིན་ ཁྱེད་ཀྱིས་ཨ་ནི་སྒང་འདི་ལུ་ ནཱ་ལས་ཕར་སོང་ཟེར་སླབ་རུང་ སྒང་འདི་ཕར་འགྱོ་འོང་ ཁྱེད་ཀྱིས་འབད་མ་ཚུགསཔ་ག་ནི་ཡང་མེད་ཟེར་གསུངས་ནུག 21#༡༧:༢༡། ཧེ་མ་གི་བློ་གཏད་ཚུགས་མི་དེབ་ཚུ་ནང་ལུ་ ཚིག་བཅད་༢༡་དེ་མིན་འདུག་ དེ་འབདཝ་ད་ཚིག་བཅད་༢༡་ནང་བྲིས་མེ་དེ་ མཱར་ཀུ་གི་བྲིས་མི་གཏམ་བཟང་ ལེའུ་༩:༢༩་ལུ་ཐོབ་ཚུགས་ དེ་ནང་ལུ་ ཨ་ནི་བཟུམ་གྱི་འདྲེ་གདོན་ལུ་ སྨོན་ལམ་གྱིས་མ་གཏོགས་གཞན་ག་ཅི་གིས་ཡང་ བཏོན་བདའ་མི་ཚུགས་ཟེར་ བྲིས་ཏེ་ཡོད།
22དེ་ལས་ཡེ་ཤུ་དང་ཁོ་གི་སློབ་མ་ཚུ་ ལུང་ཕྱོགས་ ག་ལི་ལི་ལུ་འཛོམས་ཞིནམ་ད་ ཡེ་ཤུ་གིས་ཁོང་ལུ་ མིའི་བུ་དེ་ལུ་མི་ཚུ་གི་ལག་པར་སྤྲོད་དེ་བསད་འོང་། 23དེ་ལས་ཉིནམ་གསུམ་པ་ལུ་ ཁོ་ཤི་ས་ལས་ཡར་གསོན་པོ་སྦེ་ལྷོང་གནང་འོང་ཟེར་གསུངསམ་ད་ ཁོང་སློབ་མ་ཚུ་གནམ་མེད་ས་མེད་སེམས་སྐྱོ་ནུག།
མཆོད་ཁང་གི་ཁྲལ་བཏབ་ནི་གི་སྐོར།
24ཡེ་ཤུ་དང་ཁོ་གི་སློབ་མ་ཚུ་ཁྲོམ་ ཀ་ཕཱར་ནུམ་ལུ་ལྷོདཔ་ད་ ཡ་ཧུ་ད་པའི་མཆོད་ཁང་དེ་གི་ཁྲལ་བསྡུ་མི་ཚུ་ པེ་ཏྲོ་སྡོད་སར་འོངས་ཏེ་ ཁྱེད་ཀྱི་སློབ་དཔོན་གྱིས་མཆོད་ཁང་གི་ཁྲལ་སྤྲོདཔ་ཨིན་ན་ཟེར་དྲིསཝ་ད། 25པེ་ཏྲོ་གིས་ཁྲལ་དེ་སྤྲོདཔ་ཨིན་ཟེར་སླབ་ནུག་ དེ་ལས་ པེ་ཏྲོ་ཁྱིམ་ནང་ན་འཛུལཝ་ད་ འགོ་དང་པ་རང་ཡེ་ཤུ་གིས་ཁོ་ལུ་ དབའེ་ སི་མཱོན་པེ་ཏྲོ་ ཁྱོད་ཀྱིས་མནོ་བསམ་ག་དེ་སྦེ་གཏངམ་སྨོ་ ནཱ་འཛམ་བུ་གླིང་ནང་གི་རྒྱལཔོ་ཚུ་གིས་ཁྲལ་ག་ལས་ལེནམ་སྨོ་ ཁོ་རང་གི་བཟའ་ཚན་ཚུ་ལས་ལེནམ་ཨིན་ན་ ཡང་ན་ཁོང་རང་གི་མི་སེར་ཚུ་ལས་ལེནམ་ཨིན་ན་ཟེར་དྲི་བ་གསུངསམ་ད། 26པེ་ཏྲོ་གིས་མི་སེར་ཚུ་ལས་ལེནམ་ཨིན་ཟེར་ཞུ་ནུག་ དེ་ལས་ཡེ་ཤུ་གིས་དེ་སྦེ་འབད་བ་ཅིན་ ཁོང་རང་གི་བུཚ་ཚུ་གིས་ཁྲལ་སྤྲོད་མི་དགོ་པས། 27ཨིན་རུང་ ང་བཅས་ཀྱིས་ཁོང་ལུ་ཙིགཔ་ཟ་བཅུག་ནི་མི་འོང་ ཁྱོད་རང་མར་མཚོ་ནང་སོང་སྦེ་ཀོ་མ་བརྐྱབས་ཏེ་ཉ་གཅིག་བཟུང་ཤིག་ འགོ་དང་པ་བཟུང་མི་ཉ་དེ་འཐུ་སྟེ་དེ་གི་ཁ་ཕྱེ་སྟེ་བལྟ་ ཁ་ནང་ལས་ཁྱོད་ཀྱིས་དངུལ་ཀྲམ་བཞི་འབད་མི་གཅིག་ཐོབ་འོང་ དེ་འབག་སྟེ་ཁྱོད་དང་ངེ་གི་ཁྲལ་སྦེ་སྤྲོད་ཟེར་གསུངས་ནུག།
Επιλέχθηκαν προς το παρόν:
མེ་ཐིའུ་ལེའུ་ 17: dzoD
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2012, Wycliffe Bible Translators, Inc. All rights reserved