Mata 3
3
Guma Mbulum ana Yuhana metsìlwìɓè à mburma a yam
a tsik a
Markus 1:1-8; Luka 3:1-18; Yuhana 1:19-28
1Akahər ata ka, wele duwa a riŋ a pàt aba, zləm ŋgar Yuhana. Ŋgat ka, a tsilwiɓewa à mburma a yam. Ŋgat a ndzawa ka, i dala i kusak ika ahəɗ Yuda. A tsikewa bazlam Mbulum a gà mburma i fata. 2A gwaɗawa a tar ka: «Mbəɗum à madzala gà gər kurum a təv Mbulum, aɗaba mekwere ŋgar aka à mendzera.» 3Aɗaba Yuhana ka, wele ana Ezaya mala məma à guma Mbulum a tsik ahər akahər ata ya. A gwa ka:
«Mburma ŋa a riŋ i kusak,
à fèfil a ŋgəlakəkka, a gweɗe a:
<Làmbaɗum aba vatwa a Əbay a gəzləŋ kurum a.
Ki fefetwimer a fehhè lele.> «*fa*
4Yuhana ata a ndzawa ka, nda gà petek ŋguz zlìgwèmè, madànà ŋa i magər ba ya nda kwiye. Dukw mezime ŋgar ka, say məpapəɗa heyew, nda mazəma amum ana i dala ya ɗekɗek. 5Akahər ata ka, gà mburma ana i Yeruzalem a, nda gà na a riŋ ika ahəɗ Yuda ya, dite nda gà na ta mbera a dulwa Yurdan a tserdze, te dawaha a təv ŋgar. 6Tàa daha ka, ti ɗifewa à bakal tar aka miɗ mburma tserdze, dite Yuhana a tsilwiɓewa à tar a yam i dulwa Yurdan i fata.
7Ama Yuhana a fə̀r ka, gà asiŋ gà *Farisa nda gà *Saduki riŋ ti dere a a təv ŋgar a hinne mbaŋa. Aɗaba a sàs a tar ka, mà tsilwiɓ à tar a yam. A gwaɗa a tar: «A kurum gà ɓəza palas aaha. Weke na a gwaɗa a kurum ka, ki ta beywim a i matsəɓatsəɓ Mbulum ana a dere a mba ya seyiŋ a? 8Ama kinehe ka, gwim gà megemir ana, dite mburma ti sir a dər ka, kàa mbəɗum à madzala gà gər kurum a təv Mbulum kaɗəŋ, kàa miyakum à dukw kurum ana ŋgwala tsa miviye ŋa ya ya. 9Ama kurum ka, ka tə dzalum i gəzləŋ kurum, kù gwaɗum ka, mər gà ɓəza Abəraham tsam ana, làŋa ya tsa. Aɗaba iye ihər i gweɗe a kurum ŋa: Mbulum a sle aà mene a à gà kur aaha kinehe ya, kamala gà ɓəza Abəraham a mbaŋa.
10Iye ihər i gweɗe a kurum a asa: Ku kinehe tekeɗe, zlaba a riŋ matasla ŋa hapəpəpa, na tì ses a dər dizl ɗaf a. Aɗaba taŋa dizl ana a we a ŋgwal ŋa tsiye ka, tì sèsere a i biye ya nda zlile ŋa dze, dite ta wene a nda akwa, kamala megweɗe ya ka, seriye Mbulum à gis a gà na ta ge a dukw ana ŋgwal ŋa tsiye. 11Iye kinehe ka, i tsilwiɓ à kurum a ka, a yam pəra, dite mburma tə sər dər, kàa mbəɗum à madzala gà gər kurum a təv Mbulum. Ama wele ana a dere a i dəba gà ya ka, à zè a iye nda ndzəɗa kweleŋ fètìte. Ŋgat ka, i sle a aà mesirikaha a təv ŋgar aà mazlàrra tsàpà i sik a tsa. Ama ŋgat aka dara ka, a tsilwiɓ à kurum a ka, a yam asa tsa, say a Mezite Mesife Mbulum, nda seriye ŋgar ana a ge a nda akwa ya asa mbaŋa. 12Aɗaba ŋgat ka, a riŋ nda gà kəzləm məvàvàyà duwa i ahər ŋgar. A tsire a ikaba gà daw nda dzəndzar a. Daw ŋana ka, à dze a a awura ŋgar. Ama dzəndzar ka, a wene a iɗəm a nda akwa ana a mbete a tsa aà biybiy a.»
Metsìlwìɓè à Yesuw ana Yuhana a tsilwiɓ dər a yam a
Markus 1:9-11; Luka 3:21-22; Yuhana 1:32-34
13I dəba ŋa ya, Yesuw a dara i Galile ya, a təv Yuhana a dulwa Yurdan a, aɗaba a waya mà tsilwiɓ à ŋgat a yam i dula ata. 14Ama Yuhana a gəs tsa, a màr aba ahəm a. A gwaɗar: «Iye ivaɗ na i waya i dehe a a təv yak, ki tsilwiɓ a à iye a yam ana, naha kà dara a təv ga ya, i tsilwiɓ a à kər a yam ana, meme ivaɗ a?» 15Ama Yesuw a gwaɗar aaka: «Awaŋ, ka peliŋ ahəm tsa, viliŋ vatwa, aɗaba a sèsiŋ ka, ki geme a dukw ana Mbulum a waya ya.» Yuhana a tsaraka kataya ka, a gəs bazlam Yesuw ata a tsiker a. A daha, a tsilwiɓ aɗəm à ŋgat kuɗa.
16I təv ana Yesuw a riŋ a tsiler a i yam a ka, kuvəl mbulum a hə̀ndə̀k ba tùwaŋ. A ŋgataha a Mezite Mesife Mbulum a riŋ a terre a iɗəm i fataya, zərawwa kamala maadagwar ana a ndze a a bəɗ a, aka gər ŋgar. 17A tsarakara mifefile ana a ɗera i mbulum a. Mbulum a gwaɗarra: «Kər na mandərkwasla gà ya, Kəla gà. Maŋgayaba gà fit dze ka, ika gər yak.»
Επιλέχθηκαν προς το παρόν:
Mata 3: gnd
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Wycliffe Bible Translators, Inc. All rights reserved.