Luka 3
3
Zhaŋ ɗu bunə ɗaha nenil Labara Sələmna
(Matta 3:1-12; Markus 1:1-8; Zhaŋ 1:19-28)
1A ahan de sahan ga, vaɗay Tiberiyus Kaysara ala apə jaŋwa ɗara a bay tsəre de a Ruma, Puŋtiyus Pilatu gurək higay Zhude, Hirudus gurək higay Galile, dagwa məman Filip gurək higay s'Itureya atə higay Tarakunitis, Lisaniya kini gurək higay s'Abilen. 2Wutə Anas atə Kayafas ga, ɗa zak məlmal ɗa slumə ɗaha hay atə Askwaf pitta. A ahan de sahan tsaw, Askwaf dzakəlan a Zhaŋ dagwa Zakari, akiɓde. 3Takənmandar‑a a həsɗay a hu hay de gə dikw dikkwa i huwa s'Urdun saŋa ba cecena, nenilhətan a ɗaha hay wa ɗá mbəɗakude zaɗay tan, ɗá buntəna, ta Askwaf ɓushɨtənka hipe hay tan. 4Ahan sahan laka aba apə me ka gə niya i hətsɗay a wakita s'Ezayi de ɗu mbəɗɗitənande me s'Askwaf a ɗaha hay saŋa, wa:
«Ɗu s'iŋgeɗe niya rawa agay akiɓde, wa:
“Slumɨnnika ciba a Ɗuduwuna ka,
tetevɨnhənŋa a ciba hay ene ka ba ndəɗ‑ndəɗɗa.
5Ɗəmbək hay ba cecena à ɗá rəruhwede,
tsəɓakw hay atə ma hay gə ɗugur‑ɗugur‑a kini ba cecena à ɗá tatəsŋa,
ciba hay gə i zukəɗay saŋa kini, à ɗá giya ba ndəɗ‑ndəɗɗa,
ciba hay gə dzaŋwasl‑dzaŋwasl‑a saŋa kini, à ɗá slumiya ba kalkala.
6Ta ɗaha hay ba cecena à ɗá caka zlu ɗaha s'Askwaf#Ezayi 40:3-5.”»
7Ɗaha hay duna ɗa dzəfay ala a ma Zhaŋ de a nəɗay a bunɗay. Wuran ane dzəktəna, wa: «Kwa wayə maf hay saŋa mà, wiya wakənpəkuna dabari ndumaɗaya ande a bembec daɗay s'Askwaf gə ǎ nay saŋa? 8Gɨna igə à ɗá shinkwenede apəna wa kwa mbəɗkakude zaɗay kwan saŋa. Sleslɨna bə ɗaya kwene ika mene gə ma ɗa s'Abraham. Na əŋ dzakuna, ba kuwan hay gə na wutan saŋa kini, Askwaf jukka gəɗiltəna ɗa s'Abraham. 9Ba səgan kini slabak niya abi sluməɗay a ŋguɗəɗiyede shishka hay aba atə slilke hay ene. Ba kəla shishka gə abə waha bə kine məɗinna saŋa, à ɗá ŋguɗiyede, à ɗá jufiltənde a akwa de.»
10Abaga ɗaha hay ane ɗa mbutsəkənamiya, wa: «Səgan mà, ma ge kəma aye?» 11Zləmkənhətənaŋa, wa: «Ɗu gə abə niya al ifətɗay caw ga, á vərən ɓile ene a ɗu gə niba a ma ene de. Ɗu gə abə ipəɗay niya a ma ene de kini á giya ba kugunhan.»
12Ɗa maməsl hadama kini ɗa naya a gus bunɗay a ma ene de, ɗa mbutsəkənamiya, wa: «Malum, mene mà, ma ge kəma səgan?» 13Zləmkənhətənaŋa, wa: «Kwene ga, ŋgiɗɨnnarde ba a igə ɗa dzəkkuna wa giɗɨna saŋa.»
14Sluji hay kini ɗa naya a mbutsəɗinamiya ba kugunhan, wa: «Mene mà, ma ge kəma?» Zləmkənhətənaŋa, wa: «Kwene ga, sleɗɨnpəna bə shiŋgu a ɗaha ka i nzəɗa, gha i slaɗipan mbaɗe a ɗaha kini, higɨnaŋade aba a shiŋgu kiyəhka kwan.»
15Ŋa ɗa sahan zak ba hiŋkilla apə Zhaŋ‑a sahan, ghaya ɗa dzama ala apəna a ŋa tan de ba cecena, wa: «Dagwa saŋa ni, ǎ za Kristu saŋa bə zlama?» 16Zhaŋ zləmkənhətənaŋa ba cecena tan, wa: «Ənne ga, əŋ bunkwene al ahwam, amá ɗu s'iŋgeɗe niya ǎ nay, wuran ndəmnaw ənne i nzəɗa. Ba kutəɗinede kimak a səlay‑a kini əŋ slaka ba. Wuran zlə ga, ǎ bunkwene i Shinekw Cuɗiɗɗina atə al akwa. 17Wuran niya al ifəvə s'away ene a alay de, ǎ fəviyede cinjeŋ a ahay‑a. Ahay ga, ǎ cimde a takwar de, cinjeŋ kini ǎ ndəkəna akwa gə munzəɗay ene niba aride saŋa.»
18I ɗəfɗitənde nzəɗa a zhek de a ɗaha hay i me hay gərgəra saŋa tsaw, Zhaŋ nankəlhətan Labara Sələmna a ɗaha hay. 19Amá mbakəlan a Hirudus bay higay Galile, aɗaba təvika Hirudiya hər dagwa məman atə aɗaba gika iɓutsam hay s'iŋgeɗe gərgəra, 20ɗəfkənaŋade zlama adəɓa a gə s'iɓutsam s'iŋgeɗe: Bərika Zhaŋ, nəŋkəlde a daŋgay de.
Zhaŋ niya bune Yesu
(Matta 3:13-17; Markus 1:9-11)
21A aŋəde niya ɗa bune ɗaha hay ba cecena saŋa ga, Yesu kini ɗa bunika. Niya ge maduwa ga, askwaf pəkmiya, 22Shinekw Cuɗiɗɗina fataya ala a ŋa de ayina ane ɗa gizhek atə takalak masare. Ɗa shinkay ba taŋw ada askwaf‑a, wa: «Ike ga, ike Kine s'awiya hwa, əŋ higike awiba ala apaka.»
Ceje hay ene a Yesu
(Matta 1:17)
23Yesu slɨkiya aveŋ kurkur məŋgan a aŋəde takənmandar‑a a gə sləra ene. Apə dzəmŋa ɗaha hay‑a ga, wuran saŋa kine Zhuzef, Zhuzef kine Heli, 24Heli kine Mattat, Mattat kine Lewi, Lewi kine Melki, Melki kine Yannay, Yannay kine Zhuzef, 25Zhuzef kine Mattatiya, Mattatiya kine s'Amus, Amus kine Nahum, Nahum kine Hesli, Hesli kine Naggay, 26Naggay kine Maata, Maata kine Mattatiya, Mattatiya kine Semeyin, Semeyin kine Yusek, Yusek kine Yuda, 27Yuda kine Yuwanan, Yuwanan kine Resa, Resa kine Zurubabila, Zurubabila kine Salatiyel, Salatiyel kine Neri, 28Neri kine Melki, Melki kine s'Addi, Addi kine Kusam, Kusam kine s'Elmadam, Elmadam kine s'Eri, 29Eri kine Yusuwa, Yusuwa kine s'Eliyezer, Eliyezer kine Yurim, Yurim kine Mattat, Mattat kine Lewi, 30Lewi kine Simeyuŋ, Simeyuŋ kine Yahuda, Yahuda kine Zhuzef, Zhuzef kine Yunam, Yunam kine s'Eliyakim, 31Eliyakim kine Meleya, Meleya kine Menna, Menna kine Mattata, Mattata kine Natan, Natan kine Davit, 32Davit kine Yessa, Yessa kine s'Ubet, Ubet kine Buwes, Buwes kine Salmuna, Salmuna kine Nahasunu, 33Nahasunu kine s'Amminadabu, Amminadabu kine s'Admin, Admin kine s'Arni, Arni kine Hesrunu, Hesrunu kine Peres, Peres kine Yahuda, 34Yahuda kine Zhakup, Zhakup kine s'Izak, Izak kine s'Abraham, Abraham kine Tara, Tara kine Nahur, 35Nahur kine Saruku, Saruku kine Ragu, Ragu kine Falek, Falek kine s'Eber, Eber kine Sala, 36Sala kine Kaynam, Kaynam kine s'Arfasada, Arfasada kine Sem, Sem kine Nuhu, Nuhu kine Lamek, 37Lamek kine Matusala, Matusala kine s'Anuhu, Anuhu kine Yaret, Yaret kine Maleliyel, Maleliyel kine Kaynam, 38Kaynam kine s'Enus, Enus kine Setu, Setu kine s'Adama, Adama kine s'Askwaf.
Επιλέχθηκαν προς το παρόν:
Luka 3: mlr
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© (Active), Wycliffe Bible Translators, Inc. All rights reserved.