Δημοφιλή Βιβλικά εδάφια από Ixaj 65

Κοινοποίηση

Ne hãn ne ampo na me icukij, wa ha itỳj me kampa. Ne cute amji tehcajpar xà na me iwỳr xwỳjrea na, wa ma ramã ite mehtehcajpar xà caxuw me cahê na ipa.

Ne Pahpãm pê Pahhiti pê ampo cunea to ihhimpej catê ata te amji jarẽn to: “Wa ha ijàpên xà to ita ca hõmpu he: Wa ha côjkwa tuw me, pjê tuw to, ne ramã ampo cunea tuw pit ita kam, quê ha nee jũm hipêr mam ihtũm atajê to me amji japackre nare.

“Ipê me hõ Pahhiti, ne hanea ne ipê mehtàmxwỳ jõ Pahhiti. Ne paa, wa ha me kam ijarcô mẽ, ne me to impej ita kam, jũ wỳr quê me apê, ne me hàpên xà kôt hamreare ne. Ne quê ha mehkra ihpỳpỳm, quê ha nee ampo kêanre mehwỳr cator nare. Ne mehkra hãn ne me cumã me ajhu, ne mempejti kam me amji to ajpa.

Ne pom pĩ tỳjti, ihtỳj caku jàhtôa kam awcanã ne ihcuhhê, ita jĩkjê na, quê ha ihtỳj me ikwỳ caku jàhtôa kam me awcanã, ne mempej pêa mã me amji to ipijapar to me ipa. Ne por wa ite amji caxuw me ikwỳ capi atajê, quê ha ihtỳj caku jàhtôa kam, cute hũhkra to hàpên xà ton atajê to me amji cajpuaw to me ipa. Ne nee hipêr amji mã me ikre nõ xãm, quê kam jũmjê mehkrĩ nare. Ne nee hipêr kam amji mã pĩxô kre, quê ha ajteare mã jũmjê cupê mehkrẽr nare. Ne quêt amji mã me hũrkwa pyxwỳ, ne me taa kam mehkrĩ. Ne kam me amji mã pĩxô kre, ne quêt me taa me cuku.

“Ne nee quê ha hipêr jũm krare amji to ipijapar to incri ne hacpỹ ma mã ihtyc nare, ne ihtỳj amji to ipijapar to ipa. Ne mehwej catêjê, quê ha ihtỳj mehwej to me ipa, ne maa, cute me to hõ caku mã hahêr xà ata mã me to hahêr tu, ne cormã mehweaj to ihwej, ne mehtyc to hane he. Ne cormã jũm na caku te xẽj ne ihtyc ata, quê ha me amji mã harẽn to: ‘Pỳhàpà, nee cormã ihwej nare, ne intuw kwỳa kam ihtyc’ hane. Ne nee cormã ahna caku te xẽj nare, ne ihtyc ata, quê ha me amji mã harẽn to: ‘Ihhêj ne ihkrã kêanre, ne cute Pahpãm to kên cwỳrjapê ri, intuw kwỳa kam cute ihcuran’ hane.

“Hõhõ, amcro atajêa kam, quê hacpỹa mã rop cahàc jàprêhti atajê, carà cahàcre kra me ajpẽn cahê na hàpàn to ipa. Ne rop cahàc jõkre hôhti, quê ha cupê pryti pyràac, ne ahtu pit kur to ipa. Quê ha mehkĩnte cagã, pjê jacrô pit kur to ipa ita na. Ne quê ha ijõ pjê pejti ita kam, nee ampo te to kên xà hamreare, ne nee jũ caxuw ampo te to hamre xà nare” hajỹr. Hõ, Pahhiti te amji jarẽn to hajỹr.

Ne pa, ite hajỹar, Krĩpinkrên pyrên ijakry, ne hanea ne kam mehkrĩ atajê pyrên imã amji kĩn. Na quê ha nee hipêr jũm incwỳr nare, ne nee hipêr jũm, amji japête incwỳr kam hapac nare.