Kabiye - 1995 Edition (NT)

Kɩyakʋ ŋ́gʋ́ ɖɔɖɔ Yesu lɩnɩ ɖɩɣa nɛ ewolo ɛcaɣ teŋgu nɔɔ nɛ ɛwɩlɩɣ ɛyáa Ɛsɔtɔm. Ɛyáa sakɩyɛ kaakpeɣli ɛ-cɔlɔ. Pʋ-yɔɔ ɛkʋyaa ɛkpa kpɩyʋʋ taa nɛ ɛcaɣ nɛ paba ñasɩŋ patɩŋa kidiiliŋ yɔɔ nɛ pewelesiɣ ɛ-tɔm. Ɛyɔɔdaɣnɩ-wɛ tɔm sakɩyɛ nɛ aduwa taa. Ńdʋ́ lɛ se: «Abalʋ nɔɔyʋ wɛnɩ ḿbʋ́ nɛ ewolo tɔɔnaɣ pee mɩzʋʋ ɛ-hayɩm taa. Ɛmɩzaɣ lɛ, lɛɛna tɔlɩ nʋmɔʋ nɔɔ nɛ sumasɩ tii sɩtɔɔ-yɛ. Lɛɛna ñɔtɔlɩ ɛwaɣ yɔɔ. Tɛtʋ telim lɛ, añɔ lɔŋ. Añɔwa nɛ akpa camɩyɛ fɛlɛ fɛlɛ lɛ, wɩsɩ ñaɣ nɛ awɩlɩ, mbʋ́ pʋyɔɔ yɔ, a-hosi taɖaɣlɩ. Lɛɛna tɔlɩ kpaŋsɔɔ taa nɛ añɔ ɛzɩ pɩɩkpa camɩyɛ lɛ, kpaŋsɔɔ lɛɣtɩ. Piyele lɛɛna ñɔtɔlɩ tɛtʋ kɩbandʋ taa, alɛ ñɔ nɛ pɩpaɣlɩ tɩŋ nɛ ɩlʋlɩ. Tɩʋ lɛɛkʋ lʋlɩ pee mɩnʋʋ nɛ lɛɛkʋ nɩɩnʋwa nɛ hiu nɛ lɛɛkʋ niidozo.»
Yesu tɛm-wɛ tuuu eduuye lɛ, eheyi-wɛ se: «Weyi ɛwɛnɩ nɩŋgbaaŋ lɛ, ɛnɩɩ.»


Peeɖe ɛ-tɔmkpɛlɩkɩyaa woba ɛ-cɔlɔ nɛ pɔpɔzɩ-ɩ se: «Pɩlabɩ ɛzɩma ŋyɔɔdʋʋnɩ ɛyáa nɛ aduwa ḿbʋ́?» Yesu cosi-wɛ se: «Ɛsɔ taha-wɛ lɛɣtʋ se panɩɩ e-Kewiyaɣ tɔm ndʋ́ tɩwɛ mɛsaɣ tɛɛ yɔ, tɩ-tɔbʋʋ yɔɔ mɔyɔɔdʋʋnɩ-wɛ ḿbʋ́. Ɛlɛ́, mɩ lɛ, ɛha-mɩ lɛɣtʋ se ɩnɩɩ tɩ-tɔbʋʋ. Mbʋ́ pʋyɔɔ yɔ, pʋwɛ ɛzɩ pɔtɔŋʋʋ se: ‹Weyi ɛwɛna yɔ, pɔsɔzʋʋ-ɩ nɛ pʋɖɔɔ-ɩ nɛ weyi ɛ́lɛ́ fɛyɩna yɔ, halɩ pɛtɛzɩɣ lɛɣʋ mbʋ́ ɛmaɣzɩɣ se ɛwɛna yɔ.› Pʋ-yɔɔ mɔyɔɔdʋʋnɩ-wɛ nɛ aduwa se pɔcɔna, ɛlɛ́, pataana, nɛ pewelesi, ɛlɛ́, pataanɩɩ pʋ-tɔbʋʋ. Ḿbʋ́ pɩlakɩ ɛzɩ náyʋ Ezaayii maʋ ɛ-takayaɣ taa yɔ. Ɛmawa se:
«Ɛsɔ yɔɔdaa se:
‹Ɩkɔŋ welesuu camɩyɛ,
Ɛlɛ́, ɩɩnɩɣ pʋ-tɔbʋʋ.
Ɩkɔŋ cɔnaʋ camɩyɛ,
Ɛlɛ́, ɩɩnaɣ.
Mbʋ́ pʋyɔɔ yɔ ɛjaɖɛ ńɖɩ́,
Ɖɩ-taa ñɩma laŋa wɛ kpɩzɩŋ.
Pɔtɔ pa-nɩŋgbaaŋ se pataanɩɩ, nɛ
Pohuuzi pɛ-ɛsɛ yɔɔ se pataana.
Pataasɔɔlɩ se pana nɛ pɛ-ɛsɛ,
Nɛ panɩɩ nɛ pa-nɩŋgbaaŋ,
Nɛ pɛlɛɣzɩ pa-laŋa.
Pataasɔɔlɩ se pɛlɛɣzɩ pa-lakasɩ pe-wezuu caɣʋ taa,
Pʋyɔɔ mantapɩzɩ mala nɛ pɔ-yɔɔ cɛ.›
Mɩ mɔn-tɔmkpɛlɩkɩyaa lɛ, ihiɣ mɩ-tɩ! Mbʋ́ pʋyɔɔ yɔ, ɩnaɣnɩ mɩ-ɛsɛ nɛ ɩnɩɣnɩ mɩ-nɩŋgbaaŋ Ɛsɔ Kewiyaɣ tɔm tɔbʋʋ. Toovenim lɛ, meheyiɣ-mɩ se náyaa sakɩyɛ nɛ ɛyáa kʋtʋʋzaa sakɩyɛ pañɩnaa se pana mbʋ́ ɩnaɣ yɔ, ɛlɛ́, patana-pʋ. Pañɩnaa ɖɔɖɔ se panɩɩ ndʋ́ ɩnɩwa yɔ, ɛlɛ́, patanɩɩ-tʋ.»


Peeɖe Yesu heyi-wɛ se: «Ɩɩnaɣ ɖomaɣ eduuye ńɖɩ́ ɖɩ-tɔbʋʋ: mbá panɩɣ pɔyɔɔdʋʋ Ɛsɔ Kewiyaɣ tɔm yem nɛ paanɩɣ tɩ-tɔbʋʋ yɔ, pɛwɛ ɛzɩ nʋmɔʋ nɔɔ ɖenɖe pee tɔlaa yɔ. Satanɩ kɔŋ ɛhɔɔzɩ-tʋ pa-taa. Lɛlaa ñɛwɛ ɛzɩ ɛwaɣ yɔɔ ɖenɖe pee tɔlaa yɔ. Paba nɩ Ɛsɔtɔm lɛ, petisi-tʋ kpaagbaa nɛ laŋhʋlʋmɩyɛ. Ɛlɛ́, paayeki se tɩlabɩ-wɛ tʋmɩyɛ camɩyɛ. Pɔɖɔkʋʋ-tʋ nɛ kʋñɔŋ nakʋyʋ talɩ-wɛ yaa pɛwɛɛ pa-wayɩ kaŋ kaŋ tɩ-yɔɔ lɛ, pɔtɔlɩ Ɛsɔ nʋmɔʋ taa. Lɛlaa wɛ ɛzɩ kpaŋsɔɔ taa ɖenɖe pee tɔlaa yɔ. Pɛtɛŋ Ɛsɔtɔm nɩʋ lɛ, kedeŋa yɔɔ cɩnɛ lɩmaɣza wena akʋʋ ɛyáa yɔ nɛ ñɩm mbʋ́ pɩkɛdɩɣnɩ ɛyáa yɔ, pɩ-lɩmaɣza sʋʋ pa-taa nɛ paɖɩɣ-tʋ nʋmɔʋ nɛ paawɛɣnɩ kɛzɛɣa. Piyele lɛlaa ñɛwɛ ɛzɩ tɛtʋ kɩbandʋ ndʋ́ tɩ-taa pee tɔlaa yɔ. Pewelesiɣ Ɛsɔtɔm nɛ panɩɣ tɩ-tɔbʋʋ. Ḿbá wɛnɩ ɛzɩ tɩŋ weyi ɩlʋlɩ pee yɔ: lɛɛkʋ yɔɔ mɩnʋʋ nɛ lɛɛkʋ yɔɔ nɩɩnʋwa nɛ hiu nɛ lɛɛkʋ yɔɔ niidozo.»

Yesu tasɩ-wɛ tuuu eduuye se: «Ɩna ɛzɩma mbʋ́ Ɛsɔ Kewiyaɣ wɛɛ yɔ: abalʋ nɔɔyʋ ɖuni ɖomaɣ kɩbaŋga ɛ-hayɩm taa. Đoo naayɛ taa lɛ, e-koyindu wolo alɩwaatʋ ndʋ́ ɛyáa tɩŋa payɩ ɖou yɔ nɛ eɖuu ñɩyʋʋ ɛzaɣ́ʋ tɔɔnaɣ taa nɛ ɛcaŋ ɛɖɛɛ. Tɔɔnaɣ ñɔ nɛ kakpa camɩyɛ fɛlɛ fɛlɛ nɛ katʋlɩ. Ɛlɛ́, pana ñɩyʋʋ ɛzaɣ́ʋ ŋ́gʋ́, kʋñɔwa nɛ kɩkpa ɖɔɖɔ. Peeɖe hayɩm tʋ ɛnʋ ɛ-tʋmlaɖaa woba pɔpɔzɩ-ɩ se: ‹Caa! Ŋɖu ɖomaɣ kɩbaŋga ña-hayɩm taa lɛ, le ñɩyʋʋ ɛzaɣ́ʋ lɩnaa?› Ɛlɛ́, ecosi-wɛ se: ‹Mon-koyindu nɔɔyʋ wobina nɛ ɛla ḿbʋ́.› Peeɖe ɛ-tʋmlaɖaa tasɩ-ɩ pɔzʋʋ se: ‹Ŋsɔɔlaa se ɖiwolo ɖɩkpɛzɩ-kʋ yaa we?› Ecosi-wɛ se: ‹Aayɩ! Yee ɩkpɛzɩɣ ñɩyʋʋ ŋ́gʋ́ yɔ, pɩkpɛndɩɣnɩ tɔɔnaɣ. Iyele ḿbʋ́ nɛ tɔɔnaɣ ɛkɔm kapɩɩ lɛ, meheyi kʋnɖaa nɛ pacalɩ ñɩyʋʋ ɛzaɣ́ʋ ŋ́gʋ́ kpɛzʋʋ nɛ pekpeɣli nɛ pɔsɔbɩ-kʋ miŋ nɛ piyele pakʋ tɔɔnaɣ nɛ powoni-kɛ mɛn-tɛ nɛ posuu kpou taa.› »


Yesu tasɩ-wɛ tuuu eduuye se: «Ɛsɔ Kewiyaɣ wɛ ɛzɩ piye nɖɩ́ ɖɩkɩlɩ kɔzʋʋ pee tɩŋa taa nɛ ɛyʋ kpaɣ-ɖɩ nɛ eɖuu ɛ-hayɩm taa yɔ. Ńɖɩ́ kaakɩlɩnɩ kɔzʋʋ pee tɩŋa taa. Ɛlɛ́, ɖɩñɔwa lɛ, ɖɩpaɣlɩ nɛ pɩkɩlɩ tɩŋ tɩŋa nɛ ɖɩpɩɩ tɩʋ sɔsɔʋ nɛ sumasɩ woki sɩɖʋʋ sɩ-ɖandʋ kʋ-hɔtʋ taa.»


Yesu tasɩ-wɛ tuuu eduuye se: «Ɛsɔ Kewiyaɣ wɛ ɛzɩ sɔsɔɔna wena halʋ cozuu nɛ ɛɖʋ sona mʋlʋm kiiloonaa nɩɩlɛ nɛ kagbaanzɩ taa nɛ ehuudi nɛ pʋkɔɔ puhuu yɔ.»


Yesu heyaɣ ɛyáa samaɣ tɔm ndʋ́ tɩtɩŋa payɩ nɛ aduwa taa. Ɛtaayɔɔdʋʋnɩ-wɛ natʋyʋ yem nɛ pɩtɛkɛnɩ aduwa taa. Pɩlabɩ ɛzɩ náyʋ maʋ ɛ-takayaɣ taa se:
«Mɔnkɔŋ-wɛ yɔɔdɩnaʋ nɛ aduwa taa nɛ
monsusi-wɛ tɔm ndʋ́ tɩwɛ mɛsaɣ tɛɛ ɖooo ɛzɩ Ɛsɔ labʋ kedeŋa yɔ.»

Yesu tɛm tuuu aduwa lɛ, ɛkʋyɩ ɛyáa samaɣ cɔlɔ nɛ ekpe ɖɩɣa nɛ ɛ-tɔmkpɛlɩkɩyaa wolo ɛ-cɔlɔ nɛ pɔpɔzɩ-ɩ se: «Lɩzɩ-ɖʋ ñɩyʋʋ ɛzaɣ́ʋ ŋgʋ́ kʋñɔ hayɩm taa yɔ ki-eduuye tɔbʋʋ.» Peeɖe ecosi-wɛ se: «Weyi eɖu ɖomaɣ kɩbaŋga yɔ, ɛnʋ lɛ Ɛyʋ Pɩyalʋ ma. Hayɩm lɛ kedeŋa. Đomaɣ kɩbaŋga lɛ Ɛsɔ Kewiyaɣ taa ñɩma. Piyele ñɩyʋʋ ɛzaɣ́ʋ lɛ mbá patɩŋɩɣ Satanɩ wayɩ yɔ. Koyindu weyi ɛ́lɛ́ ɖu ñɩyʋʋ ɛzaɣ́ʋ ŋ́gʋ́ yɔ, ɛnʋ lɛ Satanɩ. Kʋmtʋ lɛ kedeŋa tɛm nɛ kʋnɖaa lɛ Ɛsɔ tiyiyaa. Ɛzɩma mbʋ́ pɛkpɛzɩɣ ñɩyʋʋ ɛzaɣ́ʋ nɛ paɖʋ-kʋ miŋ taa yɔ, ḿbʋ́ ɖɔɖɔ pɔkɔŋ labʋ kedeŋa tɛm wiye. Ɛyʋ Pɩyalʋ ma, mɔnkɔŋ tiyuu men-tiyiyaa men-Kewiyaɣ taa nɛ palɩzɩ mbá patɩŋa payɩ peyeki nɛ lɛlaa lakɩ kɩwɛɛkɩm yɔ nɛ ɛzaɣ́tʋ laɖaa. Palɩzɩɣ-wɛ lɛ, pɔlɔ-wɛ kʋñɔŋ sɔsɔʋ taa. Peeɖe pewiliɣ nɛ pasalɩ pe-kela. Ɛlɛ́, mbá paba tʋʋzaa yɔ, pɔkɔŋ ñɩlɩsʋʋ pa-Caa Ɛsɔ Kewiyaɣ taa ɛzɩ wɩsɩ yɔ. Weyi ɛwɛnɩ nɩŋgbaaŋ lɛ, ɛnɩɩ!»

Yesu tasɩ tuuu ɛ-tɔmkpɛlɩkɩyaa eduuye se: «Ɩɩnaɣ mbʋ́ Ɛsɔ Kewiyaɣ nɩɣzɩnaa yɔ: abalʋ nɔɔyʋ kepimni ñɩm sɔsɔm hayɩm taa ɖooo lɔŋ. Nakʋyʋ wiye lɛ, lɛlʋ lɩɩ pʋ-yɔɔ nɛ ɛ́lɛ́ ɖaɣnɩ-pʋ pim. Peeɖe ɛ-taa hʋlʋmaa nɛ ewolo ɛpɛdɩ ɛ-ñɩm tɩŋa payɩ nɛ ewolo ɛya hayɩm ḿbʋ́.»

«Ɩɩnaɣ mbʋ́ Ɛsɔ Kewiyaɣ nɩɣzɩnaa ɖɔɖɔ yɔ: tadɩyɛ laɖʋ nɔɔyʋ ñɩnaɣnɩ lɩtʋ kɩbandʋ. Ɛkɔm ɛna lɩyʋʋ ŋgʋ́ kɩkɩlɩ ɖeu yɔ lɛ, ewolo ɛpɛdɩ mbʋ́ pɩtɩŋa payɩ ɛwɛna yɔ nɛ ewolo ɛyabɩ-kʋ.»

«Ɩɩnaɣ mbʋ́ Ɛsɔ Kewiyaɣ nɩɣzɩnaa ɖɔɖɔ yɔ: pɔlɔ piyuu teŋgu taa nɛ kɩkpaɣ kpakpasɩ ndɩ ndɩ. Kɩ-taa suwa lɛ, kʋ-lɔyaa hɔm-kʋ nɛ palɩzɩ-kʋ kidiiliŋ yɔɔ nɛ pacaɣ nɛ palɩzɩɣ kpakpasɩ. Paɖʋʋ nzɩ́ sɩwɛ ɖeu yɔ ɖɔkɩŋ taa nɛ pɔlɔ nzɩ́ sɩsɩ fɛyɩ ɖeu yɔ. Ḿbʋ́ pɔkɔŋ labʋ kedeŋa tɛm wiye. Ɛsɔ tiyiyaa kaɣ kɔm nɛ palɩzɩ ɛyáa azaɣ́a kɩbama hɛkʋ taa nɛ pɔlɔ-wɛ kʋñɔŋ sɔsɔʋ taa. Peeɖe pewiliɣ nɛ pasalɩ pe-kela.»


Yesu tɛm-wɛ yɔɔdɩnaʋ lɛ, ɛpɔzɩ-wɛ se: «Ɩnɩ aduwa ana atɩŋa payɩ a-tɔbʋʋ naa we?» Pocosi-i se: «Ɛɛɛ! Đɩnɩwa.» Peeɖe eheyi-wɛ se: «Pʋ-yɔɔ lɛ, paɣtʋ wɩlɩyʋ weyi ɛpɩsɩ Ɛsɔ Kewiyaɣ taa tʋmlaɖʋ yɔ, ɛwɛ ɛzɩ ñɩm tʋ weyi ɛlɩzɩɣ ɛ-ñɩm taa wondu kɩfatʋ nɛ kɩbɩndʋ yɔ.»

Yesu tɛm tuuu aduwa ḿbʋ́ lɛ, ɛkʋyɩ peeɖe nɛ ewolo tɛtʋ ndʋ́ tɩ-taa ɛɛcaɣaɣ nɛ ɛpaɣlɩ yɔ nɛ ɛwɩlɩɣ ɛyáa Ɛsɔtɔm Ɛsɔ ɖɩsɛyɛ taa. Peeɖe pɩɖɩɣzɩ mbá patɩŋa pɛwɛ peeɖe yɔ nɛ pɔtɔŋ se: «Le ɛnɛ ɛlɩ lɔŋ ɛnʋ ɛ-yɔɔ? Ɛzɩma ɛlakɩ hama lakasɩ sɩnɛ ḿbʋ́? Pɩtɛkɛ ɛnʋ lɛ weyi ɛkaŋ kuduyiŋ yɔ ɛ-pɩyalʋ? Pɩtɛkɛ e-ɖoo lɛ Maarɩɩ? Pɩtɛkɛ e-newaa lɛ Yakubu nɛ Yozɛɛfʋ nɛ Siimɔɔ nɛ Yuudi yaa we? Pɩtɛkɛ e-newaa halaa ñɩma tɩŋa payɩ wɛnɩ ɖɛ-hɛkʋ taa cɩnɛ yaa we? Ɛzɩ le ɛlɩ ɖoŋ ɛnʋ ɛ-yɔɔ kpem?» Pa-lɩmaɣza ana ayebina nɛ pa-laŋa wɛɛ kpɩzɩŋ nɛ pɩcɛyɩɣ-wɛ nɛ Yesu tɔm siŋŋ.
Peeɖe eheyi-wɛ se: «Pañaŋ náyʋ paa le. Ɛlɛ́, ɛ-tɛtʋ nɛ ɛ-hɔʋ pa-taa paañaŋ-ɩ.» Peeɖe ñɩma taawɛnɩ lidaʋ ɛ-yɔɔ, pʋ-yɔɔ ɛtala hama lakasɩ sakɩyɛ pɛ-tɛ.

Ακρόαση Maatiyee 13