Hebreos 1
1
Jawen Bake meranoax Dios yoyo ika
1Moatianbora, ichaakin itan, meskóakinbo, profetabo meranxon non rekenbo Diossen yoyo aka iki,
2ikaxbi rama netebaonra, jawen Bake meranxonbiribi noa yoyo ake. Já meranxonra, jatíbi nete jonia iki, jatian jara jatíbi jawékinin Ibo imaa iki.
3Ja riki ja Diossen penebires koshi noa jan oinmai, jawen ikábo Dios jisábishaman ixon, jatian janra jawen atipana join, jatíbi jawékibo koshiake. Jainoaxa jatíbi non ochabo noa soaxona pekáo, naikan kaax, Diossen mekayao yakata iki.
Diossen Bakera ángelbo xewina iki
4Jaskataxa ángelbo xewina baneta iki, jabaon jane xewina kikin janeribi bia ikax.
5Jawetianbira Diossen westíora ángelbi yoiama iki:
“Mia riki nokon Bake
ramara ea min Papa iki”, akin.
6Jatian jawen reken Bakebiribi nato neten raanaxa, Dios neskata iki:
“Jatíbi ja nokon ángelbaon rabibakanon”, iki.
7Jatian ja ángelbo yoii ikai Dios neskati:
“Nokon ángelbo riki niwe keskabores
jatian nokon yonotibo riki chii tiritai keskábores”, iki.#Sal. 104.4
8Ikaxbi jawen Bakebiribi yoii ikai neskati:
“Jatíbitian Apo riki mia Diossé,
jato ikinkinra, atibi keskáakin jato ikinnai.
9Jakon jawékibores noixonra, jakonma jawékibo min omisa iki,
jakopíra mia Diossen katota iki, min Dios ixon,
jaskáaxonra, ja miibetan ikábo bebonbires, raro mia imaa iki”, iki.#Sal. 45.6-7
10Jainoax iribai neskati: “Ibó, peokootiainxonbira, jaki mai koshitibo min aká iki.
Ja naibo riki min mekemanbishaman,
min aká teebo.
11Jatíbi jabora keyónoxiki,
ikaxbi miabiribira, jatíbitian jaai keyóyamai,
jatíbi jabora chopa ikai keskati payónoxiki,
12chopa atinra min katónoxiki,
wetsa chopa sawetininra min anoxiki,
ikaxbi miara miabi iti iki, min jatira jain keyota yamake”, iki.#Sal. 102.25
13Jawetianbira Diossen westíora ángelbi yoiama iki:
“Nokon mekayao yakáwe, ja min rawibo, en mia
jan penítiaxonai kaman”, akin.#Sal. 110.1
14Jatíbi ángelbo riki shinanres, ja kishpinmeetibo akinni teekanon ixon, jato Diossen raanabo.
Valgt i Øjeblikket:
Hebreos 1: shp
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2011, Wycliffe Bible Translators, Inc. All rights reserved.