Éxodo 23
23
1Me̱ye ticꞌtiꞌ chirix le̱ ras e̱ri̱tzꞌin chi moco chex-oque̱nk chixtenkꞌanquil li incꞌaꞌ useb xnaꞌleb riqꞌuin xyebal ticꞌtiꞌ. 2Usta chixjunileb li tenamit yo̱keb xba̱nunquil li ma̱usilal, abanan me̱ba̱nu e̱re la̱ex. Nak texbokekꞌ chiru laj rakol a̱tin, me̱ye ticꞌtiꞌ usta lix qꞌuial li cuanqueb aran teꞌticꞌtiꞌik. Cheba̱nu ban saꞌ ti̱quilal. 3Chi moco junak nebaꞌ checol rix cui incꞌaꞌ us li yo̱ chixba̱nunquil. 4Cui te̱tau li bo̱yx li quisach chiru li xicꞌ na-iloc e̱re, te̱cꞌam ut toxe̱kꞌaxtesi chak re. 5Cui te̱tau lix bu̱r li xicꞌ na-iloc e̱re xtꞌaneꞌ saꞌ be rubel li ri̱k, me̱canab chi joꞌcan. Chetenkꞌa ban chixcuaclesinquil. 6Chetenkꞌaheb li nebaꞌ re nak us teꞌe̱lk nak ta̱rakekꞌ a̱tin saꞌ xbe̱neb, ut me̱canab xjuneseb. 7Cherisihak ban e̱rib saꞌ xya̱nkeb li nequeꞌticꞌtiꞌic ut incꞌaꞌ te̱qꞌue chi camsi̱c li ti̱c xchꞌo̱l li ma̱cꞌaꞌ xma̱c xban nak la̱in tinye nak li incꞌaꞌ useb xnaꞌleb, aꞌan cuanqueb xma̱c. 8Nak texrakok a̱tin, incꞌaꞌ texcꞌuluk tumin. Li ani natumina̱c ru incꞌaꞌ narakoc a̱tin saꞌ ti̱quilal xban nak incꞌaꞌ chic narabi li cꞌaꞌru nequeꞌxye li ma̱cꞌaꞌeb xma̱c. 9Me̱rahobtesiheb li jalaneb xtenamit. La̱ex ac nequenau chanru li cua̱nc saꞌ jalan tenamit xban nak jalan ajcuiꞌ le̱ tenamit la̱ex nak quexcuan chak Egipto. 10Cuakib chihab ajcuiꞌ tex-a̱uk saꞌ le̱ chꞌochꞌ ut te̱xoc li ru le̱ racui̱mk. 11Abanan saꞌ xcuuk li chihab te̱canab chi hila̱nc li chꞌochꞌ ut me̱xoc li na-el yal xjunes re nak ta̱ru̱k teꞌtzaca̱nk li nebaꞌ li cuanqueb saꞌ le̱ tenamit, ut re ajcuiꞌ nak teꞌcuaꞌak eb li xul li cuanqueb saꞌ cꞌaleba̱l. Joꞌcan ajcuiꞌ te̱ba̱nu riqꞌuin li acui̱mk uvas ut olivos. 12Chiru cuakib cutan te̱ba̱nu li joꞌ qꞌuial le̱ cꞌanjel li te̱raj xba̱nunquil. Ut saꞌ xcuuk li cutan texhila̱nk, la̱ex joꞌ ajcuiꞌ le̱ bo̱yx, ut le̱ bu̱r. Ut teꞌhila̱nk ajcuiꞌ le̱ mo̱s joꞌqueb ajcuiꞌ li jalan xtenamit li cuan e̱riqꞌuin. 13Cheba̱nu chixjunil li xinye e̱re. Incꞌaꞌ te̱lokꞌoni li jalanil dios chi moco te̱patzꞌ xcꞌabaꞌeb. 14Oxib sut saꞌ li chihab texninkꞌei̱k re xqꞌuebal inlokꞌal. 15Cheba̱nu li ninkꞌe nak te̱cuaꞌ li caxlan cua chi ma̱cꞌaꞌ xchꞌamal. Cuukub cutan te̱cuaꞌ li caxlan cua li ma̱cꞌaꞌ xchꞌamal. Te̱ba̱nu joꞌ quinye e̱re. Te̱ba̱nu saꞌ li po Abib xcꞌabaꞌ xban nak aꞌan li po nak quex-el chak saꞌ li tenamit Egipto. Ma̱ jun ta̱oque̱nk saꞌ li ninkꞌe aꞌan chi incꞌaꞌ tixcꞌam xmayej saꞌ lin templo. 16Li xcab li ninkꞌe li te̱ba̱nu, aꞌan nak te̱sicꞌ li xbe̱n ru le̱ racui̱mk li nequerau saꞌ le̱ chꞌochꞌ. Ut li rox li ninkꞌe li te̱ba̱nu, aꞌan saꞌ rosoꞌjic li chihab nak te̱xoc chixjunil li ru le̱ racui̱mk li na-el saꞌ le̱ chꞌochꞌ. 17Saꞌ li oxib chi ninkꞌe aꞌin li te̱ba̱nu chiru li jun chihab, tento nak chixjunileb li cui̱nk teꞌxic saꞌ li templo chinlokꞌoninquil la̱in li Ka̱cuaꞌ Dios. 18Nak te̱mayeja li xul, incꞌaꞌ te̱qꞌue li quicꞌ riqꞌuin li caxlan cua cuan xchꞌamal. Chi moco li xe̱b ta̱ru̱k te̱canab chokꞌ re cuulaj. 19Te̱sicꞌ li xbe̱n ru le̱ racui̱mk li kꞌaxal cha̱bil. Aꞌan li te̱cꞌam saꞌ lin templo la̱in li Ka̱cuaꞌ le̱ Dios. Ut incꞌaꞌ te̱chik xtibel li chꞌina chiba̱t saꞌ xyaꞌal lix tuꞌ lix naꞌ. 20Li Dios quixye: —La̱in tintakla lin ángel chi cꞌamoc be che̱ru. Aꞌan ta̱ilok e̱re toj retal texcuulak saꞌ li naꞌajej li ac xincꞌu̱b chokꞌ e̱re. 21Chex-abi̱nk chiru ut cheba̱nu li cꞌaꞌru naxye. Me̱kꞌetkꞌeti e̱rib chiru xban nak aꞌan incꞌaꞌ tixcuy e̱ma̱c. Li cꞌaꞌru tixba̱nu aꞌan, tixba̱nu saꞌ incꞌabaꞌ la̱in. 22Cui la̱ex te̱rabi li cꞌaꞌru naxye e̱re ut te̱ba̱nu chi tzꞌakal li cꞌaꞌru xinye la̱in, la̱in xicꞌ teꞌcuil li xicꞌ nequeꞌiloc e̱re. Ut tinba̱nu raylal reheb li nequeꞌxba̱nu raylal e̱re la̱ex. 23Lin ángel ta̱cꞌamok be che̱ru toj retal texcuulak saꞌ li naꞌajej li cuanqueb cuiꞌ eb laj amorreo, eb laj heteo, eb laj ferezeo, eb laj cananeo, eb laj heveo, joꞌ eb ajcuiꞌ laj jebuseo. La̱in tinsach ruheb aꞌan. 24Ut me̱cuikꞌib e̱rib chiru lix yi̱banbil dios eb aꞌan, chi moco chexcꞌanjelak chiruheb. Me̱ba̱nu joꞌ nequeꞌxba̱nu eb aꞌan. Te̱jucꞌ ban lix yi̱banbil dios ut te̱sach ruheb chi junaj cua. 25Chexcꞌanjelak ban chicuu, la̱in li Ka̱cuaꞌ le̱ Dios. Ut la̱in texcuosobtesi ut tinqꞌue le̱ cua e̱rucꞌa. Ut incꞌaꞌ texinqꞌue chi yaje̱rc. 26La̱in tincuosobtesiheb li ixk saꞌ le̱ tenamit. Chixjunileb teꞌqꞌuiresi̱nk ut ma̱ jun li yaj aj ixk ta̱numekꞌ lix yajeleb. Ut tinqꞌue chi najtocꞌ ru le̱ yuꞌam. 27La̱in tinqꞌueheb chixjapbal reheb xbaneb xxiu li tenamit li texnumekꞌ cuiꞌ. Ut teꞌe̱lelik li xicꞌ nequeꞌiloc e̱re che̱ru la̱ex. 28La̱in tinqꞌueheb chi sachc xnaꞌlebeb xban xxiuheb laj heveo, eb laj cananeo joꞌ eb ajcuiꞌ laj heteo ut teꞌe̱lelik che̱ru. 29La̱in incꞌaꞌ teꞌcuisi chixjunileb saꞌ junpa̱t. Incꞌaꞌ tincuisiheb chiru jun chihab re nak incꞌaꞌ ta̱cana̱k chi ma̱cꞌaꞌ cristian ut re ajcuiꞌ nak incꞌaꞌ teꞌta̱mk saꞌ e̱ya̱nk li joskꞌ aj xul re li qꞌuicheꞌ. 30Timil timil tincuisiheb saꞌ li tenamit toj teꞌta̱mk le̱ ralal e̱cꞌajol ut toj te̱re̱chani chi tzꞌakal li naꞌajej. 31La̱in tinqꞌue retalil bar ta̱numekꞌ li nuba̱l re li naꞌajej li tinqꞌue e̱re. Li nuba̱l ta̱numekꞌ cuan cuiꞌ li Caki Palau ut ta̱cuulak cuan cuiꞌ li palau Mediterráneo li cuan saꞌ xcue̱nt lix tenamiteb laj filisteo ut ta̱cuulak cuan cuiꞌ li chaki chꞌochꞌ ut toj cuan cuiꞌ li nimaꞌ Éufrates. La̱in tinkꞌaxtesiheb saꞌ e̱rukꞌ li cuanqueb saꞌ li naꞌajej aꞌan, ut la̱ex tex-isi̱nk reheb aran. 32Joꞌcan nak me̱ba̱nu junak contrato riqꞌuineb li tenamit, chi moco te̱qꞌue xcuanquil lix dioseb. 33Incꞌaꞌ te̱canabeb chi cua̱nc saꞌ le̱ naꞌaj re nak incꞌaꞌ texqꞌue chi ma̱cobc chicuu. Naru nequex-oc chixlokꞌoninquil lix dioseb, ut riqꞌuin aꞌan te̱tzꞌek e̱rib.
Valgt i Øjeblikket:
Éxodo 23: kek
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators. All rights reserved.