Ester 2
2
Reina kananpaq Esterta akllasqankumanta
1Chaykunapa qepantam, piñakuynin pasaruptin rey Asuero yuyarirurqa reina Vastipa contranpi sentenciasqanta. 2Chaymi reyta serviqninkuna nirqaku:
Reynilláy, qampaqyá manaraq qari reqsiq buenamoza sipaskunata maskamuchunku. 3Chaynaqa, reynilláy, kikikiyá runakunata akllay chaynapi munaychakusqayki provinciakunamanta buenamoza sipaskunata Susa llaqtaman pusamunankupaq. Chay sipaskunaqa kanqaku warmikuna waqaychaq serviqniki Hegaipa cuidasqanmi, payñam adornasqa kanankupaq imakunatapas qonqa. 4Chaynapi sonqoykipa munasqan sipas, reina Vastipa rantinpi akllasqa kananpaq, nispa.
Chay nisqanku allinpaq rikchakapuptinmi, chaynata rey ruwarqa. 5Susa llaqtapim Benjamín ayllumanta kaq Judío yacharqa, sutinmi karqa Mardoqueo, payqa Jairpa churinmi karqa, Jairñataqmi Simeipa, Simeiñataqmi Cispa. 6#2 R 24.10-16; 2 Cr 36.10.Payqa Babiloniapa reynin Nabucodonosorpa, Jerusalén llaqtamanta Judapa reynin Jeconiastawan kuskata preso apachisqankunapa hukninmi karqa. 7Mardoqueom uywakurqa tionpa churin Esterta, hebreo rimaypim sutin karqa Hadasa. Payqa karqa allin rikchayniyuq buenamoza sipasmi, paypa tayta-maman wañukuptinmi Mardoqueo churichakuspa uywakurqa. 8Reypa kamachikusqan decretokuna willakusqa karuptinmi, reypa yachasqan Susa llaqtaman achka sipaskunata pusarqaku, hinaspam nanachikunanpaq Hegaiman entregarqaku. Esterpas reypa wasinman pusasqa kaspam, warmikuna nanachikuq Hegaipa makinman churasqa karqa. 9Estermi Hegaiwan kuyaykachikurqa, chaymi Hegai yanaparqa adornokunata chaynataq mikuyta qospan. Qoykurqataqmi reypa palacionpi kaq akllasqa qanchis sipaskunatapas servinankupaq, hinaspam chay sipaskunatawan kuskata warmikunapa yachanan wasipi allinnin kaq cuartoman pusarqa.
10Esterqa manam willakurqachu maylaw llaqtayuq kasqantapas nitaq pipa ayllunmi kasqantapas, chaynataqa ruwarqa Mardoqueopa yachachisqanman hinam. 11Mardoqueoñataqmi imaynam Ester kasqanta chaynataq imaynatam hatallisqankuta yachayta munaspan, warmikunapa yachasqan wasipa punkunkunapi ichikachaq.
12Costumbreman hinam, reypa qayllanman yaykunankupaqqa, llapa sipaskuna chunka iskayniyuq killatapuni allichakuqku. Soqta killam mirra aceitewan cuerponkuta llusikuqku, soqta killañataqmi miski asnaq perfumekunawan untakuqku. Chaymantañam llapa sipaskuna, chulla-chullamanta turnonpi rey Asueropa qayllanman yaykuqku. 13Reypa qayllanman yaykunanpaq hukkaqnin sipasman tuparamuptinmi, chay sipasman tukuy imata qoqku, chaynapi allichapakuruspan warmikunapa wasinmanta reypa palacionman rinanpaq. 14Reypa palacionman tardeykuyta rispanmi paqarinnintinñataq sapaq wasimanña pusasqa karqa, chaypi reypa eunucon Saasgazña nanachikunanpaq; payqa reypa uywanakusqan warmikunata nanachikuqmi karqa. Chay warmikunaqa manañam reypa qayllanmanqa yaykuqkuñachu, aswanqa rey qayachimuptillanñam.
15Mardoqueopa tion Abihailpa churin Esterman, reypa qayllanman yaykunanpaq turno tuparamuptinmi, Esterqa mana imatapas mañakurqachu, aswanqa reypa serviqnin warmikuna waqaychaq Hegaipa nisqallantam aparqa. Esterqa llapallan yanapaqninkunawanmi llumpayta kuyachikurqa. 16Rey Asuero qanchis wataña munaychakuchkaptinmi, Tebetwan sutichasqa chunka kaq killapi, Esterta rey Asueropa palacionman pusaykurqaku. 17Hinaptinmi rey Asueroqa llapallan warmikunamantapas aswanta Esterta kuyarurqa. Estermi llapallan sipaskunamantapas llumpayta rey Asueropa sonqonta suwarurqa, chaymi rey Asueroqa Esterpa umanman coronata churaykurqa, Vastipa rantinpi payña reina kananpaq. 18Chaymantam Esterpa sutinpi hatun convidota ruwachispan llapa kamachiqkunatawan serviqninkunata qayachirqa. Impuestotapas provinciankunapi menosyaykachispanmi, sonqonman hina regalokunatapas aypurqa.
Reypa contranpi hoqarikuqkunata Mardoqueo denunciasqanmanta
19Manaraq qari reqsiq sipaskuna huktawan huñusqa kaptinkum, reypa palacionpa punkunpi Mardoqueo tiyachkarqa. 20Esterqa Mardoqueopa kamachisqanman hinam may llaqtayuq nitaq pipa ayllunmi kasqantapas mana willakurqachu. Esterqa Mardoqueomanta yachachikuy chaskisqanman hinam kasukurqa. 21Chay punchawkunapim, reypa palacionpa punkunpi Mardoqueo tiyachkaptinmi, punkuta waqaychaq iskay eunucokuna Bigtanwan Teres piñasqallaña kachkarqaku hinaspam rey Asuerota wañuchinankupaq tanteanakurqaku. 22Chayta uyariruspanmi Mardoqueoqa reina Esterman willaykurqa, Esterñataqmi Mardoqueopa sutinpi reyman willaykurqa. 23Chaymanta tapukachakuspankum cheqap kasqanta yacharurqaku, hinaspam chay iskay eunucokunata warkururqaku. Chayqa reypa ruwasqankunamanta willakuq libropim qellqasqa kachkan.
Valgt i Øjeblikket:
Ester 2: RCHQ2
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Chuya Qellqa Revisión @ Sociedad Bíblica Peruana, 2012