Aromayi 1
1
1Bwulus, Kirisiti Yeisu tnutnuyi, n a ɓəi yi wo, nabai waa zhni tnutnuloyi jesnu n knyignyi ntu Shekwoyi nabagyi manai ɓo; 2nabagyi manai n Shekwoyi ɓəi la əkwo ɓəgbeshi tunyi n sapa nyi, kwo ɓəi kwnu ń əwo sheaɓəgwognayi agbe nu, dna ń Nyakazhi Gyigyiyi. 3Nabagyi manai ye ntu əwo Nugwnu ɓo nu, əza ń a ɓə ma wo vyi zanyikwoci əfye, wo ɓə zhni Dawuda yawyi nu, 4ama dna ń gyigyi əfye Zafnu nya, a ɓə la wo knyignyi Shekwoyi Nugwnu dna n kalá əwo kalala nya n əfyí: Yeisu Kirisiti əyi Dagayi. 5Dna n əwo nu, ń yi la shebmyashi gwo ɓədo ń atnutnuloyi-zhnizhnii, nabai ya yi Abyedo vnyanya ɓa vyi gbetu n kwo gbmiɓe n gaiciyaganunui ntu əwo əye ɓo. 6Əfyehni ce fye fyilo ń Abyedo, ń a la ɓa yi ge ɓa kwu zhni Yeisu Kirisiti anya nyi.
7Nyakashi ye, kwo lo da aza nu vnyanya n ɓa fyilo ń Roma, ń Shekwoyi ye ɓa lo jesnu n a la ɓa yi ɓa kwu zè əwo aza agyigyiyi.
Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.
Bwulus pwawo wa lo gnaɓyi n Roma
8Kpmisnui, mi sa Shekwoyi ami lo dna n Yeisu Kirisiti ntu əfye ɓo vnyanya, ntuge a da əfye gaiciyaganunui əɓo lo vnyanya fyi ń anyì. 9Shekwoyi, ń mi zhni əwo tnutnu dna ń əmi zafnu dna n waazizhni, əwo Nugwnu nabagyi manai nya. Əwo nu zhni əmi ɓəgbmiyi, she mi pá əfye ɓo lo ciici 10dna ń əmi aduwazhni nsahosahoi vnyanya. Mi zhniaduwa lo ge nsaiye n kpmasnu dna ń Shekwoyi ɓəye, ń zokwo ɓa gwuya ga mi ma ɓe əfye aba.
11A wo mi əpwa lo nge ma ɓe əfye aba ma gye fye əwye nabai ma ga fye zafnu anyaga ho, fya ɓwa kalá; 12əkwo nu nyi nge, əfye ɓədo əmii, ń yi ɓa myiaje gaiciyaganunui zhi n kwnusnu. 13Əmi azaje, azanugbai n anyikwozai, mi to ncei pmalo fya kwu zhi n ɓəyeɓwui m, ntuge mi ɓə la əmihni ye aɓwa bəgyéi ma ɓe əfye aba (ama to ai ye ge mi ɓe m, nya nsaiye) nabai n mi ɓa myi ma ɓwa avyiyi aje fyi n əfye aza cè, n ɓwasnu she mi kwu ɓwa fyi n Abyedo aje nyi.
14Kwo n mii zhni ɓəshishi nu n Agirikiyi aba ɓədo ntna Agirikiyii, jesnu ń aza acecei aba n amamai. 15Cenuzhni minyi nunui gnyi n əpwawoi ma zhni nabagyi manai waazi ga əfye ce, ń fye fyi ń Roma nyi.
16Nabagyi manai vnyinkwo ta wo mi lo m, ntuge əkwo nu zhni Shekwoyi kalá n kwo ɓe n gnyignyii n zahozahoyi aba n wo ga gaiciya: kpmisnui n Yahudiyi aba, nlonu lo da Abyedo. 17Ntuge dna ń nabagyi manai nu ń a la Shekwoyi ɓəfyecezhni kpeyawu; ɓəfyecezhni ń a zhni kwo dna ń gaiciyaganunui, n kwo ya n kpmisnui kwoi lo kpmasnui, n ɓwasnu she a ncei kafyilo: “Ɓəfyecezhniyi ɓa gyianyì n gaiciyaganunui.”
Shekwoyi minagyi napyei tu n aleifyizhniyi
18Shekwoyi minagyi napyei gnyilo kwoi kpeyawu ɓe ń əshemi tu aza atnashekwoyi adnawoi tukwo ɓədo ǹ akpízhniyii vnyanya ń ɓa ce gaiciyanunui aɓwaya ntu əɓa kpízhni ɓo. 19Shikwonyi əɓo ń a ɓa myi a kpeye ntu Shekwoyi ɓo, kwo wulo pəipəi ń əɓa aba, ntuge Shekwoyi wo kwu kwo wu ɓa pəipəi. 20Ntuge tunyi n anyì zhnizhni əsa, Shekwoyi alu manai ń a ta gye ɓa awye nyi m; əwo kalá nyalonyalo nya, n əwo alu ikwo vnyanya nyai; a kwu ɓa gyewye pəipəi, jesnu ai ɓwa əɓa awyega ń anya ń a kwu zhni nyi, ntulonu aza to n aɓoɓwashi bai lo m.
21Ntuge kwo shikwonyi ɓa ɓəi kpe Shekwoyi əye, ɓa to ɓəi la wo tu ngye Shekwoyi kwo ɓa sa wo ami m, ama əɓa aɓənubwozhni ɓa kwu gbmiaje jesnu əɓa amama abwugba ɓa kwu fyi wyegbma. 22Kwo shikwonyi ɓa ɓəi yi ɓahni ge ɓa cecei lo, ɓa kwu zè amama. 23Jesnu ɓa shna Shekwoyi latu do n anyadogbei ń a ɓə zhni ɓa n wu ngye zanyikwoci n wo fyí nyi, n alui, ń anyafwanyai jesnu ń anyai n ɓa kwó n nubwoi nyi.
24Ntucenu Shekwoyi wa kwu əɓa aleifyi ɓəpwawo, asisiɓozhni, fa fyi ń əɓa adu, ntu əɓa anayi àɓyii-kwnuya əɓo n ajei. 25Ɓa shna Shekwoyi gaiciyanunui ədo n akatái, jesnu ɓa ga anya azhnizhniyi mwamwa, ɓa zhni ɓa tnutnu, ɓa fa Shekwoyi anya vnyanya zhniyi, əwo nu n a ci wo nyalonyalo nyi. Aamyi.
26Ntu dəye ɓo, Shekwoyi wa kwu ɓa ga fyi n gyewna pwawo avnyinkwo nya. Kwo əɓa anyikwo ɓa shna gyewna əfye do ń adoi ń ɓa to fyilo n əfye m. 27Ń ɓwajesnu lonu, azanugbai ce, ɓa kwu fa gyewna ɓo n anyikwozai dna ń əfye, ɓa kwu nú zhi n gyewna pwawoi n azanugbai ajei. Azanugbai ɓa zhni avnyinkwo aɓo n azanugbai ajei. Cenu ɓəi zhni ɓa gwo tata n kwo ɓəi gwogwo n ɓai ntu əɓa abaɓwi ɓo.
28Tu n dəye əshe, n ɓwasnu shi ɓa to ɓəi gye kwo kwnuce lo ɓa kwu Shekwoyi yekpé wnafyi m, ntulonu Shekwoyi wa kwu ɓa fa fyi ń bwugba ajegbmii, nabai ɓa zhni əɓo n kwo to gwo ɓa zhni m. 29Ɓa kwu nu zhi n əkpizhni dəhodəhoi, n əɓo nukwoi, n fnanai ɓədo n ajegbmii. Ɓa nunui lo n shewoi, zawu, anyàwu, kwocedna, ɓədo n aɓəshinmì n ajei ń bwugba. Ɓa zhni aɓəshnayi nu, 30agnagbazhniyi, Shekwoyi anuwnuyi, asnusnuikpe, atukwognanakwoi jesnu agbegyiyi; ɓai kpe azokwo awoiwoyi aɓo nukwoi zhni nya; ɓai znu əɓa azamayi ɓəgbetu gna; 31ɓa to n gənyikpei lo m, gbenu to lo m, yeye to lo m, snusnugye to lo m. 32Kwo shikwonyi ɓa kpe Shekwoyi gbetu ɓəfyece nya əye lo, nge aza yi ń ɓa zhni aɓo ye ɓa gwo ɓa fyí, ɓa ta ɓwa gwogwodu nu n aɓo ye zhnii m, ama ɓai tuɓwa, n aɓo n aza yi zhni nyi.
Valgt i Øjeblikket:
Aromayi 1: GNB
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.