Lok 21
21
Lotange lwa n'shikwa mbuchu
(Mlk 12.41-44)
1Yɛso hakebɛlɛ n'lobonga, kwelɔlilɛ wa obangelecha, kwemɔninɛ mbɔna byɛnɛ byachebɛlɛ otangela lotange lwabɔ n'ta etanga. 2Kwemɔninɛ eyǎka m'achana n'shikwa mbuchu minɛ kwetangelɛ tofalanga tobele twɛnɛ tushinakola eto. 3Obibyɔ, Yɛso kwekaninɛ kɛte: «Ne hon'sambela kěnɛ, koko m'achana n'shikwa mbuchu nǎ kwatangela bomɔna bwǐngi oheta bato bɔsɛ. 4Ebalɔ bangɛ bɔsɛ batangela makoko ma bomɔna bwabɔ, ela koko m'achana n'shikwa mbuchu, kwatangela bomɔná bɔsɛ bwa mwɛkɔ kwakɛ.»
Yɛso kohokana yolo ya otɔkiwa wa lobonga lwa Yɛlusalema
(Mat 24.1-2; Mlk 13.1-2)
5Bǎmwɛ bato bebɛlɛ okɔmbɔla yolo lobonga lwa Yɛlusalema. Bebɛlɛ okana kɛte i kikubaiwɛ bisɔka wa mawɛ mabɛnju hamwɛ̂chi na bito bibɛnju byɛnɛ bato betangelɛ wa Abɛcha. Ela Yɛso kwekaninɛ kɛte: 6«Bibyɔ byɔsɛ byamwehomɔna, mechwa masuku mɛnɛ ushi lewɛ lyeshikala hakolo ha lêngɛ, byɔsɛ byetɔkiwa.»
Binywa byɛnɛ byechwa hambɛlɛ ha masuku esula
(Mat 24.3-14; Mlk 13.3-13)
7Nǎ baya bato bem'buchichɛ Yɛso kɛte: «N'lɔmbɔchi, biya byɔsɛ byhiya mɛngɔ naké? Na i abande naké emɔnya kɛte byahohiya?
8Yɛso kwebakailɛ kɛte: «Shamakwɛ lwɛngɛ lolomɛ, yolo mushibikiwɛ! Ebalɔ bato bɛ̌ngi bechwa n'chǐna lyanyi. Bebaokana kɛte bɔ nǎ Kilishito! Na okana kɛte mɛngɔ mesele hɔka. Ela bɛnywɛ, mushibalamɛ! 9Hamwebaoholecha myanɔ kya bita na aloke, mushibɛotekela. Ebalɔ byelěngyɛ biya byetangɛ ohiya, ela maya mɛngɔ esula měba mashinahiya.»
10Ohwa, Yɛso kwesambelɛ kɛte: «Elongɔ yeholana ná êngɛ. Na boɔlɔ bweholana ná bôngɛ. 11Ebalɔ yɔsɛ weba etetecha eolo, na weba asɛnga na bisumi(épidemie) o bibu bǐngi. Na hakolo hehuma tobande twa okakecha na twa oha bato bɔ̌ba wɛ̌nɛ.
12«Ela hambɛlɛ ha biya byɔ̂sɛ ohiya, bem'hamba na ben'subya. Na om'hicha otɔtɔla n'ta mashinagɔgi na ben'tɛla n'kolé. Mwehichiwa hambɛlɛ ha maɔlɔ na bahɛla, yolo yanyi. 13Keyá kyeba ndela kya omɔnya bolɛhɔ bwɛnyu yolo yanyi. 14Obibyɔ , byamwelɛ̌ngyɛ omana na bibi: mushibɛ oletɛnja hambɛlɛ, okana mwetɔkɔma ě. 15Yolo nɛnɛ mǐnɛ nǎ nem'ha binywa bya lwɛnyi byaotɔkɔma byɛnɛ ata tomango twɛnyu tushiɔsha ohanya aɔ okaa byamwekana. 16Ata bibushi byɛnyu na elɔngɔ yɛnyu na makɛnda mɛnyu ben'tambola hambɛlɛ ha bahɛla. Na bamwɛ hawǐngi hɛnyu behɛwa ateka a lubu. 17Bato bɔse bem'ɔnywa yolo yanyi. 18Ela ata binɔ hushi ata lochuli lomwɛ̂chi lwa miswɛ kyɛ̌nyu lwechimina. 19Mobeoɔmya mitema kwɛ̌nyu, yolo n'kekyɔ ndela nǎ mwehɔnya mwɛkɔ kwɛnyu.»
Yɛso kweholangola otɔkiwa wa mboka kya Yɛlusalɛmu
(Mat 24.15-21; Mlk 13.14-19)
20Yɛso kwekaninɛ eyaka kɛte: «Mɛngɔ mamwemɔna mboka kya Yɛlusalɛma kechongoloiwɛ ná bilusha, manakwɛ kɛte, mɛngɔ , ma otɔkiwa wakyɔ mahohiya. 21Obibyɔ M'mamɔ mɛngo, baya béba Yulɛya basenenɛ o toɔnɔ. Na baya béba m'mboka Yɛlusalɛma bahumɛ́ mɔ. Na baya bebá obitola bashisuelɛ eyǎka o mboka.
22«Ebalɔ maya masuku, meba masuku mɛnɛ Abɛcha kwêha bato ateka, yolo biya byɔsɛ byekɔliwɛ m'Mikɔlɔ Kehaha byewelelɛ#21.22 Sɔmakwɛ Ɔsɛa 9.7. 23Maya masuku, weba kɛnɛ o bǎchana benamakumɔ na baya bɛnɛ beokɔkya! Yolo wêbá masoso maolo m'ebalɔ, na songo cha Abɛcha chechwa o ee elɔngɔ. 24Bamwɛ bato behakwa ná panga na bangɛ okuhiwa bacha m'bilɔngɔ byɔsɛ. Na mboka kya Yɛlusalɛma kyematelwa na bato ba bingɛ bilɔngɔ, ná byewelela mɛngɔ mabɔ ohuma.
Ochwa wa Mwǎna kwa N'to
(Mat 24.29-31; Mlk 13.24-27)
25Yɛso kwekelelelɛ okana kɛte: «Abande emɔnɛa n'ta chǒba na n'ta mwɛ̌chi na n'ta tombalambala. Ná m'enɔ ebalɔ bato beba na bɔ̌ba na masoso, yolo ya ebelelɔ ya n'naka na ya mabembe m'echiba. 26Bato bewa ebai na bɔ̌ba m'oɛmba binywa byehiya m'ebalɔ. Ebalɔ byɔsɛ byɛnɛ bye na boɔmɛ ha hakolo byetekechwa. 27Ohwa, bemɔná nɛnɛ Mwǎna kwa N'to m'ochwa n'ta lisu ná boɔmɛ na butukufu*bwǐngi. 28Mɛngɔ mɛnɛ biya binywa byetolá uhiya kimanakwɛ na kinunakwɛ miswɛ, ebalɔ mɛngɔ ma ohɔna wɛnyu mesele hɔ̂ka.»
Eta ya n'te kwa n'tini
(Mat 24.32-35; Mlk 13.28-31)
29Ohwa bîya, Yɛso kwebatɛlilɛ bato ee etá kɛte: «M'bɛlɔla n'te kwa n'tini na kengɛ mite kyɔsɛ! 30Hamwebamɔna byǎnyi bya n'tini byesele otɔmbɛla, manakwɛ kɛte etɛlɔ ebɛnju yesele hɔka. 31Byɔka bîya, hamwemɔna biya bikɔkɔ byesele oetea, manakwɛ kɛte Boɔlɔ bwa Abɛcha* bwesele hɔka. 32Kěnɛ nehon'sambela, kɛte bibi binywa byewelela mɛngɔ mɛnɛ bamwɛ hawǐngi ha bato ba enɔ elɔngɔ bashinawa. 33Kolo na ebalɔ byeheta, ela binywa byanyi bishiheta ata hinɛ.»
Ohɛmba osuela wa Yɛso
34Yɛso kwekaninɛ eyǎka kɛte: «Shamakwɛ lwɛngɛ lolomɛ! Yolo mitema kyɛ̌nu kishinyɛmɛnywɛ ka na mionda na bɔ̌lwa. Na moshiletɛnjɛ yolo ya mwɛkɔ kwɛnyu. Nambɔ bishi bîya, loya lusuku lwa osuela wa Kilishito* lwehiya wa on'tulumunya, 35nɛhɛ biya kɔchi lyebahyoa. Yolo loya lusuku lwe hiyá o bato bɔsɛ ba ebalɔ wa otulumunya. 36Obibyɔ, mobɛ mɛ̌sɔ, mobɛ osaba Abɛcha mɛngɔ mɔsɛ. Nambɔ mwaeta biya, mweba ná oɔma wa oepuka biya byɔsɛ byɛnɛ byehiya, na okimanɛ hambɛlɛ hanɛ nɛnɛ Mwǎna kwa N'to.»
37N'chǒba, Yɛso kwebɛlɛ osɔmya bato n'ta Lobonga*. Ela busuku kwebɛlɛ okya obeta o aɔnɔ a Mizɛituni. 38Bato bɔsɛ bebɛlɛ okya o lobonga m'ɛshi kɔsɛ, yolo bam'holechɛ.
Valgt i Øjeblikket:
Lok 21: byi
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
2025 Forum Communautairre des Traducteurs de la bible et Alphabetisation
