Lok 19
19
Yɛso o sɛsɛ kya Zakayɔ
1Yɛso ohwa okingela m'mboka kya Yɛlikɔ, kwebɛlɛ oheta. 2N'keya mboka mwebɛlɛ komwɛ n'to kwebɛlɛ buchiwá Zakayɔ. Koya Zakayɔ kwebɛlɛ m'hɛla kwa bawan'lambo eyǎka mbɔná. 3Kwebɛlɛ obɛnja komanɛ Yɛso i nanyi, ela, ebalɔ kwebɛlɛ n'kihihu, kushiɔshishɛ om'mɔna yolo ya obula wa bato. 4Obibyɔ, kwebangilwɛ abelɔ, kwehɛlilɛ o n'te, Yolo komɔnɛ Yɛso, ebalɔ Yɛso kwabalěngyɛ ohetela n'keya ndela. 5Mɛngɔ mehǐlɛ Yɛso hase ha koya n'te, kwelɔlilɛ hakolo na on'kanina Zakayɔ kɛte: «Zakayɔ, obɛsala abelɔ, yolo lênɔ nehongecha n'sɛsɛ kyɔ̌bɛ.» 6Zakayɔ kwesalilɛ abelɔ nǎ on'sangelecha Yɛso wa sasɔ leolo. 7Bato bɛnɛ bemɔninɛ bîya, betolilɛ onyɔngɔtɛla m'okana kɛte: «Hɔla! Kwǎkya okingela wa n'to kwa bobé!» 8Ela, Zakayɔ kwekimanɛ hambɛlɛ ha Ɔlɔ na on'sambela kɛte: «Eee Ɔlɔ, holechaka! Nɛnɛ neha bambuchu eba ya bomɔna bwanyi. Na nǎmbɔ nesabilɛ oheta byelěngɛ, něn'suechɛcha nyɛndɔ china.» 9Yɛso kwe kaninɛ kɛte: «Lenɔ, Abɛcha kwahɔnya kenɔ sɛsɛ, yolo koko lwakɛ i kwa elɔngɔ ya Ibulaimu. 10Ebalɔ nɛnɛ Mwǎna kwa N'to nechǔlɛ oɛba na ohɔnya baya bechiminɛ.»
Eta ya bakichi batato
(Mat 25.14-30)
11Bato bekelelɛ oolecha binywa byɛnɛ Yɛso kwebɛlɛ otɔkɔma. Hakebɛlɛ hɔka na mboka kya Yɛlusalɛma, bato belangilɛ kɛte Boɔlɔ bwa Abɛcha* bwehiya m'mɔka maya mɛngɔ. Nǎ Yɛso kwebaitilɛ ê engɛ eta kɛte. 12«Webɛlɛ komwɛ n'to kwa elɔngɔ ya boɔlɔ. Koya n'to kwekělɛ lwɛndɔ o ebalɔ ya kɔ, yolo kokimiwɛ o boɔlɔ na osuela oshama ɔlɔ m'ebalɔ yakɛ. 13Ela, hambɛlɛ ha kɛ ochoa, kwebuchichɛ bato umi hawǐngi ha bakichi bakɛ. Na obakabanyinya kwabâlwa bomɔná bomwɛ̂chi bomwɛ̂chi#19.13 Bomɔna bomwɛ̂chi, bobɛlɛ bomɔna bwa olepa n'to o mibichi mia kemwɛ̂chi., na obasambela kɛte: ‹Moetɛ n'kelɔ na bobo bomɔna na obobucha nǎ byande suela.› 14Ela bato ba ebalɔ yakɛ bebɛlɛ om'ɔnywa. Yolo ya biya, behililɛ bato bakyɛ okaná kɛte: ‹Tushi obɛnja kochwɛ onɔ kobɛ ɔlɔ lyɛto.›
15«Ela ata biya koya n'to kwekimiwɛ obá ɔlɔ, na kwesuelɛ m'ebalɔ yakɛ. Hakehǐlɛ, kwebochechɛ baya bakichi bakɛ umi, yolo komanɛ kwabalwa kwapata akɔɛlɔ a bongá o boya bomɔna bwakebashikilɛ. 16N'kichi kwa n'tangi kwechǔlɛ na okana kɛte: ‹Ɔlɔ, akɔɛlɔ andamɔ̂na i umi o boya bomwɛ̂chi.› 17Ɔlɔ lyen'sambelɛ kɛte: ‹Boswachi! Waeta bisɔka! Kɔkwɛ we n'kichi m'bɛnju. Omɔna webɛlɛ mwaminifu o bito binɛ, obibyɔ naobea oba m'hɛla kwa maboka umi.› 18N'kichi kwa bobele lwakɛ kwechǔlɛ na okana kɛte: ‹Ɔlɔ, akɔɛlɔ andamɔ̂na i atanɔ o boya bomwɛ̌chi.› 19Ɔlɔ lyakɛ lye on'kaninɛ kɛte: ‹Kɔkwɛ lɔbɛ naobea obá m'hɛla o maboka matanɔ.› 20Ohwa, kongɛ n'kichi kwechǔlɛ na okana kɛte: ‹Ɔlo, kohaka lofalanga lɔbɛ. Nilobisilɛ bisɔka n'ta hieba hya ngobɔ. 21Naba na bɔ̌ba bɔbɛ wɛ̌nɛ, yolo webabá n'lomyana n'kɔmakachu. Kɔkwɛ webakoha ishiyɔbɛ, eyǎka webákembola byɛnɛ ushioninɛ.› 22Ɔlɔ lyakɛ lyen'kaninɛ kɛte: ‹Kɔkwɛ we n'kichi m'bé! Neoha ateka olamana na binywa byɔbɛ, wemaninɛ nɛnɛ nebaba n'to n'komakachu, minɛ nebakoha bishi byanyi na okembolá byandasaôná. 23Yolo yaé ushim'beɛ boya bomɔna bwanyi n'ta banki? Atambe haosuela wanyi nenabobangilɛ bwahobotana!› 24Ohwa, leya ɔlɔ lyesambelɛ baya bebɛlɛ haya kɛte: ‹Koko n'kichi n'sapakwɛ bobɔ bomɔna, mom'hɛ koya minɛ kwe na umi.› 25Bɔ na on'kanina kɛte: ‹N'lɔmbɔchi, atambe kokɔ kwesele na bomɔná umi!› 26Kɛ na obakǎ kɛte: ‹Nan'kanina kɛte n'to minɛ kwe na eto nǎ kwehɛwa engɛ́. Ela, koya minɛ kushi na eto, ata hiya hinɛ hyakele nǎhyɔ hyesapiwa. 27Eyǎka lea ɔlɔ lyakɛ lyekaninɛ kɛte: ‹Tomango twanyi, twɛnɛ tushibɛlɛ bɛnja nɛnɛ oba ɔlɔ lyabɔ, mochwɛ nǎtɔ hanɔ na motohakɛ hɔka hanɔ nɛnɛ m'omɔna.› »
Yɛso kwa kingela Yɛlusalɛma na onyɛma
(Mat 21.1-11; Mlk 11.1-11; Yɔa 12.12-19)
28Yɛso hakehulɛ otɔkɔmá bîya, kwekelelelɛ na lwɛndɔ lwakɛ lwa ohɛla Yɛlusalɛma, m'oba hambɛlɛ ha eoto bato. 29Kwehǐlɛ hɔka na mboka kya Bɛtɛfagɛ na kya Bɛtania, lǒbe lwa aɔnɔ a Mizɛituni. Kwehililɛ balɔmbwɛ* bakɛ babele, na kwebakaninɛ kɛte: 30«Kewakwɛ m'mboka kyɛnɛ kye hambɛlɛ hɛnyu. Hamwehiya obɔ, mwebanga mwǎna kwa ponda kwem'hambwɛ, minɛ kushinatɛta n'to kɛkɛsɛ. N'sulakwɛ, mochwɛ́ nakɛ hanɔ. 31Nambɔ n'to kwam'bocha kɛte yolo yaé mwan'sula, n'kǎkwɛ kɛte: ‹Ɔlɔ kohom'bɛnja.› »
32Baya balɔmbwɛ bɛnɛ behililwɛ bekělɛ. Bebangilɛ byɔka biya byɛnɛ Yɛso kwebasambelɛ. 33Habebɛlɛ osula koya mwǎna kwa ponda, bɛnɛ nǎkɛ bebabuchichɛ kɛte: «Yolo yaé mohosula koya mwǎna kwa ponda?» 34Bɔ kɛte: «Ɔlɔ nǎ minɛ kohom'bɛnja.»
35Na byabekělɛ na koya mwǎna kwa ponda wa Yɛso. Ohwa, bekandilɛ ngobɔ́ chabɔ hakolo ha keya ponda, na on'chinya Yɛso hakolo hakɛ. 36Mɛngɔ mɛnɛ Yɛso kwebɛlɛ kwěle n'lwɛndɔ, bato bekelelelɛ m'okanda ngobɔ chabɔ n'tela#19.36 Bayola mɛngɔ ma osangelecha m'hɛla, bebɛlɛ on'kandela ngobɔ n'tela wa on'nyɛmya. . 37Yɛso hakehǐlɛ hɔka na mboka kya Yɛlusalɛma, m'osala aɔnɔ a Mizɛituni, balɔmbwɛ* bakɛ bɔsɛ bebɛlɛ na sasɔ na otola otɔna Abɛcha wa lete leolo, yolo ya bikake byɔsɛ byabemɔninɛ. 38Bebɛlɛ okya m'okana kɛte:
«Kohalelwɛ Ɔlɔ kohochwa o chǐna lya Abɛcha.
Talala lyebɛ hakolo,
na Abɛcha kotɔnywɛ#19.38 Sɔmaka zabole 118.26!»
39Haya, m'eya eoto ya bato mwebɛlɛ bamwɛ Bafalisayɔ* bɛnɛ ben'sambelɛ Yɛso kɛte: «N'lɔmbɔchi, kaninaka balɔmbwɛ* bɔbɛ bashamɛ pi!» 40Ela Yɛso kwebakailɛ kɛte: «Nan'sambela, nǎmbɔ baba bahoshama pi, mawɛ nǎ mehunya maté!»
Yɛso koholela yolo ya Yɛlusalɛma
41Yɛso hakehǐlɛ hɔka na mboka kya Yɛlusalema, hakekemɔninɛ, kwekelelelɛ. 42Kwekaninɛ kɛte: «Nǎmbɔ wenamaninɛ lenɔ byɛnɛ byenaoha talala! Ela ibibiswɛ o manɔ mɛngɔ, ushinabimɔ̂na! 43Ebalɔ masuku mechwa mɛnɛ tomango tɔbɛ tweongoloa yolo tolwɛ bita nɔ̌bɛ. Na mɛngɔ ma twekubaa loba lwa olekonga hɔka nɔ̌bɛ, tweohindilicha ngobe chɔsɛ. 44Twěotɔkya hamwɛ̂chi na bato bɔbɛ. Bashishika ata lewɛ hakolo ha lengɛ, yolo ushimaninɛ mɛngɔ menɛ Abɛcha kwechǔlɛ wa wele oohɔnya.
Yɛso kwabenga bakuchi sɛsɛ kya Abɛcha*
(Mat 21.12-17; Mlk 11.15-19; Yɔa 2.13-22)
45Ohwa, Yɛso kwekingelɛ n'sɛsɛ kya Abɛcha#19.45 Sɛsɛ kya Abɛcha: hanɔ kyebɛlɛ eba ya lobonga mwɛnɛ bebɛlɛ okola bito bya otangela Abɛcha. Eyaka i bashi Bayola nǎ bebɛlɛ otɔnɛna Abɛcha haya. *. Hakehǐlɛ n̂'ya, kwetolilɛ obenga baya bakuchi, 46m'obakanina kɛte: «Byebikɔliwɛ n'ta Lokɔlɔ Lohaha kɛte: ‹Sɛsɛ kyǎnyi kyěba sɛsɛ kya losabɔ.› Ela bɛnywɛ mwahokebea oba m'haɔ kwa bɛ̌bi!»#19.46 Sɔmaka Isaya 56. 7; Yɛlɛmia 7.11
47Masuku mɔsɛ,Yɛso kwebɛlɛ osɔmya n'sɛsɛ kya Abɛcha*. Ela, bahɛla ba bibole*, na nɔmbɔchi cha Ndɔ*hamwɛ̂chi na mahika, bebɛlɛ oɛba ndela kya om'hakya. 48Ela bashiɔshishɛ, ebalɔ bato bɔsɛ bebɛlɛ om'holecha wa yǒma yɛ̌nɛ.
Valgt i Øjeblikket:
Lok 19: byi
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
2025 Forum Communautairre des Traducteurs de la bible et Alphabetisation
