Lok 10
10
N'kelɔ kwa balɔmbwɛ maumi njwe na babele
1Ohwa biya, Ɔlɔ kwesɔbɔlɛ bǎngɛ balɔmbwɛ* maumi njwe na babele#10.1 We bingɛ bitabɔ byɛnɛ byebikanɛ kɛte i maumi njwe.. Kwebahililɛ babele babele, yolo babangwɛ m'maboka na ɔɔsɛ hɛnɛ kɛ mǐnɛ kwebɛnjichɛ okya. 2Kwebakaninɛ kɛte: «Mikembo i kǐngi, ela bakembochi i banɛ. Wa biya, kaninakwɛ minɛ lobala kohilɛ bǎngɛ bakichi bachwɛ oeta n'kelɔ. 3Obibyɔ m'bɛkya! manakwɛ kɛte nam'hila nɛhɛ bǎna ba miɔɔ kyehokya hawǐngi ha lwele. 4Mushitɛ̌tɛ bomɔna, aɔ ahwaba, aɔ mikalabanda, na mushitanyɛ n'to kɛkɛsɛ n'ndela.
5«Sɛsɛ kyɔkyɔsɛ kyamwekingela, tangakwɛ okana kɛte: ‹Talala lyebɛ n'kenɔ sɛsɛ!› 6Nambɔ komwɛ n'to kwatalala kohochama ha keya sɛsɛ, talala lyɛnyu lyeba nǎkɛ. nambɔ bishi bibyɔ, leya talala lyen'sowelela bɛnywɛ bɛ̌nɛ. 7Shamakwɛ n'keya sɛsɛ, moyɛ na monywɛ byɛnɛ byabem'ha, yolo n'kichi kwelěngyɛ ohɛwa malepɔ makɛ. Mushihumɛ n'keya sɛsɛ na okya o kengɛ. 8Hamwekingela n'kimwɛ mboka, na ban'kaa bibɛnju, moyɛ byabem'ha. 9Hɔnyakwɛ basǒmwa ba keya mboka, na mokaninɛ bato kɛte: ‹Boɔlɔ bwa Abɛcha* bwe hɔka na uhiya wɛnyu.› 10Ela nambɔ mwakingela m'mboka elakɛ, na bato baɛma on'kaa, mokyɛ m'matela na mokanɛ kɛte: 11‹Twahukumuna hambɛlɛ hɛnyu ahwele a mboka kyɛ̌nyu hɛnɛ hɛɛ o byahe byɛto. Ela manakwɛ kɛte: Boɔlɔ bwa Abɛcha* bwesele hɔka wemwele.› 12Chikelwɛ nan'kanina kɛte, lusuku lwɛnɛ Abɛcha kweeta ateka, bato ba keya mboka behɛwa ateka oheta bato ba Sɔlɔma#10.12 Sɔmakwɛ Botangi 19.24-28..»
N'shicha o maboka mam'hanya Yɛso
(Mat 11.20-24)
13Yɛso kwekaninɛ eyǎka kɛte: «I n'shicha ɔbɛ mboka kya Kɔlazini! I n'shicha ɔbɛ mboka kya Bɛtɛsaila! Yolo nambɔ bikake byandeitilɛ wɛnyu byenaeteɛ omboka kya Tilɔ na mboka kya Shilɔni, bato ba m'maya maboka benashaminɛ hasé, na ochwala elamba, na olebɔngya n'tɔ, yolo bamɔnyɛ kɛte bakalola bikɔkɔ byabɔ. 14Obibyɔ, lusuku lwa ateka, masoso mɛnyu meheta ma bato ba Tilɔ na Shilɔni. 15Na kɔkwɛ mboka kya Apɛlɛnaumu, weholanga kɛte mwehɛchiwa m'paka hakolo? nǎngo! Wetɛlwa m'ena elǎhu ya babu.»
16Yɛso kwekaninɛ eyaka balɔmbwɛ bakɛ kɛte: «Nambɔ n'to kwam'holecha, i nɛnɛ nǎ kwaholecha. Ela koya minɛ kwam'hanya, i nɛnɛ nǎ kwǎhanya. Na koya kwapanya nɛnɛ, i koya minɛ kwepililɛ nǎ kwǎhanya.»
Osuela wa baya balɔmbwɛ* maumi njwe na babele
17Ohwa, baya balɔmbwɛ* maumi njwe na babele besuwelɛ na sasɔ leolo na bekaninɛ kɛte: «Ɔlɔ, ata miha kyabaotoholecha mɛngɔ matwebɛlɛ okebenga o chǐna lyɔbɛ.» 18Nǎ Yɛso kwebakaninɛ kɛte: «Nabaomɔna byɛnɛ Ehengele yabaokwa uhuma hakolo nɛhɛ ahɛnyuhɛnyu. 19holechakwɛ: nam'ha boɔmɛ bwa okanda ehengele. Mwebá omatela ndɔa na ngɛlɛngɛlɛ, na ushi eto ata emwɛchi yɛnɛ yenam'eta bobe. 20Ata biya, mushisɛ̌lɛlɛ yolo miha kyeom'holecha, ela, mosɛ̌lɛlɛ yolo machǐna mɛnyu memakɔliwa hakolo.»
Sasɔ lya Yɛso
(Mat 11.25-27; 13.16-17)
21M'mɔka maya mɛngɔ, N'tema Kohaha kwem'etelɛ Yɛso kobɛ na sasɔ, kwekaninɛ: «Tata, Ɔlɔ kwa kolo na asé, naoha buswachi, yolo wabisa o baya bee na bomanyi na lwɛ̌nyi bibi bito, na obibisula o bǎnyuɛ! Kɔkwe Tata, wabɛnja byabɛ binɔ. 22Tata kwǎpá bito byɔsɛ. Ushi n'to kwembǎnɛ nɛnɛ Mwǎna, ela Tata kɛ mǐnɛ. Ushi n'to kwem'mǎnɛ Tata, ela i nɛnɛ Mwǎna kwǎkɛ kwa ehɛnɛ nǎ neem'mǎnɛ, na bato bɛnɛ bandebɛnja bam'mǎnɛ.»
23Ohwa, Yɛso kwebasoelelɛ balɔmbwɛ bakɛ okana kɛte: «Komba bɛnywɛ behomɔna binɔ byamwehomɔna!#10.23 We bingɛ bitabɔ bye bikanɛ kɛte: komba mɛ̌sɔ mehomɔna byamwehomɔna 24Chikelwɛ nan'kanina kɛte bibole bǐngi na maɔlɔ měngi bebɛlɛ bɛnja omɔna bibi bya mwehomɔna, ela bashibimɔninɛ. Eyǎka bebɛlɛ obɛnja baholecha bibi bya mweoholecha, ela bashibiholechɛ.»
Eta ya N'samaliya kwa misa
25Ohwa haya, komwɛ n'lɔmbɔchi kwa ndɔ* kwebɛnjichɛ on'tɔnda Yɛso. Kwekimanɛ na om'bocha kɛte: «N'lɔmbɔchi, naetɛ é yolo nabɛ na mwɛkɔ kwa milombo?» 26Yɛso kwen'kailɛ kɛte: «N'ta mwa ndɔ* mwebaban'kɔliwɛ wé? Na webatɔtɔbɔla wé haweba sɔma?» 27Koya n'lɔmbɔchi kwen'kailɛ kɛte: «M'bɛnjɛ Ɔlɔ Abɛcha kɔbɛ wa n'tema kɔbɛ kɔsɛ, na bon'to bɔbɛ bɔsɛ, na oɔma ɔbɛ ɔsɛ, na wa lwɛ̌nyi lɔbɛ lɔsɛ. Na obɛ ǒnda m'binji nɔbɛ nɛhɛ kɔkwɛ mǐnɛ.»#10.27 Sɔmakwɛ Engɛlɛ chɔ 6.5; Balawi 19.18 28O esula Yɛso kwen'kaninɛ kɛte: «Wakaa bisɔka! obɛ oeta biya, yolo obɛ na mwɛkɔ.» 29Ela koya n'lɔmbɔchi kwa ndɔ kwebɛnjichɛ olemɔnya oba n'to kwa chikelwɛ, kwem'buchichɛ Yɛso: «M'binji nanyi i nanyi?»
30Yɛso kwen'kailɛ kɛte: «Komwɛ n'to kwebɛlɛ sala uhuma Yɛlusalɛma okya Yɛlikɔ. Hakebɛlɛ n'tela, kwewasilwɛ na bilomɛ pambwa (bandi). Biya bilomɛ pamba ben'sapilɛ bito byakɛ byɔsɛ na om'hola, bɔ na on'shika kweohukumba.
31We chulɛ emwɛ ebole* yebɛlɛ heta n'keya ndela, hakem'mɔninɛ koya n'to, kwehitilɛ habamba na olekela. 32Byɔka biya komwɛ N'lawi#10.32 N'lawi:Balawi bebɛlɛ bato ba elɔngɔ ya Ishilaɛli bɛnɛ bebɛlɛ owasha bahɛla ba bibolɛ oeta n'kelɔ n'ta lobonga sɔmakwɛ Lobalɔ 3.1-13. kwehǐlɛ a eya ibu. Hakemɔninɛ koya n'to, kɛ lwakɛ kwehitilɛ habamba na olekela. 33Ohwa, wechulɛ komwɛ N'samaliya minɛ kwebɛlɛ oheta n'keya ndela. Hakem'mɔninɛ koya n'to, kwem'mɔnɛnɛ kɛnɛ. 34Kwesɛninɛ hɔka nǎkɛ, kwen'kilahɛ malasɛ makɛ na mauta na livai, na kwemahambilɛ. Ohwa, kɛ na on'chinya o ponda, kwekělɛ nǎkɛ o sɛsɛ kya bakɛnyi, yolo kokilahwɛ.
35M'mɛshi mwǎkɛ, kwehunyinyɛ linali chibele cha bomɔna, na om'ha minɛ sɛsɛ na on'kanina kɛte: ‹Obɛon'kilaha bibɛnju koko n'to, na handesuwela, něosuechɛcha bongɛ bomɔna bwɛnɛ bwewehunya wakele.› »
36Ohwa Yɛso kwem'buchichɛ koya n'lɔmbɔchi kwa ndɔ* kɛte: «Hawǐngi ha baya bato batato i nanyi kwelěngyɛ oba m'binji nakɛ kwa koya n'to minɛ kwewasilwɛ na bilomɛ pamba? 37Koya n'lɔmbɔchi kwa ndɔ* kwen'kailɛ Yɛso kɛte: «I koya minɛ kwǎm'mɔnɛna kɛnɛ.»
Nǎ Yɛso kwen'kaninɛ: «Ketaka na obɛoeta byɔka biya.»
Yɛso kwaɛnɛna o sɛsɛ kya Malia na Malata
38Mɛngɔ mɛnɛ Yɛso kwebɛlɛ okya na balɔmbwɛ, bekingelɛ n'kemwɛ mboka. N'keya mboka mwebɛlɛ komwɛ m'achana kwebɛlɛ buchiwa Malata, kwem'pɔkɛlɛ Yɛso o sɛsɛ kyǎkɛ. 39Koya Malata kwebɛlɛ na n'nunâkɛ minɛ kwebɛlɛ buchiwa Malia. Koko Malia kwebɛlɛ oshama habamba ha makolo ma Ɔlɔ Yɛso, m'oholecha byɛnɛ Yɛso kwebɛlɛ osɔmya. 40Ela Malata kɛ kwebɛlɛ oeta kengɛ mikelɔ kya n'sɛsɛ. Kwen'kelelɛ Yɛso na on'kanina kɛte: «Ɔlɔ, biya byɔsɛ bishiohokanina eto wa omɔna n'nunânyi kwandɛa nɛnɛ ka oeta n'kelɔ? On'kaninɛ kombwashɛ.»
41Yɛso kwan'kailɛ: «Aah Malata, Malata!Kɔkwɛ waletɛnja na bito bǐngi.» 42Ela wee eto emwɛchi ka ye na akɔɛlɔ. Malia kɛ kwasɔbɔla eto ebɛnju wɛ̌nɛ. Na ushi n'to kwenaɔ̂sha on'sapa yɔ.
Valgt i Øjeblikket:
Lok 10: byi
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
2025 Forum Communautairre des Traducteurs de la bible et Alphabetisation
