Ntendo 11
11
Petelo ʉkʉaganʉɨla antʉ nɨshanga amʉhʉɨɨe ʉ Yesʉ kʉ Yelusalemu
1Itʉmi nɨ antʉ nɨshanga Ayahudi awa naɨahʉɨɨe aɨakolɨ kʉ Yʉdea ɨkija kɨna antʉ nɨ shanga Ayahudi nɨenso asɨngɨɨlya ʉ lʉkani lang'wi Itunda. 2Itɨ gwa ʉ Petelo wɨkanankɨla kʉ Yelusalemu, Ayahudi awa naɨabadisigwa nʉ kuhʉɨɨla ɨkamʉsosha, azemʉtʉka, 3“Ʉewe aza wendile mʉnyʉmba kʉlɨzania nɨ antʉ nɨshanga atawe kʉ kɨdamu.” 4Papo ʉ Petelo wɨkaaganʉɨla makani ɨhi naɨapumɨe kandɨɨlya ʉng'wandyo.
5“Lʉhikʉ lʉng'wɨ aɨnkolɨ mʉ kɨsalɨ ka Yapwa kʉlompa, nɨkakɨɨlwa tʉlo, nɨkaona mʉloto. Nɨkaona kɨntʉ anga mʉgolole ʉkʉlʉ, ʉkʉsima kʉpuma kigʉlʉ ʉkete mpande innɨ, nʉwenso ʉkahumbeeligwa paɨnkolɨ. 6Nɨkahʉngɨɨla mʉkatɨ akwe nɨkaona ikalɨ niikete mɨgʉlʉ innɨ, ikalɨ niya mʉwɨɨ, ikalɨ niyagula ni nyʉnyi. 7Sʉnga nɨkija kʉɨlwa ‘Petelo, ʉka ʉsɨnje ʉlye.’ 8“Ʉnene nɨkasʉkɨɨlya, ‘Isekʉlʉ, A a, kɨntʉ kɨhi nɨkɨgiigwe kʉlya nɨkɨ nɨkɨbɨ kɨkɨlɨ kʉunzɨlwa mʉ mʉlomo wane.’ 9“Nɨkaɨlwa nkʉa akabɨɨlɨ kʉpuma kigʉlʉ, ‘Kɨntʉ kɨhi Itunda nʉkeilye leka kʉlʉnga miko kʉlɨgwa.’ 10Ikani ɨlɨ azalisʉkɨɨe kataatʉ kʉpumɨla, papo ɨkɨntʉ nɨkanso nɨkimpyani nʉ mʉgolole kɨkaholwa hangɨ kigʉlʉ. 11Itungo lɨlo lɨɨlo antʉ ataatʉ, naɨ alagɨigwe kʉpuma kʉ Kaisalia ɨkapikɨɨla mʉnyʉmba naɨnishiɨ. 12Ng'wahʉ ng'welʉ wɨkambɨla kʉkʉɨlanie nɨenso ndeke kisinsɨla. Anyandʉgʉ awa nɨ mʉtandatʉ nɨenso ga ɨkakʉɨlania nʉnene, nʉsese kɨkingɨle mʉ nyʉmba ang'wa Kolinelio. 13Kolinelio wɨkakʉganʉɨla naɨʉmʉine ʉ Malaɨka wimɨkile mʉnyʉmba akwe nʉkʉlʉnga, ‘Lagɨɨlya antʉ alongole kʉ Yapwa amʉlete ʉ Simoni nʉitangwa Petelo. 14Ng'wenso ʉkʉʉpa lʉkani ʉewe nawa ɨhi nɨa mitolako nɨmʉtakɨwe kʉtenda mʉhume kʉgunɨka.’ 15Nʉnene naza nandilye kʉtambʉla, Ng'wahʉ Ng'welʉ wɨkasima migʉlyaao anga naɨʉkʉsimɨɨe ʉsese apo pa ng'wandyo. 16Papo nɨkakɨmbʉka ʉlʉkani lang'wi Isekʉlʉ Yesʉ naɨʉtambʉe, ‘Yohana aɨʉbadisilye kʉ mazɨ, ʉnyenye ingɨ mʉkʉbadisigwa kʉ Ng'wahʉ Ng'welʉ.’ 17Ingɨ Itunda anga itule aɨʉapee antʉ awa kɨpegwa kɨko kɨɨko naɨʉkʉpee ʉsese naɨkʉmʉhʉɨɨe Isekʉlʉ Yesʉ, itɨɨ, ʉnene naina nɨ nyenyu nɨngeme kʉmikʉngʉmya Itunda?” 18Antʉ naɨija inkani izi ɨkaʉlya nila kikʉngʉmya. Nawo ɨkamʉkʉlya Itunda azelʉnga, “Itunda, ʉapee antʉ nɨshanga Ayahudi kila itʉnʉ nɨlɨletaa ʉpanga nʉwa kalɨ na kalɨ.”
Ahʉɨɨli ang'wa Yesʉ nɨa kʉ Antiokia
19Itungo lɨlo lɨɨlo ahʉɨɨli ang'wa Yesʉ naɨabalansanile kʉpumɨɨla kʉ Yelusalemʉ matungo alwango naɨakɨla ɨnsha ang'wa Sitepwano. Nɨang'wɨ ɨkalongola kʉli kʉpikɨɨla kʉ Poiniki nʉ kʉ Kipʉlo nʉ kʉ Antiokia nʉ kʉ Silia, ɨkatanantya Nkani Nza kʉ Ayahudi ʉdu. 20Ingɨ ahʉɨɨli ang'wa Yesʉ nɨang'wɨ naɨapumɨɨe kʉ Kʉpʉlo nʉ kʉ Kilene, ɨkalongola kʉ Antokia, ɨkandya kʉtanantya Nkani Nza nɨang'wa Isekʉlʉ Yesʉ kʉ antʉ nɨshanga Ayahudi. 21Ʉhumi wang'wi Isekʉlʉ wɨkatula palʉng'wɨ nɨenso nɨ antʉ ɨdʉ nɨshanga Ayahudi ɨkahʉɨɨla nʉkʉmʉsʉkɨla Itunda.
22Mpola yikani nɨlanso yɨkaapikɨɨla antʉ naɨ amʉhʉɨɨla ʉ Yesʉ kʉ Yelusalemʉ, ɨkamʉlagɨɨlya ʉ Balinaba walongole kʉ Antiokia. 23Balinaba naɨwɨkapika kʉ ng'wanso, wɨkahanga itɨ Itunda naɨ ʉakembetile antʉ nɨanso, wɨkiloa nʉkʉakomya nkolo ɨhi akagupe mʉ ʉhʉɨɨlɨ wao kʉng'wi Isekʉlʉ kʉ nkolo nɨyao yɨhi. 24Balinaba aɨmʉntʉ mʉkende hangɨ aɨʉtoneewe nʉ Ng'wahʉ Ng'welʉ hangɨ mʉhʉɨɨlɨ. Antʉ ɨdʉ ɨkangeeleka kʉng'wi Itunda.
25Sʉnga Balinaba wɨkalongola kʉ kɨsalɨ ka Taliso kʉmʉduma ʉ Sauli. 26Naɨwamʉpantɨka, wɨkamʉleta kʉ Antiokia. Ɨhi mʉbiɨlɨao akikiɨ nɨantʉ nɨamʉhʉʉɨe Isekʉlʉ ng'waka wɨhi ɨkaze amanyisa antʉ. Kʉng'wanso kʉ Antokia, kʉko ahʉɨɨli ang'wa Yesʉ aɨandɨɨye kitangwa Akilisito.
27Matungo nanso amanga ang'wi Itunda ang'wɨao aɨahulumʉkile kʉ Antiokia kʉpuma kʉ Yelusalemu. 28Mʉmanga ʉng'wɨ lina lakwe Agabo, kʉ ʉhumi nʉwa Ng'wahʉ Ng'welʉ wɨkimɨka wɨkapumya mʉloto kɨna izala ikʉlʉ lɨkenela mihɨɨ ɨhi. Nzala nanso ɨkʉpumɨle mʉ ʉtemi wang'wa Tibelio. 29Itʉmi ɨkalagɨɨlya mʉntʉ wɨhi, anga ʉhumi wakwe nʉkete, wamʉgeele mʉnyandʉgʉ nʉishiɨ mʉ Yʉdea. 30Ʉʉgwa ɨkatendaʉ, ʉgeeli wao wɨkatalwa kʉa Balinaba nʉ Sauli, awo atwale kuatongeeli a ahʉɨɨli ang'wa Yesʉ.
The New Testament in Isanzu @The Word for The World International and Isanzu Language translation. All rights reserved