Lomɛ́ŋ 5
5
Támbák matápúkɛ́n é Yésus ɛ́ɛ́ túpíɛ́yɛn nɛɛyɛ́
1Anakáánɛ́ kɔk, kuátap kúásɔ́ ɛ́ɛ́kɛɛlɛ ɛ́ɛ́ túpá indɛ́ndɛ́nɛ ké iŋís yá Támbák tuond tutápukanɛn kɔ́ Ɔkɔ́n waasɔ́ Yésus Kilíis á kupá é kiyeéwe na Támbák. 2Tuákaámán é peseé u Támbák tutápukanɛn é Yésus káásɔ́ á kuátap, tuɔ́nyílɔpɔn papílúndánɛ́n é peseé ukáánɛ́. Andikɛ́k puandá púɛlɛnɛ́ ɛ́ɛ́ túyayapa punyɛ́ tuópíóndonyi ɔtɛ́m á kupia niap é nuúmu nú Támbák. 3Andikɛ́k kɔk ɛ́ɛ́ túpímɛlɛ káásɔ́ é muyu, á kiákí tuémenyen ɛ́ɛ́ muyu ááyuukan naasɔ́ é kuésepenyi, 4Kuésepinyi ékeekenyi nulátát nú kémuémue, nulátát nú kémuémue eekenyi pipíóndínyí ɔtɛ́m. 5Pipíóndínyí ɔtɛ́m tipá pípúle, á kiáki ɛ́ɛ́ Emfúnukufúúmɛ pámaátúfá éekelekesenyi iŋɔyɔ i Támbák káásɔ́ kí itɛ́m. 6Ɛ́ɛ́ɛ, aká túmányípá tumany katí imbekíe, Kilíise weekú ó pusíó pú pafalfál á kisikɛl Támbák maásɔ́mb. 7Púnyɛ imfɛ́l ɛ́ɛ́ mɔɔnd áátap kukú ó pusíó pú mɔɔnd u indɛ́ndɛ́nɛ; ɛlɛɛ́ ó pusíó pú mɔɔnd wɛɛlɛnɛ́ peseé mɔɔnd nyɛ́ pákuátap ɛ́ɛ́ úkú kɛ́ɛ́yɛ́ ó pusíó. 8Maná Támbák éétútínyenyi ɛ́ɛ́ wɔɔ́túɔyɔ táásɛ á kiáki ɛ́ɛ́ Kilíis éékú káásɔ́ ó pusíó á kisikɛl tumaápá tumanyi pafalfal. 9Índɛ́ kɔk nínúan manɔ́ŋ mé Yésus ɛ́ɛ́kɛɛlɛ ɛ́ɛ́ tupá indɛ́ndɛ́nɛ ké iŋís yá Támbák, tiɛkiɛ́ kɔk ukaná kuɛlɛ ɛ́ɛ́ utitúsótí kí ilópi í Támbák? 10Índɛ púnyɛ ɛ́ɛ́ aká tumaápá tumanyi pokóyikoy pá Támbák, nikú ni muɔ́nɔ́ wɛɛyɛ́ niɛ́kɛɛl ɛ́ɛ́ túpíɛ́yɛn nɛɛyɛ́. Nínúan tunyɛ pɛpíɛ́yɛ́n na Támbák tiɛkíɛ́ kɔk kusɔ́t kú muɔ́nɔ́ wɛɛyɛ́ kaná kuɛl ɛ́ɛ́ kútitúsóti! 11Kutápɔk pukáánɛ́ tuáyayapa ké eŋís yá Támbák tutápukanɛn kɔ́ Ɔkɔ́n waasɔ́ Yésus Kilíise; kɛ́ɛ́yɛ́ kɔk tunyɛɛ́ pɛpiɛ́yɛ́n na Támbák.
Átamɛ ne Yésus Kilíis
12Kifal mepíkín é kúúsí á mɔɔnd táŋ omoómí kisiɛ́n ɛ́ɛ́ Átamɛ, umɛɛ́l kifal, kíépíkin e kúúsí, kifal kiókoól ne niku, anakáánɛ́ kɔk nikú niátal pɛɛnd kitikit imbɔk: á kiákí ɛ́ɛ́ peem makɔɔ́n á kifal. 13Támbák mɛɛ́lɛ́ umanyi utiekí kikotí kiɛ́yɛ́ ó Moyíis, kifal mapá kíkanyi e kúúsí, aká kikotí tiányípá, pátipá pɛ́pɛnɛn mɔɔnd úmɛ́nyɛɛlɛ́ kifal. 14Anakáánɛ́ kɔk kuetúm á kisikɛl kí Átam kuám ó kí Moyíis, nikú mamíánsɛ́n pɛɛnd tɛ epé pɛmɛɛ́l pátikɔɔ́n á kifal ɛlɛɛ́ kí Átam, umɛɛ́l utiɔ́pɛ́n Támbákɛɛ́. Átam mapá imfúényé i sɔ́k ewú umɛɛ́síkɛ́nɛ́n kuol. 15Maná nupoo nú Támbák tipá puandá púmoómí na kipínanɔ́ kí Átam; púnyɛ nɔ́ ɛ́ɛ́, kipínanɔ́ kí mɔɔnd ukáánɛ́ táŋ omoómí kímɛɛ́lɛ́ ɛ́ɛ́ pɛɛnd kutek ku, maná peseé u Támbák mapá á mɔɔnd omoómí Yésus Kilíise, weesélemendi peseé ukáánɛ́ ɛ́ pɛɛnd kutek. 16Melié mó nupoo nú Támbák tipá ɛlɛɛ́ má kifal kí mɔɔnd táŋ omoómí, isɔ́ɔ́sɔ óólinon á kifal kí mɔɔnd táŋ omoómí yéékeesúkínén pɛ́pɛn pɛɛnd kutek. Naánɛ́ kɔk ɛ́ɛ́ nupoo nú Támbák weekenyée é kélém kú pipínanɔ́ kutek, ɛ́ɛ́kɛɛlɛ ɛ́ɛ́ pɛɛnd óond indɛ́ndɛ́nɛ. 17Ɛ́ɛ́ɛ, á kipinanɔ́ kí mɔɔnd omoómí, nikú níámíánsɛn mɔɔnd kitikit. Maná é péépé kitikit páányípiá peseé táásɛ u Támbák no nupoo nú indɛ́ndɛ́nɛ páátápukanɛn á mɔɔnd omoómí Yésus Kilíise, póond pámíánsinan kusɔ́t, 18Yá anakáánɛ́ kipínanɔ́ kí mɔɔnd omoómí, mɛɛ́lɛ́ ɛ́ɛ́ pɛ́pɛn pɛɛnd kitikit, yá anakáánɛ́ kɔk é puelínyé pú indɛ́ndɛ́n pú omoómí, mɔɔnd kitikit nyɛ kupá indɛ́ndɛ́nɛ woond upia kusɔ́t. 19Yá aná púnyɛ́ ɛ́ɛ́, á pitúkɔ́l pí mɔɔnd omoómí, pɛɛnd kutek pɛ́ɛ́kɛɛ́yɛ́ pafalfal, yá aná punyɛɛ́ andíkɛk ɛ́ɛ́, kí iŋɔ́pinɔ í mɔɔnd omoómí, pɛɛnd kutek kapá kí indɛ́ndɛ́nɛ. 20Kikotí, maasíám pifal píand ɔyɔkɔn, maná kɔ́ɔ́m pifal meteké peseé ú Támbák weetek. 21Ɛ́ɛ́ aná kifal maámíánsɛ́n kíékeeki niku, yá aná kɛ́k peseé u Támbák maámíánsɛ́n é Yésus Kilíis Ɔkɔ́n waasɔ́ á kuák pɛɛnd indɛ́ndɛ́nɛ ne kueki pɔ́ kusɔ́t kú teeníík.
Valgt i Øjeblikket:
Lomɛ́ŋ 5: yav
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2026, CABTAL