2 Piɛl 1
1
Imbíkélie
1Niŋɔ́ Símun Piɛ́lɛ, eŋelípuólí, ne etúmí ú Yésus Kilíis maátɔ́mɛn pɔsɔ́k pápianɛ́ɛ kuátap etényí ómoómí pilɔŋ pímoómí naasɔ́, kí indɛ́ndɛ́nɛ i Yésus Kílíse unyɛɛ́ Támbákɛ́ɛ waasɔ́ no Osótí waasɔ́: 2No nupoo ne yeéwée mónúólinon tɛɛ indítíkínín é kumenyi nupianɛ́ɛ na Támbák ne Yésus Ɔkɔ́n waasɔ́.
Puolí pu éŋétépí
3Tambák matúfá puun kitikit puɛ́sikɛɛnɛnɛ́ɛ ɛ́ɛ́ tusɔ́tɔn na nulátát kɛ́ɛ́yɛ́ á pukaaka. Woond weetútíínyi sɔ́k umaátupilikɛn ɔ́ kukɔ́l niap é nuúmu núɛ́yɛ́ ne peseé wɛɛyɛ́. 4Támbák matupítiá piandákáand nɛ pitɛ́fɛ́k pí maandá é nukúm nukáánɛ́ na pukaaka pukáánɛ́. Aká apákunanɛ́ɛ́ puandá umaápítiá, aányípá kupínyáŋɛt e kúúsí ekue pilɔk pípilɔ́ŋɛt yikesié, apílatá wɔ́ muɛ́t Támbákɛ́ɛ. 5kúúkɔ́ nuɛsikɛɛnɛnɛ́ɛ kupíkányɛk ó kupióndonyi ɔtɛ́m kɛ́ɛ́yɛ́, nuond nusɔ́tɔn kí indɛ́ndɛ́nɛ. Nusɔ́tɔn kí indɛ́ndɛ́nɛ, nupíónyonyi kumenyi puandá púɛlɛnɛ́ɛ Támbákɛ́ɛ peseé. 6É kumenyi Támbákɛ́ɛ, nuɔ́yikinɛn kupíɛ́tikinɛn, ɛ́ kupíɛ́tikinɛn kuésepenyi, é kuésepenyi nulátát na Támbák. 7Á nulátát na Támbák, nulátát nɔ sɔ́k mɔɔndɛ, á nulátát niɔy ni sɔ́k mɔɔndɛ. 8Á kiákí ɛ́ɛ́ índɛ nuápian nunamá nú meelínyée makáánɛ́, índɛ nuápian mɔ́ kusol, nukapá ó puólí, nuond nupia pukaaka pú kumenyi Ɔkɔ́n waasɔ́ Yésus Kilíis. 9Índɛ mɔɔnd tipá upianan meelínyée makáánɛ́, utipá wɛɛ́nɛn peseé unyɛ imfúényée ne epútepute. Weépíelitenyi ɛ́ɛ́ pámasukɔ́n wɔ́ pifal píɛ́yɛ́ pí insúá. 10Tɛ ɔɔ́pɔn paandimán ánuandá apílúndɛn ɛ́ɛ́: Núlɔp nulátát káánɔ́ kɔ́ ɔmbílíkínɛ́n, á kiyúúnɛ ekí umaánúyɔ́ɔ́n. Índɛ nuɔ́sɔ́tɔn nunamá nukáánɛ́, nutiányikɔɔ́n ɔ́ kilɔk. 11Akáánɛ́ Támbák éényínúfuunin kiandákáand nipíkínín ní pufuŋ pú Ɔkɔ́n waasɔ́ no Osótí waasɔ́ Yésus Kilíis.
Nulátát kí iŋónyí
12Tɛ ɔɔ́pɔn yeényínúpítéékesi siki kisikilɛ maandá makáánɛ́ tɛ kúpá ɛ́ɛ́ nuémenyen mɔ, nuond nulɔp nulátát é kémuémue ewú numaápiá. 13Yɛɛ́kɛɛ́nɛn pú indɛ́ndɛ́nɛ ɛ́ɛ́ inúényesi á maandá makáánɛ́ yɛ́ɛlɛ imanyi akɛ e kúúsí ekue. 14Yeémenyen ɛ́ɛ́ kisikɛl kíámɛ kí kuátukán naanɔ́ kanyɛ mekúyekúye aná Ɔkɔ́n waasɔ́ Yésus Kilíis éényíŋesitenyi. 15Iŋambɛt ɛ́ɛ́: É kélém kú nikú níámɛ, núpítááka á siki kisikilɛ iŋónyítónyí sikáánɛ́. 16Pútipá é piluúme pí pisupɔ́ pí kati ɛtúɛ, tumaánútíán kuól kú pukaaka kú Ɔkɔ́n waasɔ́ Yésus Kilíis. Maná tumɛpíɛ́nɛ́n ne eŋis yáásɔ́ wɔ́ kɛ́ɛ́yɛ́ é nukúm. 17Ɛ́ɛ́ɛ, umatáŋáp nukanyi ne nukúm nú Támbákɛ́ɛ Síí, kisikɛl kiandá kí ekelú ú Támbák u pukaaka mɔɔ́yɛt ɛ́ɛ́: Ewe nyɛ muɔ́nɔ́ áámɛ ú iŋɔyɔ fíɔ́, wɔ́ yɔɔyɔnɛ́ɛ. 18Ekelu ukáánɛ́ moólínón mɛnɛ́mɛnɛ́ɛ tuɔkɔɔ́p wɔ́ kisikɛl tumaápá nɛ́ɛ́yɛ́ kɔ́ ɔkɛ́l Támbák maáyɔ́ɔ́n. 19Ɔ́ kuɔ́yikɛn, tuákaand apian nukál nú peémímekélíe pá Támbák. Núnyɛ nulúndán, nuápian ipán ɛ́ɛ́ núkɔ́l kisikɛl na núu peseékése. Núnyɛ ɛlɛɛ́ ilámba íteekenyée ɔ́ kɔɔ́mɔ kí imbíne, kuám aká kuɔ́mɔ mányipál ɛ́ɛ́ yoótíótio í kiɛmɛ́ɛm punya káánɔ́ kí itɛ́m. 20Énumenyí kisíósíó ɛ́ɛ́ mɔɔnd tipá na pukaaka wɔ́ muɛ́t pú kusɛɛkunɛ nukál nú peémímekélíe á pifúúmak pí imbɔp. 21Á kiákí ɛ́ɛ́ mɔɔnd mapása utipíémínyí nukál kɛ́ɛ́yɛ́ ɔ́ kuɔyɛt ɛlɛɛ́ eŋémímekélíe má Támbák, púnyɛ na pukaaka pú Emfúnukufúúmɛ pɛɛnd maákálá ɛ́ɛ́ kisiɛ́n kí Támbák.
Valgt i Øjeblikket:
2 Piɛl 1: yav
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2026, CABTAL