Ruma 12
12
Landza ma wiyə ataa Kərist
1Zlina mama aagi, Bizlaf taghalahəji za hahər tə, sha ana ndə sa kazlapahuni: huni vəlanə ha kuni ka a Bizlaf andza səkən ndə həji kaɗal takun abə sha, ma təwahanə ata nja tə. Sha ana ma kaaɗa kwakus kuni ma ŋter ndə huni kaaɗalanə. 2Huni ɗiw a riy ha kuni ka anawatsə abə həji ma ndza a manahayak ma ndza akacihwa aagi səku, ama huni mbaslanə ha kuni ka a Bizlaf mabəwahuni, mavəlahuni sən səkən, abə wirwir aska huni asən səkən ndə Bizlaf a kamayə: ma ŋtan, ma kazhivanə a Bizlaf, ma təwah.
3Dawna sənma ndə Bizlaf a vəlaka, sa kazlapanə a kwa vaye a taba kuni: ala a ɗiw deŋ ha tə dəy aha ndə Bizlaf a tsəz ka səku, huni ndza abə ŋkwaɓ andza həji ma ŋkula ghav aagi. Kwa vaye mandza andza dawna ɗal awa ndə Bizlaf a vəlanə a kwa vaye. 4Ara ndə a ɗa, zlikusəm takwa gəla ŋgay a heɗe, ama kwa vaye abə zlən tə, 5a ndza andza sha, həji vərəm, həji ɗa zlikusəm ma ŋtaɗ ndə həji dzəv takwa abə Kərist, həji dzəv abə həji ndiɓi aagi andza gəla zlikusəm ma vərəm ataa ala, kwa vaye abə ataa aŋtə. 6Həji talima səkən ndə Bizlaf a vəlahəji ɓəlaakaka aagi parpar parpar. Andza ala minja talima səkən ma ɓəlaakaka ataa Bizlaf aska a ɗaf ma ndə a zlimazə ara Bizlaf ya, maɗafə andza ndə a ɗal awa. 7Andza ala minja talima səkən ma ɓəlaakaka ta ɗal zlən ya, maɗalə. Ala ma ndza abə səkən ma ɓəlaakaka ta sərək ma ya, masərəkə. 8Ataa ala ma kalamzə həji aagi, malamzata abə ɓas. Ala ma kavəla səkən ana ala ya, mavələ abə ꞌunəf ŋtaɗ, ala ma ŋcah a dzəv həji aagi ya, mandzəvata abə ɓas. Ala ma ndza ata ha həji titikw aagi, maɗalə abə ɓas. 9Mayha kuni maɗa ŋter. Huni ŋkalzə səkən ma gamak, huni ŋcah a mbəla ra ata səkən ma təwah. 10Mayha madzəvahuni ka andza wəzhi ataa ala ma ŋtaɗ aagi. Huni ndza a ɗa, həji ma kahawatana a həji ndiɓi aagi. 11Huni ɗalanə zlən a Bay Madagal abə sakw ꞌunəf, mba masagal aka. 12Huni ndza abə lawaɗ ata deŋ səkən ndə huni katehi, huni səw yaka ndə huni kasə, huni ŋcah a wəzaha a tarha. 13Huni lamzə həji Kərist ma kamay lam aagi, huni lamzə mbəluk ma kandaha ara huni aagi abə ra gbak gbak. 14Huni pish həji ma kagas ŋgwashem aska huni aagi, huni ɗiw a gəyata səku, huni pishatana bəzla, huni ɗiw a gəyata bəza səku. 15Huni ɓas abə həji ma kaɓas aagi, huni han abə həji ma kahan aagi. 16Huni ndza kadək a walaŋ ha kuni: huni ɗiw a gəl ha kuni səku, huni ɗiw a ghav səku, ama huni pəl ha kuni ka andza həji ma kuɗkuɗ aagi. Huni ɗiw a sar ha kuni andza həji ma kasən səkən aagi səku. 17Huni ɗiw a mən ma ma gamak abə ma ma gamak ata ala səku, huni gas səkən ma ŋtan a ɗalə ata nja həji aagi tiwtiw. 18Andza təf aka a kaɗal andza may kuni, huni ndza abə təwah abə həji aagi tiwtiw. 19Huni ɗiw a mən ma ma gamak abə ma ma gamak səku ŋgwanambə naka aagi, ama huni mbasl ghuɗek Bizlaf aka maɗal zlən, ara ndə a ɗa, taŋtiraya a Ɗerewal ma ghwaɗeɗe, iŋgaya: Mən ma a ndza ara sa, sa ma kaatsa garak aha a hwa, ana Bay Madagal, iy. 20Ama tazlap zhana: Andza mintish a kadza ala jaga kwa ci, vəlanə səkən ta zəm, andza yəm tadzə, vəlanə yəm masə, ara ndə a ɗa, andza hwa taɗalə ikwa meni, a ndza andza ndə hwa zlaɗanə aŋsli kwahu ka a ha. 21Hwa ɗiw a pəlanə ha kwa aka, a səkən ma gamak a ɓasahu səku, ama ɓas səkən ma gamak bəza abə zlən ma təwah.
Valgt i Øjeblikket:
Ruma 12: GOU
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Cabtal
Læs mere om Dzəv ma wiyə