Mark 11
11
Ɗa shari Yesɔ au Urushalima tonɛ
1Aɗagbete Yesɔ au jaɗɔyini i atɛ māāni a Urushalimani, a Betfeji a Betani a kɔpɔ laa zeetu, kɛɗɔn Yesɔ shok u jaɗɔyi ziti, 2A geliyinɛ,<<Ɔ yɛ jakomoo gbete awɔ ɗekɨnkɔ, ɔkɛ tonɛ tɛ̃ɛ̃ti ɔ yɛ zɛ jagãtola shɔ mautɛ a laa, gbete shɔ ji gẽ ɓa a yuuni ɓa gbete ɓa. Ɔ kalirɛ ɔ n-tiu yɛm. 3Shɔgbete kɛ hɨ ɔnɛ aru ivi ɔ pɛli nankɔ viya? Ɔ geliunɛ, shɔvi kasi vishonɛ pɛlinɛ awuni, yɛ sɔritɔ tɛ̃ɛ̃ti.>>
4Kɛɗɔn i yɛrɛ a kpaa jagãtola shɔ mautɛ a laa a nyaɓa wɛrɛ a denyaɓa. I ɗɔɔkalinɛ, 5shɔ gãsi gbete i a ɗɔu i hɨ Yesɔ jaɗɔyi nɛ,<<Ɔ pɛ ivi a ɗɔuni viya, ɔ kasi gãtolau kalinɛ ya?>> 6I kasi nyajo naa gbete Yesɔ geliyikɔ, Kɛɗɔn shɔ yairɛ i yɛrɛ a gãtolauni. 7Naa i n ti Yesɔ jagãtolautɛ, i ɓati fãrã rɛ au yulapa, Yesɔ gẽrɛ a ɔ̃rɛ aɗɔn. 8Shɔzɛ waanɛ i ɓati fãrã rɛ a nyaɓa, shɔwɔyi ɓati naa gapa kãkã a nyaɓa gbete i koli ai jāā. 9Shɔgbete i a Yesɔ ɗekɨn a shɔgbete i a kɨnti ni i ɗenya lapa a shanɛ,
<<Hosana!
Ɗalapa u tasi shɔgbete a au Uɓeyelapa nii vɔɔ susãri biini!>> 10<<Ɗalapa u tasi kpati sɔɔ gbete kanɛ kɨnti susãri biini u sãu naa uɓeye Dauda,
Hasanna aɗɔ pɛ̃niɓa.>>
11Yesɔ to Urushalima a to jaa Ɗa gakinɛ. kɨnnɔɔ zɛ vi piti kpai, ama si ɗaa yiitɛ kɛɗɔn yɛkɛ Betani au jaɗɔyini.
Yesɔ wiri laa sɨnti
12Naa ɗii kaatɛ aɗɔgbete Yesɔ au jaɗɔyini i ɗɔɔ Betani yanɛ, kɛɗɔn Yesɔ nwo siurɛ. 13Naa Yesɔ zɛ laa sɨntitɛ gbete u gapa aɗɔn aɗɔ kpɛlɛ, yɛrɛ nɛn zɛpɛ nɛmɛnɛ rɛɛ jaatɛ. Naa tottɛ aɗɔn ji kpau jaa ɓa ama seei gapa, aru siɓa ɗagbete laa sɨnti rɛɛ jaa ɓa. 14Yesɔ geli laa sɨntiunɛ,<< shɔwɔyi yɛ shàà jaayi toti ɓa dangdang.>> U jaɗɔyi i nta vigbete shatɔ.
Yesɔ Yɛ Jaa Ɗa
15Naa Yesɔ atɛ a Urushalima to jaa Ɗa rɛ, a nyiki shɔgbete i mɛli vi a shɔ vi woonɛi a ɓuzɨn jaa Ɗa wuni. Yesɔ sãti shɔ saa kɔsinɛ i taburu a shɔ janɔyi mɛlinɛi laa ɔ̃nɛ kpai, 16Zãritɔ nɛ shɔwɔɔ ukɔ tuu vinɛ u tɛrɛ awuni a ɗɔuni. 17Kɛɗɔn Yesɔ mati shɔ vi a shanɛ,<<shɔzɛ gbete atette Ɗa jashonɛ beetɛtɔ nɛ:
<< <N wɛrɛ shɔ ɓanɛ
wɛrɛ Ɗalapa gakinɛ a koo piti kpai.>
Ama ɔ risitɛ ɗɔgbete ɓɔɔyi i ɓuyɛ.>>
18Yupɛ̃ni shɔlansi a shɔmala nyaãsinɛyi Musa naa i nta vimtɛ i gakɛ nyaɓa kãnɛ gbete i yɛ nyo Yesɔ yɛ. Aru i ntau setitɔ, nogbete mooyi piti kpai Yesɔ vimatinɛ ãi vibizaanɛ.
19Naa ɗaɗɗarɛ pɛlitɔ, Yesɔ au jaɗɔyini i yaa komourɛ.
Vi matinɛ a laa sɨnti
20A gadi zɨɨnkɔ Yesɔ au jaɗɔyini i ɗɔ tɛɛnɛ, i zɛrɛ laa sɨntiu gɔrikitɛ au gɨnrini. 21Bituru kpaa a sisɨn, a geli Yesɔ nɛ, shɔmala, <<kɨnnɔɔ pɛ! Laa sɨnti gbete a wiriyɛ gɔrikitɛ!>>
22Yesɔ risi u nyanɛ, ã sisɨn a Ɗalapa bi. 23<<N gelaatɛ nizɛ, shɔgbete kɛ ã sisɨnnɛ a Ɗalapa bi kɛ shanɛ nɛ kɔpɔ u jesinɛ u shishi a wapo, kɛ shanɛ a sisɨn gbete kɛ ã sisɨnnɛ, vigbete nɛn shaɓangkɔ yɛ pɛlitɔ, Ɗalapa yɛ pɛliutɔ. 24N gelɔɔtɛ aruumkɔ, vigbete ɔkɛ gaki Ɗa nɛ au yuu, ɔ ã sisɨn nɛi kpaatɔ, viu yɛ ɔ̃ ɔ ɓɛɛ. 25Akɛ ɔ̃nɛ a ɗɔ Ɗa gaki, shɔgbete a sãi a sisɨn a yasiyi ruuvini gbete i pɛlaatɔ, aru meyeu lapa maa yɛ yasaa ruuvini gbete a pɛliyɛ sɔ̃njitɔ. 26(Ama ɔji yasi mɛzɔɔ ruuvini ɓa, jinankɔ meyeu gbete a lapa ma yɛ yasaa ruuvini ɓakɔjɔ.>>)
Ruu hɨnɛ aru Yesɔ kaka gbete shovi a wuniyɛ
27Yesɔ au jaɗɔyini i to Urushalima sɔ̃nrɛ, aɗagbete Yesɔ u ɗɔɔ, rakinɛ a jaa Ɗa, shɔyupẽni-nyawàànɛ a jaa Ɗa a shɔmala nya-ãsinɛyi Musa wɔsɔ̃n shɔpẽni-ɗɔlaayi i arɛ a Yesɔ ɗɔbii i hɨunɛ. 28<<A pɛli vishonɛ àpi kaka piya? Pi ãā kaka pi naa pɛli vim piya?>>
29Yesɔ kasiyi nyanɛ,<<N yɛn hɨ ɔ ruu gbete. ɔkɛ kasing nyanɛ, n yɛn gelɔɔ n kaka gbete n pɛli vishonɛ a wunitɔ. 30Yɔhana pɛli shɔ batizima u kaka shɛ a Ɗalapa ɗɔbii ya, ko a shɔzɛ ɗɔbii ya? Ɔ gelin nɛ!>>
31I nwali ruum ai nɔɔ i shanɛ, ukɛ shanɛ, a Ɗalapa ɗɔbii, yɛ hɨunɛ,<<Aru ivi ɔji ã sisɨn ɓa a Yɔhana biini ɓa viya?>> 32Ama ukɛ shanɛ, <<A shɔzɛ ɗɔbii>>....(i nta seti shɔzɛyi, aru shɔ piti kpai i tuu Yɔhana nizɛ nɛupɛ Ɗa jashonɛ.)
33Aruumkɔ i kasi Yesɔ nyanɛ,<<U ji zɛɓa.>>
Yesɔ shanɛ,<<Nkɔng maa n yɛn gelɔɔ kaka gbete n pɛli vishonɛ a wunim ɓa.>>
Valgt i Øjeblikket:
Mark 11: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
