matiyu 22
22
Ruuɓusinɛ aru zɔ tɛne
1Yesɔ shovi-shone a ruɓusinɛ a geli shɔ ruu, shanɛ.
2Kpati roone a Ɗalapa wɛrɛ ɔ̃ naa kpati gbete u ɗɔɔ nyaba tɔ̃rine nɛn tɛsi ɓejaa so. 3Kpati sho jaa a shɔgbete wayi nya ɗɔbii neyi ane, ama i bɛ̃ɛ̃ ane nɔni.
4<<Kɛɗɔn a sho u jaa wɛrɛ wɔyi sɔ̃n shanɛ,ɔ geli shɔgbete n wayi nya yɛ n nwa vishaane tɛː n yee mɛrɛ̃ɛ̃ tɛ a gunapu ni, ko iviya aɗɔn. ɔ ang ɗɔɔ bi tɔ aru bi nyatɔ̃ne gbete n tɛsi majaa so.>>
5I ji wesho ɓa au bi niɓa -kopiya yɛjo ɗɔɔ vishone. 6Gãsiyi i sãu jawɛrɛ, i wayi rɛ ai nyo vɔrɔ. 7Kpati lɛsi sisɨnrɛ. A shou sojayi rɛ aɗɔn i pũsi shɔwiyi rɛ a koo wuni kpai.
8<< Kɛɗɔn a geliu jawɛrɛ ne, bi nyatɔ̃ne aru majaa so tɛne nenkɔ, ama shɔgbeten ɓayi nya aru majaa bi nyatɔ̃ne n jo kasi ɓayi kɔ ɓa. 9Ɔ to ɓuzɨn koomoo-koomoo ɔ ɓaa kopiya nya i a majaa ɗɔbii nyatɔ̃ne aru gbete n tɛsiu so yɛ.>> 10A ɗɔukɔ u jaa wɛrɛyi yɛ nyaba lanɛ i ɓaa shɔ ai kpaayɛ nya piti kpai, shɔ tɔ̃vɨn a kɔ̃linɛ ni, ɗɔu yii a shɔni lot.
11Ama aɗagbete kpatiu arɛ nɛn zɛɛ shɔ zatiyi gbete i a ɗɔ bi nyatɔ̃ neu, a zaanoo a zɛ shɔ wɔɔ ji tosi fãrã bi nyatɔ̃ne ɓa. 12Kpatiu hɨ nɛ, Masa, a pɛli pikovi a too ɓuzɨn a fãrã bi nyatɔ̃ne ɓa viya? Jaau jo kasiu nya ɓa.
13<<Kɛɗɔn kpati geliu jawɛrɛ nɛ, ɔ sãne ɔ mau naa a ɗɔɔni, ɔ lɔkɔu a ɗɔkɨnri a ɓili, ɗɔgbete shɔ sɨnrɛ shɔ shaa tari shẽe-tɛ̃tɛ̃.>>
14Yesɔ yisi nya ruu shanɛ<< shɔ waa shɔzɛyi nya waane, ama shɔgbete shɔ lɔyi yɛ i fɛ̃ɛ̃.>>
Ruu saa bɛnɛ gbete Shɔ shoori kayisa yɛ
15Kɛdɔn shɔ Farisaya i musi yuu i nwa ruu noogbete iyɛ sã Yesɔ aru yɛ. 16I shoyi jaɗɔɔyi a Hiridu shɔbii wɔyini a nyazɔ. <<Shɔmala, >> i shaanɛ, <<U zɛtɛttɔ apɛ shɔ tɔ̃vɨn a shɔgbete mati shɔ Ɗalapa nyaruubii a nyaba tɔ̃vɨn. Aru shɔ a ɗɔbii piti kpai ipɛ zali, a kanɔɔɓa a shɔni ɓa. 17Geliu vigbete a lɛri au yuuni pɛ? Pɛ vitɔ̃vɨng u shori shɔ kpatiyi saabɛnɛ tɔya ko ɓa? >>
18Ama Yesɔ, zɛyi sisɨn kɔ̃lin;e tɛttɔ, a shanɛ, <<Shɔ- shɔ ɗakine miyi, ɔ kasin ɗanɛ aruuviya? 19Ɔ tasin saa gbete ɔ sho saabɛnɛ awuni pɛ. >>I n-tiu saa u rɛ. 20Yesɔ hɨyi kɛkn, <<Npi jasuru piya a nii ni a saani piya?>>
21I kasi nyanɛ,<<Kayisar ɓɛɛ.>> Yesɔ geliyinɛ, ɔ ã vigbete pɛ Kayisa ɓɛɛ jo Kayisa. Vigbete Ɗalapa ɓɛyɛ ɔ ã jo Ɗalapa.>>
22Naayi nta ruum tɛ, ɔ̃rii kɛ vi bi zaane. I yau ɗɔ bi i sãa yãba iyɛrɛ.
Hɨne aru vɔrɔ yusine saa
23A dii u kɔ shɔ Sadukiyawa, shɔ gbete i tɔnɛ shɔ yuuɓa saa niɓa, i aa Yesɔ ɗɔbii i hɨu nɛ. 24<< Shɔ mala, >> i shanɛ, <<Musa geliu nɛ shɔgbete kɛ vɔne ji kpaa jaa ɓa a ɓɛso niɓa, ɓɛzɔ̃ yɛ zɛnoo tɔ u sori suu vɔ rɛ u yee jaa awuni. 25Shɔwɔyi ɗɔn au tetem i ai yeene maanzii. Shɔ pɛ̃niba tɛso a vɔrɛ, ji yee jaa ɓa awuni ɓa a yasi ɓɛzɔ̃ suu vɔrɛ. 26Vim gɨn ji nankɔ gbete - gbete yɛnɛ shɔgbete i kunaa yɛ yuu iji kpaa jaa ɓa. 27A kɨntiuni kpai, suu vɔrɛ. 28Dɔdɔrim, a lee gadii gbete shɔ yusi vɔrɔ a saa, yɛ ɔ̃kɛ pi so piya atette shɔ maanziim ni piya? I piti kpai i tɛu tɛttɔ. >>
29Yesɔ risi nya nɛ, << ɔ nii tɛttɔ aru gbete ɔ ji zɛ laabeene Ɗalapa nya ruu bi ɓa wɔsɔn ɔ ji zɛ Ɗalapa kaka ɓa. 30Alee gadii gbete vɔrɔ yɛ yulapa a suruni a saa i yɛ ɔ̃naa Ɗajaashonelapa; A kolapa ruu zɔ tɛne ɓa ɗɔn ɓa. 31Ama aru vɔrɔ yuune a suruni: si ɔji ɓaliɓa a labeene gbete Ɗalapa shayɛni ɓaya, 32<Nkɔng ɔ̃rɛ Ɗalapa gbete Ibirayi, Ishayaku a Yakubu i gɨnyɛ> U ɓa Ɗalapa gbete vɔtɛttɔ ɓa ama Ɗalapa gbete u a suruni.>>
33Naa moo gbete i au ɗɔbii i nta ruum tɛ, u vimatine ɔ̃kɛ vii bi zaane.
Nya ãsine pɛ̃niba gbete Ɗalapa ãsiyɛ
34Aɗagbete Yesɔ geli shɔ Sadukiyawa nɛyi ɔ̃ nyani, farisaya i musi yuu kɛ ɗɔgbete. 35Gbete wɔɔ ai atette, shɔ ruu zɛne a nya ãsine, nta Yesɔ sisɨn a hɨu nɛ: 36<< Shɔ mala, a nya ãsinem shopi ɔ̃rɛ pɛ̃niba atette ni piya? >>
37Yesɔ risi nyanɛː << Ɔ ɔrii Uɓeyelapa Ɗalapa a sisɨn gbete ɔ ɔrii Uɓeyelapa Ɗalapa ruu bi awɔ suruni kpai ɔ ã yuu jo au bi kɔ kpai.>> 38Shomkɔ pɛ nya ãsine pɛ̃niɓa gbete Ɗalapa ãsiyɛ, ukɔ a ɗekɨn. 39Shɔgbete gɨu knti yɛː << A ɔrii a shɔ nya kããsiri wɛrɛ nɔgbete a ɔraa yuu yɛ.>> 40Labeene Ɗalapa gbete Musa n ti yɛ aru nyaãsine a Ɗalapa jashone i debii jo a nyaãsine zitim kɔ.
Kirisi ɓɛɛ pi jaa piya
41Naa shɔ farisaya i toli zɔtɛ ɗɔgbete, Yesɔ hɨyinɛ, 42<<ɔ zɛ pikovi awɔ sisɨn ni viya? Kirisi upi jaa piya?>>
I risi nyanɛ,<<Dauda ɓɛjaa.>>
43Yesɔ geliyinɛ, <<aru iviya Dauda, Ɗalapa suru pɔ̃siu naa a nwanya awuni, ɓaune <Uɓeyelapa > Dauda shanɛ,
44<< < Uɓeyelapa gelin Uɓeyelapa nɛː
<<ɔ̃ne ang naa kn
sitɛ n pɔ̃ a shɔ nopɔ̃ tɛ
i sɔ̃si tɛ a yugboti ayuu. >> >
45Dɔdɔrim Dauda kɛ ɓau kirisi nɛ <Uɓeyelapa > kirisi yɛ ɔ̃kɛ pikovi ɓɛjaa viya?>> 46A ɗɔunni shɔwɔɔ ji risiu nya ɓa ko gbete, yune leewuko yɛnɛ ɗekɨn shɔwɔɔ ji hɨu ruu tɔkɨn ɓa.
Valgt i Øjeblikket:
matiyu 22: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
