matiyu 12
12
Shɔ hɨ Yesɔ aru Lee susune
1Lee wɔɔ Yesɔ tɛɛ a shɔwɔ jaa alee susune. Si Yesɔ jadɔyi nta nwo tɛ ai zɔ̃ki yuvishane i shaarɛ. 2Naa Shɔ Farisiyayi i zɛ nam, i geli Yesɔ nɛ,<<Zɛpɛ! A jadɔyi i pɛli vigbete nya ãsine zãri tɔ, a lee susunɛ.>>
3Yesɔ kasi nyanɛ, <<Ɔ jo ɓali labeene ɓa aru vigbete Dauda pɛli yɛ a ɓɛɛ shɔzɛyi a ɗagbete i nta nwo a lee susune ni ɓaya? 4Dauda a ɓɛɛ shɔzɛyi i to Ɗalapa wɛrɛ a tu borodi, a shaarɛ gbete shɔ danya nɛ shɔkɔ shaane, nɛ se shɔ nyanwa nɛ a jaa Ɗa kɔ sheeli. 5Ko ɔ jo ɓali ɓa a Musa labeene nyaãsine aru lee susune, nɛ yupɛ̃ni nyawane a jaa Ɗa i gɨn nya ãsine ɓa, piti shɔn ni kpai jo ɔ̃rii ɓa ruuvini ɓa? 6N gelɔɔ ɓɛ tɛttɔ shɔgbete au ɓuri Ɗa wɛrɛ u yɛm. 7Ɔ si zɛ vigbete ruum tasiyɛ tɛ,<N kã shɔ shɔraa ntaneyi, ɓa vivaayi gbete ɔ ntiyɛ nei ã yuu ɓa,> ɔ sijo tuu shɔ tɔ̃vɨn ɓa nɛu ruuvuni a ɗɔnni ɓa. 8Aru Shɔzɛja ukɔ ɔ̃rɛ Uɓeyɛlapa lee susune.>>
9Yesɔ yukɛ a ɗɔuni, a yɛkɛ ɗɔgbete Yahudawayi ɗɔ ɔ̃nɛ, 10a ɗɔuni shɔgbete u naa vɔne kagbete usi ɗɔn. I kã nyaba gbete ne yeri Yesɔ nya ayuu, i hɨu ne,<<kɔritɛ ya shɔu gati shɔ a lee susune ya?>>
11Yesɔ kasii nyane,<<Naa shɔwɔ awɔ tete u mɛrɛ̃ɛ̃ kɛ shishine a yɛti too a lee susine, yɛ yau a yɛti too ni nya? 12Ɔ ji zɛ ɓaya shɔzɛ ɓuri mɛɛrɛ tɔ ɓaya! Aru nankɔ nya ãsine kɔritɔ shɔu pɛli vitɔ̃vɨng a lee susine.>> 13Kɛɗɔn Yesɔ geli shɔgbete u naa vɔɔ kagbete ne,<<gɨn naa pɛ.>>Nankɔ jau gɨn naa rɛ u naa shirɛ, u naa ɔ̃ sɔ̃njo naa shɔwi ɓɛɛ. 14Ama Farisiyayi i shɛ ɓili i kã nyaba gbete i yɛ nyo Yesɔ yɛ.
Ɗalapa jawɛrɛ au lɔɔ yɛ
15Naa Yesɔ ntatɛ ne shɔ kasin nyone, a ya ɗɔukɛ kati. Shɔ gɨu a dɔɔ bang, a gati shɔ vɔrɔ gbete ai si awuni yɛ piti kpai, 16Yesɔ gɔ̃yi shɔ yusho nɛ shɔkɔ ɓan nii ne. 17Vimpiti kpai pɛli nankɔ u sɔ̃rinya vigbete Ɗa jashɔne Ishaya shasiyɛ: 18N kɔng jawɛrɛ gbete n lɔ yɛ yɛm, shɔgbete n ɔri yɛ, shɔgbete n nta sisɨn puru awuni yɛ; N yɛn pɔ̃ n suru au ɓiikɔ, ukɔ yɛ nwari shɔ ruu tɔ̃vɨn a koo piti. 19Yɛ marinyaɓa ko yɛ nwa nya ɓa a kaka niɓa; shɔwɔyi yɛ ntau nyaɓa a nyaba niɓa.
20Laa gbete atɛ ɗɔ kane yɛ kaɓa, pitila gbete atɛ ɗɔ nikine yɛ niki ɓa, setɛ shɔ sha ruu tɔ̃vɨn tɛ piti.
21<<Shɔ yɛ pɔ̃ sisɨn jo au bi kɔ.>>
Yesɔ A Bezabu
22Kɛɗɔn shɔwɔyi i nti shɔ nogbãti a Yesɔ ɗɔbi nwanya ɓa aru gbete rãma au bi ni. Yesɔ gatiurɛ, jau nwanya a zɛ ɗɔ rɛ. 23Naa shɔwi i zɛ vimtɛ piti ɔ̃kɛ vibii zaane i shane,<<Shɔm yɛ ɔ̃kɛ Dauda bɛjaa ya?>> 24Ama naa shɔ Farisaya i nta vimtɛ, i shane,<<pɛli vim a Bezabu nii, jam shɛshi rãamajo a kpati rãama nii.>> 25Naa Yesɔ zɛi sisɨn tɛ a geliyinɛ,<<Ko koo shɔpiya au kɛ vɔsine yuu ne ɗɔ ziti yɛ lɛsi kɛtɔ, i kɛ waabane a zɔni koou yɛ ɔ̃ɓa, ko koomoo a wɛrɛ gbete kɛ vɔsine yɛ shiɓa. 26Naa japɛ̃pɛ̃ɛ̃ kɛ shɛshi japɛ̃pɛ̃ɛ̃ ne, si waabatɛ au yuu. I kpati roone yɛ shikɛpi koviya? 27Naa n kɛ shɛshi rãama ne a rãama nii, mɛshɔzɛyi pi ãi kaka rãamã shɛshi nɛ ɓɛɛkɛ piya? I yɛ ɔ̃ kɛ shɔ ruu lɔsine. 28Naa n kɛ shɛshi rãama ne a Ɗalapa suru yɛ, kpati roone a Ɗa wɛrɛ atɛ awɔ bi maani. 29Shɔ yɛ to shɔ kaka wɛrɛ pi kɔvi nen seu vi, shɔji maliu dɔɔ ɓa viya? Sete shɔ maliu tɛttɔ a shɔ seu vi kɛkn.
30<<Shɔgbete u ɓa nkɔng niɓa kasiin ruubii ɓa, shɔgbete jo pɔ̃sing naa ɓa aɗɔ vi toli nɛ niɓa u ɗɔ sãtine. 31N gelɔɔ tɛ, n yɛn yasi shɔ ruuvinitɔ a vi kɔ̃line gbete i pɛliyɛ ni, ama shɔgbete kɛ shavi kɔ̃line ne aru Ɗa suru n yɛn yasiu ruuvini ɓa. 32Shɔgbete kɛ sha vikɔ̃line ne a shɔzɛja yuu shɔ yɛ yasiu ruuvinitɔ, ama shɔgbete kɛ sha vikɔ̃line nɛ a Ɗa suru yuu shɔ yasiu ruuvini ɓa, ko dɔdɔrim ko pi ɗaviya.
33<< laa gbete u jaa tɔ̃vɨn ujo tɔ̃vɨn, akɛ shɔne laa kɔ̃line rɛɛ jo kɔ̃line, laa tɔ̃vɨn ko laa kɔ̃line shɔ zɛjo au jaa rɛɛ nɛ. 34Sɔɔ miyi, ɔ sha vitɔ̃vɨng kɛpi koviya naa ɔ kɛ ɔ̃ne kɔline? Nya shajo vigbete shɛ a sisɨn ɓuzɨn yɛ. 35shɔ tɔ̃vɨn shɛshi jo vitɔ̃vɨng gbete au sisɨn, shɔ kɔ̃line shɛshi jo vikɔ̃line gbete au sisɨn. 36N gelɔɔ tɛ a lee ruu lɔsine Ɗalapa yɛ pɔ̃rɛ kopiya yɛ sha jo au nya, vikɔ̃line a vitɔ̃vɨng gbete pɛli yɛ piti kpai. 37Shɔ yɛ pɛli vishone jo a nyakɔ a rana rɛ, a nyakɔ yɛ lɔkaa sɔ̃njo a yaa wɛrɛ.>>
Farisaya i kasine Yesɔ U tasii Vibii zaane
38Kɛɗɔn Farisiyayi a shɔmala gbeteyi matine shɔ vi aru nya ãsine Musa yɛ i geli Yesɔ ne, <<Shɔmala, u kasi u zɛ vibii zaane aa bi.>> 39Yesɔ kasi nya ne,<<Ɔ shɔ kɔline a laduru kpãngtãng jakɨntiyi ɔ kã vibii zaane ang aɗɔ biǃ Ama n yɛn tasɔɔ ɓa se shɔ Ɗa jaa shone Jona ɓɛɛ. 40A nankɔ Jona roo a jazɨng pɛ̃niba yɛti niti taati zɨmba taati, Nankɔ jashɔzɛ yɛ ɔ̃ a koo lee taati niti a zɨmba ni. 41Shɔ Neneva i yɛ yulapa a lee gbete Ɗalapa yɛ vɔsi ruu tɔ̃vɨn a ruu kɔ̃line ni i shane vigbete ɔ pɛlim ɓa ntoɓa; aru gbete i ya ruuvini pɛline tɛ aɗagbete Jona nwanya a Ɗa nya ruubii, dɔdɔrim shɔgbete ɓuri Jona tɛ u yɛm. 42Suu gbete usi kpati Shɛba yɛ yulapa a shɔ gãsiyi ni a lee gbete shɔyɛ vɔsi ruu tɔ̃vɨn a ruu kɔ̃line ni, u geliyi ne vigbete ɔ pɛlim ɓa ntoɓa; aru gbete nta ruu gbete ã sɛ̃rɛ̃ tɛ tɛttɔ a kpati Sulemanu nya, n gelɔɔ tɛ shɔgbete ɓuri Sulemanu yɛm. 43Naa suru kɔline kɛ shɛne a shɔbii, yɛkɛ ɗɔ waati u kã ɗɔ susune, naa ji kpaa ɓa. 44Kɛɗɔn yɛ shakɛ nɛ,<N yɛn sɔkɛ n wɛrɛ gbete n yasiyɛ.>Naa sɔtɛ, yɛ kpaa wɛrɛu shɔɓa ɗɔn ɓa, yɛ kpaarɛ shɔ kotɛ shɔ tɔ̃ri wɛrɛu tɛ tɛpetɛpe. 45Kɛɗɔn yɛ yɛrɛ yɛ nti suru kɔline wɔyi sɔ̃n maanzii gbete ai ɓuru a laneni, i yɛ torɛ i ɔ̃ kɛjo a ɗɔukɔ. Shɔu vɔrɔ yɛ ɓuri nɔgbete si tɔ. Yɛ ɔ̃ji ɗɔkɔ a shɔ kɔlineyi jakɨntin ni.>>
Yesɔ Ɓini a Ɓezɔ̃yi
46A ɗagbete Yesɔ u si ɗɔ nyanwane a moo-ni, ɓini a ɓezɔ̃yi-ni i shi a ɓeli, nei nwanya awuni. 47Shɔwɔ geliunɛ,<<Mɛzɔ̃i a mini iɗɔ ganɛ a ɓili nei kasi nyanwane a moni.>>
48Yesɔ risi nyanɛ, <<Mani piya, mazɔ̃i piya?>> 49Tasi janaa au jadɔyi bi, a shane,<<Nkɔ mani a mazɔ̃iyi-ni yɛm. 50Shɔ gbeteu kɛ pɛlivi gbete mayɛ kolapa kasiyɛne ukɔ ɔ̃rɛ mazɔ̃ a mana a mani ni.>>
Valgt i Øjeblikket:
matiyu 12: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
