matiyu 10
10
Yesɔ jadɔyi kopi a tu ziti
1A Yesɔ ɓaa u jadoyi nya kopi a tu ziti a ãi naa nei shɛshi suru kɔline tɔ, i gati bi kɔne piti a vɔrɔ gbete kɔ shɔ a bi piti kpai.
2Yesɔ jadoyi kopi tu ziti shɔ ɓayi nii neː Semon (gbete shɔ baunɛ Bituru) shɔ gaa nya ɓaa ne jo ukɔ, a ɓɛzɔ̃ Anduru; wɔɔ Yakubu Zebedi ɓɛjaa, a ɓɛzɔ̃ Yɔhana; 3Filibu a Baatolomi; wɔɔ Tooma a Matiyu shɔ gbete tɛ saa ɓɛne yɛɛ; wɔsɔ̃ng Yakubu Alifaya ɓɛjaa, a Tadayu, 4wɔɔ semon shɔgbete ɔriu koo waane a Yahuda Isikariyoti, shɔ gbete ã Yesɔ nɛ shɔ nyowu tɔ.
5Yesɔ shou jadoyi kopi a tu ziti miyi a ãsiyi nyanɛː << Ɔkɔ yɛnɛ a shɔ Yahudayi ɗɔ bi wɔsɔ̃ng ɔkɔ yɛnɛ a Samariyayi koomoo ni.>> 6Ɔ yɛ ɗɔɔ mɛrɛ̃ɛ̃ gbete i niitɛ shɔ Isrela. 7Ɔ yɛrɛ, ɔ geliyi rumiː << Ɗalapa ane atɛ maa-ni.>> 8Ɔ gati shɔ vɔrɔyi tɔ, ɔ yusi shɔ gbeteyi vɔtɛ lapa, shɔ gbeteyi vibii shayi tɔ ɔ gatiyi tɔ, a shɔ gbeteyi suru kɔlinɛ abi ni ɔ shɛshi tɔ. ɔ kpaa vim weze ɔ ji sho viwɔɓa ayuu ni ɓa, ɔkɔma ɔ ã shɔ jo weze. 9Ɔkɔ sã tari mɛɛ nɛ a naa ni, wɔsɔ̃ng azurfa saka gbete au saa yuu bang yɛ, wɔsɔ̃ng ɔkɔ sã tagulla nɛ saka awɔ jibayi a naa ni; 10Ɔkɔ tuu lazɔrɔ nɛ a fãrã ni, a ɗagbete ɔ yɛ ni, wɔsɔ̃ng koodɔɔ a labaa aɗa yɛnɛ ni; aru shɔ vishonɛyi vitɔ̃vɨng shɔ ãyi vigbeteyi yɛ pɛliyi vishone yɛ.
11Naa ɔkɛ tonɛ a koo moo ko jaa koomoo, ɔ yɛrɛ ɔ kãa shɔ gbete yɛ tɛɔ naa tɔ yɛ, ɔ ɔ̃ au ɗɔɔ bi kɔ sitɛ ɔ yaa ɗɔu tɛ. 12Naa ɔkɛ to wɛrɛu nɛ ɔ shane Ɗalapa u ãwɔ ɔ̃ne bi nyatɔ̃ne. 13Sho wɛrɛyi ikɛ tɛ wɔ naa nɛ, nya gee nɛ binyatɔ̃nɛ, u ɔ̃rɛ a wɛrɛu ni; shɔ jo tɛ wɔ naa ɓa, nya gee nɛ binyantɔ̃ne u sɔɔ ɔ ɗɔɔbi rɛ. 14Shɔ gbeteyi ji tɛɔ naa ɓa wɔsɔ̃ng shɔ gbeteyi ji nta ɔ nya ɓa, ɔ waa zaburu gbete awɔ dɔɔ aɗa gbete ɔkɛ shɛnɛ a wɛrɛu ni ko a koo moo ni. 15N gelɔɔ tɛ, a lee gadii lee gbete shɔ gɔ̃ shɔ yusho Ɗalapa yɛ nta raa ɓa shɔ Sɔdomyi a shɔ Gomorayi u tɛɛ shɔ koo wai tɔ. 16Ɔ nta pɛǃ n shoɔ kɛ naa mɛrɛ̃ɛ̃ a wisi gbete shɔ toli yɛ. arumkɔ ɔ ɔ̃ shɔ ruu kpɛ̃nɛ naa sɔɔyi a shɔ tɔ̃vɨn gbeteyi pɛli vi kɔlinɛ ɓa naa koroyi.
17Ɔ kɔyuu tɔ a shɔzɛyi ni; aru gbete i yɛyi n tɔɔ shɔ ruu nwaneyi i ɗekɨn i waa ɔ kpata ai jaa Ɗa. 18Ang ruu bi kɔ shɔ yɛ n tɔɔ shɔ yupɛ̃niyi a kpatiyi dekɨn, aru gbete ɔkɛ shɔ noo kɨnnɛ ɔ geliyi ruu tɔ̃vɨn a shɔ Yahudayi ni. 19Ama ikɛ n tɔɔ ɗekɨn ne, ɔkɔ pɔ̃ yuu kɔnɛ nɛ a vigbete ɔ yɛ shani wɔsɔ̃ng nɔgbete ɔ yɛ shayɛ ni. A ɗawuni shɔ yɛ tasɔɔ vigbete ɔ yɛ sha ɓɛjo tɔ, 20ɓa mɔkɔ yɛ nwanyau rɛ ɓa, ama meyeu suru yɛ nwanya rɛ aa yuu ni.
21Shɔwɔ yɛ ã ɓɛzɔ̃ shɔ nyou vɔrɔ rɛ, jaa ɓeye yɛ pɛli jo nankɔ a ɓɛɛ jaa ni; Jaayi yɛ risi ɓeyeyi a ɓiniyi knti i nyoyi vɔrɔ yɛnɛ yusaa. 22Shɔ yɛ bẽẽ ɔ ruubii ang yuu piti kpai ama shɔ gbeteu kɛ ma nyane ukɔ yɛ ranaa rɛ. 23Shɔ kɛ tasɔɔ raa ne a koo wɔɔ, ɔ yɛ sɔ̃njo nya kawɔ. N gelɔɔ tɛ nizɛ, ɔ yɛ yisi rakinɛ pẽneɓa a tipi moo gbete Isrela ni ɓa sitɛ jaa shɔzɛ atɛ.
24Jaa vi matine tɛɛ shɔ gbete mitiu vi ɓa, jaa wɛrɛ tɛɛ ɓɛɛ shɔ wɛrɛ ɓa. 25Tesi tɛ jaa vi matine u ɔ̃ naa shɔ vi tasinɛ, jaa wɛrɛ u ɔ̃ naa ɓɛɛ shɔ wɛrɛ. I kɛ ɓaa shɔ Wɛrɛ ne Bahazabu (kpati suru kɔline), shɔ yɛ ɓaa shɔ gbeteyi i a wɛrɛu nii kɛne iviya.
26Ɔkɔ ntayi setine. Aru vigbete u nya kukine dɔdɔrim shɔ yɛ ɓeliu nya tɔ a ɗekɨn ni, kopi ruu shɔ piya gbete shɔ ɓusi tɔ shɔ yɛ nta tɔ piti kpai. 27Vigbeten kɛ gelɔɔ ne a ɗɔ kɨnri, ɔ̃tɛ kaka jazɨng a kɔrɔ ɔ sha sɔngtɔ a niti ni; a vigbete ɔ ntaa a nya weere a shoo ɔ̃tɛ kaka jazɨng a kɔrɔ ɔ gesɔng a yujaa lapa ɔ sharɛ. 28Ɔkɔɔ ntaa seti shɔ gbeteyi nyɔ shɔ jazɛ bi kɔ sheeli nɛ ama i nyo shɔ suru dɔɔ ɓa. Ama, ɔ ntaa seti shɔ gbeteyi zɛnoo jazɛ bi nyone piti kpai a suru ni a yaa wɛrɛ. 29Shɔ meli jajjano ɓa ziti a saa fɛ̃ɛ̃ ni ɓaya? Piti shɔmni kpai jajjano gbete wɔ yɛ shishi ɓa a tipi ni ɓa Uɓeye Ɗalapa zɛnɛ ni ɓa. 30Ɔ kɨnnɔɔ pɛ, piti awɔ shɛ̃nti yuu ni Ɗalapa ga tɛttɔ. 31Aruumkɔ ɔ nta seti ɓa; aru ɔ tɛɛ janoyi tɛttɔ a kiririni waa-nɛ.
32<<Shɔ gbeteu kɛ tasi nɛ nɛm pɛn ɓɛɛ a shɔ ɗekɨn, n kɔ maa n yɛn tasi jo a maye ɗekɨn a kolapa u pɛn maa.>> 33Ama shɔ gbeteu kɛ bẽẽn ruubi nɛ a shɔ ɗekɨn ukɔ maa n yɛn bɛ̃ɛ̃ u ruu bi jo a maye ɗekɨn a kolapa.
34Ɔkɔɔ pɔ̃nɛ a sisɨn nɛn a ɗɔɔ binyatɔ̃ne n tinɛ a koo. N jo a ɓa ɗɔɔ bi nya tɔ̃nɛ n tinɛ ɓa, ama n ɗɔɔ sɨɨn tanɛ. 35N arɛ nn,
<<pɔ̃ jaayi u ɔ̃ɔ̃ shɔ nopɔ̃ a ɓeyeyi,
jasoro u ɔ̃ shɔ nopɔ̃ a ɓiniyi,
mɛjaayi ɓɛsoyi i ɔ̃ shɔ nopɔ̃ a ɓɛkponiyi soro---
36shɔ gbeteyi aa yɛti wɛrɛ i kɔyi yɛ ɔ̃jo aa shɔ nopɔ̃yi.>>
37Shɔ gbete jo ɔrim ɓa, u tɛɛ ɓeye a bini ni ɓa, jo yɛɓa u ɔ̃ n jadɔyi ɓa; Shɔ gbete ɔri ɓɛjaa vɔshɔ wɔsɔ̃ng ɓɛjaa soro tɛn tɔ, jo yɛɓa u ɔ̃ n jadɔyi ɓa; 38Shɔ gbeteu kɛ tɔnɛ nem pɔ̃ sisɨn ɓa ang ruu bi ni ɓa, jo yɛɓa u ɔ̃ n jadɔyi ɓa. 39Shɔ gbeteu kɛ ɔrii u suru bi nɛ yɛ kpaa ɓa, ama shɔ gbeteu bɛ̃ɛ̃ u suru tɛ ang yuu yɛ kpaa sɔng tɔ.
Vi nyonɛ
40<<Shɔ gbeteu kɛ tɛɔ nanɛ si ukɔ maa tɛn naa tɛjo, shɔ gbeteu kɛ tɛn nanɛ tɛ shɔ gbeteu shong yɛ. 41Shɔ gbeteu kɛ tɛ janyagadi nane aru neu janyagadi shɔ yɛ sɔruu dɔɔ a vi gbete shɔ pɔ̃rɛ nɛ shɔ sori janyagadi dɔɔ awuni yɛ, wɔsɔ̃ng shɔ gbeteu kɛ tɛ shɔ tɔ̃vɨnyi nanɛ aru nɛu shɔ tɔ̃vɨn shɔ yɛ soruu dɔɔ a vi gbete shɔ pɔ̃rɛ nɛ shɔ sori shɔ tɔ̃vɨnyi dɔɔ awuni. 42N gelɔɔ tɛ nizɛ shɔ gbeteu kɛ ãng jadɔ gbete pẽtẽrẽ mii baanɛ nɛ aru nɛu pɛn jadɔ, shɔ yɛ soruu dɔɔ tɔ.>>
Valgt i Øjeblikket:
matiyu 10: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
