Luka 1
1
Yutasinɛ
1N gee a nyatɛ Tiyofolos:
Shɔzɛ waanɛ gbeteyi ã yuu i bee vigbete Ɗalapa pɛli au tete yɛ. 2I bee vigbete shɔ geliuyɛ a shɔ gbete i zɛ viu ai nɔɔ a gɨngɨn a shɔ gbeteyi i waanɛ nya ruuba yɛ. 3kɛɗɔn ma shɔwɛrɛ Tiyofolos aru gbetenkɔ, n ang yuu n bili vim tɛttɔ piti kpai yunɛ au gɨn-gɨn, n zɛrɛ tɔ̃tɔ n bee vi sɔ̃njo aa yuuni. 4N pɛli vim aru gbete a zɛ vitɔ̃vɨng piti kpai a vigbete shɔ mataa yɛ.
Shɔ sha Yɔhana shɔ Batizima lee yenɛ
5Aɗagbete Hiridu usi kpati a Yahudiya yɛ, shɔ nyawaanɛ siɗɔn u nii nɛ Zakariya, shɔ gbete i shovi a Abija; ɓeso nii nɛ Elizobe; tɛu a Haruna laduru. 6I ziti piti kpai i shɔ tɔ̃vɨn a Ɗalapa ɗekɨn ni, i gɨn Uɓeyelapa nya ruubii lalas au nya-ãsinɛni. 7I jaa si ɓa aru Elizobe u si sutɔri, Elizobe a ɓɛvɔ Zakariya ni siyi kpẽ tɛttɔ. 8Lewɔɔ Zakariya u ɗɔgbete pɛliu vishonɛ nyawaanɛ a jaa Ɗa gakinɛ, sijou lee arɛ. 9Ji shɔ nyawaanɛ a jaa Ɗa i vi pɛlinɛ, Loti lɔurɛ nɛu bu zɨriya laakusɨn ayuu lazãa. Kɛɗɔn Zakariya yɛ Uɓeyelapa jaa Ɗa rɛ. 10Aɗagbete Zakariya u ɗɔɔ zɨriya laakusɨn bunɛ, mɔɔ i shi a ɓili i ɗɔɔ Ɗa gakinɛ. 11Ɗa jashonɛ lapa shɛ au ɗekɨn, a ka-nakn lazãa aɗɔgbete bu zɨriya laakusɨn ɗɔnyɛ. 12Naa Zakariya zɛutɛ, a zaa waanɛ. 13Ama Ɗa jashonɛ lapa geliu nɛ: <<Mɔkɔ nta setinɛ, Zakariya! Ɗalapa nta a gakinɛtɛ, mɛsou Elizobe yɛ yeraa javɔshɔ. A ãu nii nɛ Yɔhana. 14A yɛ nta binyatɔ̃nɛtɔ a sisɨn puruni waanɛ, shɔzɛ waanɛ i yɛ nta binyatɔ̃nɛtɔ naa shɔ kɛ yeunɛ yɛ! 15Jau yɛ ɔ̃ shɔ pẽniba a Uɓeyelapa ɗekɨn ni. Yɛ ɓoo mii gbete u kaka ɗɔnyɛ ɓa, yunɛ au lee yenɛ yɛ ɔ̃ a Ɗa suruni, 16Ukɔ yɛ sɔri shɔ Isireila waanɛ a Uɓeyelapa Ɗalapa ɗɔbii. 17Ukɔ yɛ, yɛ a Uɓeyelapa ɗekɨn, yɛ ɔ̃ shɔgbete vitɛu kaka ɓa naa Ɗa jashonɛ Iliya. Yɛ musi jaayi yuu a ɓeye ni nyazɔ, yɛ pɔ̃ shɔgbete i gɨn Ɗa nya ãsinɛ ɓa i lɛri ayuu vi wɔsɔ-wɔsɔ pɛlinɛ; yɛ toli Uɓeyelapa shɔ nya ɗɔgbete u kpayi a ɗɔgbete i gauyɛ.>>
18Zakariya geli Ɗa jashonɛ nɛ,<< kɛ ɔ̃nɛ nankɔ n yɛn zɛ kɛpi koviya? N kpẽtɛttɔ, maso kpẽ sɔ̃ntɛ jo.>> 19Ɗa Jashonɛ lapa kasiu nyanɛ,<<N kɔn Jibirilu, N shi a Ɗalapa ɗekɨn, ukɔ shonrɛ n nwanya a mokɔni n gelaa ruu tɔ̃vɨn. 20Ama a ji ã sisɨn ɓa aru gbete n gelaa yɛni ɓa, yɛ ɔ̃ nizɛ a dɔɔɗa tɔ̃vɨn. Aru gbete a jo ã sisɨn ɓa a yɛ nwanya dɔɔɓa see leegbete ang gelaami ɔ̃tɛ nizɛ.>> 21Shɔ ga Zakariya rɛ ji shɛ ɓa tɛ̃ɛti niɓa i ji zɛ vigbete zãriu shɛnɛ yɛti jaa Ɗa yɛ ɓa. 22Naa shɛ ɓilitɛ jaa Ɗa ni ji nwari nya ɓa. I kpaa sisɨnrɛ nɛ Ɗalapa ɓeliu nɔɔ mintɛ a yɛti jaa Ɗa ni, tasiyi vi a naa ama ji nwanya ɓa. 23Aɗagbete Zakariya u ɗaa vi pɛlinɛ yisi nyatɛ a jaa Ɗa ni sɔɔ wɛrɛ-rɛ. 24A kɨntiuni ɓeso Elizobe tosi jaarɛ, ji ya wɛrɛu ɓa shɛlɛ maani. 25Elizobe shanɛ<<Dɔdɔrim Uɓeyelapa pɔ̃sin naatɛ, shɛshintɛ a yusẽni a shɔ ɗekɨn ni!>>
Shɔ sha Yesɔ ɗaa yeenɛ
26Aɗagbete Elizobe usi shɛlɛ maangbete a jaani yɛti yɛ, Ɗalapa sho Ɗa jashonɛ lapa Jibirilu a komɔɔ Galili gbete shɔ ɓaanɛ Nazara. 27Ɗa jashonɛ lapa ruu shanɛ ɗɔn a nyara gbete i maruu nɛi tɛzɔ a shɔwɔ u nii nɛ Yusufu, upɛ kpati Dauda shɔ laduru. Nyarau u nii nɛ Mariyamu. 28Ɗa jashonɛ lapa au ɗɔbiirɛ a shanɛ, a ɔ̃ ɔ̃nɛ binyatɔ̃nɛ! Uɓeyelapa u a mokɔni, Ɗa tasaa vɔɔ susãritɛ biini waanɛ!
29Mariyamu yɔri yuutɔ waanɛ aru Ɗa jashonɛ lapa ruumni, ji zɛ vigbete u ruu shayɛ ɓa. 30Ɗa jashonɛ lapa geli Mariyamu nɛ, <<Mɔkɔ nta setinɛ Mariyamu; a kpaa tɔ̃vɨntɛ a Ɗalapa ɗekɨn ni. 31A yɛ kpaa yɛti a yee jaa, a ãu nii nɛ Yesɔ. 32Yɛ ɔ̃ pẽniba, shɔ yɛ ɓaunɛ shɔgbete pẽniba vitɛu kaka ɓa ɓɛjaa. Uɓeyelapa Ɗalapa pɔ̃urɛ u ɔ̃ kpati nagbete ɓɛwuru Dauda ɔ̃ yɛ. 33Ukɔ yɛ roo kpati a Yakubu laduru dandang; u kpati roonɛ yɛ sɔ̃nya ɓa!>>
34Maryamu geli Ɗa jashonɛ lapa nɛ,<<N pɛ nyarã, vim yɛ ɔ̃ kɛpikoviya?>> 35Ɗa jashonɛ lapa kasi nya nɛ,<< Ɗa suru yɛ no aa yuu, Ɗalapa kaka yɛ ɔ̃ moni. Aruumkɔ Ɗa suru shɔyɛ ɓaunɛ Ɗa jaa. 36Kpaa sisɨn pɛ a mɛzɔ̃u Elizobe bi. Shɔ shanɛ yɛ kpaa jaa ɓa, ama u a yɛtini shɛlɛ maangbete, piti au kpẽnɛni kpai. 37Aruumkɔ viwɔɔ tɛ Ɗalapa kaka ɓa.>> 38Mariyamu kasi nyanɛ,<<N pɛ Uɓeyelapa jawɛrɛ, Mɛnɛ u ɔ̃ kɔɔ nankɔ.>>A Ɗa jashonɛ lapa yaurɛ a yɛrɛ.
Mariyamu yɛrɛ gee Elizobe nya
39A ɗɔukɔ Mariyamu yuu gbãgbã yɛnɛ tipi wɔɔ adɔɔ kɔpɔ a ɓuzɨn komɔɔ tipi Yahudiya. 40A to Zakariya wɛrɛ gee Elizobe nyarɛ. 41Naa Elizobe nta Mariyamu nya geenɛtɛ, u jaɓẽreti ribii au yɛti. Ɗa suru kuki Elizobe nyawu. 42Elizobe ɓeli nya a kaka nɛ: <<Mɔkaa ɔ̃rɛ shɔ gbete Ɗa tasiu susãri a bi atete soroyi, jaa gbete aa yɛtim Ɗa u tasiu susãri a biniǃ 43Pɛvi tɔ̃vɨn shɔpi kpanrɛ viya, Uɓeyelapa ɓini ang ɗɔ nyageenɛ viya? 44Naa nta nyageenɛtɛ, jaa gbete ang yɛti nta sisɨn puru a guli bi rɛ. A sisɨn puru yɛ ɔ̃ kɛpikovi 45a sisɨn puru yɛ ɔ̃ kɛpikovi akɛ ã sisɨn nɛ a vi gbete Uɓeyelapa nya ruubii shayɛni ɔ̃tɛ nizɛ viya!>>
Marayamu soo Ɗa bɛlinɛ
46Ama Mariyamu shanɛ, <<N sisɨn a ɗɔɔ Uɓeyelapa bɛlinɛ;>> 47N suru a ɗɔɔ yɛti puru ntanɛ aru Ɗalapa u n shɔ raanɛ, 48aru kpaa sisɨntɛ ang biini, n pɛ u jadɔɔ gbete ɓa viwɔɓa. Yunɛ dɔdɔrim shɔ yɛ ɓannɛ shɔ sɨsɨn puru, 49aru vi pẽniba shɔgbete vitɛu kaka ɓa Ɗalapa ukɔ pɛlinrɛ. U nii nɛ wɔsɔ-wɔsɔ; 50yunɛ laduru shom yɛnɛ laduru wɔ tasiu shɔ gbete i basiu nii raa ntanɛtɔ. 51U vi shonɛ pɛ̃niba au pɛliyɛ, sãti shɔ yuu basinɛyitɛ a vigbete i kasi pɛlinɛni. 52Nosi kpati pẽnibayitɛ ai laa ɔ̃nɛ kpatini, a bassi shɔ gbeteyi i ɓa viwɔ ɓa. 53Shari shɔwɔ̃tɛ a vi tɔ̃vɨn, a ã shɔ vinaa i naa nɛi yɛ a naa waati,
sã ruugbete ma au ɓeuruutɛ,
pɔ̃si u jawɛrɛ Isireilayi naatɛ.
55<<kpaa sisɨntɛ nta Ibirayi raatɛǃ>>
56Mariyamu ɔ̃ a Elizobe ni mɛnɛ lee taati kɛɗɔn a yɛ wɛrɛ rɛ.
Yɔhana shɔ Batizima dii yeenɛ
57Naa Elizobe ɗaa jaa yeenɛ pɛlitɛ, a yee jaarɛ. 58U shɔ nyakãsiriyi au shɔbiiyini i nta yɛti purutɔ waanɛ nɔgbete Uɓeyelapa ntau raayɛ, i piti kpai i nta yɛti purutɔ a wunini. 59Naa jaau pɛlitɛ lumɔ gbete, i yeriu sharɛ, siyi tɔnɛ nɛi ãu niinɛ Zakariya, a ɓeye knti 60ama u ɓini shanɛ, <<Ɓa! u nii nɛ Yɔhana.>> 61I hɨunɛ, <<Aa shɔbiiyi pi nii nankɔ piya?>> 62I tasi naarɛ a Beye bi, u nii yɛ ɔ̃ kɛnɛ-iviya. 63Ɓeye Zakariya nɛ shɔu ãng vi vibeenɛ pɛ, a bee virɛ, <<U nii nɛ Yɔhana.>>I piti kpai ɔ̃rikɛ viibii zaanɛ. 64U nya ɓelirɛ tɛ̃ɛti, a gaa nya nwanɛrɛ, u ɗɔ Ɗa bɛlinɛ. 65I shɔ nyakãsiri seti pɛli kpai, shɔ dɔti nya yɛnɛ komoo kɔpɔ tipi Yahudiya piti kpai. 66Kopiya gbete nta vim kpai kɛɗɔn i lɛrirɛ i hɨnɛ,<<Jau yɛ ɔ̃ kɛ-iviya?>>Aru gbete shɔ zɛtɛttɔ nɛ Uɓeyelapa kaka a ukɔni.
Zakariya sha vigbete kanɛ ɗekɨn
67Yɔhana ɓeye Zakariya Ɗa suru si au sisɨn ni a sha Ɗalapa nya ruubii nɛ:
68<<U bɛli Uɓeyelapa nɛ, shɔ Isireilayi Ɗalapa!
Atɛ pɔ̃si ɓɛshɔzɛyi naatɛ, raayitɛ.>>
69Ãu shɔgbete rautɛ vitɛu kaka ɓa,
a ɓɛjawɛrɛ Dauda laduru,
70Nogbete ma au jashonɛyi wɔsɔ-wɔsɔ si tɛ̃ɛ̃tɛ̃ɛ̃yɛ
71nɛn yɛn rautɔ
au shɔnopɔ̃yi naani a shɔgbeteyi iji kasiu zɛnɛ ɓa i naani kpai.
72A shanɛ nɛn yɛn nta u mɛuruyi raatɔ
u kpaa sisɨn aru gbete ma a wuniyɛni.
73Tɛnɛ sisɨn zaza au ɓɛuru Ibirayi:
74ma nɛn rautɔ au shɔnopɔ̃yi naani,
nɛn yaurɛ u kpaa nyaba nɔgbete u shɔshing vi shɔnɛ seti ɓa biini ɓa,
75nɔgbete u ɔ̃ shɔ wɔsɔ-wɔsɔ a Ɗalapa ɗekɨn
a ɗagbete u a suruni kpai.
76<<Mɔkɔ, n jaa, shɔ yɛ ɓaanɛ Ɗa jashɔnɛ pẽniba shɔ gbete vitɛu kaka ɓa.
A yɛ, yɛ a Uɓeyelapa ɗekɨn
a tɔ̃riu nyaba,
77a geli u shɔbiiyi nɛ shɔ rayitɛ
a nyaba gbete shɔ yasiyi ruuvini yɛ,
78U Ɗalapa pɛ shɔgbete nta shɔ raatɔ a ɔrinɛni gbikiri-gbikiri.
yɛ pɔ̃siu ɗɔsẽsẽ shɔraanɛtɔ a kunyasi u too au bi
79U tasi a kolapa ɗɔsẽsẽ a shɔgbeteyi i ɔ̃ a ɗɔkɨnrii bi kpai, a shɔ gbete i ɔ̃ a jasuru au vɔtɛyɛ,
u tasiu nyaba nɔgbete au ɔ̃ a yɛti binyatɔ̃nɛ yɛ.>>
80Jau barɛ abi a suru ni ɔ̃ a kakani a nyaba gɨnnɛ. ɔ̃ aɗɔgbete shɔ ɓa ɗɔnni ɓa yɛ, yɛnɛ lee gbete shɛ a Isireila ɗekɨn aru nyawaanɛ.
Valgt i Øjeblikket:
Luka 1: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
