Yɔhana 9
9
Yesɔ Gati Shɔgbete Shɔ Yeeu Nɔgbãti
1Aɗagbete Yesɔ u si ɗɔɔ tɛɛnɛyɛ, A zɛ jawɔɔ gbete shɔ yeeu nɔgbãti. 2Yesɔ jadɔɔyi i hɨu nɛ, <<Shɔmala, pi ruuvini pɔ̃rɛ shɔ yeeu nɔgbãti piya? pɛjo u ruuvini ya ko u ɓini a ɓeye i ruuvini ya?>>
3Yesɔ kasinya nɛ, <<U nɔgbãti ɓanɛ a ruugbete nɛ pɛli ruuvini ɓa, ko ɓini a ɓeyeni nɛi pɛli ruuvini ɓa, ama shɔ yeeu nɔgbãti aru shɔu tasi Ɗalapa kaka vishonɛ au yuu. 4Ɗaa dooɗɔnni shɔgbete shongyɛ ɔ̃riutɛ kaka jazɨng akɔrɔ u yɛ ɗekɨntɔ au vishonɛni, ɗɔkɛ tɔɔnɛ shɔwɔɔ yɛ pɛli vishonɛ tɔɓa. 5N kɛ ɔ̃nɛ a kootipi, nkɔng ɔ̃rɛ ɗɔsẽsẽ a kootipi.>>
6Akɨnti gbete Yesɔ sha vimtɛ kɛɗɔn a tuli susãri a tipi, a rãã tipi awuni, a sii tipi gbete rãã yɛ, kɛɗɔn a sɔ̃ a jaau nɔɔ. 7A geliu nɛ, <<Yɛnɛ a sɔɔ nɔkɨn a mii kanɛ Siliyam.>>(Nii mi ukɔ ɔ̃rɛ <<Shonɛ,>>) kɛɗɔn jaau yɛrɛ a sɔɔ nɔkɨn rɛ, sɔɔrɛ u ɗɔgbete u zɛ ɗɔ.
8U shɔnyakãsiriyi a shɔgbete i zɛliu si tɛ̃ɛ̃tɛ̃ɛ̃ a ɗɔɔ vi gakinɛ i hɨunɛ, <<Ɓa jamkɔ u zɛurɛ a ɗɔɔ ɔ̃nɛ u gbete gaki vi ɓaya?>> 9Shɔ gãsiyi shanɛ, <<Pɛ ukɔ>> Ama shɔwɔyi shanɛ, <<Ɓa ukɔ ɓa; shɛ zɔɔtɔ awuni.>>
Ama jaau au yuu shanɛ, <<pɛ nkɔng jaaukɔ.>>
10I hɨu nɛ, <<A zɛ ɗɔɔ kɛpikoviya?>>
11A kasinya nɛ,<<Jaa gbete shɔ ɓaunɛ Yesɔ ukɔ rãã tɔ̃pɔ̃ a sɔ̃ring a nɔyi, a gelin rɛ nɛn yɛrɛ nɛn sɔɔ nɔkɨn a mii siliyam. Kɛɗɔn n yɛrɛ n sɔɔrɛ, ang zɛ ɗɔrɛ.>>
12I hɨ shɔgbete Yesɔ gatiu nɛ, <<Jaau u piya?>>
A kasinya nɛ, <<N ji zɛɓa,>>
Farasiyayi I Hɨli Ruu Aru Gbete Shɔnɔ̃gbãti Gatiyɛ
13Kɛɗɔn shɔ n ti Farasiyayi jaa gbete siu shɔnɔ̃gbã yɛ.
14A lee gbete Yesɔ rãã tipi a tẽẽri jaau a nɔɔ si lee susunɛ. 15Farasiya i hɨ jaau sɔ̃n nɔgbete pɛliyɛ a zɛ ɗɔyɛ. A geliyi nɛ,<<Yesɔ rãã tipi a tẽẽring a nɔɔ, n sɔɔ nɔɔrɛ dɔdɔrim nkɛ zɛɗɔnɛm.>>
16Gãsi Farasiyayi i shanɛ, <<Jaam ji shɛɓa Ɗalapa ɗɔbii ɓa, ji gɨn nya ãsinɛ dii susunɛ ɓa.>>
Shɔwɔyi shanɛ, <<Pi shɔ ruuvini shɔpi yɛ zɛnɔɔ vibii-zaanɛ nankɔ viya?>> Kɛɗɔn i nya ji a ɓa gbeteni ɓa. 17Farasiya i hɨ jau sɔ̃n nɛ, <<A shanɛ jam kɔ ɓelaa nɔɔ rɛ, a sha dɔdɔrim ɓɛkɛnɛ ivi a yuuni viya?>>
Jaau kasinya nɛ,<<U pɛ janyagadi.>>
18Yupɛ̃ni Yahudawayi i ji ã sisɨn ɓa nɛ jaau si shɔnɔgbãti ɓa, arumkɔ i ɓaa ɓeye a ɓini nya pɛttɔ. 19I hɨyirɛ,<<Shɔmpɛ ɔ jaa ya? Ɔ tɔnɛ nɛi yeeu nɔ̃gbãti ya?, Zɛ ɗɔɔ dɔdɔrim kɛpikoviya?>>
20U ɓini a ɓeyeni i kasinya nɛ,<<U zɛ tɛttɔ upɛ u ɓɛɛ jaa, u zɛ tɛttɔ u yeeu nɔ̃gbãti. 21Ama u ji zɛ nɔgbete shɔ pɛliyɛ u ɗɔgbete zɛ ɗɔ dɔdɔrim ɓa, u ji zɛ shɔ gbete ɓeliu nɔɔrɛ ɓa. Ɔ hɨ ji ukɔ, batɛtɔ nɔgbete yɛ kasinya au yuu!>> 22Ɓini a ɓeyeni i sha vim aru gbete i nta seti yupɛ̃ni Yahudawayi, Yahudawayi siyi matɛttɔ nɛ shɔgbete kɛ shanɛ nɛ Yesɔ kɔ ɔ̃rɛ Shɔshɔranɛ shɔyɛ nyikiutɔ ai ɗɔ ɔ̃nɛni. 23Arumkɔ u ɓini a ɓeyeni i shanɛ, <<Batɛtɔ, ɔ hɨu nɛ!>>
24Kɛɗɔn toti Farasiyayi i ɓa jaa gbete u si nɔgbãti, i geliu nɛ, shapɛ jo a sisɨn gbete aru Ɗalapa nii u kpaa bassinɛ!
U zɛ tɛtɔ jagbete gataam u pɛ shɔ ruuvini.
25Kɛɗɔn a kasinya nɛ, <<ko u shɔ ruuvinikɔ ko u ɓa shɔ ruuvini ɓa n ji zɛ ɓa, vi gbete ang zɛyɛ ukɔ, si n pɛ shɔnɔgbãti ama dɔdɔrim n ɗɔɔ vi zɛnɛ.>>
26I hɨu nɛ, <<Jaau pɛlaa kɛ iviya? Jaau ɓelaa nɔɔ kɛpi koviya?>> 27A kasiyinya nɛ, <<N gelɔɔ tɛttɔ gboti, ɔ ji wesho ɓa vigbete n shayɛni ɓaya? Aru ivi ɔ kasi ntanɛ sɔ̃nrɛ viya? Mɛnɛ ɔkɔɔma ɔ kasinɛi ɔ̃njo u jadɔɔyi kɔ ya?>> 28Shɔwiyi i dã jaau i shanɛ,<<Mɔkaa pɛ u jadɔɔ kɔ, ama u ɓɛɛ Musa jaɗɔɔyi. 29U zɛ tɛttɔ Ɗalapa nwanyatɛ a Musa ni; Ama jaam u ji zɛ ɗɔgbete shɛ a ɗɔnyɛ ɓaǃ>>
30Jaau kasinya nɛ, << Vibii-zaanɛ wɔɔ yɛm nɛm! Ɔ ji zɛ ɗɔgbete shɛyɛ ɓa, ama ɓeling nɔɔ sɔ̃ntɛ! 31U zɛ tɛttɔ Ɗalapa wesho ɓa a shɔ ruuvini nyani ɓa; Ɗalapa wesho a shɔ gbete i bassiutɔ nya, i pɛli vigbete Ɗalapa kasi nɛi pɛliyɛ. 32Sãnɛ ɗagbete koo gaa yɛ shɔ ji ntaɓa shãã ɓa, nɛ shɔwɔɔ ɓeli shɔgbete shɔ yeeu nɔgbãti nɔɔ ɓa. 33See jaam gbete shɛ a Ɗalapa ɗɔbii, si ɓa ɗɔkɔɓa si ji zɛnɔɔ vim pɛlinɛ ɓa nankɔni ɓa.>>
34I kasinya nɛ, <<Shɔ yeearɛ a barɛ, a yɛti ruuvini, a kãa nɛn matiu vi ya? >>Kɛdɔn i nyikiurɛ a Yahudawayi i ɗɔ ɔ̃nɛni.
Nɔgbãti A Suru
35Naa Yesɔ ntatɛ nɛyi nyiki jagbete u nɔɔ gatiutɛ, a Yesɔ kpaa jaaurɛ a hɨu nɛ, << A ã sisɨn tɛ a Shɔzɛja biini ya?>>
36Jaau kasi Yesɔ nya a shanɛ,<<Shɔmala, gelin pɛ ukɔ ɔ̃rɛ piya? Nɔgbete n ã sisɨn au biǃ>>
37Yesɔ geliu nɛ,<<A zɛu tɛttɔ gboti, ukɔ ɔ̃rɛ shɔgbete u ɗɔɔ nyanwanɛ a mɔkɔni dɔdɔrim.>>
38Jaau shanɛ,<< N ã sisɨn tɛ Uɓeyelapa!>>A ta a yugboti a Yesɔ ɗekɨn.
39Yesɔ shanɛ, <<N arɛ a kootipi n vɔsi ruu, aru shɔnɔgbãtiyi i kpaa ɗɔzɛnɛ, shɔgbeteyi i zɛ ɗɔtɔ i ɔ̃ shɔnɔgbãti.>>
40Farasiya gãsiyi gbete i si Yesɔ ni a ɗɔu maani yɛ, i nta vigbete shayɛ, i hɨu nɛ,<<Kɛ aa nya shanɛ u ji shɔnɔgbãti kɔ ya?>>
41Yesɔ kasinya nɛ, <<Ɔ si shɔnɔgbãti, ɔ ruuvini si ɓa. Ama ɔ tɔɔtɛ nɛi zɛ ɗɔtɔ, ɔ doo a yɛti ruuvini.>>
Valgt i Øjeblikket:
Yɔhana 9: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
