Yɔhana 7
7
Yesɔ A Ɓɛzɔ̃yi
1A kɨntiuni, Yesɔ raki a Galili; ama ji kasi tɔɓa nɛn ra a tipi Yahudiyani ɓa, aru yupɛ̃ni Yahudawayi gbete i a ɗɔu i kasiu nyoutɔ. 2Si Yahudawayi i ɗaa yumusinɛ taaliyi pɛlitɛ maani, 3Kɛɗɔn Yesɔ ɓɛzɔ̃yi i geliu nɛ,<<Yaa ɗɔmnɛ a yɛ tipi Yahudiya, nɔgbete a shɔ gɨnnɛyi i zɛa vi pɛlinɛ pɛjo. 4Shɔgbete kasinɛ shɔu zɛntɔ waanɛ, yɛ ɓusi u vipɛlinɛ ɓa. Nɔgbete akɛ pɛli vimnɛ, a tasaa yuujo shɔu zɛa a koo kpaiǃ>> 5( Ko Yesɔ ɓezɔ̃yima i ji ã sisɨn ɓa au biini ɓa.)
6Yesɔ geliyi nɛ,<<N ɗaa ji a pɛ̃nɛ̃ɓa. Ama awɔ ɗɔbii Ko-pi ɗagbete piya ɓɛɛjo ɔ ɓɛɛ. 7Kotipi yɛ bɛ̃ɛ̃ ɔ ɓa, ama bɛ̃n ɓɛɛtɛ, aru gbete n ɗɔɔ i ruuvini gelinɛ gbete i pɛliyɛ. 8Ɔ yɛ ɗɔɔ yumusinɛutɔ ɓɛjitɔ. N yɛn yɛ ɗɔɔ yumusinɛm ɓa, n ɗaa ji pɛli pɛ̃nɛ̃ɓa.>> 9Yesɔ sha vim, kɛɗɔn a ɔ̃ ɓɛɛjo a Galili.
Yesɔ A Ɗɔɔ Yumusinɛ Taaliyi
10Akɨnti gbete Yesɔ ɓɛzɔ̃yi i yɛ ɗɔɔ yumusinɛutɛ, kɛɗɔn Yesɔ yɛ sɔ̃n jirɛ; ama bãlitɔ shɔ ji zɛuɓa piti ɓa. 11Yupɛ̃ni Yahudawayi i si au ɗɔɔ kãnɛ a ɗɔɔ yumusinɛuni. i hɨnɛ,<<Yesɔ u piya?>>
12Atette mɔɔyi si shɔ ɗɔgbete shɔ nwalinya a Yesɔ yuu a nyawere tot-tot, shɔwɔɔ i shalinɛ,<< U pɛ shɔ tɔ̃vɨn,>> Wɔyi sha sɔ̃njinɛ ɓa nankɔ ɓa u pɛ <<Shɔ-shɔ ɗakinɛ.>> 13Ama shɔwɔɔ ji shaɓa a kakani nɔgbete shɔyɛ nta piti ɓa, aru i nta seti yupɛ̃ni Yahudawayi.
14Naa shɔ pɛli yumusinɛutɛ yɛtɛ atette kɛɗɔn Yesɔ to wɛrɛ Ɗa rɛ a gaa shɔ vi matinɛrɛ. 15Ɔ̃ri yupɛ̃ni Yahudawayi kɛ vi bizaanɛ waanɛ i shanɛ,<<Jaam zɛ vi tɛttɔ waanɛ shɔ ji matiu vi sɔ̃nɓa shɛ̃ɛ̃ɓangkaa?>>
16Yesɔ kasiyinya nɛ,<<Vigbete n matiwɔmi ɓa n vimatinɛ ɓa, ama shɛ a Ɗalapa nya, shɔgbete shongyɛ. 17Shɔu kɛ kasinɛ nɛn pɛli vigbete Ɗalapa kasiyɛ, yɛ zɛtɔ n vimatinɛ shɛ a Ɗalapa nya, ama ji shɛ ɓa ang nya ɓa. 18Shɔgbete kɛ mati shɔ vinɛ au kaka bi si kã ɓɛɛji u yuu bassinɛ. Ama shɔgbete kɛ kãri bassinɛ nɛ shɔgbete shouyɛ, u pɛ shɔ tɔ̃vɨn, nyazɔ̃ ɓa au biini ɓa. 19Musa ãwɔ nya ãsinɛtɛ, ji ãwɔ ɓaya? Ama ɔ ji gɨn nya ãsinɛm ɓa awɔ teteni ko gbete niɓa. Ɔ kang nyɔnɛ aru iviya?>>
20Moowi i kasinya i shanɛ,<<A suru kɔ̃linɛ a biini! Shɔu kãa nyɔnɛ piya?>>
21Kɛɗɔn Yesɔ kasiyinya nɛ,<<N pɛli vi bizaanɛ gbete, ɔ kpai bi zaawɔtɔ. 22Musa ãsɔɔ nya aru jaa shaa yeerinɛ, (ɓa Musa ɓa, ama pɛ mɛuruyi i gaa rɛ), piti shɔmni kpai ɔ yeeri jaa shaa a lee susunɛ. 23Shɔkɛ yeeri jaa shaanɛ a lee susunɛ si shɔ ji ka Musa nya ãsinɛ ɓa, ɔ lɛsi sisɨn kɛpiruvi a nkɔni nɛn gati jawɔ tɛpɛ-tɛpɛ a lee susunɛ viya? 24Ɔkɔɔ yee ruunɛ a vigbete nɔɔ zɛyɛni, ama ɔ yee ruujo ayuu vi gbete ji tɔ̃vɨn.>>
Yesɔ Kɔ Shɔshɔranɛ Ya?
25Kɛɗɔn shɔ Urushalima gãsiyi i shanɛ,<<N ɓa jaa gbete yupɛ̃ni Yahudawayi i kãu ɗɔɔ nyɔnɛukɔ ɓaya? 26Ɔ kɨnnɔɔ pɛ! U ɗɔɔ nyanwanɛ a shɔ ɗekɨn, i ji sha viwɔɔ ɓa au yuuni ɓa! Yɛ ɔ̃ ɓanɛ i zɛ tɛttɔ nɛ ukɔ ɔ̃rɛ shɔshɔranɛ ɓaya? 27Shɔshɔranɛ kaanɛ, shɔwɔɔ yɛ zɛ ɗɔgbete shɛ a ɗɔnyɛ ɓa. U kpai u zɛ ɗɔgbete jaam shɛ ɗɔnyɛ tɛttɔ.>>
28Aɗagbete Yesɔ u ɗɔɔ shɔ vi matinɛ a wɛrɛ Ɗa, nwanya a gãgãni a shanɛ, <<Ɔ zɛn nii tɛttɔ tɔ̃vɨn a ɗɔgbete n shɛ ɗɔn niya? Ama n ji a ɓa ang kaka bi ɓa. Shɔgbete shonyɛ, ɔ ji zɛu nii ɓa upɛ shɔ tɔ̃vɨn. 29Ama n zɛu ɓɛɛtɛ, aru gbete n shɛ au ɗɔbiikɔ ukɔ shonrɛ.>>
30Kɛɗɔn i kasiu sãnɛ, ama shɔwɔ ji ɗiu naa ɓa a biini ɓa, aru u ɗaa sijo pɛli pɛ ɓa. 31Ama shɔzɛ waanɛ atette moowi i ã sisɨn au bi i shanɛ,<<Naa shɔshɔranɛ kaanɛ, yɛ pɛli vibii zaanɛ kati u tɛɛ jaam ɓɛɛ ya?>>
Shɔ Shilinɛ Nyejaa Shɔ Shoyi Nɛi Sã Yesɔ
32Farasiyayi i nta mɔɔwi i ɗɔɔ nyawere nwanɛ a ɓɛzɔyini a Yesɔ yuu, kɛɗɔn Farasiyayi a shɔlansi wɛrɛ Ɗa i sho shɔ shilinɛ a nyejaayi nɛi sã Yesɔ. 33Yesɔ shanɛ, <<N ɗagbete n yɛn ɔ̃ a ɔkɔni roorintɛ pẽtẽrẽ, ama n yɛn sɔɔkɛ shɔgbete au shonyɛ ɗɔbii. 34Ɔ yɛ kãn ɗɔtɔ, ama ɔ yɛ kpaam ɓa, ɗɔgbete n yɛ, yɛ yɛ ɔ yɛ dɔɔɓa.>>
35Yupɛ̃ni Yahudawayi i nwanya ai nɔɔ shanɛ,<<Kasi yɛnɛ pi ɗɔpiya gbete sɨnrɛ u yɛ zɛu ɓa viya? Yɛ yɛng kɛ koomo tipi Giriki ɗɔgbete u shɔ koo i roo aɗɔn, u mati shɔ nyakoo Giriki ya? 36Shanɛ u yɛ kãn ɗɔtɔ ama u kpaamɓa, nɛu yɛ, yɛ ɗɔgbete u ɗɔnniyɛ dɔɔɓa. U ruum tasikɛnɛ iviya?>>
Jaɓooti Au à Mii Suru
37A lee gbete shɔ yisi yumusinɛ nyayɛ, gbete ukɔ ɔ̃rɛ dii tɔ̃vɨn pẽniba a yumusinɛuni, Yesɔ yurɛ nwanya a gãgãni shanɛ, <<Shɔ gbete kɛ nta sutunɛ u ang ɗɔbii, 38shɔgbete kɛ ã sisɨn nɛ ang bi u ɓoo miitɔ. Nagbete Ɗanyaruubii shayɛ, <Au sisɨn ɓuzɨn jaɓooti mii ãnɛ yɛ zɛɛ miitɔ aɗɔn.> >> 39Yesɔ sha nyam ayuu Ɗa Suru, shɔgbeteyi ikɛ ã sisɨn nɛ au bi i yɛ tɛyɛ. A ɗauni si Ɗa Suru ji apɛ ɓa, aru gbete si shɔ ji bassi Yesɔ pɛ ɓa.
Yuu Vɔsinɛ A Tete Moo
40Shɔzɛ gãsiyi atette mɔɔwi i nta vigbete shayɛ i shanɛ,<<Jaam upɛ janyagadi kɔ nizɛ!>> 41Shɔ gãsiyi i shanɛ,<<Uko pɛ shɔshɔranɛ!>>Ama shɔwɔyi shanɛ, <<Shɔshɔranɛ yɛ a ɓa, a Galili ɓa! 42Ɗanyaruubii shanɛ, shɔshɔranɛ yɛ shɛ a Kpati Dauda laduru, shɔyɛ yeeu a Baitalami, koomo gbete Kpati Dauda ɔ̃ ɗɔnyɛ.>> 43Moowi i yuu vɔsikɛtɔ aru Yesɔni. 44Shɔ gãsiyi i kasiu sãnɛtɔ, ama shɔ wɔɔ ji ɗiu naa ɓa biini ɓa.
Yupɛ̃ni Yahudawayi I Ji à Sisɨn Ɓa
45Naa shɔ shilinɛ nyejaayi i sɔɔtɛ, shɔlansi jaa Ɗa a Farasiyayi i hɨyi nɛ, <<Ɔ ji n-tiu ɓa aru iviya?>>
46Shɔ shilinɛ nyejaayi i kasinya nɛ,<<Shɔwɔ ji nwanya ɓa naa jaamni ɓa gbete niɓa!>>
47Farasiyayi i hɨyi nɛ, <<Ɔ kɔma nisɔɔtɛ ji ya?>> 48<<Ɔ zɛ shɔzɛ gbete tɛ atette yupɛ̃ni ko Farasiya wɔɔ gbete ã sisɨn au biini tɛya? 49Moo miyi gbete i ji zɛ ruu Musa nya ãsinɛ ɓa, Ɗalapa wiriyitɛ gboti!>> 50Shɔzɛ gbete atette shɔ Farasiya u siɗɔn u nii nɛ Nikodimu, shɔ gbete yɛ Yesɔ ɗɔbii siyɛ. A geli shɔ gãsiyi nɛ, 51<<Nɔgbete u nya ãsinɛ shayɛ, u zɛnɔɔ ruu yeenɛ ɓa a shɔ yuuni ɓa, setɛ shɔ nta ruutɛ a shɔu nyani, nɔgbete shɔ zɛ vigbete pɛliyɛ kɛkɨn.>>
52I kasinya nɛ,<<Nankɔ, mɔkɔma a shɛ ji a Galili kɔya? A zɛli Ɗanyaruubii pɛtɔ tɔ̃vɨn a yɛ zɛtɔ janyagadi wɔɔ yɛ shɛ ɓa a Galili ni ɓa.>> 53Kɛɗɔn kopiya yɛ wɛrɛ.
Valgt i Øjeblikket:
Yɔhana 7: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
