Yɔhana 19
19
1Kɛɗɔn Bilatu pɔ̃rɛ nɛ sojayi waa Yesɔ a kpaataa. 2Sojayi i tɔ̃ri wayuu kɔkɔ i hãsi Yesɔ rɛ yuu; Kɛɗɔn i tosiu fãrã nweri gbete naa kpatiyi i hã yɛ a bi, 3i arɛ au ɗɔbii i geliunɛ, <<Ɔ̃ a suruni kpati Yahudawaǃ >>Sojayi i yurɛ i waau naa a kashinya.
4Bilatu shɛ bili sɔ̃nrɛ a geli mooyi nɛ, << Ɔ kɨnnɔɔ pɛ n yɛn shɛshi Yesɔ aɗɔm dɔdɔrim, aru ɔ zɛ jo awɔ nɔɔ n ji kpauu ɓa aru kɔ̃linɛ wɔɔni gbete yɛtɛ nɔgbete shɔ nyouni ɓa.>> 5Kɛɗɔn Yesɔ shɛ ɓilirɛ, tosi wayuu kɔkɔ a fãrã ni abi naa kpatiyi ɓɛɛ. Bilatu geli moowi nɛ, <<Ɔ kɨnnɔɔ pɛǃ Jaau u yɛmǃ>>
6Naa yupɛ̃ni shɔlansiyi wɛrɛ Ɗa a shɔ ɗɔganɛyi wɛrɛ Ɗa i zɛ Yesɔ tɛ, i shaati nyanɛ, <<Shɔ ɓau naa nɛ laaǃ Shɔ ɓau naa nɛ laaǃ>>
Bilatu geliyi nɛ, <<Ɔ tuu nɛ ɔ ɓau naa laa awɔ yuu. N ji kpau ɓa aru wɔɔni gbete yɛtɛ nɔgbete shɔ nyouni ɓa.>>
7Moowi i kasi Bilatu nya nɛ, <<U nya-ãsinɛ ɗɔn gbete shanɛ yɛtɛ anɔgbete shɔ nyou vɔrɔni, aru gbete shanɛ, nɛn pɛ Ɗalapa jaa yɛ.>>
8Naa Bilatu nta vigbete moowi geliu yɛtɛ, seti pɛliu waanɛ. 9kɛɗɔn Bilatu sɔɔu yɛti wɛrɛ a hɨ Yesɔ nɛ, <<A shɛ pi ɗɔpiya?>>
Ama Yesɔ ji risi Bilatu nya ɓa. 10Bilatu geli Yesɔ nɛ, << A yɛ nwarin nya ɓaya? N kaka aɗɔn n yaa a naarɛ weze a yarɛ, wɔsɔ̃n n kaka aɗɔn n pɔ̃rɛ shɔ ɓaa a naa laa.>>
11Yesɔ kasi Bilatu nyanɛ, <<A kaka gbete ang yuu pɛ shɔ gbete Ɗalapa ayɛkɔ sheeli. Ama jaa gbete au ãng a, a naa tɛa tɛttɔ a ruuvini.>>
12Naa Bilatu nta vimtɛ, a kã nyaba nɛn yaa Yesɔ naa, ama moowi shaati nya sɔ̃n i shanɛ, <<Akɛ yau naa nɛ, si a ɓa Kayisa ɓɛsa ɓaǃ Shɔu kɛ tonɛ kpati, si tasiu yuutɛ zali a Kayisaniǃ>>
13Naa Bilatu nta ruumtɛ, a shɛshi Yesɔ ɓilirɛ kɛɗɔn yurɛ a ɔ̃ a la ɔ̃nɛ ruuvɔsinɛ a ɗɔgbete shɔ ɓaanɛ, <<Ɗɔ tari pɔ̃linɛ>>(A nya Hibiru shɔ ɓaanɛ <<Gabbata.>> 14Lee yumusinɛ tɛnɛda ɓɛɛ anɛ, si tete niti ɓatɛ maani. Bilatu geli mɔɔwi nɛ, <<N kɔɔ kpati yɛmǃ >>
15Moowi shaati nya sɔ̃n nɛ, <<Shɔu nyounɛǃ Shɔu nyounɛǃ Shɔ ɓau naa nɛ laaǃ>>
Bilatu hɨ moowi nɛ, <<Ɔ kasi nɛn ɓaa ɔ kpati naa a laa ya?>>
Yupɛ̃ni shɔlansiyi wɛrɛ Ɗa i kasiunya nɛ, <<U kpati ɓɛɛ jo gbete Kasisa sheeliǃ >>
16Kɛɗɔn Bilatu ã Yesɔ rɛ nɛ sojayi i ɓau naa nɛ a laa.
Shɔ Ɓaa Yesɔ Nalaa
Kɛɗɔn Yesɔ i yɛ awuni. 17Yesɔ tuu laa gbete shɔ ɓau naa aɗɔn a shɛ ɓilirɛ, a arɛ a,<<Ɗɔzɔ̃pu.>>(A nya Hibiru shɔ ɓaanɛ, Goligota.) 18I ɓaa Yesɔ nalaa aɗɔwakɔ; a i ɓaa jaa wɔɔyi i ziti naa sɔ̃njo awuni, gbete a nakɨn gbete a nagã a Yesɔ ai tete. 19Bilatu bee ruu a pɔ̃ laa gbete shɔ ɓaunɛ naa aɗɔnyɛ. nɛ,<<Yesɔ shɔ Nazara, Kpati Yahudawayi.>> 20Shɔzɛ waanɛ i ɓali vigbete shɔ bee yɛtɔ, aruviya ɗɔgbete shɔ ɓaa Yesɔ nalaa aɗɔn ɓa kpɛlɛ a komooni ɓa. Shɔ bee vim a nya Hibiru, wɔsɔ̃n Latin a nya Giriki. 21Yupɛ̃ni shɔlansi wɛrɛ Ɗa geli Bilatu nɛ, << Mokɔ bee nɛ, kpati Yahudawa,>> Ama a bee nɛ, jaam shanɛ, <<Nkɔ kpati Yahudawa.>>
22Bilatu kasiunya nɛ, <<Vigbete n beetɛm, n ɓeetɛ gboti.>>
23Akɨnti gbete sojayi ɓaa Yesɔ naatɛ, i tuu fãrã i vɔsirɛ kǹ nɛ̃ɛ̃ti, kopiya tuu kǹ gbete. I tuu u kpẽnti fãrã gbete a shɔ ji hã ɓa, ama fãrã shɔ ntaa kagbete yunɛ paa yɛnɛu dii. 24Kɛɗɔn sojayi geli zɔ̃nɛ, <<U ntaa ɓa, ama u nta laapaa pɛ au yuu, u zɛ shɔgbete yɛ shaayɛkɨn. Vim pɛli nankɔ aru u yisinya vigbete Ɗa nyaruubii shayɛ ɔ̃ nizɛː
<<I vɔsin fãrã bi ai nɔɔ
I ntaa laapaa ang yuu fãrã.>>
Shompɛ vigbete sojayi pɛliyɛkɔ.
25Shɔgbete i shi maani a ɗɔɔ laa gbete shɔ ɓaa Yesɔ naa ɗɔnyɛ, si Yesɔ ɓini, a bɛzɔ̃ Mariyamu Kayafa ɓeso a Mariyamu su Magadala. 26Yesɔ zɛ ɓini au jaɗɔɔ gbete ɔriyɛ a ɗɔɔ shinɛ a ɗɔu; Kɛɗɔn a geli ɓini nɛ, <<Mani mɛjau yɛm.>>
27Kɛɗɔn Yesɔ geliu jaɗɔɔu nɛ, << U pɛ Miniu.>>Yunɛ a ɗaukɔ Yesɔ jaɗɔɔu tuu Yesɔ ɓinirɛ yɛnɛ u wɛrɛ.
Yesɔ Vɔnɛ
28Yesɔ zɛrɛ nɛ dɔdɔrim ko iviya yisi nyatɛttɔ; aru u yisinya vigbete Ɗanyaruubii shayɛ u ɔ̃ nizɛ, kɛɗɔn Yesɔ shanɛ, <<N nta sutumii.>>
29Jabũsi mii inabi gbari wɔɔ siɗɔn, i lu soosorɛ ɗɔn i maa a laa i ã Yesɔrɛ a nya. 30Naa Yesɔ ɓoo mii gbariutɛ a shanɛ, <<Yisitɛǃ>>
Kɛɗɔn Yesɔ ɓaki yuurɛ dii a ãu sururɛ.
Shɔ Ɓa Yesɔ A Kagɨn
31Kɛɗɔn yupɛ̃ni Yahudawayi i gaki Bilatu rɛ nɛu ãi naa aru i kaki ɓɔɔ zitiwi dɔɔ, gbete shɔ ɓayi nalaa yɛ, nɛ shɔu nɔsiyi bi ayuu laa gbete shɔ ɓayi naa ɗɔnniyɛ. I gaki vim aru leeu si lee susunɛ, i ji kasiɓa nɛ lee susunɛ u kpaarɛ i bi doo a laa gbete shɔ ɓayi naa a ɗɔnni yɛ ɓa, aru lee susunɛ gbete yɛ a yɛ pɛ lee pɛ̃niɓa wɔsɔ-wɔsɔ. 32Kɛɗɔn sojayi i a ɗɔɔ shɔ gbete shɔ ɓai nalaa a Yesɔni ɗɔzɔɔ, i kaki shɔ ɗekɨn dɔɔ rɛ, kɛɗɔn i yɛrɛ i kaki shɔu pɛsiyɛ dɔɔ sɔ̃nrɛ. 33Naa i atɛ Yesɔ ɗɔbii, i zɛrɛ vɔtɛ gboti, ama i ji kakiu dɔɔ toti ɓa. 34Shɔzɛ gbete atette sojayi, ɓaa Yesɔ a shala a kagɨn, tɛ̃ɛ̃ti kpaa a mii ni shɛrɛ. 35(Shɔgbete au zɛ vim pɛliyɛ au nɔɔ ukɔ sharɛ, nɔgbete ɔkɔma ɔ ã sisɨnrɛ ɗɔn. Vigbete shayɛ pɛ nizɛ, zɛ tɛttɔ nɛ vigbete shayɛ nɛ pɛ nizɛ.) 36Vim pɛli nankɔ aru u yisinya vigbete Ɗanyaruubii shayɛ u ɔ̃ nizɛː <<Shɔ yɛ kau kaka wɔɔ ɓa ko gbete.>> 37Ɗanyaruubii wɔsɔ̃n ɗɔn gbete shanɛ, <<I yɛ kɨnnɔɔ a shɔgbete i ɓauyɛ bi.>>
Yesɔ gbãnɛ
38Akɨnti vim, Yusufu gbete a tipi Arimatiya u si jo Yesɔ jadɔɔ kɔ, gaki Bilatu nɛu ãng naa nɛn tuu Yesɔ bi pɛ. (Ama a kaɓusinɛ, aru nta seti yupɛ̃ni Yahudawayi.) Bilatu geli Yusufu nɛ, a yɛ zɛnɔɔ Yesɔ bi tuunɛtɔ, kɛɗɔ Yusufu arɛ a tuurɛ. 39Nikodimu, shɔgbete gaa Yesɔ ɗɔbii yɛnɛ ama a zɨmɓa, yɛ a Yusufuni, tuu nɔɔ sũrũ-sũrũ shɔ ɓaanɛ mur shɔ wee a alos gbete u kpetinɛ siyɛ ɔ̃ bmati atu kopi. 40Kɛɗɔn shɔ zitimiyi i tuu Yesɔ vɔrɔ i lirɛ a fãrã vɔrɔ gbãnɛ shɔ ɓaanɛ lili, a nɔɔ sũrũ-sũrũ ni, nagbete Yahudawayi nakoo sãyɛ a ɗaa vɔrɔ gbãnɛ yɛ. 41A ɗɔgbete shɔ nyo Yesɔ yɛ jaa wɔɔ si ɗɔn, a ɓuzɨn jaaukɔ yusàà si ɗɔn gbete shɔ ji gbã vɔrɔ ɓa ɗɔn shããni ɓa. 42Si yɛ ɔ̃kɛ leeukɔ lee susunɛ ɓɛɛ pɛlinɛ, aru yusààu si maani, kɛɗɔn i tuu Yesɔ birɛ i gbãrɛ ɗɔn.
Valgt i Øjeblikket:
Yɔhana 19: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
