Yɔhana 16
16
1<<N gelɔɔ vimtɛ, aru ɔ sisɨn ãnɛ ukɔu sɔɔ kɨntinɛ 2Shɔyɛ yikɔɔtɔ a Yahudawayi ɗɔ ɔ̃nɛni, ɗaa kaanɛ kopiya kpai kɛ nyowɔnɛ, yɛ tɔnɛ mɛnɛ nɛn pɛli Ɗalapa vishonɛ. 3Shɔ yɛ pɛlɔɔ vimtɔ aru i ji zɛ maye ɓa, i ji zɛn ɓa. 4Ama n gelɔɔ vimtɛ, naa ɗaau kɛ pɛlinɛ gbete i pɛli vim yɛ,kɛɗɔn ɔ yɛ kpaa sisɨn vigbete n gelɔɔtɔ.>>
Ɗa Suru Vishonɛ
5Ama dɔdɔrim n yɛkɛ shɔgbete shonɛ yɛ ɗɔbii, piti shɔmni kpai awɔ atette shɔwɔ ji hɨm ɓa nɛn yɛkɛ piya ni ɓa. 6Dɔdɔrim n gelɔɔ vimtɛ ɔ sisɨn lɛsitɔ waanɛ. 7Ama n gelɔɔm pɛ nizɛ: n yɛnɛ pɛ tɔ̃vɨn awɔ ɗɔbiini, aru n ji yɛ ɓa, shɔnaapɔ̃sinɛ yɛ awɔ ɗɔbii ɓa, ama n kɛ yɛnɛ, kɛɗɔn n yɛn shourɛ u awɔ ɗɔbiirɛ. 8Naa kɛ anɛ yɛ tasi shɔ koopitiyi tɔnɛ i ji pɛliɓa vitɔ̃vɨng ɓa ayuu ruuvini, ayuu vitɔ̃vɨng wɔsɔ̃n ayuu Ɗalapa ruuyeenɛ. 9Aru gbete i ji ã sisɨn ɓa ang biini ɓa i niitɛ ayuu ruuvini i pɛliyɛni, 10nɛi sisɨn niitɛ ayuu vitɔ̃vɨng ni, aru n yɛkɛ Maye ɗɔbii ɔ yɛ zɛn toɓa dangdang; 11Nɛi sisɨn niitɛ ayuu ruuyeenɛni, aru kpati kootipimi shɔ yeeruutɛ gboti au yuuni.
12<<N ruugbete n kasɔɔ gelinɛ aɗɔn waanɛ, ama ɔ yɛ zɛnɔɔ sãnɛ ɓa dɔddɔrimni kpai niɓa. 13Ama naa Ɗa Suru shɔ gbete yɛ hãsi ruu tɔ̃vɨn a Ɗalapa yuu kaanɛ, yɛ matɔɔ vitɔ̃vɨngtɔ kpai. Yɛ nwanya ɓa au kaka ɓa, ama yɛ nwanya a vigbete au ntayɛ u gelɔɔ vigbete kaanɛ ɗekɨn yɛ. 14Yɛ basinɛtɔ, aruviya yɛ tu vigbete n shayɛ u gelɔɔrɛ. 15Vigbete Maye a wuniyɛ pɛ n maa; aruukɔ n gelɔɔ n-tɛ, Ɗa suru yɛ tu vigbete n ãuyɛ u gelɔɔrɛ.
Sisɨn Hɨmri A Sisɨn Puru
16<<Ɗaa kaanɛ gbete ɔ zɛn toɓa, a kɨntiuni sekaa ɔ zɛn sɔ̃nrɛ.>>
17Kɛɗɔn Yesɔ jaɗɔɔyi gãsi i hɨ zɔɔ ai nɔɔ nɛ, <<Rum u dɔɔ kɛnɛ-iviya? Geliunɛ, ɗaa kaanɛ gbete u yɛ zɛn tɔɓa, a kɨntiuni sekaa ɔ zɛn sɔ̃nrɛ; a sha sɔ̃nɛ,<Aru gbete n yɛ Maye ɗɔbii.> 18U dɔɔ ruu gbete shanɛ a kɨntiuni sekaa kɛnɛ-iviya? U ji zɛ ruugbete nwanya au yuu ɓɛjo ɓaǃ >>
19Yesɔ zɛ tɛttɔ i kasiu ruu hɨnɛ, kɛɗɔn a geliyinɛ, <<N sha n-tɛ, <A kɨntiuni sekaa ɔ yɛ zɛn tɔɓa, a kɨntiuni sekaa ɔ yɛ zɛn sɔ̃ntɔ.>Nn vigbete ɔ hɨli zɔ awɔ nɔɔyɛ ya? 20N gelɔɔm pɛ vi nizɛ: Ɔ sɨnrɛ ɔ lɛrirɛ, ama shɔgbeteyi a kootipi i yɛ nta ɓɛjo sisɨn puru; ɔ sisɨn lɛsirɛ, ama ɔ sisɨn lɛsinɛ yɛ ɔ̃kɛ sisɨn puru. 21Naa soro kaanɛ a ɗɔ jaa yeenɛ, u sisɨn lɛsitɔ aru u ɗaa raaɓoonɛ atɛ; Ama naa kɛ yejaanɛ, sukiu raaɓoonɛu kɛtɔ, aru nta sisɨn puru jaa shɛ ɓilitɛ a koo. 22Vim nankɔ ɔkɔɔniː dɔdɔrim ɔ tete sisɨn hɨmri, ama n yɛ zɛwɔɔ sɔ̃ntɔ, ɔ yɛti yɛ yii a sisɨn puru, a sisɨn puru gbete shɔwɔ yɛ zɛnɔɔ ranɛ ɓa awɔ naani ɓa.
23<< Naa leu atɛ ɔ yɛ hɨ ruu wɔɔ ɓa. Gelɔɔm pɛ vi nizɛ: Maye yɛ ãwɔ ko iviya gbete gaki ang niitɔ. 24Anɛ dɔdɔrim ɔ ji gaki vi wɔɔ ɓa ang nii ɓa; ɔkɛ gakinɛ Ɗalapa yɛ ãwɔtɔ, nɔgbete ɔ sisɨn puru u ɔ̃ piti kpai.
Ɗa shaarintɛ ayuu koo
25<<N pɛli vishonɛ a ruɓusinɛ n gelɔɔ vimrɛ. Ama ɗaa kaanɛ gbete n yɛn pɛli vishonɛ ɓa a ruɓusinɛ toti ɓa, ama n yɛn nwanya n hãsibaras a Maye ruubii. 26Naa leeu kaanɛ, ɔ yɛ gakiutɔ ang nii; ɔkɔɔ shanɛ, nɛ nkɔng yɛ gakiu rɛ awɔ yuuni, 27arumkɔ Maye au yuu ɔrɔɔtɔ. Ɔrɔɔ aru gbete ɔ ɔrinyɛ, aru ɔ ã sisɨntɛ nɛ n apɛ a Ɗalapa ɗɔbii. 28N shɛ a Maye ɗɔbii a n a kotipi rɛ; zɛ tɛttɔ n yɛn yaa kootipi kɛtɔ n yɛkɛ Maye ɗɔbii.>>
29Kɛɗɔn Yesɔ jaɗɔɔyi i geliu nɛ, <<Dɔdɔrim a sha ruukɛ baras, a ji pɛli shonɛ ɓa a ruɓusinɛ niɓa. 30U zɛ tɛttɔ dɔdɔrim a zɛ vi tɛttɔ kpai; a ji kã ruu hɨlinɛ tɔɓa.Vim pɔ̃tɛ u ã sisɨn tɛ nɛ a shɛ a Ɗalapa ɗɔbii.>>
31Yesɔ risiu jaɗɔɔyi nyanɛ, <<Dɔdɔrim ɔ ã sisɨn kɛtɛ ya? 32ɗaa kaanɛ, atɛtɔ gboti, ɔ piti kpai ɔ yɛ sãtikɛtɔ, kopiya yɛ yɛjo u wɛrɛ, shɔyɛ yan a yɔhm. Ama a suru n ɓa n yɔhm ɓa, aru iviya Maye u a nkɔni. 33N gelɔɔ vim aru ɔ kpaa ɔ̃nɛbiinyatɔ̃nɛ ang bi, Shɔ kootipi i yɛ pɔ̃ ɔrɛ ɔ ɓooraarɛ. Ama ɔ mabiitɔ Ɗa shaarin tɛttɔ gboti a kootipi yuuni!>>
Valgt i Øjeblikket:
Yɔhana 16: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
