Acts 14
14
Bulus a Barnaba a Ikoniya
1A Ikoniya Bulus a Barnaba ni i to Yahudawayi i ɗɔ-ɔ̃nɛ nagbete i pɛli a lee-leeyɛ, i nwari shɔ Ɗa nyaruubii fɛ̃ɛm nɔgbete Yahudawayi waanɛ a shɔgbeteyi ɓa Yahudawa ɓa, i ã sisɨnrɛ Ɗabiini. 2Ama Yahudawa gbeteyi ɓɛ̃ɛ̃ sisɨn ãnɛ a Ɗabii yɛ, i shɔli shɔ gbeteyi ɓa Yahudawa ɓa, ai pɔ̃rɛ i lɛsirɛ a shɔ gbeteyi ã sisɨn a Ɗabiini. 3Bulus a Barnaba ni i ɔ̃rɛ a ɗɔwakɔ dɔkɔkɔ, i ɗɔɔ Uɓeyelapa nyaruubii nwanɛ seeti ɓa, Uɓeyelapa tasi u shinɛkɨntitɔ ayuu u tɔ̃vɨn pɛlinɛ nɛpɛ nizɛ, a nyaba gbete ãu jashonɛyi kaka nɛi pɛli vibiizaanɛyi a vinɔlusinɛyɛ. 4Ama shɔ komooyi i yuu vɔsikɛ zitiː shɔ wɔɔ i si a Yahudawayi knti, wɔɔ si a jashonɛyi knti.
5Kɛɗɔn gãsi Yahudawayi a shɔ gbeteyi ɓa Yahudawa ɓa, i yupɛ̃niyi ni i marɛ aru i tasi jashonɛyi raa, nɛi loriyi a tari. 6Naa jashonɛwi i zɛtɛ nankɔ kɛɗɔn i yurɛ yɛnɛ komoo Listira a Dabi a tipi Likaniya, au kɨntiyiyɛ. 7A ɗɔwakɔ i yɛ ɗekɨn shɔ ruu tɔ̃vɨn nwarinɛni.
Bulus a Barnaba a Lisitira
8A Lisitira jawɔɔ siɗɔn u si gbangbutu, sãnɛ a ɗagbete shɔ yeeyɛ, ji raɓa shãni ɓa. 9Ɔ̃rɛ aɗɔwakɔ u ɗɔgbete weshoo a Bulus nya, Bulus kɨnnɔɔ au bi kpɛ̃ɛ̃, a zɛrɛ jaau u sisɨn ãnɛ a Ɗabii aɗɔn nɔgbete shɔ yɛ gatiutɔ aɗɔn, 10ɗee yeenya a kakani a shanɛ, <<Yuunɛ a shi a dɔɔǃ>>Jaau kɔbii lapa a gaa ranɛrɛ. 11Naa mooyi zɛ vigbete Bulus pɛliyɛtɛ, i gaa yeenya ɗeenɛ a nya Likoninya i ɗɔɔ shanɛ nɛ,<<jaɗayi i notɛ au ɗɔbii a shɔzɛ jasuruǃ>> 12I ã Barnaba nii nɛ Zeyus, ai ã Bulus nɛ Hemas, aru Bulus ukɔ ɔ̃rɛ yupɛ̃ni nyanwanɛ. 13Kɛɗɔn shɔlansi jaaɗa Zeyus, gbete u wɛrɛ gãnki a akɨnti shɛnɛ komooyɛ, n ti gunapuyi a kowalaayini a nyejaa shɛni komoou, aru ukɔ a mooyini kasinɛn ã Yesɔ jashonɛyi viyuu ãnɛ.
14Ama naa Barnaba a Bulus ni i nta vigbete shɔ kasi pɛlinɛyɛ, kɛɗɔn i ntasi i fãrã a yurɛ a to mooyi i tete, i ɗɔ gbete i shatinyanɛ, 15ɔ pɛli vim aruiviya? ukɔma u ji shɔzɛ naa ɔkɔɔǃ U aɗɔm aru u gelɔɔ ruu tɔ̃vɨn, ɔ risi vikɔ̃linɛm knti, ɔ sɔɔ Ɗalapa au suru ɗɔn ɗɔbii, shɔ gbete pɛli kolapa a kootipini, wapo a vi gbete a ɓuzɨn ni kpai. 16A koo gbete si tɛ̃ɛ̃tɛ̃ɛ̃ yɛ, ya shɔzɛ kpai nɛi pɛli vi gbeteyi kasi pɛlinɛ yɛ. 17Ama Ɗalapa kopiɗaviya tasitɔ nɛn aɗɔn a nyaba vi tɔ̃vɨn gbete pɛliyɛ: Awɔ mii kolapa a vishaani a ɗaa tɔ̃vɨn; ãwɔɔ kn u pɔ̃rɛ ɔ ɔ̃ atette sisɨn puru. 18Piti a ruumini kpai, mooyi nta vi gbete Bulus shayɛ, i tɔnɛyi yɔ gunapu zitiutɔ aru i bassi Bulus a Barnaba ni ama a kɨnti ni kpai i yaarɛ.
19Ama gãsi Yahudawayi arɛ Antiya a Ikoniya i shɔli mooyirɛ, ai lori Bulus a tari, i gɔ̃urɛ shɛnɛ komoo ɓili, i tɔnɛ mɛnɛ vɔtɛ. 20Ama shɔ gbeteyi ã sisɨn a Ɗabii i kɨntiu atette, kɛɗɔn yulaparɛ a sɔɔ ɓuzɨn komoorɛ. A dii gadii a yɛkɛ Dabi a Barnaba ni.
Bulus a Barnaba Sɔɔnɛ Antiya a Suriya
21Bulus a Barnaba ni i nwari shɔ ruu tɔ̃vɨn a Dabi i kpaa jadɔɔyi fɛ̃ɛm. Kɛɗɔn i sɔɔ Lisitirarɛ, a Ikoniya wɔsɔ̃n Antiya a Pisidiya. 22i ã shɔ sisɨn ãnɛ Ɗabii kakarɛ, ai masiyibii nɛ shi ayuu sisɨn ãnɛ Ɗa bi. I tɔnɛ<<Ɔ̃tɛ kaka jazɨn akɔrɔ u ɓooraatɔ fɛ̃ɛm ɗau to ɗɔɔ Ɗa kpati roonɛkɨn,>> 23ko-pi wɛrɛ Ɗa shɔpiya i lɔri shɔpẽni atete ni shɔ gbeteyi gɨn Ɗalapayɛ, a Ɗa gakinɛ a nya manɛni i ãyi Uɓeyelaparɛ naa, gbeteyi ãsisɨn au biiyɛ.
24Kɛɗɔn i sɔɔ tipi Pisidiya yɛnɛ pamfiliya. 25A ɗɔwakɔ i nwari shɔ ruu Ɗalapa a Paga, kɛɗɔn i yɛ Ataliya rɛ. 26A ɗɔukɔ i to latosirɛ i sɔɔ Antiya rɛ, ɗɔ gbete shɔ gakiyi Ɗa nɛ Ɗalapa u shaaritɔ ai tete vishonɛ gbeteyi yisi dɔdɔrim yɛ.
27Naa i to Antiya tɛ, i toli mooyi rɛ gbeteyi gɨn Ɗalapa yɛ, i geliyi vigbete Ɗalapa pɛli ai kɔni, nɔgbete ɓeli shɔ gbeteyi ɓa Yahudawayi ɓa nyaba gbeteyi yɛ ã sisɨnyɛ. 28I ɔ̃ a ɗawakɔ dɔkɔkɔ a shɔ gbeteyi ã sisɨn Ɗabiini
Valgt i Øjeblikket:
Acts 14: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria