Varoma 10
10
1Vakwetu, eharo lyomutjima gwange lyeli asi Vaisraeli ngano va paruke. Ame yiyo ani va kandererere kwaKarunga. 2Ame tani gava undipo wokuvahamena asi, awo kukondjera Karunga, nye kukondja kwawo kapi kwa paka nondunge.
3Morwa awo kapi va diva uhungami waKarunga, yiyo va heteka kutura po wavene. Yipo va dilira kuligava kouhungami waKarunga. 4Nye Kristusa yige ga hagesesa po Veta, asi nkenye ogu ana kumupura va mu hungameke.
Eparu kwa hamena vantu navenye
5Mosesa kwa tjanga yokuhamena uhungami womoVeta asi, “Ogu a sikisa mo Veta, moVeta yimo a parukire.” 6Nye eyi yokuhamena uhungami wemepuro kwa yi tanta asi, “Walye o lipura nomutjima goge asi, Yilye ogu nga ronda a ze meguru?” kuninka asi a ka humburure Kristusa. 7“Ndi asi, Yilye ogu na za mosirongo sovafe?” kuninka asi a ka vhumbure Kristusa koufe! 8Nani ngapi omu ga tanta matjangwa asi, “Nkango pepi noge za kara, mokana koge nomomutjima goge.” Azo yizo nkango zepuro ezi tuna kuudisa. 9Nsene o tongonona Hompa Jesus nokana, ove hena o pure momutjima goge asi, Karunga kwa mu pindura koufe, Karunga ngano nga ku parura. 10Yeeyi muntu age kupura momutjima gwendi, makura tava mu hungameke, age kugava undipo weyi nokana kendi, makura tava mu parura. 11Matjangwa kwa tanta asi, “Nkenye ogu a mu pure, nokumufisa si nomuga.” 12Kapi pwa kara malisigo pokatji koMujuda noMugereka. Yeeyi navenye Hompa gwawo gumwe tupu, age kutungika nountungi wendi wounene navenye ava ava mu zigida. 13Yeeyi kwa tjanga asi, “Nkenye ogu a kugu edina lyaHompa, kumuparura.”
14Nye ngapi omu nava mu kuga ogu va dira kupura? Ngapi omu nava mu pura, awo va hana kuzuvha rumwe Mbudi zendi? Ngapi omu nava zuvha, opo pwa hana muudisi? 15Vantu omu nava udisa‐udisa, awo va hana kuvatuma? Moomu lya tanta etjangwa asi, “Ee, uwa musi womudingu gwava ava udisa Mbudi zoNgwa!” 16Nye kapisi navenye va limburukwa koMbudi zoNgwa. Jesaya kwa tente asi, “Hompa, yilye ogu ga pura eudiso lyetu?” 17Ano epuro kutunda mokuzuvha Mbudi, ano ozo Mbudi kutunda mokuudisa Kristusa.
18Ame tani pura asi: nye yosili kapi va zuvha Mbudi ndi? Hawe, va zi zuvha. Yeeyi kwa tjanga asi:
“Ezwi lyawo kwa za
omu mwa za uzuni mudima,
ano nonkango dawo kwa ka sika
kooku wa ka twa uzuni.”
19Ame tani pura hena asi: ee, muhoko gwaIsraeli nani kapi gwa yi kwete egano? Pomuhowo Mosesa kwa tanta asi:
“Ame ngani mu rwisisa esupa
kwava va hana asi muhoko,
ngani mu handukisisa komuhoko
gwa hana nondunge.”
20Jesaya kwa uyungire nouradi asi,
“Ame kwa gwana nge ava va dilire kupapara nge,
ame kwa monekera ava
va dilire kupura nge.”
21Yokuhamena Israeli age kwa tanta nye asi, “Ame kwa gonwena ezuva mudima mawoko gange komuhoko ogu gwa ha zuvhu gomupote.”
© Egwanekerobibeli Lyanamibia 1987, 2003
© Bible Society of Namibia 1987, 2003