Yirugana Yovapositoli 2
2
Ewizo lyoMpepo zoKupongoka
1Apa lya sikire mo ezuva lyoPentekoste, awo vapuli navenye kuna pongo pamwe tupu. 2Va liharuka ko, meguru tamu tundu sipupiro somuhagaro ngwendi ekundungu, makura tasi zwida nzugo nazinye ezi va hingilire. 3Makura tava mono ngwendi maraka gomundiro, aga gana kulihangura, nkenye ogu tali mu tembere limwe. 4Navenye makura tava zura Mpepo zoKupongoka, tava tameke kuuyunga maraka peke‐peke, moomu za va pererere Mpepo eyi nava uyunga.
5Ano moJerusarema mwa kere Vajuda, vantu wovahungami ava va tundire monomuhoko nadinye douzuni. 6Apa sa zuvhikire esi sipupiro, mbunga zonene zovantu tazi pongo. Makura sitetu tasi va gwana, morwa nkenyogu kwa lizuvhilire ko ruuyungo rwamwene. 7Navenye tava tetuka oku guna va pwaga, makura tava tanta asi: “Navenye ava vana kuuyunga kapisi Vagalireya nani? 8Omu tuna kuninka no, nkenye ogu kuna kuvazuvha meraka lyamwene lyosirongo somvharerwa? 9Vapareti noVamede noVaerami nava va kara moMesopotamiya nomoJudeya naKapadokiya naPontusa naAsiya, 10womoFiligiya naPamufiliya, womoEgipite nava womonomukunda daLibiya, edi da hamena koKirene, noVaroma nava va lihamesa koVajuda, 11Vakereta noVaarabiya — kuna kuvazuvha momaraka getu, omu vana kuuyunga yirugana yoyinene yaKarunga!” 12Navenye kwa tetukire, tadi va tororoka, nkenye ogu kuna kutantera mukwawo asi: “Yinke nayi kara eyi?” 13Nye vamwe tava paya vapuli asi: “Owo kuna gwana mo movhinyu zontovara!”
Mbudi zaPeturusa
14Makura Peturusa ta sikama novakwawo vena murongo nagumwe, ta ziguruka, ta va tantere asi: “One Vajuda vakwetu nava mwa kara moJerusarema namuvenye, purakeneni nonkango dange, mu kwate egano lyeyi nina kumutantera. 15Ava vantu kapi vana korwa moomu muna kuvagazarera, amesi simpe ngurangura zovili zautano‐naune. 16Nye eyi yiyo ga uyungire muporofete Jowera asi:
17‘Karunga kutanta asi:
Momazuva gouhura ngani poomwena
Mpepo zange kovantu navenye.
Vana veni wovagara nava wovakadi ngava pumba,
vadinkantu veni ngava mona yimoneko yokutetukisa,
ano vakurupe veni ngava rota nonzodi.
18Nokovakareli vange wovagara nava wovakadi
pomazuva ogo ngani va poomwena ko Mpepo, ngava pumbe.
19Ame ngani monekesa yitetu keguru noyidiviso pevhu,
honde nomundiro nomusi gomunzi.
20Ezuva ngali sovagana,
ano kwedi ngaku geha ngwendi honde,
ntani ngali wiza ezuva lyaHompa lyenene lya fumana.
21Makura nkenye ogu ana kuzigida edina lyaHompa,
ngava mu parura!’
22“One Vaisraeli, purakeneni nonkango dange edi! Jesus goMunasareta kwa kere mugara ogu ga mu likidisisire Karunga koyirugana yononkondo nokoyitetu nokoyidiviso, eyi ga mu ruganesesere mokatji keni, moomu mwa yi divira nyamweni. 23Age kwa mu mu pa, moomu ga tokwere nare Karunga meseyo lyamwene nemepumbo lyamwene. One yiyo mwa mu dipagere pokumusigira vapagani, asi va mu pampare kosilivindakano. 24Nye Karunga ga mu pindura koufe, yiyo ga mu zowora mo mokukora konomfa, yeeyi nomfa dene ya di limbire yokumukwatera mo. 25Yeeyi Ndafita ga mu uyunga asi:
‘Ame kudiworoka Hompa nkenyapa,
morwa kweli korulyo rwange,
asi ni dire kuzapauka.
26Yiyo nye agu hafere mutjima gwange, neraka lyange
yiyo lina kuhambererera,
ano simpu sange naso ngasi
ka pwizumuka mehuguvaro.
27Yeeyi ove kapi ngo sigililira
mwenyo gwange moufe,
ndi asi Mupongoki goge
o mu sigilire a zonauke.
28Ove kwa likida nge nonzira domwenyo,
ove ngo zwida nge ehafo kosipara soge.’
29“Vakwetu, ame kuna kumudukwira yombinga zazinyakurwetu Ndafita, asi ga fa yiyo va mu vhumbika. Nelyelyezuva ntoko zendi mozili mokatji ketu. 30Age kwa kere muporofete, age hena ga divire asi Karunga ga gana asi, moruvharo rwaNdafita yimo ngamu tunda Hompa Kristusa, ogu nga hingira kosipundi sendi. 31Ndafita kwa mwene yokomeho yaKarunga, yiyo nye ga uyungilire yepinduro koufe lyaKristusa asi:
‘Mwenyo gwendi kapi ngava gu sigilira mosirongo sovafe,
ano rutu rwendi kapi ngaru wora.’
32“Ogu Jesus a huru yige ga pindura Karunga koufe, ano ose natuvenye nyose nombangi dayo. 33Kwa mu twere korulyo rwaKarunga, yiyo ga gwana Mpepo zoKupongoka, moomu ga zi mu pingidilire Guhwe. Makura yige ana zi tu poomwene, ezi muna kumona oku tomu zi zuvhu. 34Yeeyi Ndafita mwene kapi ga ronda meguru, nye kwa tanta asi:
‘Hompa kwa tanterere Hompa gwange asi:
Hingira korulyo rwange,
35dogoro noku ngani ninka nonkore doge di kare
ulyatero wonompadi doge.’
36“Ano muhoko gwaIsraeli mudima gu dive sili asi, Jesus ogu mwa pamparere kosilivindakano, yige googu ga paka Karunga, a kare Hompa age Kristusa!”
37Tupu va di zuvha vantu, tadi va tu konomutjima, makura tava pura Peturusa novapositoli vakwawo asi: “Ngapi omu natu rugana, vakwetu?” 38Peturusa ta va tantere asi: “Litezurureni namuvenye, mu likuhwire medina lyaJesus Kristusa, va mu dongwenene po nonzo deni, ntani ngomu tambura uhwi woMpepo zoKupongoka. 39Yeeyi etumbwidiro lyaKarunga nyone novana veni nava navenye va kara ure lya hamena, nanavenye ava nga horowora Hompa Karunga.”
40Nonkango nonkwawo nonzi, edi ga va gaverere undipo oku ta va korangeda asi: “Sigeni va mu yoworore mo movantu ava va puka.” 41Ava va tambwire nonkango dendi nehafo, tava va kuhu. Ezuva olyo vantu wokusika ngwendi pomayovi gatatu kwa va gwedererere kombunga zawo. 42Awo makura tava ligava mo merongo lyovapositoli nomonkarapamwe nomokulya kumwe nomomakanderero.
Nkarapamwe zovapuli
43Vapostoli kwa rugene yitetu noyidiviso yoyinzi, makura nkenye ogu tali mu kwata ehuhwe. 44Navenye ava va pulire, kwa kere pamwe tupu, ano ugawo wawo naunye kwa u pakererere. 45Emona lyawo nomaugawo gawo tava randesa, ano eyi yina kutunda mo, tava yi ligavere navenye, nkenye ogu pohepero zendi. 46Nkenye ezuva awo mutjima gumwe tupu ngava kara montembeli. Momambo gawo ngava lyaalya kumwe, ngava li nondja dawo nehafo nomalinunupiko gokonomutjima, 47oku tava hamberere Karunga, awo kuna kara nombili novantu navenye. Ano Hompa nga gwederere ko nkenye ezuva vayoworoki kombunga zawo.
© Egwanekerobibeli Lyanamibia 1987, 2003
© Bible Society of Namibia 1987, 2003