ಮತ್ತಾಯ 19
19
ತೊಡಮೊಡನಾಹುತಿ ಯೆಸು ಕದ್ಯಲ
(ಮಾರ್ಕ 10:1-12)
1ಅಮ್ಮ ರ್ಹತಾಮಾ ಯೆಸು ಆಂ ವಾತೊ ಮುಗಸಲಪರ ಗಲಿಲಾಯ ಛೊಡಿನ ಯೊರ್ದಾನ್ ತಳಾನಾ ಹಿಂಗೆ ರ್ಹಯಲ ಯುದಾಯ ಪ್ರಾಂತ್ಯನೆ ಗಯೊ. 2ಮನಕ್ಹೊನು ಮ್ಹೊಟು ಗುಂಪ ತಿನಾ ಪಾಚಾ಼ ಗಯಾ, ತೆ ತ್ಯುನೊನೆ ತ್ಯಾಜ಼ ಅರಾಮ ಕರ್ಯೊ. 3ಪರಿಸಾಯರೊ ಯೆಸುನೆ ಪರಿಕ್ಷಾ ಕರಾನೆ ತಿನಾ ಕ್ಹಾಮಾ ಐನ, ಯಕ್ಲೊ ಕಯಾಬಿ ಯಕ್ಕ ಕಾರಣಕ್ಹು ತಿನಿ ಬೈಕೊನೆ ಛೊಡಿ ಪಡಾನೂ ಶಾಸ್ತ್ರಮಾ ಛೆ ಸು? ಕೈನ ಪುಚ್ತಾಮಾ,
4ತೆ ಉತ್ತರ ದಿನ, ಮನಕ್ಹೊನೆ ಸೃಷ್ಟಿ ಕರಲವಾಲೊ ಅದಿತೊಜ಼ ತ್ಯುನೊನೆ ಗಂಡ ವರಿ ಹೆಣ್ಣ ಕೈನ ಸೃಷ್ಟಿ ಕರ್ಯೊ. 5ಆಂ ಕಾರಣಕ್ಹುಜ಼ ದಾಣ್ಗೊ ಯಾ ಬಾನೆ ಛೊಡಿನ ತಿನಿ ಬೈಕೊನೆ ಮಳೈಲಿವಸ. ತ್ಯುನೆ ಭಂಬಿ ಜ಼ನಾ ಯಕ್ಕಜ಼ ಅಂಗ ಥೈನ ರ್ಹವಸ ಕವಾನು ತುಮೆ ಓದ್ಯಾಸತೊ?’ 6ಅಮ್ಮ ರ್ಹತಾಮಾ ತ್ಯುನೆ ಬೆಜ಼ನಾ ನ್ಹವೈ ಯಕ್ಕ ಅಂಗ ಥಯಾಸ. ತಿನಾಹುತಿ ಕ್ಹುದಾ ಮಳಾಯಲನೆ ಮನಕ್ಹ ಜು಼ದು ಕರು ನೈ ಕದ್ಯೊ. 7ತಿನಾಹುತಿ ತ್ಯುನೆ ಯೆಸುನೆ, ಇಮ್ಮ ರ್ಹಯಮ ತಲಾಕನು ಪತ್ರ ದಿನ ತಿನೆ ಛೊಡಿಪಡು ಕೈನ ಮೊಶೆ ಕಾ ಆಗನ್ಯಾ ದಿದ್ಯೊ? ಕೈನ ಪುಚ್ಯಾ.
8ತೆಳಾಮಾ ಯೆಸು ತ್ಯುನೊನೆ, ಮೊಶೆ ತುಮಾರಾ ಮಂಡತನಾಕ್ಹು ತುಮಾರಿಯೊ ಬೈಕೊನೆ ಛೊಡಿಪಡಾನೆ ಅಪ್ಪಣೆ ದಿದ್ಯೊ. ತೆನೈಸೊ ಆದಿತು ಇಮ್ಮ ನ್ಹೊತು ಕದ್ಯೊ. 9ವರಿ ವ್ಯಬಿಚಾರನಾ ಕಾರಣಕ್ಹು ನೈಸೊ ತಿನಿ ಬೈಕೊನೆ ಛೊಡಿನ ವರಿಯಕ್ಲಿನೆ ಹಿವಾ ಕರಿಲಿವಾಲೊ ವ್ಯಬಿಚಾರ ಕರಲ ನಿಂಗತ ವ್ಹೈ; ವರಿ ಮಾಟಿ ಛೊಡಲವಾಲಿನೆ ಹಿವಾ ಕರಿಲಿವಾಲೊ ವ್ಯಬಿಚಾರ ಕರಲ ನಿಂಗತ ವ್ಹೈ ಕೈನ ತುಮೊನೆ ಕೌಸ ಕದ್ಯೊ. 10ತಿನಾಹುತಿ ಶಿಶ್ಯಾ ಯೆಸುನೆ, ಬೈಕೊನಾ ಕ್ಹಾತೆ ಮಾಟಿನೊ ರಿಸ್ತೊ ಇಮ್ಮ ರ್ಹಯಮ ಹಿವಾ ಕರಿಲಿವಾನು ಚೊ಼ಕು ನ್ಹವೈ ಕದ್ಯಾ. 11ತೆನೈಸೊ ಯೆಸು ತ್ಯುನೊನೆ, ಎ ವಾತನೆ ಕ್ಹಾರಾ ಸ್ವಿಕಾರ ನೈ ಕರ್ತಾ ತೆನೈಸೊ ಕಿನೆ ತೆ ವರಾ ದಿದಲ ಛೆ ತ್ಯುನೆ ಯಕ್ಕಜ಼ ತಿನೆ ಸ್ವಿಕಾರ ಕರಸ.
12ಮಾನಾ ಪೆಟಮಾತಾಜ಼ ನಪುಸಂಕ ಥೈನ ಹುಟ್ಟಲವಾಲಾ ದಕ್ಹಾ ಜ಼ನಾ ಛೆ ವರಿ ಮನಕ್ಹೊಕ್ಹು ನಪುಸಂಕ ಥಯಲವಾಲಾ ದಕ್ಹಾ ಜ಼ನಾ ಛೆ ವರಿ ಪರಲೊಕ ರಾಜ್ಯನಾಹುತಿ ತ್ಯುನೊನೆ ತ್ಯುನೆಜ಼ ನಪುಸಂಕ ಕರಿಲಿದಲವಾಲಾ ದಕ್ಹಾ ಜ಼ನಾ ಛೆ. ಎ ಬೊದನೆನೆ ಸ್ವಿಕಾರ ಕರಾಲಾ ಸ್ವಿಕಾರ ಕರಾದೆ ಕೈನ ಕದ್ಯೊ.
ಯೆಸು ನ್ಹಾನಾ ಬಚ್ಚಾ಼ವೊನೆ ಆಶಿರ್ವಾದ ಕರಲ
(ಮಾರ್ಕ 10:13-16; ಲುಕ 18:15-17)
13ದಕ್ಹಾ ಜ಼ನಾ ತ್ಯುನಾ ನ್ಹಾನಾ ಬಚ್ಚಾ಼ವೊನೆ ಯೆಸುಕನ ಬಲೈಲಿನ ಐನ, ತ್ಯುನಾ ಉಪ್ಪರ ತೆ ಹತೊ ಮ್ಹೆಲಿನ ಪ್ರಾರ್ಥನಾ ಕರು ಕೈನ ಮಾಂಗಿಲಿದ್ಯಾ. ತೆನೈಸೊ ಶಿಶ್ಯಾ ತ್ಯುನೊನೆ ಭುಚ್ಕಾಡ್ಯಾ. 14ತೆನೈಸೊ ಯೆಸು, ನ್ಹಾನಾ ಬಚ್ಚಾ಼ವೊನೆ ಛೊಡೊ. ಮಕನ ಆವಾನೆ ತ್ಯುನೊನೆ ಅಡ್ಡ ಕರೊ ನಕೊ. ಕಾಕದ್ಯಾಮ ಪರಲೊಕ ರಾಜ್ಯ ಹೆವಾವೊನುಜ಼ ವ್ಹೈ ಕೈನ ಕದ್ಯೊ. 15ವರಿ ತ್ಯುನಾ ಉಪ್ಪರ ಹತ್ತ ಮ್ಹೆಲಿನ ಪಾಚ಼ಲ್ತೊ ತ್ಯಾಂತೊ ಗಯೊ.
ಸೌಕಾರ ಜಾಂಜಿಮಾನ
(ಮಾರ್ಕ 10:17-31; ಲುಕ 18:18-27)
16ಯಕ್ಕ ಮನಕ್ಹ ಯೆಸುಕನ ಐನ, ಬೊದಕ ಮಿ ಹಮೆಶಾನು ಜ಼ಲಮ ವ್ಹಂದಿಲಿವಾನೆ ಕಯು ಚೊ಼ಕು ಕಾಮ ಕರು? ಕೈನ ಪುಚ್ಯೊ. 17ಯೆಸು ತಿನೆ, ಚೊ಼ಕಾನಾಹುತಿ ಮನೆ ಶಾನೆ ಪುಚ್ಚಶಿ? ಚೊ಼ಕೊ ರ್ಹಯಲವಾಲೊ ಯಕ್ಲೊಜ಼ ವ್ಹೈ. ತೆ ಜ಼ಲಮ ವ್ಹಂದಿಲಿವ ಕೈನ ಕದ್ಯಾಮ ಕ್ಹುದಾನಿ ಆಗನ್ಯಾವೊನೆ ವಿದೆಯ ಥೈನ ಚಾ಼ಲ ಕೈನ ಕದ್ಯೊ. 18ತಿನಾಹುತಿ ತೆ, ತೆ ಕಯಾ ವ್ಹೈ? ಕೈನ ಪುಚ಼ತಾಮಾ ಯೆಸು, ನರಹತ್ಯ ಕರು ನೈ, ವ್ಯಬಿಚಾರ ಕರು ನೈ, ಚೊ಼ರಿ ಕರು ನೈ, ಸುಳ್ಳ ಸಾಕ್ಷಿ ಕೌ ನೈ. 19ತಾರಾ ಮಾ ಬಾಪನೆ ಮರ್ಯಾದಿ ದ್ಯು ವರಿ ತಾರಾ ನಿಂಗತಜ಼ ತಾರಾ ಬಾಜು಼ ರ್ಹಯಲವಾಲಾನೆ ಮಯಾ ಕರು. ಎಜ಼ ವ್ಹೈ ಕದ್ಯೊ. 20ತೆ ಜಾಂಜಿಮಾನ ಮನಕ್ಹ ತಿನೆ, "ಎ ಕ್ಹಾರಾವೊನೆ ಮಿ ವಿದೆಯ ಥೈನ ಚಾ಼ಲಿಲಿನ ಗಯೊಸ” ಹಜ಼ುನ ಮಾರಾಮಾ ಸು ಕಮಿ ವಸ? ಕೈನ ಪುಚ್ಯೊ.
21ಯೆಸು ತಿನೆ, ತು ಪರಿಪುರ್ಣ ಥಾವಾನೊ ರ್ಹಯೊಮ, ಗೈನ ತುನೆ ರ್ಹಯಲ ಕ್ಹಾರು ಇಕ್ಕಿನ, ಗರಿಬೊನೆ ದೆ, ತೆಳಾಮಾ ತುನೆ ಪರಲೊಕಮಾ ಆಸ್ತಿ ರ್ಹವಸ. ಪಾಚ಼ಲ್ತೊ ತು ಮಾರಾ ಪಾಚೊ಼ ಆ ಕೈನ ಕದ್ಯೊ. 22ತೆನೈಸೊ ತೆ ಜಾಂಜಿಮಾನ ಮನಕ್ಹ ಘನ್ನೊ ಆಸ್ತಿವಾಲೊ ರ್ಹಯಲಕ್ಹು ಎ ವಾತ ಐಕಿನ ದುಖಕ್ಹು ಗೈಪಡ್ಯೊ. 23ತೆಳಾಮಾ ಯೆಸು ತಿನಾ ಶಿಶ್ಯಾವೊನೆ, ಆಸ್ತಿ ರ್ಹಯಲವಾಲೊ ಪರಲೊಕ ರಾಜ್ಯಮಾ ಜಾ಼ವಾನು ಘನ್ನು ಕಷ್ಟ ವ್ಹೈ ಕೈನ ತುಮೊನೆ ಕ್ಹರಿಜ಼ ಕೌಸ. 24ಹಾಂ, ಮಿ ಫರಿನ ತುಮೊನೆ ಕೌಸ ಆಸ್ತಿ ರ್ಹಯಲವಾಲೊ ಕ್ಹುದಾನಿ ರಾಜ್ಯಮಾ ಜಾ಼ವಾತಿ ಹುಂಟ ಖ್ವಯಿನಾ ಡೊಳಾಮಾ ಜಾ಼ವಾನು ಆಸಾನ ವ್ಹೈ.
25ಶಿಶ್ಯಾ ಎ ಐಕಿನ ಘನ್ನಾ ಘಾಬ್ರಾ ಥೈನ, ಇಮ್ಮ ರ್ಹಯಮ ರಕ್ಷಣೆ ವ್ಹಂದಾನೆ ಕಿಕ್ಹು ಥಾವಸ? ಕೈನ ಪುಚ್ಯಾ. 26ಯೆಸು ತ್ಯುನೊನೆ ಯಕ್ಕ ಸಂವಾ ದೆಕಿನ ಎ ಮನಕ್ಹೊಕ್ಹು ಅಸಾದ್ಯ ವ್ಹೈ. ತೆನೈಸೊ ಕ್ಹುದಾನೆ ಕ್ಹಾರುಜ಼ ಸಾದ್ಯ ವ್ಹೈ ಕದ್ಯೊ. 27ತೆಳಾಮಾ ಪೆತ್ರಾ ಯೆಸುನೆ, "ಹಮೆ ಕ್ಹಾರು ಛೊಡಿನ ತಾರಾ ಪಾಚಾ಼ ಆಯಾಸ; ಇಕ್ಹು ಹಮೊನೆ ಸು ಮಳಸ? ಕೈನ ಪುಚ್ಯಾ. 28ಯೆಸು ತ್ಯುನೊನೆ, ತುಮೊನೆ ಕ್ಹರಿಜ಼ ಕೌಸ, ನಯಿ ಸೃಷ್ಟಿಮಾ ಮನಕ್ಹನೊ ದಿಕ್ರೊ ತಿನಿ ಮಹಿಮಾನಾ ಸಿಂಹಾಸನಪರ ಬೈಟತಾಮಾ, ಮಾರಾ ಪಾಚಾ಼ ಆಯಲವಾಲಾ ತುಮೆಬಿ ಬಾರಾ ಸಿಂಹಾಸನೊನಾ ಉಪ್ಪರ ಬೈಟಿನ, ಇಸ್ರಾಯೆಲನಾ ಬಾರಾ ಘರ್ದಾನೊನೆ ನ್ಯಾಯ ತಿರಿಸೊಶಿ.
29ವರಿ ಮಾರಾ ನಾಮನಾಹುತಿ ಘರೊನೆ ರ್ಹವಾದೆ, ಭಾಯೊನೆ ರ್ಹವಾದೆ, ಭೆನೊನೆ ರ್ಹವಾದೆ, ಬಾಪನೆ ರ್ಹವಾದೆ, ಮಾನೆ ರ್ಹವಾದೆ, ಬಚ಼್ಚಾವೊನೆ ರ್ಹವಾದೆ, ಜಿಮಿನನೆ ರ್ಹವಾದೆ, ಛೊಡಿಪಡಲ ಹರಯಕ್ಲೊ ಕ್ಹಾರು ಖೊ ಯಕ್ಲು ವ್ಹಂದಿಲಿವಸ. ತೆನೈಸೊ ಹಮೆಶಾನಾ ಜ಼ಲಮನೊ ಅದಿಕಾರಿ ಥಾವಸ. 30ತೆನೈಸೊ ಪೈಲಾತಾ ರ್ಹಯಲವಾಲಾ ಘನ್ನಾ ಮನಕ್ಹೊ ಲಾಸ್ಟನಾ ಥಾವಸ ವರಿ ಲಾಸ್ಟನಾ ಘನ್ನಾ ಮನಕ್ಹೊ ಪೈಲಾನಾ ಥಾವಸ.
Valgt i Øjeblikket:
ಮತ್ತಾಯ 19: Srr25
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Sikkiligar Bible © The Word for the World International and Sikkiligar Bhasha Samiti, Madhya Pradesh, 2025
