Lukas 1
1
Pamula sura'
1:1-4
1Ee, Teofilus, to mala'bihku'. Budamo tau mpengkulle-kullei tonganni nnuki' rampa'i katuoan-Na Puang Isa to mangkamo jaji lan tangnga-tangngata'. 2Ia to nauki' tau, susi bang unamo to napangpeissenan to tongkita kalenai apa to mangka jaji, mellao jio mai pamulanna. Iamo tuu lako tau mpangpangngajaran kadan-Na Puang Allataala tongkuuki'i tee. 3Ia tongkupasilolongan ngasanni tuu lako mellao jio mai pamulanna, kusanga melo ke kuukiran pole'ki' to mangrundunanna. 4Iamo kupugaukki susi joo, dikua antaissenni kumua, tongan to apa mangka tasa'ding.
Kajajianna Nabi Yahya dipangpeissenan
1:5-25
5Ia tonna Raja Herodes mangparenta jio tana Yudea, den imang jio disanga Zakharia, rapunna imang Abia. Ia to bainena disanga Elisabet, bati' imang toda ia. 6Ia to sipa'na sola dua napumasannang Puang Allataala, na naturu'i ngasan to parenta-Na na atoran-Na Puang Allataala. 7Te'da anakkana, nasaba' tamanangngi to Elisabet na matuami sola dua.
8-9Den wattu, tonna dete'mi wattunna rapunna imang Abia la mangjama, mentamami Bola Puang Allataala imang Zakharia, nasaba' nakannai undi la ntunu kamanynyang. Ia to kabiasan joo wattu, ia to carana mpattantu imang la mangjama, diundi. 10Ia tonna ntunu kamanynyang, ia to tobuda massambajang jio salean. 11Denmi malaeka'-Na Puang Allataala mpangpekitan kalena lako Zakharia. Ia joo malaeka' ke'deh jio sa'de kananna meja to dinii ntunu kamanynyang. 12Ia tonna kitami, sabakanmi namalaja' too. 13Apa mangkadai joo malaeka' nakua, “Ee, Zakharia, danggi' mumalaja'! Natarimamo Puang Allataala to passambajangmu. Ia to balimmu la njajianni mesa' pea muane, ammusangai Yahya. 14La gaja sannangko, na buda tau la mpumasannangngi to kajajianna joo pea. 15Ia joo pea, la mala'bih situru' pengkitan-Na Puang Allataala, na te'da nalamangngiso' anggoro' ba'tu nniso' to makarrahna. Mangpamula nakeba'tangan indona nakuasai tarruhhi Roh Allataala. 16Buda to-Israel la napapole lako Puang Allataala, Puangna. 17Na la menjaji pesuro matappa'-Na Puang Allataala, na dipakuasa susi Nabi Elia. La napasikalinoi to ambe' na anakkana. Na ia to totangkainawa naajahhi mangtangngah susi tomelo penawa. Susimo joo napasadiai to tau ntarima Puang.”
18Mangkadami Zakharia lako joo malaeka' nakua, “Umbo la kukua nnissenni kumua la jaji susi joo? Sanga matuamo', na ia to balingku' matua todamo.” 19Mebalimi joo malaeka' nakua, “Aku'mo tee Jibrail, pesuro matappa'-Na Puang Allataala, disua mpauanko tee kareba kamarioan. 20Apa ia to kupauanko la jaji ke wattunnami. La mamangko sajajinna joo, sanga te'da mukatappa'i.”
21Ia to tobuda ntajan bangmo Zakharia jio salean. Takkajanna' tuu lako tau, sanga gaja sainmi lan Bola Puang Allataala. 22Na ia tonna messunmo Zakharia, tangnaissenmi mangkada. Mangkada tomamang bangmira lako tau, sanga mamangmi. Ta'pa naissenmi tobuda kumua mangkami ngkita pengkita makalaen-laen lan Bola Puang Allataala.
23Ia tonna puramo to wattu mangjama lan Bola Puang Allataala, polemi Zakharia lako bolana. 24Te'da namasai mangkanna joo, keba'tangmi Elisabet balinna, anna torro bang membuni jio bolana limang bulan. 25Mangkadami nakua, “Iamo tee pangtulung-Na Puang Allataala lako kaleku', nata'dei to siri'ku'.”
Kajajian-Na Puang Isa dipangpeissenan
1:26-38
26Ia tonna annanmo bulanna keba'tang Elisabet, nasuami Puang Allataala to malaeka' Jibrail male lako kota Nazaret, mesa' kota jio tana Galilea, 27lako mesa' ana'dara disanga Maryam, to dipasitangka'mo Yusuf, bati'na Raja Daud. 28Ia tonna ratumo lako, mangbere sallangmi nakua, “Salama', nabarakka'imoko Puang Allataala narande pala'ko.”
29Sabakanni Maryam ssa'dingngi joo kadanna, natangngah-tangngahhi lan penawanna kumua apa battuananna joo passalama'. 30Mangkadami joo malaeka' nakua, “Maryam, danggi' mumalaja', nasaba' napumasannangko Puang Allataala. 31La keba'tangko ammujajian mesa' pea muane, na la musangaii Isa. 32La mala'bihhi joo pea nadisanga Anak Allataala jao majaona. La naangka'i Puang Allataala menjaji Raja susi Raja Daud, tojolona. 33Na la mparenta bati'na Yakub. Na ia to kadatuan-Na te'da cappa'na.”
34Mangkadami Maryam nakua, “Umbo nakua la jaji tuu, na ana'dara unapa'?” 35Mebalimi joo malaeka' nakua, “Roh Allataala la rratuiko na kuasan-Na Puang Allataala la torro ssolanko. Iamo joo namala'bih joo pea la jaji nadisanga Anak Allataala. 36Parallu muissen, Elisabet to rapummu, annanmi bulanna keba'tang, moiraka nakua ngasanmo to tau tamanangngi, sanga matuami. 37Te'da to apa tanglajaji napugauk Puang Allataala!”
38Mangkadami Maryam nakua, “Ia tee aku' kaunannana' Puang Allataala. Ake'mo najaji lako kaleku', susi tuu mupau.” Mangkai joo too ta'demi joo malaeka'.
Maryam male ssikitan Elisabet
1:39-45
39Mangkai joo too malemi Maryam lako mesa' kota jio padang membuntunna tana Yudea. 40Ia tonna ratumo lako, mentamami bolana Zakharia, namangbere sallang lako Elisabet. 41Ia tonna sa'dingmi Elisabet to passalama'na Maryam, nakuasaii Roh Allataala, nata'pa pundiu to tau lan ba'tangna, 42anna gumalasi Elisabet nakua, “Ee, ikomo baine to kaminang dibarakka'i to sininna baine! Dibarakka'i tooi tuu tau la mujajian! 43Indara' tee, anna ratura indo-Na Puangku' ssikitanna'? 44Kusa'dingna passalama'mu, pundiumi to tau lan ba'tangku', sanga kamarioanna. 45Masannangko iko, nasaba' mukatappa'i kumua la jaji to apa napauanko Puang Allataala.”
Maryam mpakala'bih Puang Allataala
1:46-56
46Mangkadami Maryam nakua,
“Kupakala'bih to Puang Allataala,
47na mariona',
nasaba' Puang Allataala mpasalama'na'.
48Naingaranna' dikka' aku' tokai'da'-i'da'!
Mammula tee too nakua sininna tau
kumua masannangna'.
49Nasaba' Puang Allataala to makuasa
mpupenjaji tauna'.
Dipakala'bih sangan-Na!
50Napangpekitanmi to kamamasean-Na
lako mangpapa'-papa' bati' to ngkasiri'i.
51Napangpekitanmi to kuasan-Na,
Napasisarambui to tomajao penawanna,
na tangjaji to pangtangngaranna.
52Napamajiong to raja, anna te'damo namangparenta,
Napaendek tuka'i to tokai'da'-i'da'.
53Nabenni to totangbarah na sabarahna,
na ia to tosugih nasua pole mangpala' lo'bang.
54Natulungmiki' to to-Israel, taun-Na,
situru' basse-Na lako tojolota'.
55Naingaran bang Puang to basse-Na,
mpangpekitan tarruh kamamasean-Na lako Nabi Ibrahim
na lako sininna bati'na.”
56Torromi Maryam jio bolana Elisabet agi-agi tallung bulan, namane' pole lako bolana.
Kajajianna Nabi Yahya
1:57-66
57Nadete'mi allo kakeanakanna Elisabet, njajianmi pea muane. 58Ia tonna sa'ding ngasanmi bali bolana sola rapunna to kamamasean-Na Puang Allataala, mariomi sola Elisabet.
59Ia tonna karuamo allona jajinna joo pea, ratumi to tau la ssunna'i, nalassangaii Zakharia, susi sanganna ambe'na. 60Apa mangkadai to indona nakua, “Tangngia! La disanga ia Yahya.” 61Mangkadami tuu lako tau nakua, “Te'da rapummi mpusangai joo sanga.” 62Iamo joo nabenni tau tanda to ambe'na, ngkutanai apara la disanganni joo anakkana. 63Mpeta'dami batu dinii mangnguki' nauki'i, “La disangai Yahya.” Jangngah ngasanmi to tau. 64Ta'pa mangkadami ambe'na mpakala'bih Puang Allataala. 65Malaja' ngasanmi to bali bolana, na ia ngasan tau ncuritai joo kareba jio sininna membuntunna tana Yudea. 66Padami tossa'dingngi, mangpikkiri'i nakua, “Ba'tu la umbo ia susinna joo pea keanu'?” Nasaba' pajan, kumua narande pala'i Puang Allataala.
Zakharia mpakala'bih Puang Allataala
1:67-80
67Nakuasaii Roh Allataala joo ambe'na Nabi Yahya napaui to pepasan-Na Puang Allataala nakua,
68“Tapakala'bihhi to Puang Allataala,
Puangta' kita' to-Israel,
sanga ratumi ntulungki'
anna la'bakki'.
69Nabenmiki' Tomangpasalama' to makuasa,
bati'na Raja Daud, taun-Na.
70Susi to pura napau Puang Allataala tonna anu',
napatarruhhi nabin-Na to pura napilei kumua,
71la napasalama'ki' jio mai ewalinta',
na jio mai kuasanna to tongkaba'ciki'.
72Nampangpekitanmo kamamasean-Na lako tojolota',
naingaranmi to basse mala'bih-Na.
73-74Massapahmo lako Nabi Ibrahim, ambe' tojolota',
kumua la napasalama'ki' jio mai ewalinta',
anna te'damo tamalaja' ssompai,
75antapangben kaleta' lako Puang,
napumasannangngi penawan-Na,
padapi tanii tuo.
76Ee anakku', la disangako
nabin-Na Puang, to Puang Allataala makuasa.
Disuako njoloan Puang,
la mpasadianni lalan naola,
77la mpangpeissenanni lako umma'-Na,
kumua la dipasalama'mi,
ke nadampanganmi Puang Allataala.
78Mamase na manana' Puangta'.
Ratumi la mpasalama'ki'.
Susi to allo ollong
ke makale'
79la nnarrangngi sininna tau,
to tuo lan kamalillinan na kamalajatan.
Napatujuki' lako lalan
to nanii kasikalinoan.”
80Samatonggo-tonggona na saendek-endekkena toomi sumanga'na tee anakkana Zakharia. Torromi jio padang pallawangan, sanadete'na wattunna mpangpekitan kalena lako to-Israel.
Valgt i Øjeblikket:
Lukas 1: mvpAD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© Wycliffe Bible Translators, Inc. All rights reserved.
