रोमी 3
3
यहूदी तान्या ओलेखा ल्यो ज़
1जे ते, ‘हो ची ताकिन्दा, गे यहूदी गेताव स़ोनो क्याल्न्या सरेस गेजैसिउ अऩाकलाव ज़ ची ओल्यो’ है जेलिज़्याखेहो। 2अऩाकलाव ते माले, ओलेखा ल्यो ज़ लिज़्या। प़ाइँरानी उस॰कताव आव ज़ — परमेस्वरए ओपाँर यहूदीराए यापासल ज़ नैक्यो। 3नोर नो य़ाकाए ओसतत यामालिदी ब, यायुँ ओमाहुप्दी ब परमेस्वरलाई असतलाव माजैधुर। 4मानुवाताव मिँ भरी ओपो·स ज़ असतलावर याथ॰रिदी ब, परमेस्वर ते सतलाव ज़ थ॰रिन्या ले। धर्मसास्त्रल मनी परमेस्वरए उजूँनी इताव सर्सिउ लिज़्या,
“नपाँ भरिल नँ ज़ साचो थ॰रिन्या नले।
नपाँलाई याफाल्दी ब नँ ज़ झेंःन्या नले।”#भज ५१:४
5ख्वा ख्वाराए ते मिँराए बिचार मितावनी है लिज़्याखेरहो, “माचाव गेय़ेननी परमेस्वरए ओय़ेन झन ज़ ओसत ल्यो ओरैंःकिन कातानी गेलाई नो य़ेनत सजा ओयासिरिज़्याव?” 6निताव ते माताए। परमेस्वरए ननी ज़ अन्याय ओदोव उथ॰रिकिन, कै जैद आव मानुवाताव मिँरालाई याफालोके? 7ख्वा ख्वाराए फरी, “काता, गे माचाव गेय़ेनत परमेस्वरए उमिन झन ज़ ओघ्योःकिन काराव गेलाई पापी ओथ·रैसिज़्याव? 8हिताव ताकिन चाव घताक लिद प़ाइँए पाप ज़ गेदोया,” है लिज़्याखेरहो। हिताव ते माताए। गेमिन बले·द्याव पैंज़्याव ख्वा ख्वाराए ते झन हो ज़ थ·रैद्यासिज़्यार। नितावराए सजा दैन्या ते थिक ज़।
परमेस्वरए ओङ़ाक सु ज़ धर्मी माथ॰रिए
9है जैद गे यहूदीर छुत जातलाव मिँराकिन चावर गेमाले। ङा है ङादाचिज़्याव मिताव यहूदीर तादी ब, छुत जातलावर तादी ब प़ाइँ पापल ज़ लिज़्यार। 10धर्मसास्त्रल मनी इताव सर्सिउ लिज़्या,
“परमेस्वरए ओङ़ाक धर्मी तोबो ब माले।
11परमेस्वरए ओपाँ तीज़्याव ब सु ज़ माले।
परमेस्वरलाई खिम्ज़्याव ब सु ज़ माले।
12प़ाइँ तँदा बाद काम मालागिउर ताद लेर।
चाव य़ेन दाज़्यावर तोबो ब मालेर।”#भज १४:१-३; ५३:१-३
13“नोराए याभोंकोरा घ्वाँःव खादर स्यासो लिज़्या।
यापाँ ब धुत वाज़ लिज़्या।”
“यायाःत घुलए ओधास स्यासो लिज़्या।”#भज ५:९; १४०:३
14“यायाःनी हुज़्याव भरी गाल स़ोनो सराप वाज़ लिज़्या।”#भज १०:७
15“मिँ सैःन्यादा याखँ बनै गिल्ज़्या।
16जोङ बाद ब दुख यान्या वाज़ सैंज़्यार।
17छुतस खैन्या येमदा खर्क ज़ माबार।”#यसै ५९:७-८
18“परमेस्वरलाई रँःद ब माछे·र।” #भज ३६:१
19जे ज़ जेसैंज़्या, जो कानुन तादी ब कानुन मादैवराए जूँनी ते माले, दैवराए जूँनी ज़ लिज़्या। है जैद मानुवाताव मिँ भरी परमेस्वरए ओङ़ाक पाँन्या येम ज़ माले, ओपो·स ज़ परमेस्वरए ओसजा दैन्यार ताद लेर। 20कानुनलाव य़ेन दाद परमेस्वरए ओङ़ाक सु ज़ धर्मी थ॰रिन्या मालेर। नो कानुनए ओय़ेन ते गेपाप सतैंद्यान्या लिज़्या।#भज १४३:२
परमेस्वरए ओङ़ाक खत माल्यो थ॰रिन्या
21गे मिँरालाई परमेस्वरए ओङ़ाक गेखत माल्यो धर्मी थ॰रिन्या साःरो येम सतैंसिउ लिज़्या। हो येम कानुनलाव य़ेन दान्यानी माःक। हैदी ब नो येम ङ़ादाकिन ज़ मोसाए ओकानुन स़ोनो अगमबक्ताराए यासरो भरिल सतैंसिउ लिज़्या। 22नो येम आव ज़ — जोए येसु ख्रीसलाई उयुँ हुप्ज़्या, नो उयुँ उसुहुबोनी ज़ परमेस्वरए ओङ़ाक धर्मी थ॰रिज़्या। है जैद यहूदीरालाई तादी ब, छुत जातलावरालाई तादी ब, हुनी वाज़ लिज़्या। 23काराव ल्यो ताकिन प़ाइँए ज़ पाप दाद परमेस्वरए ओज़गैनी अछत ताकेर। 24है जैद परमेस्वरए उयुँ गराँद मिँरालाई ओज़ा येसु ख्रीसनी ओलस सखैन्याए जूँनी यासजानी अइज़ यापले·क्यो। 25ओज़ाए ओक्याँत यायुँ हुप्ज़्यावरालाई ओल परमेस्वरए ज़ यासजा भरी नोए उझीनी ज़ क्याल्द याएज़्याव। परमेस्वरए ओन्याय सतैंन्याए जूँनी येसु ख्रीस ओमाहुदकाव यादोव पाप भरी सहिद्याद ओज़ाए ओक्याँत ज़ सयो·द याएक्यो। 26आज्याल मनी ओज़ा येसुलाई यायुँ हुप्ज़्यावरालाई हुनी ज़ यासखैज़्याव। परमेस्वरए न्यायस ज़ ओराफाल्ज़्याव मनी ननी ज़ रैंःज़्या।
27है जैद मिँराए, ‘ङा ङादोव य़ेननी ज़ परमेस्वरए ओङ़ाक धर्मी ङाथ॰रिके’ है लिद मास॰धुर, युँ हुप्न्यानी वाज़ धर्मी तान्या ताज़्या। 28कानुनलाव य़ेननी परमेस्वरए ओङ़ाक सु ज़ माथ॰रिधुर, युँ हुप्न्यानी वाज़ परमेस्वरए ओङ़ाक कानुन सयो·सिउ थ॰रिज़्या। 29परमेस्वर काता यहूदीराए यापरमेस्वर वाज़ रो? छुत जातलावराए यापरमेस्वर माःक रो? नो छुत जातलावराए यापरमेस्वर पाला ज़ सानी। 30परमेस्वर तोबोका तोबो वाज़ ओतावए, नो परमेस्वर यहूदीराए यापरमेस्वर वाज़ माःक, प़ाइँए यापरमेस्वर ज़ लिज़्या। है जैद यहूदीर तादी ब, छुत जातलावर तादी ब परमेस्वरए मिँरालाई उयुँलाव मिताव धर्मी ओरारँःज़्याव तोबोनी वाज़ — नो येसुलाई युँ हुप्न्यानी वाज़ लिज़्या।#ब्य ६:४ 31है जैद परमेस्वरए ओङ़ाक धर्मी थ॰रिन्या येम युँ सुहुप्न्यानी वाज़ ओताकिन ‘कानुन ते अऩाकलाव ची ओल्यो’ है जेलिज़्याखेहो। हिताव ते माःक, बुरू गेयुँ गेसुहुबोनी परमेस्वरए ओकानुन झन ज़ गेसयो·ज़्या।
Valgt i Øjeblikket:
रोमी 3: NKham
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2015, Wycliffe Bible Translators, Inc. All rights reserved.